Қостанай қалалық «Жайлаубай ата» мешітінің ұжымы қасиетті Рамазан айы басталғалы бері жамағатқа тағылым әрі өнегелі болар жарқын істі қолға алды. Күнде таң намазынан кейін имамдар Құранның қазақша аудармасынан бір парадан оқып, оның мағынасын түсіндіруде.

Сондай-ақ, екінді намазынан соң Қарилар жамағатпен бірігіп арабшадан бір пара Құран хатым етуде. Ауызашарға жоғары оқу орындары мен колледж студенттерін шақырып, қонақтарға ғибратты болу мақсатында белгілі ақындардың өзекті тақырыптарды арқау еткен шығармалары мен өлеңдерінен үзінділер оқытылып, бейнероликтер көрсетілуде.

Қостанай облыстық мешітінің баспасөз қызметі

Баршаға мәлім, үстіміздегі жыл «Жұмысшы мамандықтары жылы» деп жарияланды. Осыған орай Қостанай қалалық «Жайлаубай ата» мешітінің ұжымы қасиетті Рамазан айында шаһардың тазалығына қызмет етіп жатқан “АБЗ+” мекемесінің мамандарына қайырымдылық көмек жасады. Оларға көлемі 100 мың теңге тұратын азық-түлік таратылды.

Соңында имандылық ордасының асханасында ауызашар дастарқаны жайылып, еңбек адамдарына құрмет көрсетілді. Жиналғандар ұйымдастырушыларға шынай алғысын білдірді.

Қостанай облыстық мешітінің баспасөз қызметі

Жақында Қазақстан мұсылмандары діни басқармасының 35 жылдығы және қасиетті Рамазан айының құрметіне облыстық «Аймағанбет қажы Спанұлы» мешітінің асханасындағы ауызашар кезінде сұрақ-жауап түріндегі викторина өткізілді.

Бұл тағылымы мол шараны наиб имамдар Нұрлан Сейдағалиев пен Абзал Сұлтанғалиұлы ұйымдастырды. Онда Құран кітабы басшылыққа алынып, жамағатттың діни білімі мен сауатын арттыруға айрықша назар аударылды.

Викторина барысында белсенділік танытқан жамағатқа ұлы Мұхаммед пайғамбарымыздың өмірі арқау болған «Адамзаттың асыл тәжі», Құран және басқа да танымдық кітаптар берілді.

Қостанай облыстық мешітінің баспасөз қызметі

Қасиетті Рамазан айы басталғалы бері Шоқан қажы Әмірханов басшылық ететін «Жайлаубай ата» мешітінің ұжымы қайырымдылық мақсатында өзгелерге өнеге боларлық ізгі шаралар өткізуде.

Мәселен, Оразаның алғашқы күндері көмекке мұқтаж көп балалы 10 отбасыға азық-түлік тапсырып, олардың ризашылығына бөленді. Шаңырақ иелері демеушілерге өздерінің шынайы алғысын жеткізді.

Қостанай облыстық мешітінің баспасөз қызметі

Жуырда Қазақстан мұсылмандары діни басқармасының 35 жылдығына орай және қасиетті Рамазан айының қарсаңында Арқалық қалалық «Мухтасиб Әлмұхаммед» мешітінің жанынан асхана ашылды.

Жергілікті халықтың игілігіне берілген орын 900 шаршы метрді құрайды және 500 адамға лайықталған. Осынау алыстан көз тартатын зәулім ғимарат қала әкімі Әмірхан Асановтың бастамасымен әрі демеушілердің көмегімен салынды. Енді мұнда түрлі діни рәсімдер өткізілетін болады.

Асхананың лентасы салтанатты түрде қиылып, қала әкімі осында алғашқы болып өз отбасының атынан жиналған жамағатқа ас берді. Аруақтарға бағышталып құран оқылды.

Аталмыш қала өміріндегі айтулы жиынға Қостанай облысының Бас имамы Бектұрсын Уәлиев, Аманкелді ауданының әкімі Қанат Кеделбаев және басқа да ел арасында үлкен құрметке бөленген азаматтар қатысып, арқалықтықтардың қуанышына ортақтасты әрі ең ізгі тілектерін білдірді.

Бектұрсын Торғайбайұлы өз сөзінде асхана құрылысына қаржылай қолдау көрсеткен кәсіпкерлерге, жүрегі жомарт жандарға, шаһар басшысы Әмірхан Асановқа Қазақстан мұсылмандары діни басқармасының атынан Алғыс хаттарды табыс етті. Сондай-ақ бірқатар қомақты үлестерін қосқан кісілердің иығына шапан жабылып, құрмет көрсетілді.

Қостанай облыстық мешітінің баспасөз қызметі

Қасиетті Рамазан айында жақсы жаңалық. Тобыл қаласында орналасқан «Радуга» дүкенінің иесі арақ-шарап және темекі сатудан бас тартты. Бұл өзгелерге өнеге боларлықтай мысал.

Сондықтан Қостанай аудандық «Маңдай батыр» мешітінің наиб имамы Ерлан Сыздықов, алқа мүшелері және Сайым ата бастаған қадірменді ақсақалдар жоғарыда аталған сауда орнына арнайы барып, ұжымға Алғыс хатты табыс етті. Осылай қоғамды жаман әдеттен арылтуға ықпалын тигізетін жандардың қатары көбейе түссе, құба-құп.

