Өткен жылдың қараша айынан бастап сәуір айының соңына дейін Қостанай облыстық «Аймағанбет қажы Спанұлы» мешітінде шәкірттер арасында Құранды толық оқу бойынша «Ең үздік хатым етуші» жарысы ұйымдастырылған еді.
Шәкірттерге шарты түсіндірілгендіктен, қасиетті Құранды әр 10 күн сайын толық хатым ету дәстүрге айналған-ды. Мұнда 10 – парадан алты, 5 – параданда алты, 3 – парадан 10 шәкірт қатысты.
Жарыста шәкірттер қашанда шыңдалатындығы белгілі. Сондықтан талапкерлер алға қарай ұмтылыс жасап, тынбай ізденіс танытты. Қасиетті Құранның мәні мен маңызын жете түсінді.
Өткеен Рамазан айына олар жан-жақты дайындықпен келген болатын. Олар білім жағынан өздерінің жан сарайын байытып, еңбекқорлыққа дағдыланды.
Жарыстың қорытындысы бойынша жүлделі бірінші орынға – Нұржан Айтбай, екінші орынға – Ғабит Пірмағамбетов, үшінші орынға Темірбақ Шапатуллаев ие болды.
Аты-жөндері аталған жеңімпаздарға ақшалай сыйлықтар мен сертификаттар табысталды.
Үстіміздегі жылы Қостанай облысының Әулекөл ауданы Бас имамы Балахметов Нұрбол Исламұлы басқаратын «Әмит ишан» мешітінің алқа мүшелері өзгелерге үлгі боларлық істер атқарды.
Олар аудандағы бірқатар саудамен айналысатын дүкендерді аралап, қасиетті Ораза кезінде арақ-шарап сатылмауы жайлы ойларын ортаға салды. Мәселен, дін қызметкерлерінің талап-тілектеріне ерекше көңіл бөлген сауда орындары мен олардың иелерінің аты-жөндеріне тоқтала кеткеніміз жөн болар.
«Жақсының жақсылығын айт, нұры тасысын» демекші, Ғ.Жансейітова, А.Нұржанов, И.Исмагамбетов, Ә.Қалиева, Г.Кәкімжанқызы басқаратын «Таң-Нұр», «Айнур», «Айшагүл», «Ожан», «Арнұр» секілді сауда орындарында Рамазан кезінде сөрелерден арақ-шараптарын сатылымнан алып тастады.
Міне бұл айлардың сұлтаны болып табылатын Рамазанға жасалған үлкен құрмет деп білеміз. Аталмыш жеке кәсіпкерлерге жұмыстары берекелі болсын тілек білдіреміз.
Сонымен қатар Құсмұрын елді мекеніндегі «Хақ» мешіті қызметкерлерінің ұйымдастыруымен ораза ұстаған қарияларға азық-түлік пакеттері үлестірілді.
Ал Қадір түні қарсаңында аудандық Әулиекөл ауылындағы тастанды балалар үйіндегі тәрбиеленушілер де өздеріне деген қамқорлыққа дән риза болысты.
Аманқарағай елді мекендерінде күнкөрісі төмен 40 отбасына да азық-түлік ұсынылды. Бұл қайырымдылық шарасына есімі өңірімізге кеңінен танымал «Москалев» ЖШС басшысы З. Жаңбыршиновтің демеушілік жасаған болатын.
ҚМДБ-ның Қостанай облысы бойынша
өкілдігінің баспасөз қызметі
Имандылық – бала тәрбиесінің ең басты қайнар бұлағы. Сондықтан тәрбиені діннен бөлек алып қарауға әсте болмайды. Қаншалықты жақсы тәрбие көрсе де, дініне енжар, селқос қарайтын, имандылық негіздеріне аса мән бермейтін ұрпақ екі дүниеде де мұратқа толық жете алмайды.
