Қазақстан мұсылмандары діни басқармасының наиб мүфтиі, шариғат және пәтуа бөлімінің меңгерушісі Сансызбай қажы Шоқанов іс-сапармен Қостанай облысына келді.

Белгілі дін қайраткері осы сапар барысында Алтынсарин ауданындағы Мәриям Хакімжанова селолық округіне қарасты Шербаков елді мекеніндегі «Тойғанша ана» мешітінің салтанатты ашылуына қатысуы жоспарланған.

Алайда Қазақстанға белгілі дін саласында ұстаздық қызмет жасап жүрген Бауыржан Әлиұлының кенеттен дүниеден өтуіне байланысты қайа жолға шығуына тура келді.

Бірақ осындай жағдай да Сансызбай қажы облыстық мешітте жамағатпен кездесіп «Ғибратты өмір» туралы уағыз айтып, Бауыржан ұстаз туралы тебірене сөйледі.

Уағыздың толық нұсқасы https://www.youtube.com/watch?v=hoUflFmIwhg

Қостанай облыстық мешітінің баспасөз қызметі

Бүгінгі күні қоғамдық проблемалар қатарында дін жолында адасушылар да өз алдына бір топты құрап отыр. Дінге үлкен сеніммен келгенмен үйретушісі дұрыс болмаса, ол адамның жалпы дін жолынан, сонымен қатар Қазақстан мұсылмандарына тән жолдан ауытқып кетуі өте оңай.

Қазақстан мұсылмандары сунниттік, оның ішінде Ханафи мәзһабын, Матуриди ақидасын ұстануымен және жергілікті ғұрыпқа да көңіл бөлуі мен ерекшеленеді. Қазақ жерінде ислам ұлттық мәдениетіміздің қалыптасуында өзіндік зор үлес қосып, халықтың күнделікті әдет-ғұрып, салт-дәстүріне терең сіңіп кетті.

Деструктивті сипаттағы теріс діни ағымдарға ерген жастар аят-хадистерде айтылған жайттардың астарындағы даналыққа үңілмеді, діни мәтіндерге үстірт қарады, тарихты оқымады, мәдениетті елемеді, келте діни түсінікпен ата-ана, туыс-туған, дос- жарандарынан безінді, дәстүріне қарсы шықты, қабірлерді қиратты, мемлекеттік билігіне қару алып қарсы тұрып, кейбір зайырлы білім пәндерін қабылдамады, қоғамнан оқшауланып, өздерінен басқалардыда адасушы деп түсінді, біржақтылыққа ұрынды. Діни экстремизм бабымен істі болып, лаңкестігі үшін түрмеге қамалды. Бұның бәрі де діни сауаттың төмендігімен болып отыр.

Діни сауаты төмен адам дінде айтылған әрбір сөзге тез иланады, сындарлы ойламайды, мәліметтің ақ-қарасын ажыратпайды, бәрін талғамай қабылдайды. Сондықтан бұл тұрғыда кез-келген мәліметті екшейтін ішкі сүзгі болуы керектігін айтамыз.

Дін жолында адаспау, орны толмас қателіктерге ұрынбас үшін білім алу, ізденіс өте маңызды. Исламда ең алғашқы бұйрықтың өзі «Оқы!» деп келгендіктен, ардақты Мұхаммед пайғамбар (оған Алланың игілі мен сәлемі болсын) «Білім іздену әрбірі мұсылман ерге де, әйелге де парыз» екендігін айтқан болатын.

Сол себепті Меккеден Мәдинаға қоныс аударған уақытта әуелгі кезекті мешітпен қатар Суффа мектебі деп аталған ілім ошағының негізі қаланған. Ол жердегі сахабалар күндіз түні тек қана іліммен шұғылданған. Сол жерден бастау ала отырып, ислам дінінің әр саласында ғалымдар шоғыры қалыптасты.

