Қостанай қалалық «Жайлаубай ата» мешітінің Бас имамы, Қостанай облысы бойынша «Қамқор-шарапат» бөліміне жауапты Шоқан қажы Ғазизұлы Қазақстан мұсылмандары діни басқармасы «Қамқор-шарапат» салттық қызмет көрсету орталығының директоры Мейрамбек Қабылбекұлының арнайы шақыруымен Астана қаласында болды.

Дін қайраткері аталмыш орталықтың тыныс-тіршілігі және жұмыс барысымен танысты. Онда қазіргі таңдағы осынау ұжымның негізгі ұстанған бағыт-бағдары, мақсат-мұраты, діни салт-дәстүрді атқарудағы заңдылықтары түсіндірілді.

Сондай-ақ, алдағы уақытта Қостанай шаһарында діни қызметкерлер үшін семинар-тренингтер өткізу жайы да қарастырылды.

Қостанай облыстық мешітінің баспасөз қызметі

Қостанай қалалық «Жайлаубай ата» мешітінің ұжымы қасиетті жұма күні дастарқан жайып, жамағатқа құрмет көрсетті.

Онда намазхандар ыстық бауырсақ пен тәтті шырын судан дәм татты. Олар бір-бірімен жылы жүздесіп, әңгіме-дүкен құрысты. Дұға жасап, жоғары көңіл күймен тарқасты.

Қостанай облыстық мешітінің баспасөз қызметі

Республикалық ақпараттық -насихат тобының мүшесі Ұлан Шарипов қасиетті жұма күні Қазақстан Республикасы ішкі істер министрлігіне қарасты Шырақбек Қабылбаев атындағы Қостанай академиясының курсанттарымен кездесті. Онда жастардың бойына патриоттық сезімді нығайту мақсатында отансүйгіштік және жауапкершілікті терең сіңіру жөнінде келелі әңгіме қозғады.

Сондай-ақ, ол Қостанай облыстық «Аймағанбет қажы Спанұлы» мешітінде жамағатпен жүздесу барысында «Ысырапшылдық - Алла сүймейтін іс» тақырыбында уағыз айтты. Оның терең мазмұнды ұлағатты сөздерін жиналған жұртшылық ұйып тыңдады.

Қостанай облыстық мешітінің баспасөз қызметі

Бүгін, Республикалық ақпараттық - насихат тобының мүшесі Ұлан Беркенбайұлы Шарипов Қостанай қаласына келді.

Ол алдымен Қазақстан Республикасы ішкі істер министрлігі Қылмыстық Атқару жүйесі комитетінің №76 мекемесінде болып, жазасын өтеушілермен кездесті. Онда Құран ілімінің қайнар бұлағы, араб тілін білудің маңыздылығы туралы әңгімеледі. Қатысушылар тарапынан қойылған сауалдарға нақты жауап берді.

Содан кейін Қостанай облыстық «Аймағанбет қажы Спанұлы» мешітінің кітапханасында Ахмет Байтұрсынұлы атындағы Қостанай өңірлік университетінің студенттерімен дидарласты. Рухани ордада «Исламдағы жастардың орны» тақырыбы қозғалды.

Басқосуда уақытты барынша тиімді пайдалану, тиянақты білім алу, әрдайым жауапкершілікті терең сезіну және қазіргі таңдағы өзекті мәселе ойын құмарлық жайлы да айтылды. Студенттер көкейінде жүрген сұрақтарына жауап берілді.

Сондай-ақ, Ұлан Беркенбайұлы қалалық «Марал ишан» мешітінде ақшам намазынан кейін жамағатпен жүздесті. Мұнда «көркем мінезге жататын ұят» туралы уағыз айтып, жиын соңында қоғамдағы өзекті болған мәселе екі дуалдың арасында намаз оқу, әминді іштен айту секілді тақырыптарды қамтыды.

Қостанай облыстық мешітінің баспасөз қызметі

Облыс орталығындағы «Жайлаубай ата» мешітінің наиб имамы Қазбек Кошеров жергілікті гуманитарлық колледжінің студенттерімен кездесті. Онда бүгінгі таңдағы өзекті мәселе - «Суицит-үлкен күнә» тақырыбында семинар сабағын жүргізді.

Бұл дәрістің мақсаты мен мазмұнын тереңірек аша түсу үшін интерактивтік тақта мен көрнекті құралдар пайдаланылды. Сондай-ақ, студенттер тарапынан қойылған сұрақтарға нақты жауап берілді.

Білім ордасының ұстаздары мен жастар Қазбек имамға тәрбиелік мәні зор әңгімесі үшін ризашылықтарын білдірді.

