Үстіміздегі жылдың 21-ші қазан күні «Нұр-Мүбарак» Египет ислам мәдениеті университетінде Қазақстан мұсылмандары діни басқармасы мен Қазақстан Республикасы Білім және ғылым министрлігі «Философия, саясаттану және дінтану институты» бірлесе отырып «Қазақстандағы «Дін дүрбелеңі»: кеңестік биліктің дінге қарсы репрессиялық шаралары» атты республикалық ғылыми-тәжірибелік конференция өткізілуі жоспарланған.

Осы маңызды конференция қарсаңында Қостанай облыстық мешітінде арнайы жиын болып өтті. Оған алқа мүшелері мен дін қайраткерлері қатысты.

Басқосуды мешіттің наиб имамы Бақытжан қажы Икрам жүргізіп, кездесудің мәні мен маңызына тоқталды. Жұртшылық алдында белгілі қаламгер, ғалым «Қостснай облысында діни қуғын-сүргінге ұшыраған діни қайраткерлер» тақырыбында тағылымды дүниелерімен көпке танылған Ақылбек Шаяхмет баяндама жасады.

Жалпы, қазақ халқының басына қара бұлт болып үйірілген қуғын-сүргін яғни нәубет жылдары қаншама адам жазықсыз зардап шеккені белгілі. Ол жөнінде тарихтан белгілі. Біздің өңірде де қуғынға ұшырап оның 1061-і ақталған.

Қостанай облыстық мешітінің баспасөз қызметі

Амангелді аудандық «Сатыбалды ишан» мешітінің бас имамы Жандарбек Амирхамзин жергілікті Ішкі істер бөлімінде «Иман және оның маңыздылығы» тақырыбында полиция қызметкерлерімен кездесу өткізді.

Кездесу барысында өзекті мәселе қозғалып, тәртіп сақшылары көкейде жүрген сауалдарын қойды. Жандарбек имам нақты жауап беріп, мұндай басқосудың маңыздылығына тоқталды.

Өз кезегінде полиция қызметкерлері дін қайраткеріне ризашылығын білдірді және алдағы уақытта осындай кездесулер жалғасын тапса деген ниеттерін жеткізді.

Қостанай облыстық мешітінің баспасөз қызметі

Қостанай облыстық мешітіндегі «Әйел-қыздар» секторының ұйымдастыруымен «Қош келдің, мүбәрәк Мәуліт айы» деген тақырыпта басқосу болып өтті.

Яғни мұсылман жыл санауы бойынша үстіміздегі ай «Рабиғул әууал» Мұхаммед Пайғамбарымыздың (оған Алланың игілігі мен сәлемі болсын) туған мәуліт айы.

Осы орайда ұстах Халим Жансая келгендерге Пайғамбарымыз туралы мағыналы ғұмыры жайында тағылымды уағыз айтты. Жиынға қатысушылар оны аса зейін қойып тыңдады.

Әңгіме дастарқан басында одан әрі жалғасты. Мұнда Құран және салауат оқылды. Басқосудан алған әсер ұмытылмастай болды. Әрбір адамға естелік сыйлықтар таратылды.

Қостанай облыстық мешітінің баспасөз қызметі

Ақиқатында, адам баласы бұл жалғанға Жаратушысын танып, Оған құлшылық ету үшін келген. Құранда Құдай тағала: «Жын мен адамзатты Өзіме ғибадат етулері үшін ғана жараттым», – деген иләһи әмір айтқан.

Пендеге міндеттелген парыздарды орындаумен бірге тіршіліктің қамын жасап, бала-шағаға адалынан напақа тауып, тәлім-тәрбие беру де ғибадат. «Ер дәулеті – еңбек» демекші, мұсылман үшін өзін және отбасын асырау, адал еңбекпен нан табуы – құлшылықтың бір түрі. Абдулла ибн Масғұдтан (р.ғ) жеткен риуаятта Алла Елшісі (с.ғ.с): «Адал кәсіп табуға талпыну – парыздан кейінгі парыз» деген. Өйткені, бұл да дініміздің бұйрығы.

«Еңбек – адамның көркі, адам – заманның көркі» дегендей, жастар өз қабілет-қарымына сай елге де, өзіне де пайдалы кәсіп маманы болуы маңызды. Тек қана заңгер, қаржыгер болам деген қате пікір. Барлық мамандық жақсы. «Сен де бір кірпіш, дүниеге кетігін тап та, бар, қалан!», – деп Абай атамыз айтқандай, Отанымыздың титтей болса да бір тетігін бүтіндеуге бар болмысымызбен атсалысуымыз қажет.

Адамзат асылы саналатын Пайғамбарлардың барлығы да маңдай терімен нәқапасын тапқан.

Лұқман Хәкім өз перзентіне: «Балам! Кедейлік атаулыдан адал кәсіп етіп тәуелсіз бол. Өйткені, кісі қолына қараған адамның басына үш жаманшылық келеді. Ол 3 нәрсе мынау: діні әлсірейді, ақылы төмендейді және адамгершілігін жоғалтады. Бұл үш қасіреттен де ауыры адамдар оны менсінбей кетеді», – деген екен.

