Ардақты пайғамбарымыз Исламның асыл құндылықтарын адам бойына сіңіру үшін басқаларға өнеге көрсете отырып, бар күш-жігерін сарып етті. Ол өз іс-әрекетімен және көркем мінезімен көпшілікті тәнті ете білді. Соның нәтижесінде тұла бойы асыл қасиетке толы саңлақ сахабалар үмметі пайда болды.

Пайғамбарымыз қандай адам болмасын, онымен тез тіл табысып, жақсылыққа шақыратын. Ғаламның Падишасы қою қара түнек жапқан қоғамды жарық сәуледей тіліп өтіп, дүниені нұрға бөледі. Адамдардың жүрегіне – нұр, мінезіне – көркемдік дарытып тәрбиеледі. Сондықтан да, ол: «Қиямет күні таразыға қойылған нәрселердің ішінде көркем мінезден ауыр нәрсе болмайды» – деп, адамдарды көркем мінезді, әдепті болуға шақырды. Оның өсиет етіп: - «Көркем мінез дегеніміз ол – ашуды баса білуің және кек сақтамауың», – деп айтқан.

Ардақты Алла елшісі өмірінің соңына дейін кішіпейілдігінен танбаған, өзін Құдайдың қарапайым құлы санап, дүние-мүлік дегенді көзіне ілмей өткен жан болды. Ол ешқашан өзін-өзгеден артық санамаған. Алланың ең сүйікті Елшісі бола тұра жарлылықты жақын көріп, құлша өмір сүрді. Әркез: «Мен кедейлігімді мақтаныш көрем» деп те қоятын. Меккені азат етіп, даңқы асқақтап тұрған кездің өзінде де ол осы ұстанымынан таймады.

Пайғамбарымыздың рахымдылығы, жанашырлығы деген өз алдына ерекше еді. Жетім көрсең жебей жүр дегендей. Жетімдерді бауырына басып, басынан сипайтын. Ақ пейілімен оларға жақсылық жасайтын. Ата-анасыз өскен тұл жетімді көргенде жүрегі езіліп, тіпті көзіне жас үйірілетін. «Егер сенің жүрегің жұмсарсын десең, жетімнің басынан сипа», «Егер сен жұмаққа кіргің келсе, жетімдерге барынша қамқор болып, жақсылық жаса», – деп елді жетім-жесірлерге пана болуға шақырған.

Тағылымды Тәлімгер өзіне жәннаттың нәсіп етілгенін біле тұра, зікірі мен шүкірін көп айтып, құлшылығын бар ынта-жігерімен өзгелерден артық орындайтын. Ол түндерін таһажүдке (қосымша түнгі намаз) арнаушы еді. Таң атқанға дейін, аяқтары талып, ісініп, омырауын ыстық жас жуып, Алладан дұға тілеуші еді!

Екі дүние сәруары мұсылмандар арасындағы бауырмалдыққа үлкен мән беріп: «Мұсылман - мұсылманның бауыры, оған зұлымдық жасамайды, оны дұшпан қолына бермейді. Мұсылман, мұсылман үшін кірпіштен өрілген қабырға іспеттес. Олардың бірі, екіншісін бекітіп отырады»,- деген.

Тәлімгер ұстаз – ғылым-білімде кенжелеп қалған елдің ойлау тәсілін, әдеттері мен мінез-құлқын өзгерте білді. Надандықты – ғылыммен, тағылықты – мәдениеттілікпен алмастырып, мейірімсіз қатал адамдарды Жаратқаннан қорқатын, қайырымды да турашыл жандарға айналдырды. Асау тұлпардай жұлқынып, бағыну дегеннің не екенін білмейтін жандарға, заңға мүлтіксіз бағыныштылықты үйретті.

Қадірлі ағайын! Бұл айтылғандар хазреті Пайғамбардың өнегелі ғұмыр кешкенінің бірер көрінісі ғана. Алла елшісінің өмірімен жақыннан танысқан сайын, біз оның қай ісінің де үлгі-өнегеге лайық екенін көреміз. Алла тағала бізді 124 мың пайғамбардың арасынан хз.Мұхаммед ғ.с.-ге үммет болу нығметі мен абыройына бөлеген. Пайғамбарлар сұлтанына үммет болу ең үлкен бақыт әрі зор жауапкершілік екенін ұғына білейік.

Құранда Алла Тағала:«Алла пайғамбарына рахым етіп абыройын жоғарылатады, дәрежесін көтереді. Періштелерде соны қалап дұға етеді. Уа, мұсылмандар, сендер де расулаллаға салауат айтыңдар, сәлем жолдаңдар!» - делінген. Суфиян Сәури (р.ғ.): Алла тағала салауаты – рақымет, періштелер салауаты – истиғфар. Бұл аятта Алла тағала пенделерге құлы әрі елшісі Мұхаммедтің (с.ғ.с) көктегі мәртебесі айтылып, салауат айтылу әмір етілуде. Салауат – дұға-тілек дегенді білдіреді. Салауат айту – күнәлардың кешірілуіне себеп болады. Хадисте: «Кімде-кім маған бір рет салауат айтса, Алла ол адамға 10 рет салауат айтады. 10 қателігі кешіріліп, 10 дәреже көтеріледі» (Нәсай, Сәһу, 55). Тіпті салауат айта отырып тілеген тілектің қабыл болатыны жайлы да риуаяттар бар. Соның бірін Омар (р.ғ) былай жеткізеді: «Жасалған дұғалар, жеріне жетпестен бұрын жер мен көктің ортасында тұрады. Ол Пайғамбарымызға салауат айтқан кезде ғана жетеді». Сондықтан, осындай мүбарак мәуліт айында Алла елшісіне көп-көп салауат айтып, Оны жан-тәнімізбен сүйіп, Оның біздерге қалдырған баға жетпес сүннет жолын дұрыс ұстана білейік.

Осынау айда мүмкіндігімізше «Аллаһуммә салли ғалә сәиидинә Мұхаммәд»-деп салауатты көбейтуге тырысайық. Салауат айтуды айналамыздағы ағайын-туысқа, балаларымыз бен дос-жарандарымызға насихат етуді ұмытпайық. Осынау айтулы мейрамның аясында Алла Елшісін жақсырақ танып, өсиеттерін тереңірек түсінуді нәсіп етсін. Осы мерейлі мәуліт мерекесі адамдар арасындағы рахым-мейірімнің, имандылықтың, бауырмалдықтың арта түсуіне сеп болғай.

Елім деген адамға – ел ғашық демекші, Жүрегіміз Қазақстан деп соғып, ел мүддесі үшін адал қызмет етуді Алла нәсіп етсін. Халқымыздың ырыс-несібесі молайып, ауызбіршілігіміз арта берсін. Әмин!

Рудный қалалық «Нұр» мешітінің бас имамы Бектұрсын Торғайбайұлы

Таяуда Әулиекөл аудандық «Әмит ишан» мешітінің бас имамы Нұрлан қажы Сейілханұлы Көктал жалпы білім беретін мектебінің жоғары сынып оқушыларымен кездесті.

Жүздесу барысында ата-ананы құрметтеу, үлкенді сыйлау, білім және тәрбие жайлы сыр шертілді. Сондай-ақ, теріс діни ағымдардан сақтану хақында сөз болып, Әбу Насыр әл-Фараби бабамыз айтқандай, адамның ғұмырында ұлағатты тәрбиенің алар орны ерекше екендігі айтылды.

Басқосуда арқау болған барлық тақырыптар жан-жақты ашылып, шәкірттер көп жайды көңілге түйді. Бас имам олардың қойған сауалдарына тиянақты жауап берді.

Қостанай облыстық мешітінің баспасөз қызметі

Меңдіқара аудандық «Зұлқарнайұлы Мұса қажы» мешітінің Бас имамы Еркебұлан Қошан жергілікті Ғаббас Жұмабаев атындағы мектеп - гимназиясының 11сынып оқушыларымен кездесті.

Онда дін қайраткері салауатты өмір салтын ұстанудың адам баласына тигізер пайдасы жөнінде әңгімеледі. «Тәні саудың-жаны сау» дегендей денешынықтыру мен спорттың алар орны ерекше екендігіне тоқталды.

Мектеп оқушылары тарапынан да сұрақтар қойылып, оған нақты жауап алынды. Мұндай жүздесулердің өскелең ұрпаққа берері мол екендігіне қатысушылардың көздері айқын жетті.

Қостанай облыстық мешітінің баспасөз қызметі

Жуырда облыстық мешіт жанындағы жастар ісі секторының жетекшісі, білікті маман Әлішер Ертайұлы рухани келісім күніне орай Ахмет Байтұрсынов атындағы Қостанай өңірлік университетінің студенттерімен жүздесті.

Осынау кездесу барысында Әлішер Балахмет Ислам дініндегі татулық, өзге де дін өкілдеріне деген құрмет, әңгіме арқауына айналған маңызды тақырып жайлы келелі әңгіме қозғады.

Бүгінгі студент, ертеңгі тәуелсіз еліміздің тірегі болып табылатын жастар өздерін толғандырып жүрген сауалдарын қойып, оған нақты да алдағы уақытта өмірлеріне ізгі әсерін тигізетін жауап алды.

Қостанай облыстық мешітінің баспасөз қызметі

Қостанай қалалық әкімдігінің ұйымдастыруымен өңірдегі діни конфессиялардың өкілдері бас қосқан дөңгелек үстөл болып өтті. Ол рухани келісім күніне арналды. Оған Қостанай облысының Бас имамы Бахытбек қажы Тәжімбет те қатысты.

Жүздесуде діни наным-сенімдеріне қарамастан елімізде мекендеп жатқан барлық дін өкілдеріне құрметпен қарау, қоғамда әрқашан да халықтар арасындағы достық пен татулық басты орын алатындығы айтылды.

Жиыннан кейін оған қатысушылар ауыз бірлік пен ынтымақтың жарқын айғағы ретінде ұйымшылдық танытып, тал екті.

-Бүгінгі жүздесудің маңызы ерекше. Еліміздегі бүкіл жұртшылық жұдырықтай жұмылып, ортақ мақсат жолында аянбай еңбек еткенде ғана біз бұдан да іргелі, сыйластығы жарасқан мемлекетке айналамыз,- деді облыстың Бас имамы Бахытбек қажы Нұрғабылұлы.

Аталмыш шарадан соң барлық кофессия өкілдері қаладағы жаңадан ашылған паркте ағаш отырғызды.

Қостанай облыстық мешітінің баспасөз қызметі

Бейбітшілік және келісім күніне орай Қостанай аудандық кітапхана мен «Маңдай батыр» мешітінің ұйымдастырумен Н.Наушабаев атындағы мектебінің 9 сынып оқушыларымен кездесу болып өтті.

Тобыл қалалық «Маңдай батыр» мешітіне жаңадан тағайындалған бас имам Дархан Манарбекұлы оқушыларды жылы жүзбен қарсы алып, мешіттің тыныс-тіршілігімен таныстырды.

Жүздесу барысында Ислам дінінің құндылықтары жөнінде тағылымды уағыз айтылды. Оқушылар тарапынан бірқатар сауалдар қойылып, оған тиісті деңгейде жауап берілді.

Осы мешіттің найб имамы Медет Қылышбайұлы жалпы біздің өмірімізде достық пен бейбітшілікті қаншалықты маңызды орын алатындығы жөнінде тілге тиек етті.

Қостанай облыстық мешітінің баспасөз қызметі

Өткен қасиетті жұмада Сарыкөл аудандық «Аққозы қажы» мешітінде кадрлық өзгеоістер болып өтті. Онда облыстық мешіттің найб имамы Бақытжан қажы Икрам ҚМДБ-ның төрағасы, Бас мүфти Наурызбай қажы Тағанұлының бұйрығымен аудандық мешітке Бас имам болып тағайындалған Асылхан қажы Түсіпбекті жамағатқа таныстырды.

