Жітіқара аудандық «Ержан Тәтішев» мешітінің ұжымы жергілікті Мәдениет сарайында «Мәуліт» мерекесін өткізді.

Осы игі шараға Қостанай облысының Бас имамы Бектұрсын қажы Торғайбайұлы арнайы қатысып, Адамзаттың ардақтысы Мұхаммед Пайғамбарымыздың өнегелі өмірі туралы насихат айтты.

Аталмыш басқосуда облыстық «Аймағанбет қажы Спанұлы» мешітінің найб имамы Әлішер Ертайұлы, Қостанай аудандық «Маңдай батыр» мешітінің Бас имамы Дархан Сыздықов және «Ержан Тәтішев» мешітінің найб имамы Бисұлтан Көптілеуұлы Мәуліт-шариф оқыды.

«Қостанай минералдары» акционерлік қоғамының басқарма төрағасы Ербол Сапарбайұлы Жітіқара ауданындағы алты адамға яғни молдалар мен мешіттің алқа мүшелеріне шипажайға сертификаттарды табыс етті.

Мереке барысында терме-жырлар орындалды. Сондай-ақ, қазіргі таңдағы өзекті мәселе - жастардың ажырасуы жайлы ой саларлық қойылым көрсетілді.

Содан кейін мешіттің асханасында Мұстафа қажы Ғұбайдуллаұлының ұрпақтары ас берді.

Қостанай облыстық мешітінің баспасөз қызметі

Қостанай облысының Бас имамы Бектұрсын қажы Уәлиев кезекті іс сапарында өңірдегі Денисов ауданында болды. Онда бірқатар маңызды кездесулер өткізді. Енді соларға қысқаша тоқталып өтелік.

Ол алдымен аудандық мәдениет үйінде ұйымдастырылған Мәуліт кешіне қатысты. Бұл мерекелік басқосуда облыстық «Аймағанбет қажы Спанұлы» мешітінің найб имамы Әлішер Ертайұлы және Лисаков қалалық «Әбдіхаим Саламатұлы» мешітінің Бас имамы Әкімбек Нұрханұлы Мәуліт-шариф оқыды.

Содан кейін Бас имам аудандық кітапханада жергілікті халықпен, зиялы қауым және аға буын өкілдерімен кездесті. Мұнда ысырапшылдыққа жол бермеу, жаназа дастарханының ас мәзірі, қайтыс болған үйден ас ішпеу, ауданның діни ахуалы жөнінде айтты. Сапар барысында музейге саяхат жасалды.

Денисов аудандық «Жұма» мешітінде Бектұрсын Торғайбайұлы «Ислам және дәстүр құндылығы» жылы аясында жұртшылық, ақсақалдар алқасының мүшелері және жамағатпен жүздесті. Жиында ас беру мәдениеті және басқа да өзекті тақырыптар әңгімеге арқау болды. Қатысушылар өздерінің көкейінде жүрген сауалдарына нақты жауап алды.

Қостанай облыстық мешітінің баспасөз қызметі

Меңдіқара аудандық «Қарамақы ата» мешіті Мәуліт мерекесін тиісті деңгейде өткізді. Осынау рухани жиынға зиялы қауым өкілдері, мемлекеттік қызметкерлер, ақсақалдар мен ақ жаулықты аналар, бірқатар қала аудан мешіт бас имамдары және жастар қатысты.

Онда Меңдіқара ауданы әкімінің орынбасары Марлен Сандыбеков барша жұртшылықты құттықтап, өзінің ең ізгі тілегін білдірді.

Кеште облыстық «Аймағанбет қажы Спанұлы» мешітінің найб имамы Әлішер Ертайұлы, Қостанай аудандық «Маңдай батыр» және Лисаков қалалық «Әбдіхаим Саламатұлы» мешіттерінің Бас имамдары Дархан Сыздықов, Әкімбек Нұрханұлы сахнаға көтеріліп, салауат оқыды.

Ал, Қостанай облысының Бас имамы Бектұрсын қажы Торғайбайұлы өз сөзінде жалпы Мәуліт сөзінің мағынасы мен мәніне жан-жақты тоқталып, Мұхаммед Пайғамбарымыздың өмірбаяны мен көркем мінезі, ғибратты ғұмыры жайлы кеңінен әңгімеледі.

Мерекелік шарада жергілікті мәдениет үйінің өнерпаздары Бақытжан Сәуекенов, Мейір және Гүлжан Нұрмұхамбетовтер, Байдос Қожасағиев, Азат Тобылұлы әуелете ән шырқап, күмбірлете күй шертсе, есімі өңірге танымал жыршы Абзал Алпысов ойлы термелерімен көпшілікті тәнті етті.

Содан кейін мешіт асханасында дастархан жайылып, ас берілді. Пайғамбарымыздың (с.ғ.с) өмірбаянынан сұрақтар және қазақтың ежелгі ұлттық ойындары, салт-дәстүрлері жөнінде сұрақтар қойылып, нақты жауап бергендерге сыйлықтар табыс етілді. Абыз ақсақалдар ақ батасын берді.