Қазіргі жаһандану заманында қоғамымыздағы кейбір жастардың әдепсіз әдептерге, мұсылманға жат қылықтарға бой алдыру, батыстық мәдениетке еліктеп, әзәзіл әуендерге үйір блып, ақырында болашағынан үміт күттірген өскелен ұрпақтың ғасырлар бойы қалыптасқан ұлттық, рухани құндылықтарға қарсы келуінің басты себебі де, сөз жоқ, нақ осы имандылық тәрбиенің әлсіздігінен немесе жоқтығынан.
Асыл дініміз туылған нәрестеден бастап , ер жеткенге дейін перзентке қандай тәрбие беру керектігін нақтылап берген. Алла Тағала қасиеті Құран Кәрімде былай дейді:
يَا أَيُّهَا الَّذِينَ آمَنُوا قُوا أَنفُسَكُمْ وَأَهْلِيكُمْ نَارًا وَقُودُهَا النَّاسُ وَالْحِجَارَةُ
«Уа иман келтіргендер! Өздеріңді және отбасыларыңды отыны адамдар мен тастар болған оттан (тозақтан) сақтаңыздар» Тахрим сүресі, 6-аят. Сонымен қатар Алла Тағала басқа аятта былай деп бұйырады:
وَأْمُرْ أَهْلَكَ بِالصَّلَاةِ وَاصْطَبِرْ عَلَيْهَا ۖ لَا نَسْأَلُكَ رِزْقًا ۖ نَّحْنُ نَرْزُقُكَ ۗ وَالْعَاقِبَةُ لِلتَّقْوَىٰ
«Отбасыңды намаз оқуға бұйыр және өзің де намаз оқуда табандылық таныт. Біз сенен ризық сұрамаймыз, керісінше сенің ризық-несібеңді Біз берудеміз. Расында, жақсы нәтеже тақуаларға» Таһа сүресі, 132-аят.
Ибн Омар (р.ғ.) Алла Елшісінің (с.а.с) былай дегенін риуаят еткен: «Сендердің бәрің де бақташысыңдар, бәрің де өз отарларыңа жауаптысыңдар. Әмірші адамдарға бақташы, ол сол отарына жауапты, ер кісі өз отбасына бақташы, сол отарына жауапты, ал әйел күйеуінің үйіне және баласына бақташы әрі соларға жауапты, кісінің құлы (қызметкері) қожайынның малына бақташы әрі соған жауапты. Әлбетте, бәрің де бақташысыңдар әрі бәрің де өз отарларыңа жауаптысыңдар!». Балаларды сүйіспеншілікпен тәрбиелеп, махабат нұрын жаудыру әр ата-ананың міндеті. Сәбиге туған кезден бастап жақсы тәрбие беру керек. Оның тыныш, мамыражай жағдайда өскені жөн. Оған қатты дауыс көтеріп ұрсуға, жекуге, қорқытуға болмайды. Сондай-ақ айқай-шу, төбелес сияқты жағымсыз көріністер көрсетілмеуі тиіс. Мұндай әрекеттер баланың жүйкесіне теріс әсер етіп, оның ақыл-есінің кемуіне әкеп соғуы ықтимал. «Әрбір туылған сәби фитрада (әуелгі таза болмыста, яғни еш нәрседен бейхабар пәк болып) туылады. Кейін әке-шешесі оны не яһуди, не христиан, не отқа табынушы етеді. Сондықтан ата-ананың балаға дұрыс үлгі болуы – игі ұрпақ тәрбиелеп шығарудың басты талабы. Сонымен, бала тәрбиесінің басты ұстындарын былайша бөлуге болады:
Егер ата-ана ұрпағын нағыз шынайы мұсылман етіп тәрбиелей алса, онда олардың баласы қиямет күні жұмақ қақпасының алдында отырып: «Әке-шешем кірмесе, мен де кірмеймін»,- дейді екен. Ізгі ұрпақ тәрбиелегені үшін ата-анаға осы дүниеде де, ақыретте де үлкен құрмет, шексіз қошемет бар.
