Қазақ елі тәуелсіздік алғалы бері дініміз өркендеп, ұмытуға шақ қалған салт-дәстүріміз, әдет-ғұрыптарымыз арамызға қайта оралды. Соңғы біраз жылдардан бері Ұлы Мұхаммед Пайғамбарымыздың туған күні яғни Мәуліт мерекесі де тиісті деңгейде аталып келеді.

Бұл орайда белгілі дін қайраткері Бахытбек Нұрғабылұлы Тәжімбет басқаратын облыстық мешіттің ұжымы да іскерлік пен ұйымдастырушылықтың жарқын үлгісін көрсетуде.

Бұған нақты мысал ретінде өткен жұма күні қаланың бір шетінде орналасқан „Мирас„ мәдениет сарайында өткізілген „Адамзаттың абзалы„ деп аталатын Мәуліт мерекесіне арналған рухани кешті ерекше атап өтер едік.

Бір ғажабы, алдын ала құлақтанғандықтан болар, әлгі аталған сәнді ғимаратқа халық өте көп жиналды. Олардың арасында өмірдің талай өткелдерінен өткен ақсақалды қарттарымыз, ақ жаулықты аналарымыз, тіпті студент жастар да аз емес еді.

Залға жайғасқан үлкенді-кішілі қауымның назары бір сәт сахнаға ауды. Онда алдымен „Азан үні„ бейне жазбасы көрсетілді. Содан кейін есімдері елімізге белгілі әріптестеріміз Қыдырбек Қиысхан мен Заңғар Санай ғибратты кештің ашылғанын жариялады.

Жалпы, жүргізушілердің де осы басқосуға үлкен дайындық жасағандықтары бірден көзге ұрды. Олардың сөз саптасы, дін ілімінен хабарларының молдығы көпшілікті тәнті етті.

Мұндай жиын ән-күйсіз, музыкалық тартусыз өтпейтіндігі жалпыға аян. Осы кеште сахнада ойналған күй, мәртебелі қонақтарға арналған шашу рәсімінің де әсері ерекше болғандығын жасырмаймыз.

Мәселен, „Сағындым сені иә, Расулуллаһ„ бейне көрсетілімі де көпшілікке ой салды. Оның тәрбиелік мән-маңызы да ерекше болатын. Сондықтан да жерлестеріміздің ұйып тыңдауынан оны аңғармау да мүмкін емес-ті.

Сахнаға көтерілген Қостанай облысы әкімінің орынбасары Марат Жүндібаев барша қауымды Мәуліт мерекесімен шын жүректен құттықтады. Жерлестерімізге мықты денсаулық, отбасында қуаныш пен ізгілік тіледі.

Өңірден арнайы келген қонақтар мен барша мұсылман жұртшылығын Қазақстан мұсылмандар діни басқармасының Қостанай облысындағы өкіл имамы Бахытбек Нұрғабылұлы Мәуліт мерекесімен құттықтай келе оның маңызына да ерекше тоқталды.

Сондай-ақ облысымыздағы Ислам дінінің өркендеуіне өздерінің лайықты үлестерін қосып келе жатқан мешіт жанашыларына және демеушілерге шынайы алғысын білдіріп, Алғыс хаттармен марапаттады.

Әрине, мұндай құрмет көрсету кімді болсын қанаттандырып, олардың халық арасындағы абырой-беделін барынша асқақтата түсері де хақ. Бір байқағанымыз, мұндай қолы ашық, жүрегі жомарт іскер азаматтардың аз еместігі көңілімізге қуаныш ұялатты.

Көрнекті мемлекет қайраткері, даңқты жерлесіміз Ілияс Омаровтың есімі берілген облыстық қазақ драма театрының сахна шеберлері де Мәуліт мерекесін жоғары деңгейде өткізуге белсене атсалысты. Осы руханият ордасының әртістері белгілі ақын, драматург Ақылбек Шаяхметтің „Өкініш„ деп аталатын туындысын көпшілік назарына ұсынды.

