Жуырда Қазақстан мұсылмандары діни басқармасының бастамасымен қолға алынған "Мектепке жол" акциясы Арқалық қаласында жалғасын тапты.

Жергілікті "Мухтасиб Әлмұхаммед" мешітінде осындай қайырымдылық шарасы ұйымдастырылды. Жамағаттардан жиналған 200 мың теңгеге жаңа оқу жылы қарсаңында қыз және ер балаларға 40 оқу құралдары берілді.

Оқушылардың ата-аналары Бас имам Нұрхан Асанұлына шын жүректен шыққан шынайы алғыстарын жеткізді.

Қостанай облыстық мешітінің баспасөз қызметі

Белгілі дін қайраткері Шоқан қажы Әмірханов басқаратын Қостанай қалалық "Жайлаубай ата" мешіті және елге танымал "Большевичка" тігін фабрикасының ұжымдары бірігіп "Мектепке жол"акциясын өткізді.

Онда көп балалы отбасыларында тәрбиеленіп жатқан 20 оқушыға құны 360 мың теңгені құрайтын мектеп киімдері сыйға тартылды.

Жиын соңында жас бүлдіршіндерге ақ бата беріліп, жаңа оқу жылында толағай табысқа жетулеріне тілектес білдірілді.

Қостанай облыстық мешітінің баспасөз қызметі

Жылдағы қалыптасқан дәстүр бойынша Қостанай өнірінде де көмекке мұқтаж отбасыларында тәрбиеленіп жатқан ұл мен қыздарға Қазақстан мұсылмандары діни басқармасының бастамасы бойынша қайырымдылық акциясы өткізілуде.

Осы жуырда ғана облыстық «Аймағанбет қажы Спанұлы» мешітінде аталмыш акция қолға алынды. Бас имам Бектұрсын қажы Торғайбайұлы жиында сөз алды. Жиналған балаларға ең ізгі тілегін білдіре келіп, жаңа оқу жылында пайдаланатын сөмке мен құрал-жабдықтарды тапсырды. Сонымен қатар бірнеше көп балалы отбасыларға киім-кешек берілді.

Оның алдында ғана облыс орталығындағы «Жайлаубай ата» және «Марал ишан» мешіттерінде де қолдауға зәру балаларға жоғарыдағы «Мектепке жол» акциясына байланысты балаларға оқу барысында пайдаланатын құрал-жабдықтар тапсырылған-ды.

Жалпы, облыстағы қалалық және аудандық мешіттерде 1000 ұл мен қыздарға қайырымдылық акциясы барысында көмек көрсетіліп, ата-аналардың алғысына бөленді.

Биыл да біз еліміздің болашағы болып табылатын оқушыларға қол ұшын беріп, қуанышқа кенелттік. Олардың жүзінен бақыттың ұшқынын көрудің өзі де бір ғанибет емес пе? Балдырғандарға осындай мүмкіндік тудырған күллі әріптестерім мен демеушілерге ризашылығымды білдіремін. Оларға Алланың нұры жауа берсін, дейді облыстың бас имамы Бектұрсын Уалиев.

Қостанай облыстық мешітінің баспасөз қызметі

Қостанай облысының жаңадан тағайындалған Бас имамы Бектұрсын Торғайбайұлы өзінің іс сапарын кеншілер қаласы Рудныйдан бастады.

Ол жергілікті "Нұр" мешітіне ат басын бұрып, жамағатпен жүздесті. Имандылық ордасында бесін намазын өткізіп, жиналғандарға ой салар тағылымды пікірлерін айтты. Сондай-ақ мешіттің тыныс-тіршілігімен танысты.

Осындағы атқарылып жатқан жөндеу жұмыстарын көзбен көріп, біраз жайларға қанықты. Онымен бірге облыстық мешіттің найб имамы Әлішер Ертайұлы болды.

Қостанай облысының жаңадан тағайындалған Бас имамы Бектұрсын Уәлиев мешітте кезекті кездесуін өткізді. Бұл жолы өңірдегі беделді бұқаралық ақпарат құралдарының өкілдерімен көкейтесті мәселелерді қозғады.

Ол ең алдымен журналистер қауымының халық пен биліктің арасындағы алтын көпір болып отырғандығына тоқтала келіп, алдағы уақытта да олардың еліміздің жарқын болашағы үшін адал қызмет ете беретіндігіне үлкен сенім білдірді.

Өзінің жаңа қызметінде де жергілікті телеарналар мен басылымдармен тығыз байланыста жұмыс істеп, ислам дінін өркендету жолында аянбай тер төге беретіндігін айтты.