Ардақты Пайғамбарымыз (с.ғ.с.) еңбек туралы: «Кісі қолына мұқтаж болудан сақтанып, бала-шағасын асырап, көрші-қолаңына жақсы қарым-қатынаста болып дүниені адал жолмен тапса, Алланың алдына барғанда оның жүзі толған айдан жарық болады», – деген.

Еңбек етпей, маңдайдан тер төкпей адам баласының мақсатына жетпесі хақ. Жұмыстан қашып, «жеңілдің асты, ауырдың үстімен» жүру – бойға жабысқан жалқаулықтың белгісі. Білім-ғылымда да күнделікті тұрмыста да кісіні көш соңында қалдыратын себеп ол – жалқаулық. Ал, жалқаулық пен жатыпішерлік мұсылмандыққа да, адамгершілікке де жат нәрсе.

Мұсылман деген тек мешіттен шықпай мінәжат ететін адам емес. Ол дүние тіршілігінде өзгемен терезесі тең болу үшін еңбек ететін, еңбекқор жан. Нағыз мұсылман – дүниелік тіршілігіне де, діни құлшылығына да бірдей тең қарайтын адам. Құран Кәрімде: «Намаз аяқталғанда, жер бетіне тарқалыңдар да Алланың нығметінен өздеріңе рызық-несібе іздеңдер әрі Алланы көп еске алыңдар, мүмкін бақытты боларсыңдар», – деп әмір етілген.

Бір хадисте: «Еңбек етуден қолдары күстенген, шаршап-шалдығып ұйқыға кететін адам кешірімге бөленіп, күнәларынан арылады»деп, Алла елшісі еңбекқорларды сүйіншілейді.

Дана халқымыз: «Еңбегің болмаса елге өкпелеме, Ықтасының болмаса желге өкпелеме», – дейді. Қазір кейбіреулерге: «Неге жұмыс істемейсің?» – десең: «Жұмыс жоқ», деп жауап береді. Еңбекқор адамға әрдайым жұмыс табылады. «Екі қолға бір күрек» деп мұсылман сегіз қырлы бір сырлы болуы қажет. Нағыз азамат өзінің біліміне, білегіне сүйенеді.

Хәкім Абай: «Өзіңе сен, өзіңді алып шығар, Еңбегің мен ақылың екі жақтап», – дегендей мұсылман баласы еңбекқор болуы керек.

«Адал еңбек елге жеткізер, Арам еңбек елден кеткізер» -дегендей, ең басты назарда ұстауға тиісті болған нәрсе ол – адам істеген ісінің қиындығына немесе жеңілдігіне, беделділігіне емес, ең алдымен тапқан табысының адалдығына баса мән беруі қажет.

Қадірлі оқырман қауым! Бабаларымыз: «Еңбегімен ер сыйлы» деген, әуелі өзімізі еңбектеніп, перзенттерімізді де жас күнінен еңбекке баулып өсіре білейік. Алла тағала еткен еңбектеріңіздің екі дүниеде нәтижесін көруді, сауаптан болуды нәсіп еткей!

Рудный қалалық «Нұр» мешітінің имамы Бектұрсынқажы Торғайбайұлы

Өткен қасиетті жұма күні Қостанай облысының Тобыл қаласындағы «Маңдай батыр» мешітіне Бас имам болып осыған дейін он жыл облыстық мешітте найб имам қызметін атқарған Сыздықов Дархан Манарбекұлы тағайындалды.

Сонымен қатар Жітіқара ауданының «Ержан Тәтішев» мешітіне де Бас имамдыққа Қабиев Айбек Аманқосұлы тағайындалды. Жаңадан тағайындалған қос имам да Алматыдағы «Нұр - Мүбәрак» Египет Ислам мәдениеті университетінің түлектері. Болашағынан үлкен үміт күттіретін мамандар.

Ал осыған дейін «Ержан Тәтішев» мешітінде абыроймен басқарған Мейіржан Қапарұлы Бердіғожин Қостанай облыстық «Марал ишан» мешітіне найб имам болып бекітілді.

Біз білімді азаматтарға жаңа жауапты қызметтерінде табыс тілейміз. Әріптестеріміз әрдайым биіктен көрініп, халықтың құрметіне бөленетіндіктеріне нық сенімдіміз.

Қостанай облыстық мешітінің баспасөз қызметі

Қостанай облысының ЖАНТ мүшелері Б. Уәлиев, С. Есмурзин, А. Бейсекеев, Н. Сейдағалиев іс-сапармен Денисов ауданында болды. Олар жұмыс барысында «Қоғамда экстремизм мен терроризм идеологиясының таралуына қарсы іс - қимыл» атты семинарға қатысты.