Бұл драмалық шығарманы әсіресе, өскелең жастарға тағылымды жағы ерекше еді. Себебі, мына өмірде жүрегінде иманы бар адам ешқашан да жамандыққа жол бермейді. Жек көрінішті әрекеттерден өздерін әрдайым аулақ ұстайды. Шіркін, ұлдарымыз ұлықты, қыздарымыз қылықты болып өскенге не жетсін!

Айтыс десе делебесі қозбайтын қазақ жоқ. Сондықтан талай мәртебелі сайыстарда топ жарып жүрген дарынды бауырымыз Айбек Қалиев пен айтыс өнерінің аққуы атанған Салтанат Өтелбай сахнаға шыққанда залға жиналған ағайын айрықша құрмет көрсетті.

Олардың өнері шын мәнінде баршаның көңілінен шықты. Суырып-салмалығымен дараланған ағалы-қарындас қандастарымызға жоғары көңіл-күй сыйлады. Сөз құдіреті қашан да жоғары тұратындығын тағы да бір дәлелдей түсті.

Мәртебелі қонағымыз, ҚМДБ-ның „Ақпараттық насихат тобының„ мүшесі Ризабек Батталұлы ұлы Пайғамбарымыздың өмірінен ғибраты мол уағыз айтты. Жиналған жұртшылық одан көп тағылым алды.

Мәуліт мерекесі барысында дін тақырыбына байланысты жазылған өлеңдерді мәнерлеп оқуға да айрықша назар аударылды. Талапкерлердің таудай талабына үлкенді-кішілі қауым дән риза болысты.

Өңірдегі дарынды азамат Абзал Алпысовтың орындауындағы терме де өзінің айрықша мәні, терең мазмұнымен күллі ағайындарды үлкен ойға қалдырды. Сонымен қатар жоғарда аталған қазақ драма театрының әртістерінің орындауындағы „Үш бидің өсиеті„ қойылымы да көптің көңілінен шықты.

Рухани кештің сәні болған болашағы жарқын талантты өнерпаз Дінмұхаммад Бектұрсынұлының ән айтудағы шеберлігі бұрынғыдан да өсе түскендігіне де куә болдық.

Басқосуда өңірдегі халық үшін адал қызмет атқарып жүрген имамдар Мәуліт шариф оқыды. Кештің соңында дін саласында аянбай тер төгіп келе жатқан Қостанай қалалық мешітінің бас имамы Шоқан қажы Әмірханов бата берді.

Осы жиын жоғары деңгейде өтті. Оған арнайы келген аға буын өкілдері мен Ислам дінін ерекше ардақ тұтатын ағайындардың сөзі нақты дәлел.

-Өз басым осы рухани кештен үлкен ләззат алдым. Онда қаншама тың ойлар, ғибратты сөздер айтылды. Бұл басқосу өңірімізде дінімізге айрықша назар аударылып келе жатқанын айқын көрсетті„,-дейді абыз ақсақал Мырзағали Ғабдулин.

Оразалы Жақсанов

Қостанай өңірінде қасиетті Мәуліт мерекесін тойлау жалғасын табуда. Әлемнің рақым нұры, екі дүниенің сәруары, пайғамбарлардың сұлтаны Хазіреті Мұхаммедтің (с.ғ.с.) туған күні — исі мұсылман үшін қуанышты бір мерекелердің бірі.

Әдеттегідей «Мирас» мәдениет үйінің залы халыққа лық толы болды. Бұл Алла елшісіне деген зор құрмет екені анық. Мерекенің құрметіне мәуліт-шариф оқылып, пайғамбарымызға салауаттар айтылды, дұғалар бағышталды.

Мерекелік жиынның алғашқы сөзін Қостанай облысы әкімінің орынбасары Марат Жүндібаев алып, аймақ басшысы Архимед Мұхамбетовтың құттықтау лебізін жеткізді.

