Жуырда Денисов ауданының имамы Руслан Маратұлы Қырым және Перелески ауылының тұрғындарымен кездесті. Ол осы жүздесу барысында қазіргі таңдағы өзекті мәселелерге кеңінен тоқталды.

Мәселен, имам мектеп оқушылары суицидтен аулақ болу, деструктивті діни ағымдарға түсіп қалмау, жадыраңқы жаз айларында уақытты барынша тиімді пайдалану жайында әңгімеледі.

Имам жоғарыда аталған елді-мекендердегі ата – аналарға балаларының демалыс кездерінде жауапкершілікті сезініп, мүмкіндігінше сақтық шараларын ұстану қажеттігін айтты.

Сонымен қатар кездесулерде  тұрғындарды толғандырып жүрген бірқатар сұрақтарға жауап берді. 

Қостанай облыстық мешітінің баспасөз қызметі

Үстіміздегі жыл мемлекетіміздің егемендігіне 30 жылдық мерейтойы қарасаңында облысымызда бірқатар жұмыстар оң нәтижесін беруде.

Атап айтқанда Қарабалық ауданына қарасты Бөрлі ауылында намазхана күрделі жөндеуден өткізілуде.

Оған облыстың Бас имамы Бахытбек қажы Нұрғабылұлы арнайы барып, жөндеу жұмыстарымен танысып қайтты.

Сонымен қатар Қостанай ауданына қарасты Жамбыл ауылындағы намазхананың асханасында болып, жасалған жұмыстарды көрді.

Көршілес Алтын дала ауылындағы намазхананың асхансы жұмыстарын көріп, ауданның бас имамы Асылхан қажы және сол ауылдағы Берік молдамен бірге алдағы жұмыстарды талқылады.

Қостанай облыстық мешітінің

баспасөз қызметі

Қостанай қаласының  уақыт талабына сай абаттандырылуы және көрікті болуы әрбір адамның экологиялық мәдениетіне және ішкі жан дүниесінің сұлулығына, талғамына да байланысты.

Міне, мұны жете ұққан облыстық мешіт қызметкерлері де жыл сайын жадыраңқы көктем айларында белсенділік танытып келеді. Осы сөзіміздің  жарқын айғағы ретінде өткен қасиетті жұма күні киелі орынның жанындағы әйел жамағаттар аулаға гүл егіп, еңбек сүйгіш екендіктерін көрсетті.

Алдағы уақытта олар отырғызған гүлдер алыстан көз тартып, мешіттің айналасын құлпыртып тұратын болады. Енді оны дер кезінде суарып, күтіп баптауға ерекше назар аудара бермек. 

Қостанай облыстық мешітінің баспасөз қызметі

Таяуда Рудный қалалық «Нұр» мешітінің ұжымының бастамасымен жергілікті қауым мен жамағат шаһардағы зираттардың тазалауға белсене атсалысты. Олар қалаға қарасты қос зиратты қоқыстан тазартты.

Жергілікті мешіттің бас имамы Бектұрсын Торғайбайұлы мұсылман бауырларымызға қабірге зиярат етудің мәдениетін түсіндіріп, марқұмдардың рухына дұға бағыштады. 

Осы маңызы мен тәрбиелік мәні зор шараға қала әкімі Қуандық Хайдарұлы да қатысып, өзгелерге үлгі-өнеге көрсетті. Жастар жағы ғибратты тағылым алды.

Бас имам ұйымшылдық танытқан барша қауымға алғысын жеткізді. Осы сенбілікке қажетті арнайы техникалармен (автобус, трактор, жүк көлігі) қамтамасыз еткен қала әкімдігі мен іскер азаматтарға шынайы ризашылығын білдірді. 

Қостанай облыстық мешітінің баспасөз қызметі

1 маусым - Халықаралық балаларды қорғау күніне орай Меңдіқара ауданындағы «Зұлқарнайұлы Мұса қажы» мешіті тағы бір игілікті шара ұйымдастырды. Олар «Шығармашылық үйі» орталығының 30 бүлдіршініне мерекелік сыйлықтар табыс етті. 

