Дүниеден өткен кісіге құрмет көрсету тіріге міндет екені белгілі. Сондықтан жерленген ата-баба, әке-шеше, бауырларымыздың қабірін аяқ асты етпеу бәріміздің де парызымыз.

Өңірімізде көктем және күз уақыттарында бейіттердің басын тазарту дәстүрге айналып, жалғасын табуда.

Жуырда ғана Қостанай ауданына қарасты Талапкер елді-мекені мен облыс орталығымен іргелес жатқан Қонай ауылындағы зираттарда тазарту жұмыстары жүргізілді. Оған Тобыл мен Қостанай шаһарындағы мешіттердің имамдары, сол маңдағы тұрғындар мен жамағаттар белсене атсалысты. Уақытпен санаспай жұмыс істеп, өздерінің лайықты үлестерін қосты.

Осы арада зираттардағы жиналған қоқыстарды тасымалдауға «АБЗ плюс» жауапкершілігі шектеулі серіктестігінің директоры Николай Лобанов екі Камаз көлігі мен бір трактор бөліп, азаматтық танытты. Оның қарамағындағы бір топ қызметкерлер аянып қалған жоқ.

Жалпы аудандар мен қалалардағы мұсылман зираттарының маңайын тазалап отыру әрбір саналы азамат үшін сауабы мол іс. Бұл орайда аға ұрпақ өкілдері еліміздің болашағы болып табылатын жастарға өнеге-үлгі көрсетіп жатса құба-құп.

Қостанай облыстық мешітінің баспасөз қызметі

Бүгін Қостанай аудандық «Маңдай батыр» мешітінде аудан және ауылдардағы дін қызметкерлеріне арналған жиын өтті.

Бас имам Дархан Манарбекұлы сөз алып, облыстық «Аймағанбет қажы Спанұлы» мешітіндегі басқосуда көтерілген мәселелерге жан-жақты тоқталды.

Онда алдағы уақытта барша мешіттер мен намазханаларда еңбек тәртібі мен тазалықты сақтауға айрықша көңіл бөлу, әрбір қызметкердің өз міндетіне деген жауапкершілігін арттыру, халыққа қызмет көрсету сапасын бүгінгі уақыт талабына сай жақсарту жөнінде айтылды.

Қостанай облыстық мешітінің баспасөз қызметі

Лисаков қаласының мәдениет және спорт орталығының спорт залында осы шаһардағы діни бірлестіктердің арасында футболдан турнир өткізілді.

Аталмыш іс-шараны «Таза Қазақстан» республикалық бағдарламасы аясында Лисаков қалалық ішкі саясат бөлімінің қызметкерлері ұйымдастырды. Онда жүлделі І және ІІ орындарды жергілікті «Әбдіхаим Саламатұлы» мешітінің командалары, ІІІ орынды «Христианский семейный центр» шіркеуінің командасы иеленді.

Олардан басқа турнирге Православие, Жатва және «Новый Завет» шіркеулерінің ойыншылары да қатысты. Жарыс алғаш рет өткізілсе де, қатысушылар мен жанкүйерлерге ұмытылмас әсер қалдырды.

Осынау іс-шараның негізгі мақсаты - түрлі діндерді ұстанатын адамдардың арасындағы достық қарым-қатынас пен ынтымақты нығайту еді.

Қостанай облыстық мешітінің баспасөз қызметі

Республикалық ақпараттық тобының мүшесі Нұрсұлтан Мамедалиев арнайы іс-сапармен Қостанай өңірінде болды. Ол осы сапар барысында алдымен қалалық «Марал ишан» мешітінде жергілікті жамағатпен кездесті.

Білікті маман бұл жүздесуде діни ілімнің маңызы жайлы уағыз айтты. Жұртшылық тарапынан қойылған сауалдарға тұшымды жауап берді.

Сондай-ақ облыстық «Аймағанбет қажы Спанұлы» мешітіндегі жұма намазына қатысып, «Исламның тірегі болған төрт хадис» тақырыбында насихат айтты.

Жиналған жұртшылық мазмұнды уағызды зейін қоя тыңдап, өздерінің шынайы ризашылықтарын білдірді.

Қостанай облыстық мешітінің баспасөз қызметі.

Қазақстан мұсылмандары діни басқармасы Жастар ісі секторының ұйымдастыруымен Республикалық бас мешітте «DINTELLECT» интеллектуалды білім сайысы өткені белгілі.

Осы жарыста Қостанай облысынан наиб имам Әлішер Ертайұлы бастап барған команда терең білім көрсетіп, жүлделі үшінші орынды жеңіп алып, ҚМДБ Төрағасы, Бас мүфти Наурызбай қажы Тағанұлының атынан марапатқа ие болды.

Сөйтіп, олар өңіріміздің абырой-беделін асқақтатты. Жерлестерімізді осы жетістіктерімен шың жүректен құттықтаймыз.

Қостанай облыстық мешітінің баспасөз қызметі.

ҚМДБ-ның жанындағы «QAMQOR-SHARAPAТ» салттық қызмет көрсету орталығының бастамасымен елімізде бүгінгі заман талабына сай қыруар жұмыстар атқарылып, аймақтарда түсінік жұмыстары жүргізілуде.

Осы сөзіміздің нақты дәлелі ретінде жуырда аталған орталықтың директоры Мейрамбек Қабылбекұлы Рсымов Қостанай өңіріне арнайы іс-сапармен келді. Ол жергілікті «Аймағанбет қажы Спанұлы» мешітінде облыстың аудандары мен қалаларының бас имамдарымен семинар өткізді.

