Қостанай облысының Бас имамы Бектұрсын қажы Уәлиев кезекті іс сапарында Әулиекөл ауданында болды. Ол ауданда ұйымдастырылған Мәуліт рухани кешіне қатысып, уағыз-насихат айтты.

Онда облыстық мешіттің наиб имамы Әлішер Ертайұлы мен Қостанай аудандық «Маңдай батыр» мешітінің бас имамы Дархан Манарбекұлы Мәуліт-шәриф оқыды.

Тағылымы мол жиынға осы өңірдегі ардақты ақсақалдар мен ақжаулықты аналарымыз шақырылып, кештің ажарын кіргізді. Басқосуда аудан әкімі Жансұлтан Қоңыртайұлы айтулы мерекеге орай барша қауымды шын жүректен құттықтап, ең ізгі тілегін білдірді.

Мәуліт мейрамы өз деңгейінде өтті. Жиын соңында жергілікті «Әмит ишан» мешітінің бас имамы Нұрбол Исламұлы барша қонақтар мен жамағаттарға шынайы алғысын жеткізді.

Сондай-ақ аталмыш сапар барысында Бектұрсын Торғайбайұлы аудан басшысымен қалыптасқан діни ахуал жайлы келелі әңгіме қозғады. Әулиекөлдік ағайындармен жүздесуде діни рәсімдер кезінде ысырапшылдыққа және басқа да келеңсіздіктерге жол бермеу жөнінде тілге тиек етті.

Қостанай облыстық мешітінің баспасөз қызметі

Қазақстан мұсылмандары діни басқармасы төрағасының орынбасары, наиб мүфти, «Шариғат және пәтуа» бөлімінің меңгерушісі, Республикалық ақпараттық-насихат тобы мен ғұламалар алқасының мүшесі Сансызбай қажы Құрбанұлы арнайы іс-сапармен Қостанай облысына келді.

Сансызбай қажы Құрбанұлы аудандық мешіттің жамағатымен кездесіп, уағыз-насихат айтты. Облыс бас имамы Бектұрсын қажы Торғайбайұлы жамағат атынан ұстазға алғысын білдірді

Сапар барысында онымен бірге Қостанай облысының Бас имамы Бектұрсын Уәлиев болды. Көрнекті дін қайраткері Сатыбалды ишан жерленген зиратқа барып, оған және осындағы тыныстап жатқан барша аруақтарға құран бағыштап, бата берді.

Сондай-ақ, халқымыздың ардақты ұлдары Сатыбалды ишан, Файзолла қари және де Омар халпенің халқына сіңірген еңбегі және өмірбаянымен танысты.

Қостанай облыстық мешітінің баспасөз қызметі.

Арамызда жүрген ардақты ақсақалдар мен ақ жаулықты аналар қандай құрметке де әбден лайықты. Облыстық «Аймағанбет қажы Спанұлы» мешітінде аға буын өкілдеріне дастарқан жайылып, олардың атына қаншама ізгі тілектер айтылды.

Жиынды Қостанай облысының Бас имамы Бектұрсын Уәлиев ашып, өмірдің талай белестерінен өткен қарттардың елімізді өркендетуге, өскелең ұрпақты тәрбиелеуде сіңірген еңбектері зор екендігіне кеңінен тоқталды. Оларға ұзақ ғұмыр, баянды бақыт тіледі.

Басқосуда абыз аталарымыз Жандарбек Сейітов, Торғайбай Уәлиев, Әбдікәрім Баекенов және басқалар тебірене сөз сөйлеп, мешіт қызметкерлеріне шынайы алғыстарын білдірді. Ақ жаулықты аналардың тілегі де арнайы шақырылған қонақтарға үлкен әсер қалдырды.

Аға ұрпақ өкілдерінің алдында танымал мәдениет қайраткерлері асқақтата ән салып, күмбірлете күй шертті. Кешті белгілі журналист Заңғар Санай жүргізді.

Жиынның соңында бата беріліп, жұртшылық жоғары көңіл-күймен тарқасты.

Қостанай облыстық мешітінің баспасөз қызметі

Таяуда Қостанай облыстық «Аймағанбет қажы Спанұлы» мешітінің жанындағы әйел-қыздар секторының жетекшісі Жансая Салауатқызының ұйымдастыруымен Адамзаттың асылы Мұхаммед Пайғамбарымызға (Алланың оған сәлемі болсын) арналған Мәуліт кеші өткізілді.

Рухани басқосудың тағылымдық-тәрбиелік мәні жоғары болу үшін бағдарлама жасалды. Онда шақырылған әйел қауымының дүниетанымын кеңейтіп, жан сарайын байыту мақсатында викториналық ойындар жүргізіліп, ұмытылмас әсер қалдырды.

