Қадір түні мың айдан қайырлы. Мұны Пайғамбарымыз (Алланың оған игілігі мен сәлемі болсын) Рамазан айының соңғы он күнінің тақ түндерінен іздеңдер деген. Соның ішінде 26- нан 27-не қараған түні қадір түні болу ықтималдығы жоғары екенін айтқан ишараттар бар.

Сол мақсатта жылдағы үрдіске сәйкес барлық мешіттерде осы түнді жоспар бойынша өткізу қалыптасқан. Сондықтан облыстық «Аймағанбет қажы Спанұлы» мешітінде халық көп жиналып, қасиетті түн өз деңгейінде ұйымдастырылды.

Алдымен Құранды осы имандылық ордасына жақында ұстаздық қызметке кіріскен қари Мұртаза Ертайұлы мен республикалық қарилар медресесінің ұстазы Мұхаммедали Садуақасұлы оқыды. Содан кейін тарауық намазындағы хатым Құранның аяқталғандығына байланысты батаны Қостанай облысының бас имамы Бектұрсын қажы Торғайбайұлы жасады. Ол Рамазан айында жамағаттың көңілінен шығып, бойларындағы білім-біліктерін Құранды толық оқып, қажыр-қайраттарын аямай жұмсаған Қариларға ілтипат ретінде иықтарына шапан жауып, көпшіліктің атынан ақшалай сыйлықты тарту етті.

Бектұрсын қажы Уәлиев бастаған имамдар Қадір түнінінің қадір -қасиеті жайлы жиналғандарға мазмұны терең, тыңдауға ұғынықты уағыз айтты.

Сондай-ақ жиналған қауымның діни білімін шыңдау мақсатында танымдық викториналық сұрақ-жауап ойындары өткізілді. Жеңімпаздарға, мешіттің бес уақыт намазына тұрақты қатысқан жамағатқа және ауызашар барысында белсенді қызмет көрсеткен шәкірттерге Құран және діни кітаптар табыс етілді. Тәсбих намазы оқылып, еркін құлшылық жасауға мүмкіндік берілді.

Қадір түнінің құрметіне мешіттің асханасында сәресіге арналған дастархан жайылды. Содан кейін таң намазы оқылып, жұртшылық жоғары көңіл-күймен тарасты.

Қостанай облыстық мешітінің баспасөз қызметі.

Қасиетті Рамазан айында Наурыз мейрамының құрметіне Қостанай облыстық «Аймағанбет қажы Спанұлы» мешітінің қызметкерлері ұлттық ойындар - гір көтеру, арқан және таяқ тартудан сайыс ұйымдастырды.

Жұма намазынан кейінгі мешіт жамағаты арасындағы бұл жарыс өте тартысты өтті. Онда имамдар да белсенділік танытып, команда құрамы намысты қолдан берген жоқ.

Сайыстың соңында облыстың Бас имамы Бектұрсын Уәлиев сөз алып, ата-бабамыздан келе жатқан салт-дәстүрімізді, яғни ұлттық ойындарды дәріптеп, оны халыққа насихаттау аса маңызды екендігіне тоқталды. Бүгінгі шара соның бір жарқын көрінісі болып табылатындығын айтты.

Сондай-ақ, ол жеңімпаздарды құттықтады. Сый-сияпат жасап, діни кітаптарды табыс етті. Кешке барлық қатысушыларға ауызашар берілді.

Қостанай облыстық мешітінің баспасөз қызметі

Ұзынкөл ауданынан шыққан қажылар аз емес. Олар жылдағы қалыптасқан дәстүр бойынша Ораза айында жергілікті «Құрман баба» мешітінің асханасында дастархан жайды. Жиналған жамағат зәм - зәм суымен ауыз ашып, дайындалған тағамнан дәм татты.

Сонымен қатар қажылар көмекке мұқтаж 10 отбасына азық - түлік салынған «Рамазан қоржынын» табыс етті.

Жиналған халық жерлестерінің ыстық ықыластарына дән риза болып, ақсақалдардың ақ батасын алды.

Қостанай облыстық мешітінің баспасөз қызметі

Ұзынкөл ауданындағы «Айгөлек» бөбекжайында Наурыз мейрамы жоғары деңгейде аталып өтті. Онда салт-дәстүрімізге сай ұлттық киімдер киген бүлдіршіндер би билеп, ән шырқады.

Жергілікті «Құрман баба» мешітінің Бас имамы Есенгелді қажы Сақтағанұлы тәрбие орнына арнайы ат басын бұрып, қызметкерлерге ризашылығын білдірді. Балақайларға «Рамазан тәттілері» себетін тапсырып, ақ батасын берді.