Жалпы баланың тәрбиесіне әсер ететін төрт фактор бар:
Демек, бала тәрбиесі ата-ананың, мектептің, қала берді жалпы мұсылман қоғамның ортақ ісі. Жаратушы Хақ Тағала мұсылмандардың ізгі істерде әрдайым тізе қосып, бірге жүзеге асырауларына үндеп былай дейді:
وَتَعَاوَنُوا عَلَى الْبِرِّ وَالتَّقْوَىٰ ۖ وَلَا تَعَاوَنُوا عَلَى الْإِثْمِ وَالْعُدْوَانِ ۚ
«Ізгілік пен тақуалықта бір-біріңе жәрдемдесіңдер! Ал күнәлі істерде һәм дұшпандық жасап, шектен шығуда бір-біріңе болыспаңдар» Мәйда сүресі, 2-аят.
Халық нақылында: «Алтыға дейін патшадай сыйла, алтыдан кейін құлдай жұмса, он алтыда досындай сырлас» делінеді.
Ұлы Жаратушымыз былай дейді: «Балаларын толыққанды емізгісі келетін аналар толық екі жыл емізеді. Ананың азығы мен киімі шама-шарқынша баланың әкесіне міндет. Әркімге шамасы келетін нәрсе ғана жүктеледі. Ана да, әке де баланың себебінен зиян шекпесін. Сондай-ақ, мұрагер де сондай. Егер ата-ана өзара ризашылықпен кеңесіп, емшектен шығаруды қаласа, сонда екеуіне күнә жоқ. Ал егер балаларыңды (басқа әйелге) емізгілерің келсе, ақысын келсім бойынша төлеген болсаңдар, (бұл да) сендерге күнә емес. Алладан қорқыңдар да біліңдер! Расында Алла істегендеріңді толық көруші» Бақара сүресі, 233-аят.
Демек, ата-ана баласын толыққанды емізгісі келетін болса, екі жыл бойы емізуі тиіс. Ал ата-анасы тамақ жей алатын жағдайға келген баласын екі жылға толтырмай емшектен шығарып жатса, онда Алла Тағала айтқандай оларға күнә жоқ. Тек әуелі дәрігермен кеңесуді ұмытпаған жөн. Осыны есімізден шығармауымыз керек! Қазақтың мына: «Ел боламын десең, бесігіңді түзе», «Отан отбасынан басталады», «Атадан жақсы ұл туса, есіктегі басын төрге сүйрер. Атадан жаман ұл туса, төрдегі басын есікке сүйрер» нақылдары да, бала тәрбиесіне аса қатты мән берілуі керектігінің айғағы болып табылады. Қазіргі жасөспірім балалар теледидарға телміріп, одан қалса ұялы телефонға және компьютерлік атыс-шабыс, төбелес, тонау, т.б. ойындарға әуестігі басылар емес. Осы орайда: «Теледидар көрсе-көрсін, ұялы телефон және компьютер ойнаса-ойнасын, тек жыламаса, бұзықтық істемесе, босқа қаңғырмаса, әйтеуір мазамды алмай тыныш отырса болды»,- деген немқұрайлылықтан барынша сақтанып, бала тәрбиесіне баса назар аудару қажет. Перзентіңізге көңіл бөліп, оған ғибратты әңгімелер мен киссалар айтып берсеңіз, түптің түбінде еңбегіңіздің жеміс берері даусыз. Ал, енді сол немқұрайлылықпен жүре берсек ақыры не болмақ деп бір сәтке ой жүгіртіп көрдіңіздер ме?! Перзентіңіздің күн сайын алдынан түспейтін әлеуметтік желі мен ғаламтор және құрдымға апаратын құмар ойындар мен зиянды бағдарламалар жастардың сана-сезімі мен ақыл-ойын біртіндеп улап, неше түрлі қылмыстық әрекеттерге итермелеуі әбден мүмкін.