Сондай-ақ көпті толғандырып жүрген діни рәсімдерде (Жаназа шығару, жылдық аста) ысырапшылдыққа жол бермеу және басқа да кездерде қарапайым жұртшылықтың жағдайын ескеру хақындағы тың ойларын ортаға салды.

Кездесу барысында «Қазақстан-Қостанай» телеарнасының басшысы Ербол Ипбергенов, облыстық «Қостанай таңы» газеті бас редакторының орынбасары Асылан Қанғожин және «Алау» телеарнасы қазақ редакциясының қызметкері Асылан Ермекбай өздерінің құнды ұсыныстарын білдірді.

Жүздесу өте әсерлі өтті. Оған облыстық мешіттің наиб имамдары Әлішер Ертайұлы мен Бақытжан Икрам қатысты.

Қостанай облыстық мешітінің баспасөз қызметі

Баршаға мәлім, Қазақстан мұсылмандары діни басқармасының төрағасы, Бас мүфти Наурызбай қажы Тағанұлы осы жылды «Ислам және дәстүр құндылығы» деп жариялаған болатын. Содан бері еліміздің өңірлерінде қаншама жұртшылықпен жүздесулер өткізіліп жатыр.

Қостанай облыстық «Аймағанбет қажы Спанұлы» мешітінің Бас имамы болып тағайындалған Бектұрсын қажы Торғайбайұлы өңірімізде ислам дінін өркендетуге лайықты үлесін қосып жүрген, бірқатар аудандық және қалалық мешіттерді басқарған дін қайраткері.

Ол жаңа лауазымдағы жұмысын өмір көрген, тәжірибесі мол, елдің қазынасы болып табылатын аға ұрпақ өкілдерінің басын қосып, олармен «Аталар сөзі – ақылдың көзі» тақырыбындағы мәнді де мағыналы кездесуден бастады.

Бұл жүздесуге облыстық ардагерлер кеңесінің төрағасы Батырбек Ахметов бастаған ел ағалары, қоғам қайраткерлері, зиялы қауым өкілдері арнайы шақырылды.

Осынау қалың жұртшылыққа танымдық – тағылымдық жағынан берері мол басқосуды найб имам Әлішер Ертайұлы жүргізді. Алдымен Бектұрсын қажы қатысушыларға жиынның алға қойған мақсатын түсіндірді. Өзінің қызметінде әрқашан да бүкіл саналы ғұмырын еліміздің дамуына қомақты үлес қосқан ардақты ардагерлердің ақыл-кеңесін басшылыққа алып отыратындығын жеткізді.

Содан кейін сөз алған Батырбек Мықансалықұлы Бектұрсын Уәлиевті жаңа қызметімен шын жүректен құттықтай отырып, облыстың өндіріс пен ауылшаруашылығын өркендетудегі табыстарына қысқаша шолу жасады. Өзі жетекшілік ететін ұйымның мүшелері әрдайым мешіт қызметкерлерін қолдауға дайын екендігін білдірді.

Ал, жерлестерімізге қайраткер тұлға, ғалым ретінде белгілі Есімхан Махметов діннің мұсылман бауырларымызды имандылыққа ұйытатын қасиетті орын екендігін, аталмыш мешіттегі өз саласы бойынша аянбай тер төгіп жүрген Бақытжан Икрам және басқа да қызметкерлердің есімін атады. Бас имамға алдағы уақытта табыс тіледі.

Сондай-ақ, Ахмет Байтұрсынов атындағы Қостанай өңірлік университетінің профессоры Қалқаман Жақып, Қазақстанның Еңбек Ері Сайран Бұқанов, Қазақстан Жазушылар Одағының облыстағы өкілі, қаламгер Жанұзақ Аязбеков, абыз ақсақал Жандарбек Сейітов, елге танымал азамат Төлеген Шоланов және басқалар өздерін көптен бері толғандырған ой-пікірлерін ортаға салды.

Одан кейін мешіт асханасында жайылған дастархан басында ардагерлердің маңызды әңгімелері жалғасын тапты. Онда халық құрметіне бөленген Торғайбай Уәлиев, Жақсылық Кәкенов және өзге де қадірменді ақсақалдар ұлағатты сөздерімен жиналғандарды баурады.