Қостанай облыстық мешітінің баспасөз қызметі

Рамазан айында Қостанай қалалық «Жайлаубай ата» мешітінің қызметкерлері қайырымдылық шарасын ұйымдастыруға ерекше көңіл бөлуде.

Таяуда осы сөзіміздің нақты айғағы ретінде 22 көп балалы отбасыға 220 мың теңгенің азық-түлгі табыс етілді.

-Қайырымдылық адам бойындағы ең ізгі қасиеттердің бірі. Сондықтан біз Оразаның алғашқы күнінен бастап бұл сауабы мол акцияға айрықша назар аудардық. Қаншама көмекке мұқтаж жандарға қол ұшын бердік. Дер кезінде үн қатқан демеушілерге алғысымыз шексіз, - дейді Бас имам Шоқан қажы Ғазизұлы.

Қостанай облыстық мешітінің баспасөз қызметі

Лисаков қалалық «Әбдіхаим Саламатұлы» мешітінің қызметкерлері қасиетті Рамазан айында «Рамазан тәттісі» атты қайырымдылық акциясын ұйымдастырды.

Осынау іс-шара барысында 20 балаға «Рамазан тәттісі» себеті үлестірілді. Мұндағы басты мақсат – өскелең ұрпаққа қасиетті айдың мәні мен маңызын жете ұғындыру.

Бас имам Әкімбек Асанов бүлдіршіндер мен ата-аналарға Оразаның ерекшелігі туралы айтып, жан-жақты мағлұмат берді. Жиын соңында қатысушылар мешіт ұжымына алғыстарын жеткізді.

Қостанай облыстық мешітінің баспасөз қызметі

Қазақстан мұсылмандары діни басқармасы жастарды имандылыққа баулу мен оларға тәлімді тәрбие беруге айрықша назар аударып жатқаны белгілі. Осы талапты басшылыққа алған Қостанай қалалық «Жайлаубай ата» мешітінің қызметкерлері де бірқатар игі жұмыстарды жүзеге асыруда.

Мәселен, имандылық ордасының ұстаздары оқушылардың көктемгі демалысын пайдалана отырып, діни дәрістерді оқытуды одан әрі жалғастыруда. Наиб имам Қазбек Кошеров қасиетті Рамазан айында балаларға Құран негіздерін және әліпбиді үйретіп жатыр.

Бас имам Шоқан қажы Әмірхановтың айтуына қарағанда, оқушылар сабақ барысында көп жайды көңілге түйіп, діни сауатын арттыруға толық мүмкіндік алады.

Қостанай облыстық мешітінің баспасөз қызметі

Таяуда Федоров аудандық «Жиентай қажы» мешітінің ұжымы қасиетті Рамазан айының құрметіне қайырымдылық шарасын өткізді.

Онда жүрегі жомарт жандардың қолдауымен 10 отбасыға 125 мың теңге тұратын азық–түлік табыс етілді. Олар өз кезегінде сауабы мол акцияны ұйымдастырушыларға шын жүректен шыққан алғыстарын білдірді.

Қостанай облыстық мешітінің баспасөз қызметі

Наурыз айы келісімен күн жылынып, қыс бойы жиналған қар күрт ери бастады. Осы қарбалас шақта облыс орталығындағы АБЗ+ мекемесінің жұмысшылары уақытпен санаспай жұмыс істеуде.

Міне, осының бәрін көзбен көріп, жүрекпен сезініп отырған Қостанай қалалық “Жайлаубай ата” мешітінің ұжымы еңбек адамдарына қолдау көрсетуді ұйғарды. Сөйтіп, 15 отбасыға көлемі 150 мың теңге тұратын азық-түлікті табыс етті.

Бұл орайда қайырымды жандардың қосқан үлестері айтарлықтай.

Қостанай облыстық мешітінің баспасөз қызметі

Қазақстан мұсылмандары діни басқармасының 35 жылдығына орай Қостанай қалалық «Жайлаубай ата» мешітінің қызметкерлері Л.Толстой атындағы облыстық әмбебап кітапханасымен бірігіп, «Алаш - халық тарихындағы із» атты ғылыми- танымдық конференция өткізді.

Онда Қазақстан Жазушылар Одағының мүшесі, халықаралық «Алаш» сыйлығының лауреаты, ақын Ақылбек Шаяхмет, филология ғылымының докторы, профессор Алмас Әбсадықов сөз сөйледі.

Жиынға бұқаралық ақпарат құралдарының өкілдері, педагогикалық колледж студенттері мен оқытушылары, мешіт ақсақалдары мен алқа мүшелері қатысты.

Студенттер Алаш зиялыларының еңбектерінен үзінділер оқыды. Бейнероликтер көрсетілді. Соңында естелік сыйлықтар табыс етілді.

Қостанай облыстық мешітінің баспасөз қызметі