Ал мәні зор мәжіліске Қазақстан мұсылмандары діни басқармасы ақпараттық насихат тобының мүшесі Ризабек Батталұлы арнайы келіп қатысып, пайғамбарымыздың өмірі мен кейінгі үмбеттері алдында орындап кеткен жауапкершілігі жайында уағыз-насихат айтты.

Бүгінгі таңда мешіттеріміз жастарды тура жолға бастап отырған басты рухани орда болса, өңірлердегі өнер ошақтарының да кейінгі буынның адасып кетуіне жол бермей келе жатқанын айтуымыз керек. Жазушы-драматург Ақылбек Шаяхметтің өмірдің ащы шындығын бейнелейтін «Өкініш» спектаклі дәл қазіргі тасбауыр қоғамның дертін тап басқандай.

І.Омаров атындағы облыстық қазақ драма театрының шығармашылық ұжымы сахнада аталған қойылымнан үзінді көрсеткенде, көпшілік көз жасына ерік берді.

Дегенмен ортаға қазақтың марғасқа ұлдарының бірі белгілі айтыскер Айбек Қалиев пен елдің аяулы қызы Салтанат Өтелбай шығып, сөз жарыстырғанда, халықтың еңсесі көтеріліп қалды. Бұл жерде пайғамбарымыздың ұлы тұлғалығын насихаттаған қос ақын жарасымды әзіл-қалжыңды да ұмыт қалдырған жоқ. Қазақстан мұсылмандары діни басқармасының Қостанай облысы бойынша өкіл-имамы Бахытбек Тәжімбет бірқатар жүрегі ізгі азаматтарға алғыс хаттар тапсырды.

Жылда салтанатты шарадан кейін қалталы азаматтар жиналып, жұртшылыққа ас беретін. Ал биылғы Мәуліт мерекесінде Қостанай облысының Жастар бөлімі мен Әйелдер-қыздар секторының ұйымдастыруымен Аймағанбет Спанұлының ұрпақтары бастап, қаладағы «Сәтті» мейрамханасында 150-ге тарта жағдайы төмен отбасыларының балалары мен жетімдер үйінің тәрбиеленушілеріне берді.

ҚМДБ-ның Қостанай облысындағы
өкілдігінің баспасөз қызметі

Жуырда Федоров ауданы «Жиентай қажы» мешітінің жамағаты мен Успенов ауылы жамағатының арасында спорттың волейбол түрінен жарыс өткізілді.

Оның алдына қойған мақсаты - жастарды салауатты өмір салтына, спортқа тарту болатын. Оны жете түсінген қауым ойынды ұйымдастыруға белсене атсалысты.

Өздеріңіз де байқап жүрген боларсыздар, ҚМДБ тарапынан да соңғы жылдары мұндай тәрбиелік мәні зор шараларды өткізуге ерекше назар аударылып келеді.

Жалпы осы Федоров ауданында ұйымдастырылған жарыстан оған қатысушылар үлкен әсер алды. Мұндай спорт түрлерінен ойындар алдағы уақытта өңірдің өзге де аудандары мен елді-мекендерінде жалғасын таба береді деген үміттеміз.

ҚМДБ-ның Қостанай облысындағы
өкілдігінің баспасөз қызметі

Жуырда облысымыздың Арқалық қалалық «Мухтасиб Әлмұхаммед» мешітінде Мәуліт мерекесі жоғары деңгейде өткізілгендігі белгілі.

Онда ҚМДБ-ның Қостанай облысындағы өкіл имамы Бақытбек Тәжімбет жергілікті мұсылман қауымын жоғарыда аталған мейраммен шын жүректен құттықтап, жиналған қауымға ізгілік, отбасында молшылық тіледі.

Сондай-ақ осы мерекеге орай іскер азаматтар да жомарттық танытты. Мәселен, «Алюминстрой» жауапкершілігі шектеулі серіктестігінің басшысы Абай Құспанұлы шаһардағы мешітке «Лада Гранта» жаңа автокөлікті сыйға тартты.