Осы кеште облыстың Бас имамы Бектұрсын қажы Уәлиев жүрегі нәзік жандармен кездесіп, уағыз-насихат айтты. Барлық қатысушыларға Мәуліт мерекесінің құрметіне сыйлықтар табыс етіліп, дастархан жайылды.

Қостанай олыстық мешітінің баспасөз қызметі

Жақында Қостанай қалалық “Жайлаубай ата” мешіті ұжымының ұйымдастыруымен еліміздегі ұлттар арасындағы достықты нығайту және шарапатты Мұхаммед Пайғамбарымыздың құрметіне түбі бір туыстас түрік диаспорасымен бірігіп, Мәуліт-шәриф оқылды.

Ұлағатқа толы салауатты жамағат ұйып тыңдап, үлкен ғибратқа бөленді. Имамдар уағыз-насихат айтты. Соңында жиналғандар түнгі намазға қатысып, жоғары көңіл-күймен тарасты.

Қостанай облыстық мешітінің баспасөз қызметі

Даңқты жерлесіміз дарынды ақын, белгілі публицист, шебер аудармашы Ғаббас Жұмабаев үстіміздегі жылы 100 жасқа толды. Соған орай қасиетті жұмада оның кіндік қаны тамған Меңдіқара ауданының орталығы Боровской селосында мерейтойы аталып өтілді.

Алыс-жақыннан келген қонақтар мен туыстары алдымен жергілікті «Қарамақы» мешітінде болды. Онда бас имам Жандарбек Әмірхамзин үлкенді-кішілі қауымды жылы жүзбен қарсы алып, талантты қаламгердің өмір жолына жан-жақты тоқталды. Оның елі мен халқына сіңірген еңбегі, артында қалдырған мол рухани мұрасы жайлы баяндады.

Сондай-ақ ғасырға толған тұлғаның әруағына бағыштап құран оқыды. Ұрпақтарына ұзақ ғұмыр, баянды бақыт тіледі.

Содан кейін артында өшпес із қалдырған жерлесімізге арналған салтанатты жиын мен тағылымды рухани шаралар оның есімі берілген білім ордасында жалғасты.

Қостанай облыстық мешітінің баспасөз қызметі

ҚР Парламенті Сенатының төрағасы Мәулен Әшімбаев Астанада Қазақстан мұсылмандары діни басқармасының ұйымдастыруымен өтіп жатқан «Қожа Ахмет Ясауи және оның рухани мұрасы» халықаралық ғылыми-теориялық конференциясына қатысушыларды құттықтады.

«Бүгін бәріміз ұлы ойшыл, рухани ұстаз, түркі дүниесінің айтулы тұлғасы Қожа Ахмет Ясауиге және оның мұрасына арналған конференцияға жиналып отырмыз. Осы іс-шараға тұтас түркі дүниесінің дін лидерлері мен қайраткерлері арнайы келген екен. Баршаңызды Қазақ елінде көргенімізге қуаныштымыз! Сонымен қатар, бұл жиын отандық және шетелдік ясауитанушы ғалымдардың басын қосып отырғанын атап өткеніміз жөн.

Қазақстан Республикасының Президенті Қасым-Жомарт Кемелұлы Тоқаев Ясауидің есімін ұлықтауға және еңбегін дәріптеуге үнемі баса мән беріп келеді. Мемлекет басшысы Ұлттық құрылтайдың отырысында «Ислам дінінің Ұлы дала төрінде таралып, тамыр жаюына орасан зор үлес қосқан, түркі әлеміндегі сопылық ілімнің негізін қалаған Қожа Ахмет Ясауи мұраларын терең зерделеп, дәріптеуге айрықша назар аударған жөн», деген еді.

Осыған орай еліміздің және шетелдің ғалымдарын шақырып, арнайы іс-шара өткізу туралы бастама көтерген болатын. Бүгінгі конференция – аталған бастаманы іске асырудың нақты көрінісі.Сонымен қатар, Президентіміз жуырда ғана киелі Түркістанға жасаған сапарында ең алдымен Қожа Ахмет Ясауидің кесенесіне зиярат етті.

Мұның бәрі Ясауи – ұлтымыздың рухани темірқазығы екенін айқын көрсететін қадамдар. Бүгінгі іс-шара да ұлы тұлғаның есімін және еңбегін жаңаша жаңғыртудың жарқын үлгісі болады деп сенеміз» деді Мәулен Сағатханұлы.

Қазақстан мұсылмандары діни басқармасының ұйымдастыруымен өтіп жатқан «Қожа Ахмет Ясауи және оның рухани мұрасы» халықаралық ғылыми-теориялық конференциясында Бас мүфти Наурызбай қажы Тағанұлы баяндама жасады.