Жиынға облыстың Бас имамы Бектұрсын Торғайбайұлы, облыстық дін істері басқармасының басшысы Ерлан Қалмақов, Қостанай қалалық әкімдіктің цифрландыру бөлімінің және осы саланың білікті мамандары қатысты.

Мейрамбек Қабылбекұлы «Зират және зиярат мәдениеті» туралы маңызды құжатты басшылыққа ала отырып, зираттарды цифрландыруға байланысты нақты мысалдар келтірді. Осы маңызды жұмысты бір ізділікке түсіру жайлы жан-жақты баяндады.

Оның айтуына қарағанда, зираттарды цифрландыру жұмыстары алдымен қалалық жерлерде, келесі жылдан бастап аудан мен ауылдарда қолға алынбақ.

Семинар барысында имамдар тарапынан сауалдар қойылып оған нақты жауаптар берілді.

Қостанай облыстық мешітінің баспасөз қызметі.

Жұртшылық Республикалық ақпараттық насихат тобының мүшелері еліміздегі аймақтарда болып, ислам дінін өркендетуге лайықты үлесін қосып келе жатқандықтарынан хабардар.

Міне, солардың бірі – ақида (сенім мәселесі) тақырыбын жан-жақты зерттеп жүрген айтулы маман Нұрсұлтан Мамедалиев. Ол Тобыл-Торғай өңіріне арнайы келген іс-сапарында аудан және қалалардың бас имамдарына дәріс оқыды.

Дәріс барысында өзі жетік білетін ақида іліміне қатысты мәселелерді қозғады. Мәселен, бұл күндері көпшілікті толғандырып отырған теріс ағымдардың алдын-алу, одан жастарды сақтандыру бағытында егжей-тегжейлі түсіндірді.

Қостанай облыстық мешітінің баспасөз қызметі.

Жақында Қостанай облыстық «Аймағанбет қажы Спанұлы» мешітінде өңірдегі аудан және қала имамдарының қатысуымен «Имамның тұлғалық келбеті деп аталатын семинар» өткізілді.

Онда бүгінгі таңдағы маңызды әрі әрбір имандылық ордасындағы имамдардың заман талабына сай қызметтік міндеттерін айқындайтын «Имамның тұлғалық келбеті» тақырыбы өзек болды.

Алдымен наиб имам Бақытжан Икрам ҚМДБ-ның имамдар форумында қабылданған «Имамның тұлғалық келбеті» құжатын басшылыққа ала отырып, оларға тән көркем-мінез, адалдық, жауапкершілік және басқа да қасиеттер жайлы сөз етті.

Сонымен қатар семинар одан әрі жалғасып, облыстағы білікті жас мамандардың бірі, Алтынсарин аудандық «Алдиярұлы Жанұзақ» мешітінің бас имамы Ансаған Абдрахман дәріс оқыды.

Ол дәріс барысында бүгінгі таңдағы имамдар басшылыққа алатын басты қағидаттар Усул аль-фиқһ «Фиқһ негіздері мен анықтамаларынан дұрыс алу», сондай-ақ жамағаттарға Құран мен хадистегі кейбір мәселелерді дұрыс ұғына білу және түсіндіру жайын кеңінен баяндады.

Семинарға қатысушылар баяндамашының келтірген деректер мен дәйектерінен көп жайды көңілдеріне түйді. Өздерін толғандырып жүрген мәселелерге тұшымды жауап алды.

Қостанай облыстық мешітінің баспасөз қызметі.

Елордамыз Астанада Қазақстан мұсылмандары діни басқармасының ұйымдастыруымен «Ислам және дәстүр құндылығы» жылы аясында «Жастар – руханият шамшырағы» ІІ республикалық Жастар форумы болып өтті.

Осы маңызды жиынға Қостанай облысынан да бір топ жастар қатысты. Ал облыстық мешіттің наиб имамы, Жастар ісі секторының басшысы Әлішер Балахмет қажырлы еңбегі үшін Бас мүфти Наурызбай қажы Тағанұлының Алғыс хатымен марапатталды.

Біз Алишер Ертайұлын марапатымен құттықтай отырып, мықты денсаулық, жауапты қызметінде табыс тілейміз.

Қостанай облыстық мешітінің баспасөз қызметі.

Қостанай облысының Бас имамы Бектұрсын Уәлиевтің төрағалығымен өңірдегі аудан және қала имамдарының өзекті мәселелерді қараған жиыны болып өтті. Оған облыстық дін істері басқармасының басшысы Ерлан Қалмақов қатысты.

Ол алдымен әріптестерін Қасиетті мәуліт айымен шын жүректен құттықтады. Барша имамдардың алдында тұрңан келелі міндеттерге жан-жақты тоқталды.

Таратып айтатын болсақ, тәртіптің қай қызметте болсын ерекше орын алатындығын тілге тиек етті. Имам қазіргі таңда басты тұлғаға айналу үшін оның бойында кішіпейілділік, адалдық, білімділік,, парасаттылық, тың ізденіс секілді қасиеттер табылуға тиіс екендігінің еске салды.

Сондай-ақ діни рәсімдер, мешіттердің ішкі-сыртқы тазалықтарына айрықша көңіл бөлу секілді жайлар қамтылды. Имамдардың тарапынан сауалдарға нақты жауап берілді. Мұндай маңызды тақырыптарды арқау еткен жиындар алдағы уақытта да жалғасын таба бермек.

Қостанай облыстық мешітінің баспасөз қызметі.