       Орталықтың басшылары ауданның бас имамы Еркебұлан Қошан басқарған мешіттің ұжымына шынайы ризашылығын білдірді. Бүгінгі жас ұрпақ еліміздің ертеңгі иманды да ибалы ұл-қыздары екені белгілі.

Қазақ «Тәрбие басы тал бесіктен басталады» деп босқа айтпайды. Мұндай қайырымдылық шаралары балдырғандардың жадында ұзақ сақталып, олардың болашақта мейірімді, жүрегі жомарт азаматтар болып қалыптасуына септігін тигізеді деген үміттеміз дейді бас имам Еркебұлан қажы.  

Қостанай облыстық мешітінің

баспасөз қызметі

   Арқалық қалалық «Мұхтасиб Әлмұхаммед» мешітінің ұжымы 1 маусым – Халықаралық балаларды қорғау күнінде «Арқалық қаласының психологиялық-педагогикалық түзеу кабинеті» мекемесіндегі бүлдіршіндерді  қуанышқа бөледі.

Бас имам Дархан Қосылбаев бастаған мешіт ұжымы ондаңы тәрбиеленіп жатқан 50 балаларға ішіне тәтті тағамдар салынған 50 пакетті тапсырды.

Еліміздегі  есте қаларлық мерекелерді өз деңгейінде өткізуді өзінің азаматтық парызы санайтын мешіт мекеме қызметкерлерінің алғыстары шексіз.

«Мынау тіршілікте балдырғандардың жүзінен қуаныш нышанын көруден асқан бақыт жоқ. Ал балалар қолдарына сыйлықты алған кездеріндегі сәтті тілмен айтып жеткізу әсте мүмкін емес. Мұндай игі шаралар алдағы уақытта да жағасын табатын болады» дейді Дархан имам. 

Қостанай облыстық мешітінің баспасөз қызметі

Қазақстан мұсылмандары діни басқармасының жанындағы «Қамқор - Шарапат» саллтық қызмет көрсету орталығы құрылғаннан бері бірқатар игі бастамаларға ұйытқы болып келеді.

Осы мамыр айының соңғы күндері олардың ұйымдастыруымен бүкіл елімізде зираттарды қоқыстардан тазалау мақсатында жұмыс атқарылды. Бұл бастаманы Қостанай өңіріндегі мешіт имамдары мен жамағатта да қолдады.

Міне, мұндай ұйымшылдықтың арқасында барлық зираттар қалыппа келтіріліп, барша жүрегінде иманы бар кісілер көпшіліктің алғысына бөленді.

Мәселен, Арқалық, Рудный қалалары мен Сарыкөл, Амангелді, Мендіқара аудандарындағы мешіт имамдары зиратты тазалау акциясына белсене қатысқан жамағаттарға түскі ас пен моншаға түсу мәселесін қолға алды.

Жалпы облыстағы дін қызметкерлері «Өлі риза болмай, тірі байымайды» деген қағиданы ерік ұстанып отырғаны баршаны да шексіз қуанышқа бөлейді.

Қостанай облыстық мешітінің баспасөз қызметі

Қостанай облысының Бас имамы Бахытбек Нұрғабылұлы және наиб имам Әлішер Ертайұлы Мендіқара ауданында арнайы іс сапарда болды. Бас имам алдымен аудан әкімі Нұрлан Жеңісұлымен кездесіп, мешіт жанынан асхана құрылысының салыну жоспарымен танысты. Өңірдегі діни ахуалдың жай-жапсары жайлы тілге тиек етті.

Сондай-ақ, осы сапар барысында облыстың Бас имамы Бахытбек Тәжімбет республикаға белгілі Мұхамеджан Қарабаев атындағы облыстық оңалту орталығының ұжымымен жүздесті. Онда Ислам дінінің өткен кезеңдегі тарихы, оның мәні мен мақсатына жан-жақты тоқталды.

Ал Әлішер Балахмет өзекті мәселелер бойынша Меңдіқара аудандық әскери комиссариат қызметкерлерімен кездесіп, олардың сұрақтарына нақты жауап берді.

Сонымен қатар «Халал даму» саласы бойынша Әлішер Ертайұлы аталмыш аудандағы нан өнімдерін шығаратын наубайхананың тыныс- тіршілігімен танысып, сертификат алушыларға қойылатын талаптары жөнінде түсіндірді.

