Қай салада болмасын өз мамандықтарына аса бір жауапкершілікпен қарап, көпшіліктің құрметіне бөленіп жүрген абзал да сыйлы азаматтар аз емес. Мұны жете түсінетін Қостанай аудандық «Маңдай батыр» мешітінің Бас имамы Дархан Манарбекұлы өзі басқаратын киелі орындағы әріптестеріне қолдан келгенше ілтипат көрсетуді өзінің басты парызы санайды.

Осы сөзіміздің нақты дәлелі ретінде ол еліміздегі ұлы мереке Тәуелсіздік күніне орай мешіттің қаржылық мүмкіндігіне байланысты бірқатар кісілерді марапаттауға ұйғарым жасады.

«Жақсының жақсылығын айт, нұры тасысын» демекші, ұжымдағы дін қызметкерлері мен ортақ іске сүбелі үлес қосып жүрген жандарға ақшалай сыйлықты табыс етті.  

Қостанай облыстық мешітінің баспасөз қызметі

Қостанай облыстық мешітінің жанындағы Қайырымдылық және Зекет қорының қызметкерлері уақытпен санаспай жұмыс істеп, өтіп бара жатқан жылы өңірде қаншама қамқорлықа мұқтаж жандардың ризашылығына бөленді.

Осы қордың жетекшісі әрі найб имам Бақытжан қажы Икрамның айтуына қарағанда, желтоқсан айында облыста 359 отбасына көмек көрсетілді.

Аймақта 38 қайырымдылық іс-шаралары ұйымдастырылды. Әрине, бұл игілікті жұмыстардың бәрі де демеушілер мен жүрегі жомарт азаматтардың қолдаулары арқасында жүзеге асырылды.

Бұл қайырымдылық шаралары мешіттердің негізі жұмыстарының бірі және бірегейі. Сондықтан алдағы уақытта да жалғаса беретін болады. Ат салысам, демеушілік көмек көрсетем деушілер мешіттерге хабарласса болады.

Қостанай облыстық мешітінің баспасөз қызметі

Қыс келіп, жерге қар түсісімен шаһарымыздағы жұмысшыларға қарбалас басталады. Бұл әрине, халқымыздың мүддесі үшін жасалып жатқан игі істер екендігі белгілі.

Олардың мамандықтарының ерекшеліктерін жете түсінетін Қостанай қалалық "Жайлаубай ата" мешітінің қызметкерлері дер кезінде қолдау көрсетуді ұйғарды. Имандылық ордасының ұйымдастыруымен өткен жұмада шаһарымыздағы тазалық жұмысымен айналысып жатқан кісілерге жұртшылық "қыстың қымызы" деп атап кеткен құрт көже апарып берді.

Мұндай мешіт тарапынан ыстық ықыласқа бөленген жұмысшылардың қуанышында шек болған жоқ. Олар шын жүректен шыққан шынайы алғыстарын білдірді.

Сонымен қатар жұма намазынан шыққан намазхан бауырларымызға да құрт көже таратылды.

Қостанай облыстық мешітінің баспасөз қызметі

Елордада Қазақстан мұсылмандары діни басқармасының Орталық аппаратында өткен Төралқа мәжілісінде Бас мүфти Наурызбай қажы Тағанұлы Тәуелсіздігіміздің 30 жылдық мерейтойына орай облыс имамдарын арнайы алғыс хатпен марапаттады.

«Сіздің асыл дініміздің өсіп-өркендеуіне, тәуелсіз еліміздің 30 жылдық мерейлі белесінде жеткен әрбір жетістігіне қосқан үлесіңіз мол. Рухани құндылықтарымызды насихаттау жолындағы белсенді қызметіңіз бен ыждаһатты еңбегіңіз үшін Сізге айрықша алғысымды білдіремін. Алла разы болсын! Отбасыңызға амандық, деніңізге саулық, ізгі ісіңізге береке тілеймін!
Алла Тағала дін саласында ықыласпен атқарған әрбір ісіңізге мол сауаптан жазғай. Жаратушы Жаббар Иеміз Тәуелсіздігімізді баянды етіп, халқымызға бірлік пен береке нәсіп еткей. Әмин!» делінген Бас мүфтидің алғыс хатында.
Төралқа мәжілісінде ҚМДБ Төрағасы Наурызбай қажы Тағанұлы бір жыл бойы жақсы жұмыс нәтижесін көрсеткен барша дін қызметкерлеріне алғысын жеткізді.