Ардақты пайғамбар дінді үйретуге әр аймаққа ғалым сахабаларды жіберді. Дін жолы әрдайым ғылыммен қатар жүріп отырды. Мұсылман ғалымдар тек дінді ұстанып, ғылымнан қол үзіп кеткен жоқ. Екеуін де қатар алып жүруге тырысты.

«Айтшы, білетіндер мен білмейтіндер тең бе?!» (Зумар сүресі, 9 аят), «Алладан шынайы түрде тек ғалымдар қорқады» (Фатир сүресі, 28-аят) деген аяттар білімді болудың артықшылықтарын насихаттады. Хадисте «Ғалым мен қарапайым құлдың арасы менімен сендердің ең төмендегілеріңнің арасы секілді» (Тирмизи жеткізген) делінді. Баршамызға мәлім, әл-Фараби, Ибн Сина, Ибн Халдун, Идриси, әл-Бируни, әл-Хорезми, Ибн Батут, әл-Баттани, Джабир ибн Афләх, әр-Рази, әл-Ғазали, Ибн Рушд сияқты т.б. көптеген ғалымдар мұсылмандардың дін мен ғылымды қатар алып жүргендігіне дәлел.

Қазіргі уақытта діни білім алам деушілерге елімізде бірқатар жағдайлар жасалған. Тіпті Нұр-Мүбәрак ислам мәдениеті секілді жоғарғы оқу орны, тоғыз медресе, мешіттердің жанында сауат ашу курстары жұмыс істеуде. Одан бөлек, дінтану, исламтану мамандықтары да еліміздегі бірқатар жоғарғы оқу орындарында гранттық негізде оқытылады.

Сондықтан барлық сала секілді дін саласы да білімділік пен біліктілікті қажет етеді. ХХІ ғасырда шалалыққа, шалт басуға орынболмауы тиіс.

Отбасы үлкен жауапкершілікке құрылады. Әке – отбасыға жауапты бірінші тұлға. «Бәрің де бақташысыңдар! Елбасы еліне жауапты, отағасы отбасына жауапты, әрбірің қарамағыңдағыларға жауаптысыңдар» деген хадис осы шындықты білдіруде. Діни сауаттылықты бала мектепте де үйренеді. Ата-ана да балаға осы бағытта дұрыс тәлім бере білуі тиіс, оны қадағалауы керек. Айталық, мешіттердегі діни сауат ашу курсына бала ата-анасының рұқсатымен баруы тиіс. Бала кімдерді тыңдап жүр, қандай діни кітаптар оқуда, діни танымы дұрыс қалыптасуда ма деген сауалдарға ата-ана да мән беріп отырғаны жөн.

Ал ата-ана діннен хабарсыз болса, ол баласын қалай қадағалай алмақ? Немесе «дінге жолама» деген сөз баланың дінге деген қызығушылығын баса алама? Бала бәрібір өзіне керекті мәліметтерін интернеттен іздеуге мәжбүр болады. Ал интернет не әлеуметтік желілерді көп жағдайда деструктивті діни ағым өкілдері тиімді пайдаланып кетіп жатады.

Яғни ондағы мәліметтерді бақылап отыру қиын. Осы себепті ата-ана бар жауапкершілікті тек мектепке я ұстаздарға ысыра салмай, баланың болашағы дұрыс қалыптасуында өздері де жауапты екенін сезінуі тиіс.

Айтпағымыз, дін туралы дұрыс ақпарат балаға қайжақтан да дұрыс жетсе, сонда ғана ол дұрыс танымға қол жеткізетін болады.

Біз жоғарыда сөз еткендей ұстаздар қауымы не ата-ананың діннен шошуы, соның нәтижесінде баласына «дінге жолама» деп шектеу қоюы мәселенің алдын ала алмайды. «Бала тыйым салынғанға өш» дегендей, ол бәрібір рухани қажеттіліктерін іздейді. Соның кесірінен бала теріс діни мәліметтер өзіне сіңіріп алуы мүмкін. