Өткен аптада Рудный қалалық «Нұр» мешітінде сенбілік ұйымдастырылды. «Тазалық – иманның жартысы» деген қағиданы берік ұстанған мешіт қызметкерлері мен жамағаттар белсенділік танытты.
Олар мешіт аумағын жинастырып, айналаның айнадай тазалығына айрықша назар аударды. Соның нәтижесінде барлық қоқыстар арнайы техникаға тиеліп, тиісті орындарға шығарылды.
Қалалық мешіттің бас имамы Бектұрсын Уәлиев қараша айының алғашқы жұмасында игілікті іс тындырған жерлестеріне, жамағаттар мен шәкірттерге ұйымшылдықтың жарқын үлгісін көрсеткендері үшін шын жүректен шыққан шынайы алғысын білдірді.
Қостанай облыстық мешітінің баспасөз қызметі
Жылдағы қалыптасқан дәстүр бойынша Қостанай өңіріндегі дін қызметкерлері Ұлы Пайғамбарымыздың туған күні, яғни Мәуліт мерекесінің есте қаларлықтай болуына айрықша назар аударды.
Осы сөзіміздің жарқын айғағы ретінде Қазақстан мұсылмандары діни басқармасының облыстағы өкілдігінің бастамасымен барша аудандық, қалалық, кенттердегі мешіттерде мәуліт мейрамына орай салауат шәриф оқылды.
- Қасиетті жұма күні өңірдегі бүкіл имандылық ордаларында Мұхаммед Пайғамбарымыздың өмірін насихаттауға бағытталған тағылымдық жағы мол ғибраттық шаралар ұйымдастырылды, - деді облыстық мешіттің найб имамы Әлішер Балахмет.
Қостанай облыстық мешітінің баспасөз қызметі
Жақында Қостанай ауданына қарасты Алтын дала ауылында Пайғамбарымыздың туған күніне орай Мәуліт мерекесі ұйымдастырылды. Бұл мейрамға облыстық Марал ишан мешітінің найб имамы, ұстаз Абдулқаһар Ерматов, Тобыл қалалық «Маңдай батыр» мешітінің бас имамы Дархан Сыздықов қатысты.
Алдын ала хабарланғандықтан іс шарада оқушылар тәлімдік-тәрбиелік мәні зор салауаттарды орындады. Ұлы Пайғамбарымыздың өмірбаянынан қасидалар оқылды.
Кеш соңында жиналған қауымға ас берілді. Онда да жергілікті жамағат пен бауырларымызға ой саларлық әңгімелер айтылды.
Қостанай облыстық мешітінің баспасөз қызметі
Рудный қалалық «Нұр» мешітінде мерейлі Мәуліт мейрамына байланысты тағылымы мол іс-шара ұйымдастырылды. Онда Пайғамбарымыздың өмірі баяндалып, салауаттар оқылды.
Бұл мерекеге ерлер жамағатымен қатар қыз-келіншектер секторының ұстазы Аяулым Смағұлова бастаған әйелдер қауымы да белсене атсалысты. Олар «Соқыр яһуди» атты ғибратты көріністі дайындап, мешіт шәкірттері тәлімді қойылымды жұртшылықтың назарына ұсынды.
Сонымен қатар Алла елшісі жайлы мазмұнды уағыздар айтылып, діни әндер орындалды. Сұрақ-жауап ойыны өткізіліп, тапқырлық танытқан қатысушыларға естелік сыйлықтар табыс етілді. Мерекелік шарадан балалар үйі мен басқа дін өкілдері үлкен әсер алды.
Жиналғандар Мәуліт мейрамының құрметіне жайылған дастарқаннан дәм татты.
Қостанай облыстық мешітінің баспасөз қызметі
Ислам дінінің көрнекті өкілі Сатыбалды ишан Ғабдоллаұлының 195 жыл толуына орай Торғай аймағы бойынша «Құран кәрім - мәңгілік мұғжиза» атты қасиетті Құран Кәрімнің 30-шы парасын жатқа және мәнерлеп оқудан сайыс өтті.
Бұндағы басты мақсат – өскелең ұрпаққа қасиетті Құранды оқытып, үйренуді насихаттау. Аталмыш жарыста Аманкелді ауданының әкімі Талғат Тойшыбекұлы жиналған қауымға ізгі лебізін білдірді. Сонымен қатар, ишанның ұрпақтары Құран жаттаушылардың қатары көбейе берсе деген тілектерін жеткізді.
Байқауға мәртебелі қонақтар, яғни облыс орталығындағы «Жайлаубай ата» мешітінің бас имамы Шоқан Ғазизұлы, Рудный қалалық мешітінің бас имамы Бектұрсын Уалиев пен найб имамы Әкімбек Нұрханұлы әділ қазылық жасады.
Жарыстың қорытындысы бойынша жүлделі 1-ші және 2-ші орындарды Арқалықтық Көбей Қалмырзаев пен Ербол Мұқанов, 3-ші орынды Амангелді ауданынан қатысқан Данияр Білімұлы иеленді.
Ал, 30-шы параны жатқа оқудан 1-ші орынға Жангелділік Бекболат Наурыз, 2-ші орынға Арқалық қаласының өкілі Қуандық Алдабергенұлы, 3-ші орынға Жангелді ауданынан келген Дінмұхаммед Ғазиз ие болды. Сондай-ақ, ынталандыру сыйлығы Амангелді ауданынан қатысқан Осман Абзалұлына берілді.
Барлық қатысушыларға «Сатыбалды ишан Ғабдоллаұлы» кітабы мен ақшалай сыйлықтар табыс етілді.
Бұл байқаудың өтуін Әмірхамзин Жандарбек имам мен мешіт ұжымы ұйымдастырып, ишанның ұрпақтары демеушілік етті. Олар бабаларының құрметіне мешіт асханасында қонақтар мен сайысқа қатысушыларға арнайы дастарқан жайды. Онда өңірімізге есімі танымал Мұхтар қажы және Кәкей ақсақал сөз сөйледі. Ас соңында Құран оқылып, бата берілді.
Қостанай облыстық мешітінің баспасөз қызметі
Міне, ата-бабаларымыз ғасырлар бойы армандап өткен тәуелсіздік мерекесіне де санаулы ғана айлар қалды. Биыл осы мейрамның 30 жылдығын атап өтеміз.
Сонымен қатар биыл Пайғамбарымыз Мұхаммед (c.ғ.с) туған күні мәуліт те осы күндерге сәйкес келді. Осының бәрін алдын-ала жоспарлаған Қазақстан мұсылмандары діни басқармасының Қостанай облысындағы өкілдігі мұрындық болып, аталған аудан өңірінде тұңғыш рет ұлттық ат спорты көкпардан сайыс ұйымдастырды.
Оған қолдау білдірген Әулиекөл ауданының әкімі Ерлан Теменов, «Әмит ишан» мешітінің Бас имамы Нұрлан Сыздықов және Құсмұрын елді-мекенінің жамағаттары қаржылай көмек бергенің ерекше атап өткеніміз жөн.
Көкпар десе делебесі қозбайтын қазақ бар ма? Жарыстың өтетіндігін естіген болар, жергілікті бауырларымыз көп жиналды. Өңір бойынша алпыстан астам шабандоздар қатысып, бақтарын сынады.
Осы жарыстың басы - қасында кезінде КСРО-ның бірнеше дүркін чемпионы, Қазақстанның еңбек сіңірген жаттықтырушысы, марқұм Ораз Сейдахметовтың сүйікті ұлы, есімі елімізге танымал шабандоз Бақдаулет Асан болып, жарыстың жоғары деңгейінде өтуіне ықпалын тигізді.
Жарыс болған жерде жеңімпаз да жарқырап көрінетіндігі белгілі. Өздерін нағыз спорттық бабында екендігін көрсеткен шабандоздарға қаржылай сыйлық салтанатты түрде тапсырылды.
Қостанай облыстық мешітінің баспасөз қызметі
Жуырда Қостанай облысының Бас имамы Бахытбек қажы Тәжімбет Ахмет Байтұрсынов атындағы Қостанай мемлеткеттік өңірлік университетінде болды.
Онда осы аймақтағы іргелі оқу-орнының ректоры Алма Іргебайқызы Досжановамен жүздесті. Кездесу барысында олар алдағы уақытта облыстық мешіт пен университеттегі жастар арасындағы рухани, адамгершілік, тәрбие және басқа да маңызды мәселелер бойынша жұмысты барынша жандандыруға келісті.
Көпшілікке мәлім, облыстық мешіттің жанындағы Әлішер Ертайұлы жетекшілік ететін «Жастар ісі секторының» атқарған істері жылдан жылға қарқын алып, жастар арасында қолдау тауып келеді.
Жоғарыда аталған жоғары оқу орындарында болашақ маман иелерін яғни студенттерді теріс ағымнан сақтандыру, атадан балаға мирас болып келе жатқан салт-дәстүріміздің жаңғырту, дініміз бен тілімізге құрметпен қарау жайы әңгіменің өзегіне айналды.
Қостанай облыстық мешітінің баспасөз қызметі
Қазақстан мұсылмандары діни басөқармасының Қостанай облыстық «Зекет және қайырымдылық» қорының қызметкерлері өткен қазан айында да қажырлы еңбек етіп, өңірдегі көмекке мұқтаж жандардың алғысына бөленді.
Нақты деректер мен дәйектерге сүйенетін болсақ, наиб имам Бақытжан Икрам өткен қазан айында жалпы облыс бойынша тек ғана мешіттерден 200 отбасына қайырымдылық шаралары жасалды.
Атап айтқанда азық-түлік қржындары мен киім-кешек те табыс етілді. Сондай-ақ жолда қалып қойған азаматтардың да өтініштері қанағаттандырылып, қаржылай жәрдем көрсетілді.
Жалпы, аталмыш шараларғы барлығ 1 млн 539 мың 100 теңге қаражат жұмсалды. Бұл орайда өңірдегі жүрегі жомарт демеушілердің белсенділік танытқандықтарын атап өткен жөн дейді Бақытжан қажы.
Қостанай облыстық мешітінің баспасөз қызметі
Рудный қаласындағы №19-шы мектепте «Мәдениет – ұлттық қайта өркендеу коды» атты жоғары сынып оқушыларымен кездесу өтті.
Кездесуді жас маман тарих пәні мұғалімі Қабылдина Гүлмира жүргізіп, «Рудный қаласының Нұр» мешітінің Бас имамы Бектұрсын Уәлиевке сөз берді.
Бас имам өз сөзінде: «Мәдениет – діннің төл перзенті десек-те болады. Мәдениет - жеке тұлға мен қоғамның ар-ұятының айнасы. Бұған адамзат дін арқылы ғана қол жеткізе алады. Дін жоқ жерде көркем мінез бен парасаттылық жайлы сөз қозғау, пікір таластыру да қиын. Өйткені, көркем мінез бен мәдениеттің қайнар көзі – ар-ұждан. Сол ар-ұжданды басқаратын жалғыз нәрсе, ол Алла тағаламен байланыста тұратын дін. Халқымыздың мәдениеті де Хақ Тағаладан келген асыл дінімізбен біте қайнасқан» - дей келе әңгімесін жас ұрпақ тәрбиесіне бұрды. Адалдық, мейірімділік, жауапкершілік пен кешірімділік жалпы әдептілікке байланысты мазмұнды ойымен бөлісті.
Кездесуге арнайы қатысқан мектеп директоры Гүлжазира Ғинаятқызы да айтылған насихаттарды қолдап, тақырыпқа сай өз ойын да жан-жақты жеткізе білді.
Қостанай облыстық мешітінің баспасөз қызметі
Бұдан бұрын хабарлағанымыздай, Тобыл қалалық «Маңдай батыр» мешітінің бас имамы Дархан Сыздықов Қостанай ауданына қарасты ауылдардың тұрғындарымен кездесіп, келелі де рухани нәр берер сұхбатттарын одан әрі жалғастыруда.
Бұл сөзіміздің нақты айғағы ретінде кезекті сапарында Мичурин және Заречный елді-мекендерінде болып, жергілікті азаматтармен жүздесті.
Онда Дархан Манарбекұлы ислам діні мен адам бойындағы ең ізгі қасиеттер - адалдық, адамгершілік және басқа да тәрбиелік мәні зор тақырыптар бойынша уағыз айтты.
Осы ауылдардағы басқосуларға мешіттің найб имамы Азамат Мурзаканов та қатысты. Кездесулер өте әсерлі өтті. Қатысушылар көп жайды көңілдеріне түйді.
Қостанай облыстық мешітінің баспасөз қызметі
Миләди
Хижри