Жаны жайсаң бауырымызға алдағы уақытта да Алланың нұры жауа берсін деген ең ізгі тілегімізді білдіреміз.

ҚМДБ-ның Қостанай облысындағы
өкілдігінің баспасөз қызметі

Құрметті Қостанайлықтар және қала қонақтары сіздерді ү.ж. 21 қаңтарда сағат 11.00-де, «Мирас» мәдениет сарайында өткізілетін әлемнің жарық нұры, екі дүние сәруәрі болған пайғамбарымыз Мұхаммедтің (ﷺ) туылған күні, Мәуліт мерекесіне арналған «Адамзаттың абзалы» атты мерекелік рухани кешімізге шақырамыз.

Бұл мейрамды атап өткізудегі негізгі мақсат – Алланы мадақтап, пайғамбарға (ﷺ) салауат айту, ел бірлігін насихаттау, жастарға имандылық қағидаттарын түсіндіру, қоғамымыздағы адамдарды Отан сүйгіштікке, бауырмалдыққа, адамгершілікке, ата-анасын құрметтеуге және түрлі теріс қылықтардан сақтануға шақыру.

ҚМДБ-ның Қостанай облысындағы
өкілдігінің баспасөз қызметі

Қасиетті жұма күні Қазақстан мұсылмандары діни басқармасының төрағасы, Бас мүфти Ержан қажы Малғажыұлының бұйрығымен жаңа тағайындаулар болды. Атап айтқанда Рудный қаласының бас имамы қызметіне Мурзаканов Азамат Серікбайұлы тағайындалды. Ол «Нұр-Мүбарак» Египет ислам мәдениеті университеттінің түлегі. Алтынсарин және Қостанай аудандарында бас имам қызметін атқарған. Осы тағайындауға дейін Қостанай облысының найб имамы болып жұмыс істеген.

Ал Рудный қаласы «Нұр» мешітінің бас имамы қызметін атқарған Сеит Темірбекұлы Қостанай облысының найб имамы лауазымына тағайындалды.

Бұл жасалып жатқан жұмыстар ҚМДБ-ның бекіткен Ережесіне сәйкес орындалуда.

Өз кезегінде Рудный қаласының жамағаты Сеит Темірбекұлына рахметін білдірді. Ақсақалдар шапан жауып, жаңа қызметіне табыс тілеп ақ батасын бері.

ҚМДБ-ның Қостанай облысындағы
өкілдігінің баспасөз қызметі

Арқалық қаласында мәуліт мерекесі өткен жылдың желтоқсан айында бастау алған болатынды. Шаһардағы және оған қарайтын ауылдық мешіттерде шәкірттер мәуліт қасидаларын оқып, салауаттар айтты.

Ал үстіміздегі жылдың 8 қаңтарынан бастап, спорттық сайыстардың апталығы да қолға алынды. Арқалық қалалық «Мухтасиб Әлмұхаммед» мешіті мен шаһардағы спорт бөлімінің басшысы Айтжан Маликовтың ұйымдастыруымен спорттық сайыстар да өткізілді. Мұндағы мекемелер мен ұжымдар арасындағы волейболдан, үстел теннисінен және гір көтеруден сайыстар жұртшылықтың көңілінен шықты.

Осынау жарыстың арнайы ашылу салтанаты «Жігер» стадионында өтті. Онда қала әкімінің орынбасары Қайрат Әбішов мерекеге жиналған қауымды құттықтап, қатысушыларға сәттілік тіледі.

Ал мешіт имамы Бектұрсын Торғайбайұлы тағылымы мол мейрамның мән-маңызына тоқталып, спорт сүйер жұртшылыққа жүректен шыққан шынайы лебізін білдірді.

Өткен сәрсенбі күні «Жас-Ұлан балалар және жасөспірімдер орталығында» «Адамзаттың абзалы» атты рухани кеш жоғары деңгейде ұйымдастырылды.

Бұл басқосуда алдымен қалалық мешіттің шәкірті, Астана қарилар курсының тәлімгері Дінмұхамед Саулетұлы қасиетті құран аяттарын оқыды.