Асылхан қажы Мұханбетжанұлы осы кезге дейін Қостанай аудандық «Маңдай батыр» мешітіне басшылық еткен.

Ал, «Аққозы қажы» мешітінде бас имам болып қызмет атқарған Нұрбол қажы Исламұлы Тобыл қаласындағы «Маңдай батыр» мешітінде найб имам болып жауапты қызметін одан әрі жалғастырады.

Мешіт жамағаты Асылхан имамды қарсы алып, Нұрбол қажыны иығына шапан жауып шығарып салды.

Қостанай облыстық мешітінің баспасөз қызметі

Арқалық қалалық «Мұхтасиб Әлмұхаммед» мешітінің Бас имамы Нұрхан қажы Асанұлының қатысуымен шаһарға қарасты Фурманов, Восточный, Сарыөзен ауылдарында мектеп оқушыларымен кездесулер ұйымдастырылды.

Бұл кездесулерде Нұрхан қажы «Ислам құндылығы», «Ата-анаға құрмет», «Жат ағымдардан сақтану» тақырыптарында уағыз айтылып, оны оқушылар ұйып тыңдады. Тақырыптарға қатысты қойған сұрақтарға да нақты жауап берді.

Мектеп ұжымдары Бас имамға мұндай тағылымы мол басқосуларды өткізуге мұрындық болғаны үшін шынай алғысын білдірді.

Қостанай облыстық мешітінің баспасөз қызметі

ЖАНТ мүшелерінің сапары Рудный қаласында жалғасты. Онда насихат-дәрістерге ерекше назар аударылды.

Мәселен, «Нұр» мешітінің имамы Бектұрсын Уәлиев қалалық ішкі саясат бөлімімен келісе отырып, «Жастар ресурстық орталығы» директоры Дәурен Қайратұлымен бірге қаладағы оқу орындарында болды.

Сонымен қатар қаладағы Педагогикалық колледж, Жұмыспен қамту және әлеуметтік бағдарламалар орталығы, Ішкі істер басқармасы, Пробация және Жастар ресурстық орталығындағы кездесулер де әсерлі өтті.

Ақпараттық-насихат тобы мүшелері аталмыш ұжымдарда «Жат ағымның алдын-алу және дін мен дәстүр сабақтастығы негізіндегі тәлім-тәрбие» атты тақырыптарда тыңдармандарға дәріс оқыды.

Студенттер мен түрлі санаттағы қауым имамдардың тағылымды әңгімелерін көкейлеріне түйіп, өздерінің ойларын ортаға салды. Басқосуларға облыстық мешіттің найб имамы Абзал Бейсекеев, Лисаков қаласы мен Алтынсарин, Қарабалық, Әулиекөл аудандарының Бас имамдары Сабыржан Есмурзин, Нұрлан Сейдағалиев, Серік Рахимов және Нұрлан Сыздықовтар насихат жұмысын жүргізді.

Қостанай облыстық мешітінің баспасөз қызметі

Жуырда Денисов аудандық «Жұма» мешітінің бас имамы Руслан Жиенбаев жергілікті № 3 мектеп оқушыларымен кездесіп, қоғам дертіне айналған суицид мәселесі туралы насихат айтты.

Жүздесуде ол өз-өзіне қол жұмсаудың ислам дініне қайшы екенін аят, хадистермен түсіндіре келіп, мұндай өкінішке ұрындырар әрекетке бой алдырмаудың бірден-бір жолы-жүректегі иманның әлсіремеуі екендігіне тоқталды.

Жалпы, Ғасыр дертінің алдын алуда дін өкілдерінің орны ерекше. Қазіргі таңда имамдар тек өз ілімдерін арттырып, халықты имандылыққа үндеп қана қоймайды. Олар бұқаралық ақпарат құралдарымен тығыз байланыста жұмыс істейді.

Қостанай облыстық мешітінің баспасөз қызметі