Жеткіншектер үшін ғаламтордың бір зиянды жағы, мұнда әр түрлі құмар ойындары, зиянды бағдарламалар да жетіп артылады. Алаяқтар мен хакерлер жастарды ғаламторға тәуелді етіп, бұлыңғыр қарым-қатынас, жыныстық байланыс жасауға шақырып, виртуальды әлемге қызықтырып, ақыл-ойы әлі қалыптаспаған ұл-қыздарымызды еліктіріп, есінен айырады. Әрине, кәзіргідей техникалық-ғылими прогресс дамыған заманда компьютердің, ғаламтордың дұрыс пайдалана білген адамға пайдасы зор. Ол-талас туғызбайтын ақиқат. Тек оған біздің көптеген жастарымыздың таным-түсінігі жетпей жататыны болмаса... Демек, компьютерде отырған адамның миының үштен бірі істемей тұрады, -дейді. Демек, ғаламтордың соншама зиянын естіп, біле тұра неге алдын алмасқа? Ол үшін не істеуіміз керек деген сұрақ туындары сөзсіз. Әрине оның жауабы бар. Олай болса, ұл-қызымыз иманды да ибалы болсын десек, өзімізге де, балаларымызға да адамзаттың асыл тәжі Пайғамбарымыздың (Алланың оған игілігі мен сәлемі болсын) өнегелі өмірінен ғибрат алуды және Алла Елшісінің (Алланың оған игілігі мен сәлемі болсын) өзін өмірлік өнеге ете білуді үйренейік. Бұл жөнінде Алла Тағала қасиетті Құран Кәрімде былай деп баян етеді:
لَّقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ لِّمَن كَانَ يَرْجُو اللَّهَ وَالْيَوْمَ الْآخِرَ وَذَكَرَ اللَّهَ كَثِيرًا
«Шүбәсіз, Алла Елшісінде сендер үшін әрі Аллаға және ақирет күніне бар үмітін артқан (Алланы және ақирет күнін жан-тәнімен қалайтын) һәм Алланы көп еске алып, Оған көп құлшылық ететіндер үшін қай жағынан алсақ та теңдессіз үлгі-өнеге бар» Ахзаб сүресі, 21-аят.
Ендеше, Алла Тағаланың өзі сүйген Мұхаммед пайғамбарды (Алланың оған игілігі мен сәлемі болсын) балаларымыз жақсы көретін болса, онда Жаратушы Иеміз де оларды сүйетіні шүбәсіз. Ал, Алла сүйген ұрпақтан бақытты ұрпақ қайдан болсын!
Қорыта келе, Елбасымыздың: «Біз – тегіміз түрік, дініміз – Ислам екенін ұмытпаумыз керек. Ол үшін касиетті кітап Құран Кәрімді насихаттауды естен шығармауымыз керек»,-деген ұлағатты сөзін айтқым келеді. Пайғамбарымыздың (Алланың оған игілігі мен сәлемі болсын) өсиеттерінің бірінде: «Ешбір ата-ана өз баласына көркем әдептен артық сый-мұра қалдыра алмайды»,-делінген (Тирмизи). Даналарымыз айтпақшы: «Атадан үш ұл туады: «Бірі атадан өте туады. Бірі жете туады. Енді бірі кері кете туады».
Ендеше, Алла Тағала бізге атадан жасық туатын емес, атадан асып туатын ұлағатты ұл мен инабатты қыз тәрбиелеуімізді нәсіп еткей!
Денисов аудандық «Жұма» мешітінің
бас имамы Байшев Болатжан Ғалымұлы
Қайырымдылық – халқымыздың ең ізгі қасиеттерінің бірі. «Жанашырлыққа — жан риза» дегендей, мүмкіндігі шектеулі, жетім, қамқорлыққа алынған балалардың жанашыры болып, аялы алақанын тосып, жүрек жылуын ұсыну, сауабы мол іске атсалысу - әрбір адамның азаматтық парызы.