Қостанай облыстық мешітінің баспасөз қызметі

Қостанай қалалық «Жайлаубай ата» мешітінің ұстазы Аяулым Ермекқызы әйел-қыздар жамағатына "Мәйіт жуу және кебіндеу" семинар өткізді.

Жалпы, дүниеден озған мұсылманды соңғы сапарға ғұсылдандырып, кебіндеп, жаназасына қатысу әрбір иманды адамның міндеті.

Аталмыш семинарда мәйітті жуу мен кебіндеудің қыр- сыры үйретіліп, егжей-тегжейлі түсіндірілді.

Қостанай облыстық мешітінің баспасөз қызметі

Өткен жылдан бері мемлекет басшысы Қасым-Жомарт Тоқаевтың бастамасымен елімізде «Таза Қазақстан» республикалық экологиялық акциясы жүріп жатқаны белгілі.

Осы акция аясында Қостанай өңіріндегі өкілдік облыстық «Аймағанбет қажы Спанұлы» мешітінде сенбілік өткізді. Оған Бас имам Бектұрсын қажы Уәлиев бастаған дін қызметкерлері мен жамағат белсене қатысты.

Таңертеңнен бастап қолдарына қажетті құрал-саймандар ұстаған үлкенді-кішілі қауым ұйымшылдық танытып, имандылық ордасының аумағын алыстан көз тартатындай етіп қоқыстардан тазартты.

Қазақстан мұсылмандары діни басқармасы тазалыққа жіті назар аударуда. Әр апта сайын осындай сенбілік өткізуді тапсырып, оны күн тәртібіне енгізді. Бүгін де өздеріңіз куә болғандай, өзгелермен қатар мешіттегі жастар секторы да аянбай еңбек етті, - деп сөзін түйіндеді наиб имам Әлішер Ертайұлы.

Мұндай экологиялық акциясы облыстағы барлық аудандар мен қалалардағы, кенттердегі мешіттерде де талапқа сай ұйымдастырылды.

Қостанай облыстық мешітінің баспасөз қызметі

Қазақстан мұсылмандары діни басқармасының Қостанай облысы бойынша өкілдігі діни оңалту бағытына жұмылдырылған мамандарға семинар ұйымдастырды.

Аталған шараға өңірдегі қалалық және аудандық мешіттердің Бас имамдары мен басқа да дін қызметкерлері қатысты.

Жиында Қостанай облысының Бас имамы Бектұрсын қажы Уәлиев сөз алып, күн тәртібіне арқау болған мәселелерге аса жауапкершілікпен қарап, жұмысты барынша жандандыру керектігін айтты.

Облыстағы діни оңалту бағытына жауапты маман Сабыржан Есмурзин 2025 жылы жүзеге асырылатын міндеттер мен мақсаттарға тоқталды. Сонымен қатар оңалту жұмыстарын жүргізудің тиімді тәсілдері аясында маңызды жайлар мен ақпараттық-түсіндіру жұмыстарын баяндады.

Қостанай облыстық мешітінің баспасөз қызметі

Шәууәл айына арналған ауызашар

Қостанай қалалық «Жайлаубай ата» мешітінің ұжымы Шәууәл айының 6 күндік Оразасы құрметіне әрі бейсенбінің фазилатына арнап жамағатқа ауызашар дастарқанын жайды.

Содан кейін наиб имам Бақберсін Ізбасаров жиналғандарға уағыз-насихат айтты. Жұртшылық оның ұлағатқа толы сөздерін ұйып тыңдады.

Бірлік бар жерде тірлік бар

Облыс орталығындағы «Жайлаубай ата» мешітінің ұжымы қасиетті жұма күні түрлі есте қаларлық тағылымды шаралар өткізуді дәстүрге айналдырды.

Бұл жолы намаздан кейін жамағаттардын ауызбірлігі мен ынтымағын нығайту мақсатында бауырсақ пен сусын таратылды.

Қостанай облыстық мешітінің баспасөз қызметі

Арқалық қалалық «Мухтасиб Әлмұхаммед» мешітінде Айт мерекесі биыл да ойдағыдай аталып өтті. Мәселен, Абай Құнанбаев атындағы № 6 мектебінің 5-ші сынып оқушылары мен ұстаздары имандылық ордасына арнайы келді.

Бас имам оларды мешіттің тыныс-тіршілігімен таныстырып, Ораза айт мұсылмандар үшін айтулы мереке екендігін түсіндірді. Балалар дін қайраткеріне нақты сұрақтарын қойып, тұщымды жауап алды.

Сондай-ақ, аталмыш мешітте Ораза айттың құрметіне 30 бүлдіршінге тәттілер таратылды. Бас имам оларды мерекемен құттықтап, оның мәні мен маңызы жайлы баяндады.

Қостанай облыстық мешітінің баспасөз қызметі