ҚМДБ Төрағасы, Бас мүфти Наурызбай қажы Тағанұлының жетекшілігімен өтіп жатқан Төралқа мәжілісінде облыс бас имамдары 2021 жылдың қорытынды есебін баяндады.

Төралқа жиынында Нұр-Сұлтан, Алматы, Шымкент қалалары мен облыстардың бас имамдары өңірдегі биыл әртүрлі бағытта атқарылған жұмыстардың қорытынды есебін жеке-жеке баяндап, слайд түрінде ұсынды.

Бас мүфти Наурызбай қажы Тағанұлы дін қызметкерлерінің жыл бойына атқарған жұмысына оң баға беріп, сәттілік тіледі. Сондай-ақ жетілдіруі қажет тұстарын екшелеп, кемшін түсіп жатқан бағыттар бойынша әлі де жұмыс істеу керектігін атап өтті.

Қазір имандылық ордаларында биылғы атқарылған жұмыстар қорытындыланып, келер жылы жүзеге асырылатын игі істер тиянақталып жатыр. Осындай маңызды жиын Рудный қалалық «Нұр» мешітінде де болып өтті.

Бас имам Бектұрсын Уәлиев алдымен кездескен қиындықтарға қарамастан өз мамандықтарына адалдық танытқан мешіттің қызметкерлерін еліміздегі ұлы мереке Тәуелсіздіктің 30 жылдығымен құттықтады. Оларға алғыс хат тапсырып, сый-сияпат жасады.

Басқосуда 2022 жылы халыққа көрсетілетін қызмет барынша жанданып, қайырымдылық және басқа да ізгі мақсаттағы шаралар өткізілетін болады.

Қостанай облыстық мешітінің баспасөз қызметі

Жуырда Қарабалық аудандық «Ғашура ана» мешітінің Бас имамы Серік Темірбекұлының ұйытқы болуымен өзекті мәселе - теріс ағымдардың алдын алу мақсатында бірқатар маңызды кездесулер өткізілді.

Осы жүздесулерге қысқаша тоқталып өтелік. Алдымен олар аудандық төтенше жағдайлар бөлімі қызметкерлерімен «Деструктивті теріс ағымдардың қоғамға зияны» жөнінде әңгіме өрбітті.

Содан кейін өңірімізге белгілі Қазақстан агротехникалық колледжінің жатақханасында студенттермен «Деструктивті теріс ағымдардың ықпалына қалай түспеуге болады?» деген тақырыптағы кездесу терең мазмұнымен есте қалды.

Аталмыш басқосуда жастарға теріс ағымдардың жетегінде кетпеу үшін олар нені білу керектігі, сондай-ақ қозғалып отырған жайдың қоғамға тигізетін зияны мен зардабы жайлы кеңінен түсіндірілді. Студенттердің қойған сауалдарына тиянақты жауап берілді.

Қостанай облыстық мешітінің баспасөз қызметі

Меңдіқара аудандық «Зұлқарнайұлы Мұса қажы» мешітінің найб имамы Ерік қажы Ыбырай Кәмшат Дөненбаева атындағы ауыл шаруашылық колледжінің екінші және үшінші курс студенттерімен Ихсан бағыты аясында имани кездесу өткізді.

Жастар оның маңызды тақырыпқа арналған әңгімесін мұқият тыңдады. Содан кейін өздерін толғандырған сауалдарын қойып, оған нақты жауап алды.