Ғибратты жиында ҚМДБ-ның Қостанай облысы бойынша өкіл имамы Бахытбек Нұрғабылұлы сөз сөйлеп, барша қала тұрғындары мен қонақтарды үлкен мерекемен құттықтады. Сонымен қатар мәуліттің мән-мағынасын түсіндіріп, пайғамбарымыздың өнегесі жайлы уағыз айтты.

Өкіл имам осы қаладағы дінімізге жанашылық танытып, демеушілік көрсетіп жүрген мекеме мен ұйым басшыларына алғыс хат тапсырды.

Олардың қатарында Арқалық қалалық мешітіне автокөлікті сыйға тартқан «Алюминстрой» жауапкершілігі шектеулі серіктестігінің басшысы Абай Құспанұлы, осынау киелі орынға бейне бақылау қондырғысын орнатқан «Агро интерптица» ұжымының жетекшісі Камиль Рашидұлы және мерекелік дастарханға демеуші болған Мираш қажы Тәшетұлы секілді іскер азаматтар бар.

Берері мол кеште қала әкімі Амантай Кәкімбекұлының шынайы лебізінде жиналған көпшілік ұйып тыңдап, келген қонақтарға ризашылығын білдірді.

Содан кейін «Шүкіршілік» атты сахналық қойылым көрсетілді. Театр әртістері рөлдерін шеберлікпен орындағаны соншалықты, көрермендер тіпті көздеріне жас алды.

Бұл тәрбиелік мәні зор кешті танымал ақын ақын Тоба Өтепбаев жүргізіп, жамағатқа ой салар жыр жолдарын арнады.

Мектеп оқушылары мен мәдениет бөлімінің өнерпаздары иләһи әндерді нақышына келтіре шырқап, күмбірлете күй шертті.

Жалпы, арнайы ұйымдастырылған рухани кешке қала жұртшылығы көп жиналды. Олар басқосудан ұмытылмас әсер алып, жандүниелерін рухани жағынан байытты.

Жиынның соңында Арқалық қаласы «Мухтасиб Әлмұхаммед» мешітінің имамы Бектұрсын Торғайбайұлы мәуліт мерекесін өткізуге атсалысқан жанашыр азаматтар мен спорттық ойындардың жеңімпаздарын марапаттады.

Сол күні мәуліт мейрамының құрметіне „Сайора„ шатханасында дастархан жайылып, қайырымдылық асы берілді.

ҚМДБ-ның Қостанай облысындағы
өкілдігінің баспасөз қызметі

Баршаға мәлім, Қостанай қалалық мешіті қашанда қайырымдылық істерде мұрындық болып халықтың шынайы алғысына бөленіп келеді.

Өйткені олар осы күнге дейін түрлі мекемелерге барып, қайырымдылық шараларын өткізді. Мәселен, жетім балалар және жасөспірімдер үйлеріндегі ұл мен қыздар ерекше қуанышты бастан кешіп, дән ризашылығын білдірді.

Тағдырдың жазуымен жастайынан ата-анасынан ажырап, мейірім мен жылы сөзге мұқтаж жандарға қандай көмек берсе де жарасады емес пе.

Жуырда жоғарыда аталған киелі орынның қызметкерлері Қостанай шаһарындағы облыс әкімдігі білім басқармасының жетім және ата-ана қамқорлығынсыз қалған балалар тәрбиеленіп жатқан №2 мектеп-интернатында болды.

Онда ұлы Пайғамбарымыздың (с.ғ.у) туған күні яғни Мәуліт мерекесіне орай қалалық мешітінің ұжымы атынан сыйлықтар тапсырылды.

Осында ұл мен қыздар өздеріне табыс етілген ойыншықтар мен тәтті тағамдарды алған кезде қуаныштан жүздері бал-бұл жанды.