Қостанай облыстық мешітінің баспасөз қызметі

Рамазан айының келуіне байланысты Қостанай облыстық «Аймағанбет қажы Спанұлы» мешітінде зум программасы арқылы кеңейтілген жиын болып өтті. Қостанай облысы өкілдігіне қарасты барлық қала, аудан имамдарына қасиетті Рамазан айына дайындық жағы жан-жақты пысықталды.

Жиында ҚМДБ тарапынан бекітілген Рамазан жоспары таныстырылып, Қостанай облысының бас имамы Бектұрсын Уәлиев өңірдегі бас имамдарға нақты тапсырмалар жүктеді.

Сонымен қатар, өкілдіктің әр бағытқа жауапты имамдар баяндама жасап, алдағы жоспарлармен бөлісті. Мешіттерде тарауих намазының өткізілу тәртібі, жамағатқа уағыз-насихат жұмыстары, ауызашар ұйымдастыру және қайырымдылық шараларын жүйелі түрде жүзеге асыру мәселелері талқыланды. Санитарлық тазалықты сақтау және келушілерге барынша ыңғайлы жағдай жасауға ерекше назар аударылды.

Берекесі мол қасиетті айды баршамызға ынта-жігермен, белсене атсалысып, жоғарғы деңгейде өткізуді тапсырды.

Қостанай облыстық мешітінің баспасөз қызметі

Ағымдағы жылдың 27 ақпанында Қостанай қалалық «Жайлаубай Ата» мешіті әйел-қыздар жамағатына Қош келдің Берекелі Рамазан атты рухани іс-шара өткізді. Оған мешіттің ұстазы Аяулым Ермекқызы ерекше дайындық жасап, ойдағыдай ұйымдастыра білді.

Аталмыш іс-шара Құранмен басталды. Қазақ халқының дәстүрін жаңғырту мақсатында әжелер жамағаты жарапазан әнін айтып жамағатты сүйсіндірді.

Жиналған жамағатқа оразаның пайдалары жайлы уағыз-насихаттар айтылып, дастархан жайылды. Қасиетті айдың құрметіне дінге жанашыр болған әйел кісілерге сыйлықтар мен алғыс хаттар берілді.

Қостанай облыстық мешітінің баспасөз қызметі

Қостанай облысының өңірлік коммуникациялар қызметі биылғы Рамазан айының өту тәртібі, ұйымдастырылатын шаралар, Қадір түні мен пітір садақасына қатысты маңызды ақпаратпен брифинг ұйымдастырды. Эфирге Қостанай облысының бас имамы Бектұрсын Торғайбайұлы, Алтынсарин аудандық «Алдиярұлы Жанұзақ» мешітінің бас имамы Ансаған Абдурхаман және Қостанай облысы әкімдігінің дін істері басқармасының бөлім басшысы Әбдиев Сапарғали Әкімбекұлы қатысты.

Әуелі баспасөз мәслихатына мәлімет берген Қостанай облысының бас имамы Бектұрсын Торғайбайұлы:
Әлем мұсылмандарының асыға күткен Рамазан – айы да келіп жетті. Бұл айда мұсылмандар ізгі амалдар жасауға, рухани кемелденуге ерекше мән береді. Ол жамағатты қасиетті айда сауапты істерді арттырып, ізгілік пен мейірімділікке басымдық беруге шақырды. Рамазан – сабыр мен тақуалық айы. Алла қаласа, 2025 жылы Рамазан айы 1 наурызда басталып, 29 наурызда аяқталады. Ал наурыз айының 26-нан 27-не қараған түн – қасиетті Қадір түні. 30 наурыз – Ораза айт мерекесі болып белгіленді», - деп атап өтті.

Сондай-ақ, кездесуде Алтынсарин аудандық «Алдиярұлы Жанұзақ» мешітінің бас имамы Ансаған Абдурхаман орыс тілінде сөз алып, Рамазан айының адам руханияты мен қоғамдағы береке-бірлікті нығайтудағы рөлі туралы баяндады.

Кездесу барысында қасиетті айда өңір мешіттерінде ұйымдастырылатын рухани іс-шаралар туралы айтылды. Рамазан айында ауызашар дастархандары жайылып, қайырымдылық акциялары өткізіледі. Сондай-ақ, Қазақстан мұсылмандары діни басқармасының Төралқа мәжілісінде биылғы пітір садақа мөлшері 655 теңге болып бекітілгені хабарланды. Пітір садақаны ұн, құрма немесе мейіз құнымен беруге болады.

Қостанай облыстық мешітінің баспасөз қызметі

Таяуда облыстық «Аймағанбет қажы Спанұлы» мешітінің наиб имамы Азамат Мурзаканов Қостанай қаласының маңайындағы бірқатар ауылдарда болып, тағылымды кездесулер өткізді.

Осынау мемлекеттік мекемелердің қызметкерлері мен білім ордаларының мұғалімдері арасында ұйымдастырылған жиындарда қазіргі таңдағы өзекті мәселе «Теріс ағымдардың алдын алу», «Конфессияаралық және этносаралық келісім» тақырыптары арқау болды.

Басқосуларда қатысушылар көкейде жүрген сауалдарын қойып, оған нақты жауап алды.

Қостанай облыстық мешітінің баспасөз қызметі