Жалпы, осы жолғы дін қайраткерлерінің Меңдіқара ауданындағы сапары өте әсерлі өтті. Көкейде жүрген маңызды жайлар ортаға салынып, алдағы  жүзеге асырылатын мәселелер айқындалды.

Қостанай облыстық мешітінің баспасөз қызметі

Пандемия жүрегінде иманы бар азаматтардың мейірімділігі мен қайырымдылығын арттыра түсті. Олар дерттің алдын алу мақсатында да өздерінің жанашырлық қырларын барынша таныта түсуде.

Мәселен, жуырда сонау Мәскеу қаласында кәсіпкерлікпен айналысатын бауырымыз Жарас Баймұханов және оның достары Талғат Әубәкіров, Айбат Темірбеков үшеуі демеушілік жасады. Олар 1250 бет пердені тарту етті.

Жомарттық жасап, нағыз азаматтық қырларын көрсеткен кәсіпкер жігіттерге алдағы уақытта мықты денсаулық тілейміз. Жұмыстары әрдайым алға басып, табыстан-табысқа жете берсін.

Қостанай облыстық мешітінің баспасөз қызметі

21.05.2021

                                                                                        «Дүние бір қисық жол бұраңдаған,                                                                                         Бақ тайса мал мен басың құралмаған.                                                                                          Күніне мың бір пәле көрсеңдағы                                                                                         Сонда да күдер үзбе бір Алладан!»

Бүгінде өз ғұмырында басына іс түспеген, қиыншылыққа ұшырамаған адамды табу қиын болар. Осындай сәттерде басқа түскен іске төтеп бере алмай сабырсыздық танытып, көптеген қателікке ұрынып қайғы үстіне қайғы қосып жататындар бар. Сондай кезде: «Я, Құдай мен саған не жазып едім» - деп Аллаға қарсылық танытып-та қоятынымыз жасырын емес.   

       Негізінде адам баласы тағдырындағы істердің бір Алладан екендігіне сену бұл – иманның шарттарының бірі. Құранда:  

«Жер бетіндегі және өздеріңе тап келген қандай да бір мұсибат (бәле) Біз оны жаратпастан бұрын Кітапта жазылған. Ақиқатында бұл Алла үшін оңай. Біз бұл туралы сендердің өткізіп алғандарың үшін қайғырып, сендерге берілген нәрсе үшін қатты қуанбауларың үшін айттық..» (Хадид с.22-23).    

       Түсінген жан үшін адамды тағдыр ісіне күмәнды етіп қою бұл – ібіліс шайтанның айла-шарғысы. Мысалы: бір адам қандай бір іске үлгіре алмай қалса не басына бір сынақ түссе, шайтан келіп: «Егер сен былай істегеніңде ғой, мұндай болмас еді», – деп азғырып, пендені өкінішті жағдайға түсіріп қояды. Ардақты Пайғамбарымыз мұндай жағдай туралы-да біздерге ескертіп кеткен. Әбу Һурайрадан (р.ғ.) жеткен риуаятта Алланың елшісі (с.ғ.с)  былай деген: «Күшті мүмін Алла үшін әлсіз мүміннен гөрі қайырлы әрі сүйікті. Алайда әрқайсысында да қайырлылық бар. Өзіңе пайда әкелетін нәрсеге тырысып, Алладан көмек сұра, әлсіздік танытпа. Егер бір нәрсе болып қалса «егер былай істегенімде олай болмас еді» деме, «Алла солай мөлшерледі, қалағанын қылды» деп айт. Расында «егер» сөзі шайтанға жол ашады». (Мүслім риуаяты). Сол үшін-де Алланың тағдырға жазған ісіне разы болып, сабырлықпен шүкір етуіміз керек.

       Адам баласы өзінің қимасын жоғалтып қайғыға душар болғанда, қиындық үстіне қиындыққа тап болып, алдағы күннің сәулесі өше бастаған шақта үміт – адам баласын әуелете тік көтеріп әкетеді. Үміт арқылы адам Алланың қалауымен өзінің шамам келмейді-ау деп ойлаған нәрселеріне қол жеткізеді.           