Бұл ретте Ішкі істер министрлігінің Шырақбек Қабылбаев атындағы Қостанай академиясы түлектерінің ұйытқы болуымен 11 мұқтаж отбасыға азық-түлік, киім-кешек таратылды. Осынау игі іс-шараға Қостанай қалалық «Жайлаубай ата» мешітінің ұжымы және жамағаты бір кісідей атсалысты.
Аталмыш іс-шараның мақсаты – көпбалалы, көмекке мұқтаж, тұрмысы төмен, сонымен қатар мүгедек балаларды асырап отырған отбасыларға азда болса материалдық демеу беріп, әр отбасын қуаныш пен шаттыққа бөлеу.
Академия түлектерінің ұйытқы болуымен, аталған шара аясында 10 отбасыға азық – түлік түрінде (картоп, орамжапырақ, пияз, жеміс-жидек, май, шай және т.б) көмек көрсетілсе, еліміздің ертеңі болып табылатын жас ұрпаққа - киім-кешек , ал ата-анасына азық-түлік түрінде қайырымдылық жасалды.
Міне, осылайша олар нағыз азаматқа тән қырларымен өздерінің парыздарын өтеді.
Қазақстан мұсылмандары діни басқармасы жанындағы «Зекет» қорының «Ел үлесі - пәтерге» жобасы бойынша 84-ші баспана Қостанай облысы, Арқалық қаласына қарасты Родина елді мекерінде берілді. Бұл баспана нәсіп болған жанұя асыраушысы жоқ бес баланың анасы Гүлмира Жылқыбайқызына бұйырды.
Үйдің кенже баласы Дінмұхамед мүмкіндігі шектеулі сәби. Отбасы мүшелері балалардың жәрдемақысына күнелтіп, осы уақытқа дейін өмірдің ащы қиындығын көріп, пәтер жалдап көшіп-қонып жүрген болатын.
Міне Бас мүфтидің бастамасымен республика аумағында «Ел үлесі пәтерге» қайырымдылық шарасы аясында осы мұқтаж отбасының баспаналы болуына себепші бола алдық.
Аталмыш – жоба мешіт имамдарының халыққа, жамағатқа түсіндіре жеткізе білген насихаттарының нәтижесінде іске асуда. Бұл сауапты іс-шараға Қостанай облысының барша жамағаты атсалысты, сол үшінде халыққа, мешіт жамағатына Алла разы болсын.
Сондай-ақ, жаңа қоныс иелеріне Арқалық қаласының әкімі Эльдар Қонысбайұлы теледидар, жеке кәсіпкер «Әділ» дүкені 50.000 теңгенің сертификатын , «Мухтасиб Әлмұхаммед» мешіті кілем тарту етті. Ал ауыл әкімі Рүстем Асанханұлы баспана құжаттарын рәсімдеп беретінін жеткізді.
Облыс бойынша аталмыш шараның іске асуына себепші болған Қостанай облысының өкіл имамы Бахытбекқажы Нұрғабылұлы жиналған қауымға қайырымдылық, мейірімділік жайлы тұшымды уағызын айтып, баспана кілтін табыстады.
ҚМДБ-ның Қостанай облысы бойынша
өкілдігінің баспасөз қызметі
Қазақстан мұсылмандары діни басқармасының Қостанай облысындағы өкілдігі үстіміздегі жылғы қасиетті Рамазан айын барынша мазмұнды әрі халықтың көкейінде ұзақ сақталатындай етіп өткізуге көп көңіл бөлді.
Соның бір жарқын айғағы ретінде облыстық мешітте Оразаның алғашқы күнінен бастап, ауызашар беру дәстүрі жалғасын тауып, қалың жұртшылықтың ыстық ықыласына бөленді.