Жалпы, басқосуда жастардың үлкендерді сыйлауы, ұлттық құндылықтар мен ислам дінін ұлықтауы, діни рәсімдерді бір ізге келтіру, ұрпақтың ана тілінде сөйлеуі, ауылдық жерлерге де сауатты дін қызметкерлерін тарту және өзге де жұртышылықты ойландыратын өзекті жайлар қамтылды.

Кезесудің соңында Бас имам ел ардақтылары мен өмір белестерінен өткен барша ақсақалдарға шын жүректен шыққан алғысын білдіріп, оларға болашақта мықты денсаулық тіледі.

Қостанай облыстық мешітінің баспасөз қызметі

Жуырда Қазақстан мұсылмандары діни басқармасының төрағасы, Бас мүфти Наурызбай қажы Тағанұлының бұйрығымен Қостанай облысындағы өкілдіктің және облыстық «Аймағанбет қажы Спанұлы» мешітінің Бас имамы болып Уәлиев Бектұрсын Торғайбайұлы тағайындалғаны белгілі.

Ол бұған дейін Қостанай қалалық «Марал ишан» мешітін басқарып, талай әріптестеріне өнеге боларлық жұмыстар атқарғаны жұртшылыққа аян. Дін саласында жинақтаған бай тәжірибесі жерлестерімізге жақсы таныс.

Жаңа жауапты қызметке кіріскен өкіл имам өңірдегі қалалар мен аудандардың бас имамдарымен арнайы кездесуінде алда тұрған келелі міндеттерге жан-жақты тоқталды.

Сондай-ақ ол аталмыш мешіттің тыныс-тіршілігімен жан-жақты танысып, көзбен көріп, көңілге түйгенін ортаға салды.

Қостанай облыстық мешітінің баспасөз қызметі

Бүгін Қостанай облыстық «Аймағанбет қажы Спанұлы» мешітінде өңірдегі қала және аудандардың бас имамдары бас қосқан жиын болып өтті.

Оған Қазақстан мұсылмандары діни басқармасының Төрағасы, Бас мүфти Наурызбай қажы Тағанұлының арнайы тапсырмасы бойынша іс сапармен келген ҚМДБ-ның «Уағыз насихат» бөлімінің меңгерушісі Батыржан Берденұлы Мансұров қатысты.

Ол мүфти хазреттің бұйрығы бойынша жаңадан тағайындалған Қостанай облысының Бас имамы лауазымына Уалиев Бектұрсын Торғайбайұлын таныстырды.

Осы шараға қатысқан Қостанай облыстық Дін істер басқармасының басшысы Қалмақов Ерлан Болатұлы жаңадан тағайындалған Бас имамға ізгі тілегін білдіріп, жауапты қызметінде абырой тіледі.

Қостанай облыстық мешітінің баспасөз қызметі

Жақында Қостанай облысының Бас имамы Бахытбек қажы Тәжімбет және Рудный қалалық «Нұр» мешітінің Бас имамы Сабыржан Есмурзин Тобыл қаласында болды.

Олар аудандық «Маңдай батыр» мешітінде жастармен кездесу өткізді. Онда қазіргі таңда қоғамдағы өзекті мәселе лудомания яғни құмар ойындарының тигізетін зардабы және оның алдын алу жөнінде уағыз-насихат айтты. Жүздесу қазақ және орыс тілдерінде жүргізілді.

Жиналған өскелең ұрпақ өкілдері дін қайраткерлерінің маңызды да мәнді әңгімелерін ұйып тыңдап, өздерінің алғыстарын білдірді.

Кездесу соңында аудандық мешіттің Бас имамы Дархан қажы Сыздықов әріптестеріне шын жүректен шыққан шынайы лебізін жеткізіп, мықты денсаулық, жауапты қызметтерінде табыс тіледі.

Қостанай облыстық мешітінің баспасөз қызметі

Бұл күндері Мұртаза Балахметті еліміздің жұртшылығы жақсы біледі. Ол белгілі дін қайраткері Ертай Исламұлының болашағынан үміт күткен дарынды перзенттерінің бірі.

Жас та болса республикалық бас мешіттің ұстазы әрі қари. Жуырда Қостанай облыстық «Аймағанбет қажы Спанұлы» мешітінің арнайы шақыруы бойынша өңірдегі имамдарға "Құран және Тәджуид ережелері" бойынша семинар өткізді.

Жиналғандар Мұртаза Ертайұлының терең біліміне тәнті болып, өздерінің көкейінде жүрген сауалдарына нақты жауап алды. Енді олар семинардан түйгендерін күнделікті қызметтерінде басшылыққа алатын болады.

Қостанай облыстық мешітінің баспасөз қызметі