Жиын соңында Меңдіқара ауданының Бас имамы Жандарбек Әмірхамзин мешіттің жанашырларына, қолдау көрсетіп келе жатқан ел ағаларына, демеушілерге және мәдениет үйі қызметкерлеріне жамағатқа қонақ болып келген әріптестеріне шынайы ризашылығын жеткізді.

Қостанай облыстық мешітінің баспасөз қызметі

Жітіқара аудандық «Ержан Тәтішев» мешітінің ұйымдастыруымен 25 қазан - Республика күніне орай Ішкі істер министрлігі қылмыстық атқару жүйесі комитетінің № 39 мемлекеттік мекемесінде стол теннисінен жарыс өтті. Жарыста мекеме қызметкері, әскерилер, мешіт жамағаты және жазасын өтеушілер қатысты.

Тартысты өткен спорттық доданың өз жеңімпаздары анықталып, бағалы сыйлықтар мен медальдар табысталды.

Жуырда Қостанай облыстық «Аймағанбет қажы Спанұлы» мешітінің наиб имамы Бақытжан Икрам Қазақстан Республикасы Ұлттық Ұланға қарайтын 6697 әскери бөлімінде болды.

Ол осындағы азаматтық борышын өтеп жатқан жауынгерлермен кездесіп, бүгінгі таңдағы өзекті мәселелердің бірі – суицид жайлы уағыз айтты.

Онда жүздесуге қатысушылардың көкейлерінде жүрген сауалдарға қос тілде нақты жауап берді.

Қостанай облыстық мешітінң баспасөз қызметі

Биыл Қазақстандағы ұлттық мереке – Республика күні қасиетті жұмамен тұспа-тұс келді. Қостанай облыстық «Аймағанбет қажы Спанұлы» мешітінің ұжымы оны есте қаларлықтай өткізуге барын салды.

Жұма намазынан кейін жиналған жамағатқа тағамдық қуаты мол «Қыстың қымызы» деп аталып кеткен құрт көже таратылды.

Облыстың Бас имамы Бектұрсын қажы Уәлиев жұртшылықты халықтың өмірінде ерекше орын алатын айтулы мейраммен шын жүректен құттықтап, баршаға молшылық пен ізгілік тіледі.

Сонымен қатар ежелден келе жатқан ұлттық ойындарды жаңғырта түсу мақсатында жастарды ширақтыққа, батылдыққа баулитын сайыстар ұйымдастырылды. Көпшілік қауым асық ойыны, арқан тартудан ұмытылмас әсер алды.

Мерекелік басқосудың соңында жүлдегерлер марапатталып, оларға бағалы сыйлықтар табыс етілді.

Ұзынкөл аудандық «Құрман баба» мешітінде – Республика күніне орай, Жастар арасында жыр, өлең сөздер айтудан жарыс ұйымдастырылды. Жастарды отанға деген құрмет пен отанды сүйю, қорғау секілді құндылықтар айтылды.

Тобыл қалалық «Маңдай батыр» мешітінің ұжымы Республика күні қарсаңында қалалық мешіттер арасында шағын футболдан жарыс ұйымдастырды. Әділқазылар алқасының шешімі бойынша І орынды облыстық «Аймағанбет қажы Спанұлы», ІІ орынды Қостанай аудандық «Маңдай батыр», ІІІ орынды Қостанай қалалық «Жайлаубай ата» мешіттерінің командалары иеленді.

Жүлдегерлерге лайықты құрмет көрсетіліп, арнайы сыйлықтармен марапатталды. Салауатты өмір салтын жандандыру мақсатында өңірде осындай спорттық шаралар алдағы уақытта да жалғасын таба бермек.

Республика күніне орай Рудный мешітінде ақсақалдар мен әже аналарға дастархан жайылды. Мерекенің мәні мен маңызы жөнінде тілектер айтылып, көк ту таратылды.

Жетіқара аудандық «Ержан Тәтішев» мешітінде жұма намазынан кейін мереке күніне арнап халыққа Көк туды таратты.

Қостанай облыстық мешітінің баспасөз қызметі

Тобыл қалалық «Маңдай батыр» мешітінің ұжымы Республика күні қарсаңында қалалық мешіттер арасында шағын футболдан жарыс ұйымдастырды. Ол Тобыл қаласындағы «Астана» спорт кешенінде өткізілді.

Жарыс басталмас бұрын облыстың Бас имамы Бектұрсын қажы Уәлиев және Қостанай ауданының дене шынықтыру және спорт бөлімінің басшысы Мылтықбай Абдуайтов сөз сөйлеп, қатысушыларға сәттілік тіледі.

Әділқазылар алқасының шешімі бойынша І орынды облыстық «Аймағанбет қажы Спанұлы», ІІ орынды Қостанай аудандық «Маңдай батыр», ІІІ орынды Қостанай қалалық «Жайлаубай ата» мешіттерінің командалары иеленді.