Осы жұма күні 50 отбасына көпбалалы және әлеуметтік жағдайы төмен обасыларына азық-түлік ұсынылды. Ал халықаралық балалар күніне орай 10 велосипет тәттілерімен баларға тартылды.
Ал қасиетті Қадір түні өте ұйымшылдықпен өтті. Азаматтар Рамазанның шарапаты мол екендігін де айқын сезінді.
Осы кеште облыстық мешіттің наиб имамы Дархан Манарбекұлына және қалалық «Жайлаубай ата» мешітің найб имам Дархан Исламбекұлына қызметтік пәтерлердің кілтін салтанатты түрде тапсырды. Міне бұл төрт пәтер Рамазандағы мешіт қызметкерлеріне берілген үлкен сый болды.
Қадір түнінің жоғары деңгейде өтуіне руханият жанашыры, облыс әкімі Архимед Мұхамбетов пен өзге де іскер азаматтардың ұйытқы болғандығын айтып өткеніміз абзал. Үлкенді-кішілі қауым олардың азаматтық қасиеттеріне дән риза болысты.
Қадір түні облыстық мешітте сәресі де берілді. Жиналған жерлестеріміз Рамазан айының шарапаты мен қасиетін жете ұғынып, жастар жағы алдағы өмірлерінде тағылым боларлықтай игі әсер алды.
Мұндай басқосулар өңірдің барлық аудандары мен қалаларындағы мешіттерде де өткізілді. Ең бастысы, қостанайлық ағайындардың дінге деген ыстық ықыластары жылдан-жылға артып келеді.
ҚМДБ-ның Қостанай облысы бойынша
өкілдігінің баспасөз қызметі
Қостанайлық ағайындар қасиетті Рамазан айын ұйымшылдықпен өткізді. Қазақстан мұсылмандары діни басқармасының Қостанай облысындағы өкіл имамы Бахытбек Тәжімбеттің басшылығымен өңірдегі барлық мешіттерде отыз күн бойы ауызашар берілді.
Оған іскер азаматтар мен кәсіпкер жігіттері атсалысты. Сөздің орайы келгенде «Әкім бол, халқыңа жақын бол» демекші, Қостанай облысының әкімі Архимед Бегежанұлы Мұхамбетов өзінің дінге деген жанашырлығын ерекше көрсетті.
Ол алғашқылардың бірі болып ауызашар берді. Қадір түні де өзінің азаматтық қасиеттерін көрсетіп, барша қауымға дастархан жайды. Сөйтіп, халықтың шынайы алғысына бөленді. Ораза ұстаушылардың қатарында жастардың көптігі жұртшылықты қуантты.
Әкімнен үлгі алған кәсіпкер және жүректеріне имандылық ұялаған жергілікті азаматтар биыл да жақсы қырларымен көзге түсті. Ең бастысы, өңірде Ислам дінінің өркендеп келе жатқандығын айрықша атап өткеніміз жөн.
Алдын-ала хабарланғандықтан, Ораза Айттың бірінші күні таңертеңнен бастап облыстық мешітке жамағат ерте жиналды. Олардың алдында өкіл имам Бахытбек Нұрғабылұлы сөз сөйлеп, Ораза Айттың ерекшелігі жайлы уағыз айтты.
Бұл қуанышты сәттер олардың жадында мәңгілік сақталары хақ. Ораза кезіндегі облыста атқарылған жұмыстар да тілге тиек етілді. Қайырымдылық мақсатында да жүзеге асырылған игілікті істер аз болған жоқ. Облыстағы барлық мешіттерде Рамазан айы тиісті деңгейде өтті.
Облыстық мешітте жылдағы қалыптасқан дәстүр бойынша дүниеден өткен ата-бабаларымызға Құран бағышталды.