Жүздесудің соңында олар өздеріне арнайы келіп, қазіргі таңдағы өте қажетті де мазмұнды, тағылымды әрі ғибратты ой-пікірлері үшін Ерік қажыға шынайы алғыстарын білдіріп, оған жауапты қызметінде табыс тіледі.

Қостанай облыстық мешітінің баспасөз қызметі

Қалың жұртшылыққа Қазақстан мұсылмандары діни басқармасының төрағасы, Бас мүфти Наурызбай қажы Тағанұлы үстіміздегі жылды Ихсан жылы деп атағаны белгілі.

Оны Бахытбек қажы бастаған аймақтағы дін қызметкерлері де қолдап, бірқатар игі істерді жүзеге асырды. Соның бір жарқын айғағы ретінде облыстық мешітте конференция ұйымдастырылды. Іс-шара Құран оқумен басталды. Оған көрнекті ақын Ақылбек Шаяхмет, танымал ғалым Қалқаман Жақып, аталған имандылық ордасы жанындағы алқа мүшелері, аудан мен қалалардың имамдары қатысты.

Жиында Бас мүфтидің тікелей бастамасымен жарық көрген «Ихсан рухани тәрбие негізі» деп аталатын қос тілде және «Толық адам» атты кітаптардың тұсауы кесілді.

Осы басқосуда құнды еңбектердің лентасын қиған Ақылбек Қожаұлы «Ихсан» сөзінің терең мәні мен мазмұнына, оның оқырман мен мұсылман бауырларымызға берер тағылымы және басқа да өзіндік ерекшелігіне жан-жақты тоқталса, ал Қалқаман Хасенұлы жүрек дерттері жайлы ойлы пікірлерін ортаға салды. Сондай-ақ, адам бойындағы көркем мінез бен өзге де қандастарымызды ізгілікке, имандылыққа, адалдыққа бастайтын тәрбиелік жақтары жөнінде әңгіме өрбітті.

Облыстың Бас имамы Бахытбек Нұрғабылұлы конференцияны қорытындылай келіп, жиынның мәртебелі қонақтары Ақылбек Шаяхмет пен Қалқаман Жақыпқа Алғыс хаттарды табыс етті.

Сонымен қатар ол конференцияда қозғалған тақырыптың өте өзекті екенін, осы бағытта алдағы уақытта да тыңғылықты жұмыстар атқарыла беретіндігін айтты. Барлық қатысушыларды Тәуелсіздік мерекесімен құттықтап, оларға мықты денсаулық, қызметтерінде табыс тіледі.

Қостанай облыстық мешітінің баспасөз қызметі

Денисов аудандық "Жұма" мешітінің ұжымы жергілікті жамағатты имандылық пен парасаттылыққа, ізгілікке, адалдыққа баулып, асыл дініміздің құндылықтары мен рухани нәріне сусындатып келеді.

Бұл күндері жаңадан жөндеуден өткен имандылық ордасына келушілер де аз емес. Мешіттің бас имамы Руслан Маратұлының іскерлігінің арқасында жүзеге асырылған жарқын істер тілге тиек етерліктей.

Ғимараттың қазіргідей тартымды да жұрт назарын аударарлықтай деңгейге жетуіне мұсылман бауырларымыз, жүрегі жомарт жандар мен демеушілер өздерінің лайықты үлесін қосты.

Жалпы, мешіттегі жөндеу жұмыстары осы жылдың күз айында басталып, дер кезінде аяқталды. Мәселен, имандылық ордасының ауласы қақпамен толық қоршалды.

Сондай-ақ мешіт баспалдағы күрделі жөндеуден өтіп, арнайы тұтқалармен бекітілді. Басқа да маңызды жұмыстар атқарылды. Сөйтіп, қысқа мерзімде пайдалануға беріліп, аудан тұрғындарын үлкен қуанышқа бөледі.

Қостанай облыстық мешітінің баспасөз қызметі