Жүлдегерлерге лайықты құрмет көрсетіліп, арнайы сыйлықтармен марапатталды. Салауатты өмір салтын жандандыру мақсатында өңірде осындай спорттық шаралар алдағы уақытта да жалғасын таба бермек.

Қостанай облыстық мешітінің баспасөз қызметі

Жуырда Қазақстан Республикасы Мемлекеттік қызмет істері жөніндегі агенттігінің Қостанай облысы бойынша департаменті «Мемлекет қызметкерлерінің арасында құмар ойындарының алдын алу: тәжірибе, мәселелер және оны шешу жолдары» тақырыбында дөңгелек үстел ұйымдастырды.

Оған Қостанай облысы әкімі аппараты мен облыстық басқармалардың, өкілетті атқару органдарының басшылары, бірқатар департаменттердің қызметкерлері қатысты.

Аталған жиында Қостанай облысының Бас имамы Бектұрсын қажы Уәлиев көпшілікке ой салар мазмұнды баяндама жасады. Ол өз сөзінде: «Ойынқұмарлық – тек қана бір отбасының шырқын бұзып қана қоймай, қоғамды құлдыратып, елдің берекесін кетіретін зиянды әрекет. Құмар ойынға әуес болу құран мен хадистерде тыйым салынып, үлкен күнәлардың қатарына жатқызылып харам делінген. Үлкен күнә саналуының себебі – оның қоғамдық сипат алуында» -деді.

Белігілі дін қайраткері ой-толғамын жалғастыра келіп, «Лудомания бұл – адамның психологиясына зиян келтіреді. Құмар ойнайтын адамның жеңіл жолмен ақша табамын деген жоспары жалқаулыққа, ақыл-ойының әлсіреуіне алып барады. Ал, жеңіл жолмен табыс табу – құмар ойынның алғашқы бастамасы. Букмекерлік кеңселерде және спорттық ойындарға бәс тігу өкінішке орай қазіргі таңда кең етек жайып келеді. Оған басыңды алып қаша алмайтын толып жатқан жарнамалардың да әсері жоқ емес. Мұндай жолға түскен адамның тығырықтан шығар жолы бар ма? Әрине бар, адам өзінің ерік-жігерінің және қалыбындағы иманының кәміл болуымен, өзінің әрекетінің дұрыс емес екенін түсініп, ауыр күнә арқалайтынына көз жеткізсе, бұл істі доғаратыны сөзсіз екенін тілге тиек етті.

Оның пікірінше, пенде түрлі жамандықтан алдымен өзі ғана құтқара алады және қоршаған ортасы, ағайын-туысы, дос-жарандарының қолдауы мен ақыл-кеңесі ауадай қажет-ақ.

Бас имам осылайша жиалғандарға пайдалы насихат айтып, жасөспірімдерге ерте жастан лудоманияның үлкен күнә екенін түсіндіру керектігін, әлеуметтік желілердегі санқилы көз сүріндірер жарнамаларға шектеу қойып, оның орнына құмар ойының қасіреті жайлы қысқа метражды бейнефильмдерді көбейту абзал деп ойын түйіндеді.

Қостанай облыстық мешітінің баспасөз қызметі

Қостанай облысының Бас имамы Бектұрсын қажы Уәлиев Алтынсарин ауданына арнайы іс сапармен барды. Ол мешіттің сыртындағы құрылыс нысандарымен, оның ішінде мәйітхана және артынан тұрғызылатын қосымша орындармен танысты.

Сонымен қатар «Алдиярұлы Жанұзақ» мешітінде өткізілген Мәуліт мерекесіне қатысты. Онда облыстық мешіттің найб имамы Әлішер Балахмет және Тобыл қалалық мешітінің Бас имамы Дархан Манарбекұлы Мәуліт- шариф оқып, Бектұрсын Торғайбайұлы бата берді.

Содан кейін Бас имам аудан әкімі Арнұр Сартовпен іскерлік жағдайда кездесіп, болашақта жүзеге асырылатын маңызды жұмыстарды талқылады.

Қостанай облыстық мешітінің баспасөз қызметі

Қостанай облысының Бас имамы Бектұрсын қажы Уәлиев арнайы іс-сапармен Наурызым ауданындағы Шилі ауылына барды.

Ол алдымен аталмыш елді-мекендегі салынып жатқан мешіттің құрылысымен танысты. Осы имандылық ордасының тұрғызылуына мұрындық болған жергілікті белсенді тұрғындармен кездесті.

Жүздесу барысында мешіттің осы жылдың аяғына дейін пайдалануға берілетіндігін және білікті діни маманның қажеттігін білді.

Сондай-ақ Бектұрсын Торғайбайұлы ауыл тұрғындары және елді-мекендегі орта мектептің ұстаздарымен де жиын өткізіп, онда білім, мейірімділік, қайырымдылық, қазіргі таңдағы өзекті мәселе діни рәсімдердегі ысырапшылдықтың алдын алу жөнінде уағыз-насихат айтты.

Қостанай облыстық мешітінің баспасөз қызметі