ҚМДБ-ның Қостанай облысы бойынша
өкілдігінің баспасөз қызметі
Жуырда Рудный қаласындағы «Қостанай облысы төтенше жағдайлар депараментінің өрт сөндіру және авариялық құтқару жұмыстары қызметі» мемлекеттік мекемесінде осы шаһардағы «Нұр» мешітінің наиб имамы Ерлан Өмірбекұлының қатысуымен әсерлі кездесу болып өтті.
Аталмыш жиында наиб имам мекеме қызметкерлеріне «Дініміздің кемелдігі» атты тақырыпта уағыз айтып, келелі әңгіме қозғады. Сондай-ақ, осы қасиетті Рамазан айының артықшылығы мен берекеті жайында да тілге тиек етті.
Оразада жасалған әрбір жақсылық еселене сауапталатыны жөнінде хадис шарифтерінде келтірілген. Сондықтанда осы қасиетті айда дін жолындағы қызметкерлердің ауқымды кездесулер өткізіп, дініміздің насихатталуынаайрықша назар аударуы аса маңызды дер едік.
Мұсылман бауырларымызға айтарымыз, осы Рамазан айында барлық ізгі ниеттеріңіз жүзеге асып, отбасыларыңызда тек қуаныш пен ырыс-береке молая берсін демекпіз!
Жақында Денисов аудандық «Жұма» мешітінің бас имамы Болатжан қажы Ғалымжанұлының ұйымдастыруымен, «Қош келдің Рамазан» атты Құран жарысы өткізілді.
Оған 10 шәкірт қатысып, бақтарын сынады. Олар әділ қазылардың сұрақтарына мүдірмей жауап беріп, өздерінің тыңғылықты дайындықтарын көрсетті.
«Жүзден жүйрік, мыңнан тұлпар» демекші, терең білім және жан-жақты қарым-қабілеттерін танытқандарға құрмет көрсетілді. Оларға бағалы сыйлықтар табыс етіліп, есімдері аталды.
Мәселен, жарыс барысында ерекше көзге түскен шәкірттер, яғни 6-сынып оқушысы Асылай Марат - ІІІ орынды, 2-сынып оқушысы Аян Ерманов ІІ орынды иеленді. Ал 4-сынып оқушысы Бақнұр Марат бас жүлдені жеңіп алды.
Осылайша, аталмыш сайыс Денисов ауданында да талапты жастар өсіп келе жатқандығын айқын көрсетті. Бұл, әрине, бәрімізді де шексіз қуанышқа бөлейді! Оларға тек «талаптарыңа нұр жаусын!» дегіміз келеді.
Жуырда Алтынсарин ауданы «ALDIARULY JANUZAQ» мешітінің бас имамы Ерік Ыбырай және аудандық ішкі саясат бөлімі ауыл әкімдерімен бірге Обаған ауылдық округіндегі Силантьев елді мекенінде, Үлкен Чураковка ауылында болып, әлеуметтік жағдайы төмен, көп балалы, Тың ардагерлерінің үйінде болды.
Оларды қасиетті Рамазан айымен құттықтап, қайырымдылық мақсатында ізгі істерді тындырды. Мәселен, Тың ардагері Равиль Сайфулиннің шаңырағына ат басын бұрып, тыныс-тіршілігімен танысып, сәлем берді.
Содан кейін жалғызбасты ана, мүгедек баланы тәрбиелеп отырған Ботакөз Наурызбаеваның, сондай-ақ көп балалы ана, украин ұлтының өкілі Галина Литвиненконың отбасында болды.
Сонымен қатар, Обаған ауылдық округіне қарасты Силантьев ауылында тұратын Жұматай Бадановтың, көп бала тәрбиелеп отырған, Атырау аймағынан қоныс аударған Кәмшат Қаңтарбаеваның, мүгедек Кенжебек Абдрашевтің үйіне барып, олардың да жай-күйімен танысып, оларға азық-түлік пакетін ұсынды.
Миләди
Хижри