Балдырғандар өз кезегінде өнерлерін көрсетіп, өлең оқыды, әсем әндерді орындады. Әрине, сол сәтте оған куә болған жандар мына дүниеде балалардың қуанышынан артық ештеңе жоқ екендігіне көздері айқын жетті.

Сондай-ақ мешіт қызметкерлері облыс орталығындағы №3 балалар үйіне де атбасын бұрып, Мәуліт мерекесіне байланысты ондағы бүлдіршіндерге сыйлық табыс етті.

ҚМДБ-ның Қостанай облысындағы
өкілдігінің баспасөз қызметі

Қазақстан мұсылмандары діни басқармасының «2020 жылға дейін діни білім беруді дамыту» тұжырымдамасы негізінде Қостанай облысы өкілділігінің ұйымдастыруымен қалалық мешітте 2015 жылы желтоқсанда екі айлық «Сауат ашу курсы» ашылған болатын.

Аталмыш курста бүгінгі күні 5-ші топта 18 шәкірт діни білімін «Фиқһ», «Ақида», Құран», және «Араб тілі» мен «Тәжуид» пәндерінен жетілдіріп, тамамдады.

Осы жолғы шәкірттерге «Сертификат» тапсыру рәсімінде Қостанай қалалық мешітінің Бас имамы Шоқан қажы Ғазизұлы сөз сөйлеп, жылы лебізін білдірсе, мешіт ақсақалы Мұстафа қажы Құрбанұлы ақ батасын берді.

Қазіргі таңда Қазақстан мұсылмандары діни басқармасы тарапындағы діни оқу орындарына, биылғы жылы Қостанай облысы бойынша 19 шәкірт қабылданды.

Алдағы уақытта Алла Тағаланың хақ діні Исламның шариғатын үйреніп, діни сауатын ашып, дәріс алам деп талаптанушыға әрдәйым дәріс беруге, әмәндә Пайғамбарымыз Мұхаммед (с.ғ.у) салып кеткен сара жолына бастап, көркем мінезін қамтыған сабақтарды үйретуге Дүйсен, Бақберсін, Дархан ұстаздардың ықласты. Әр-бір қазақ елінің азаматы өз отанын сүйуге, тілін, ділін, дінін білуі парыз.

ҚМДБ-ның Қостанай облысындағы
өкілдігінің баспасөз қызметі

Жуырда ҚМДБ-ның шариғат және пәтуа бөлімі меңгерушісінің орынбасары Сансызбай Құрбанұлы, елімізге танымыл діни ұстаз Сарыағаш медресесінің директоры және РАНТ мүшесі Абдуғаппар Сманов, Ақмола облысынң өкіл бас имам Қанат Қыдырмин және «Насихат» қоғамдық қорының басшысы Қанат Алшимбаевтар Қостанай өңірінде іс-сапармен болды.

Аталмыш дін қайраткерлері Аймағанбет қажы Спанұлы және Рудный қалалық «Нұр» мешіттерінің жамағатымен бірнеше кездесу өткізді.

Келушілер де көп болды және ұстаздардың ғибратты уағыз насихаттар әсерлі өтті. Жандарына ыстық болып кеткен ұстаздарын жамағат құшақ жайып қарсы алып, уағыздарын сүйсініп тыңдады.

Сансызбай ұстаз қазіргі таңдағы үйлену және ажыраспай сол шаңыраққа еге болу туралы, ал Абдуғаппар ұстаз Алла тағаланың бізге берген үлкен нығметінің бірі «Намаз» тақырыбында Исламның көзқарасын, Құранның аяттарын хадистермен дәлелдеп айтып өтті.

Жалпы әрбір уағызда, кездесуде «Бірлік, татулық, бауырмашылдық» тақырыптары бойынша келелі әңгіме болып, жамағат тарапынан сұрақтар қойылып тартымды өтті.

Қостанай өңірінде келген ұстаздарға жамағаттың ыстық ықыласы мен алғысы шексіз болды.

ҚМДБ-ның Қостанай облысындағы
өкілдігінің баспасөз қызметі