        Қоғамда ауруынан айыға алмай жүрген науқастар, перзент көрмей жүрген отбасы, қалаған қызметіне қол жеткізе алмай жүрген мамандар, оқуға түсе алмай қалған жастар осы секілді сан қилы сынақтарға түсіп жолы болмай  жүрген жандар бар. Мұндайда сағын сындырып, өмірден түңіліп кетпестен, керісінше келешектен үміт күтуі қажет. Алла тағала Құранда: «Алланың рахымынан күдер үзбеңдер» дейді (Зүмәр с.53). Ілгеріде өткен тақуа-ғалымдардың бірі: «Алланың мейірімділігін тілеу – пенде үшін үміт есігін ашады. Оған шынайы ықыласымен құлшылық етуге күш-қуат береді» деген. Үміт бұл – Хақ тағаладан пана тілеу арқылы, ырыс-берекеге қол жеткізу. Халық қаһарманы, батыр, қазақтың көрнекті жазушысы Бауыржан Момышұлының: «Үміт өрге тартады, үмітсіздік көрге тартады» деген сөзі ойға-ой қосып, қиналған пендеге қанат бітіреді.

      Үміт – сенімнен туындайды. Иман келтірген жан әрқашан келешекке үмітпен қарайды. Ал, үміт арқылы қиын белестерден қиналмай асып, биік шыңдарға шығуға болады. Қазақта: «үмітсіз тек шайтан» деп айтады. Бұл сөздің астарында терең мағына бар. Қазақтың бұл сөзі асыл дініміз исламнан бастау алатындығы анық. Мұсылман баласының еш уақытта үміті, күдері үзілмеуі керек. Біле-білсек Алладан үмітін үзу - үлкен күнәлардың қатарына жатады. Өйткені Құранда: «Раббыңның рахымдылығынан адасушылардан басқа кім үміт үзеді?»  (Хижр с.56)-деп үміт үзудің күнә екендігін ескертеді.

         Келесі бір аятта: «Ей, шектен тыс күнә жасап, өздеріне зиян келтірген құлдарым! Алланың рақымдылығынан үміттеріңді үзбеңдер. Алла күнәлардың барлығын кешіреді». (Зумәр, 53) – деп, бізге бұйыру арқылы үмітсіздікке бой алдыруымызға тыйым салып тұр. Шынында да, өмірде орны толмас қателікке бой алдырып, өкініштен өзегі өртенген жандарға осы бір аят үлкен үміт сыйлап, бақытқа жетуіне сеп болмақ. Тіпті, өзін күнәһар  санап, иманға жақындай алмай жүрген пенделерге исламды қабылдатты десек-те болады. Пайғамбар заманында хазірет Хамзаны өлтірген Уахшидің өзін, Алла елшісі (с.ғ.с.) бірнеше рет исламды қабылдауға шақырды. Алайда, Уахши жан дүниесін кернеген үмітсіздік пен күдіктен арыла алмады. Ол пайғамбардың жақынын өз қолымен өлтіргені үшін өзін «кешірімге лайық емеспін» дегенге сендірді. Сол үшін де мұсылманшылықты қабылдауға тәуекел ете алмады. Пайғамбарымыз үшінші рет құран аятын жазып жібергенде ғана Уахшидің бойындағы кешірімге деген күдік-күмән сейіліп, көкірегіндегі үміт оты қайта маздап, мұсылмандықты қабылдады.

Үкімі қияметке дейін өзгермейтін Құрандағы бұл аят бүгінгі адамдарға да үміт сыйлаумен қатар, Алла қаласа келер ұрпаққа да үміт қайнары болмақ.

       Қадірлі оқырман қауым! Сөзімізді қорытындылай келе айтарымыз:

Үміт – Құдай тағаланың кешірімінің кеңдігіне сену. Құранда: «Менің рахымым барлығын сыйдыратындай өте кең»  (Ағраф с.156), – дейді. Міне, осылайша Раббымыз өз құлдарына қаншалықты мейірімді екендігін айтып, үміт сәулесін өшіріп алмауымызды ескертеді.

Рудный қалалық «Нұр» мешітінің бас имамы Бектұрсын Торғайбайұлы