Түркі жұртының даңқты ғұлама, әулиесі Қожа Ахмет Ясауи және оның рухани мұрасы жөнінде ҚМДБ Төрағасы:
«Қазақстан мен Орта Азиядағы сопылық мектебінің көрнекті өкілі, ғұлама, әулие бабамыз Қожа Ахмет Ясауидің күллі түркі жұртының рухани тарихында айрықша орны бар. Ол – Ислам дінінің жанашыры әрі насихатшысы, сопылық ілімнің көрнекті ұстазы.

XIII-XV ғасыр арасында Ясауи ілімі Хорезм, Мəуреннаһр және Анадолыға дейін жетті. Қазақ елінде Ясауиді құрметтеп, пір тұтқандықтан «Мəдинада – Мұхаммед, Түркістанда – Қожа Ахмет» деген тәмсіл пайда болды.

Ол адамгершілік пен имандылықты ту етіп, күш-қайратын ізгілік жолына арнады. Бүкіл түркі жұртын татулыққа, тазалыққа үндеді. Әр мұсылманның бойында Аллаға деген зор сүйіспеншілік, Мұхаммед (оған Алланың салауаты мен сәлемі болсын) пайғамбарға деген ыстық махаббат болу керектігін сүйсіне жырлады» деді.

Айта кетейік, халықаралық ғылыми-теориялық конференцияға ҚР Парламенті Сенатының төрағасы Мәулен Әшімбаев, Түркия Дін істері басқармасының төрағасы Али Ербаш, Кавказ мұсылмандары діни басқармасының төрағасы Шейхул-Ислам Аллашүкір Паша-Заде, Өзбекстан мұсылмандары басқармасының төрағасы, шейх Нуриддин Холикназар, Қырғызстан мұсылмандары діни басқармасының төрағасы Абдулазиз қажы Закиров, Түркі мемлекеттері ұйымы бас хатшысының орынбасары Мирвохид Азимов, сондай-ақ мемлекет және қоғам қайраткерлері, дін ғалымдары, имамдар және БАҚ өкілдері қатысуда.

Астанада Қазақстан мұсылмандары діни басқармасының ұйымдастыруымен «Қожа Ахмет Ясауи және оның рухани мұрасы» халықаралық ғылыми-теориялық конференциясы басталды.

Конференция жұмысына ҚР Парламенті Сенатының төрағасы Мәулен Әшімбаев, Қазақстан мұсылмандары діни басқармасының төрағасы Наурызбай қажы Тағанұлы, Түркия Дін істері басқармасының төрағасы Али Ербаш, Кавказ мұсылмандары діни басқармасының төрағасы Шейхул-Ислам Аллашүкір Паша-Заде, Өзбекстан мұсылмандары басқармасының төрағасы, шейх Нуриддин Холикназар, Қырғызстан мұсылмандары діни басқармасының төрағасы Абдулазиз қажы Закиров, Түркі мемлекеттері ұйымы бас хатшысының орынбасары Мирвохид Азимов, сондай-ақ мемлекет және қоғам қайраткерлері, дін ғалымдары, имамдар және БАҚ өкілдері қатысуда.

Халықаралық ғылыми-теориялық конференцияның мақсаты – Орта Азия, қала берді күллі түркі әлеміне танылған, түркі жұртының рухани құбыласы саналған Қожа Ахмет Ясауи мұрасын зерттеп-зерделеу, осы конференция аясында отандық және шетелдік ғалымдардың ізденістерін бір арнаға тоғыстыру, сондай-ақ тұлғаның даналық хикметтері мен өсиеттерін халықаралық деңгейде дәріптеу, өскелең ұрпақты ұлы баба мұрасын терең меңгеріп, зерттеуге ынталандыру, жас буынды елдік санаға баулу, ұлы баба өнегесімен шәкірттерді адамгершілікке, ізгілікке баулу, т.б.

Елордада Қазақстан мұсылмандары діни басқармасының ұйымдастыруымен өткен Түркі мемлекеттері ұйымы Мүфтилер алқасының V мәжілісінде «Фиқһ мектебінің пәтуа беруге қатысты ережесі» құжаты қабылданды.

Аталған құжаттың мақсаты – Түркі мемлекеттері ұйымына қарайтын фиқһ және сенім институттарының тұрақтылығын қамтамасыз ету, ұйымға мүше мемлекеттердің ғұламалары арасында ынтымақтастықты нығайту, өзекті фиқһ мәселелерін шешуде өзара консультациялар жүргізу.

Сонымен қатар Ислам шариғатының нормаларына сәйкес қоғамның сұранысына орай мәселелерді шешу үшін пәтуалар шығару, мұсылман қауымын, әсіресе жастарды теріс ағымдардың ықпалына түсуден сақтау және т.б.