Сондай-ақ олар мекемелерді аралап, жұртшылыққа қазіргі таңда діндегі өзекті мәселелер туралы жан-жақты түсіндіру жұмыстарын жасады. Мәселен, белгілі дін қайраткерлері жиналған қауым мен мектеп оқушыларына қазіргі таңда діни сауаттылықтың маңызы және деструктивті діни ағымдардан сақтану жөнінде әңгімеледі.

Басқосуларда «Басты тақырып бала тәрбиесі» хақында тілге тиек етті. Жас ұрпақты білім нәрімен сусындатып жатқан ұстаздардың қойған сұрақтарына нақты жауап берді.

Қостанай облыстық мешітінің баспасөз қызметі

Үстіміздегі жылғы жауын-шашынның дер кезінде болмауынан орын алған қуаңшылық мал өсіріп отырған кейбір аудандардағы ағайындарға оңай соққан жоқ. Осы азаматтық пен іскерлік сыналар шақта «Қиындықта ел бірге» жобасының аясында Қостанай өңіріндегі жанашыр азаматтар да оған өздерінің лайықты үлесін қосты.

Мысалы, облыстағы қолдауға зәру 4 ауданға, көмек беру үшін қыруар жұмыстар атқарылды. Осындай ұйымшылдықтың және ауыз бірліктің нәтижесінде Жангелдин, Жітіқара және Б. Майлин аудандарына 45 тонна 400 келі мал азығы болып табылатын шөп жөнелтілді.

Оған 1 млн 351 мың теңге жұмсалып, қостанайлықтар да қиын кезде жерлестеріне көмек беруге әрқашан дайын екендіктерін көрсетті. Оған облыстық мешіттің жанындағы Зекет және қайырымдылық қоры ұйытқы болды.

Қостанай облыстық мешітінің баспасөз қызметі

Қазақстан мұсылмандары діни басқармасының Қостанай облыстық мешітінде қалалар мен аудандардың бас имамдарына арналған семинар өтті.

Оның барысында Құран, Ақида және де Фикһ ілімдері бойынша дәрістер ұйымдастырылды. Облыстың Бас имамы Бахытбек қажы Нұрғабылұлы және наиб имамдар Дархан Сыздықов пен Тимур Туребаев алдағы уақыттағы болатын имамдар аттестациясына даярлық жайын пысықтады. Ал Қанат Орынтайұлы құжаттар мен қызметтік тапсырмалар бойынша және заң саласындағы кейбір жайттар бойынша кеңес берді.

Сонымен қатар алған діни білімдерін күнделікті қызмет барысында ұтымды пайдалану, жұртшылыққа дұрыс жеткізу, түсіндіру, насихаттау хақында өз ойларын ортаға салды.

Мұндай семинарлар алдағы уақытта да өткізіліп, өңірдегі имамдардың діни сауаттарын тиісті деңгейге көтеруге игі ықпалын тигізе беретіндігі даусыз.

Қостанай облыстық мешітінің баспасөз қызметі

Қостанай облыстық мешіті жанындағы Зекет және қайырымдылық қорының қызметкерлері өткен айда аймақтағы әріптестеріне үлгі-өнеге көрсетті. 

Бұған осы қордың жетекшісі, тәжірибелі дін қайраткері Бақытжан қажы Икрамның бізге берген мәліметі нақты айғақ. Оның сөзіне сүйенетін болсақ, қыркүйекте өңір бойынша 100 қамқорлыққа мұқтаж отбасына азық-түлік себеттері табыс етілді.

Осы мақсатқа демеушілердің тікелей қолдауымен 1 млн 863 мың 690 теңге жұмсалды. Қамқорлық шапағатына бөленген жерлестеріміздің оларға деген алғысы шексіз. 

Қостанай облыстық мешітінің баспасөз қызметі

Сарыкөл ауданы "Аққозы қажы" мешітнің Бас имамы Исламұлы Нұрбол қажы басқаратын мешіт ұжымының ұйымдастыруымен  «Қазыналы қарттар» атты шара өткізілді. 

Еліміз бойынша аталып өтетін осы мереке қарсаңында арамыздағы қарт кісілерге, оның ішінде жалғызбасты зейнеткерлер мен мүгедектерге көңіл бөлу. Осынау қыйын қыстау заманда оларға материалдық, әлеуметтік-тұрмыстық және басқа да көмек түрлерін көрсету.

Үлкенге құрмет, кішіге ізет көрсету - адамгершіліктің ең жоғарғы қасиеттерінің бірі. Қай халықтың болмасын түпкі тамырында үлкенді сыйлап, құрмет көрсету тереңде жатыр.

Мерекелік жиын барысында Бас имам Нұрбол қажы "Қарттары бар ел-бақытты ел" турасында уағыз насихат айтып, сыйлықтар табыстады. Осынау ықыласқа риза болған ақ сақалды қариялар мен ақ жаулықты аналарда барша ұйымдастырушыларға ақ батасын беріп, ризашылықтарын білдірді.

Қостанай облыстық мешітінің баспасөз қызметі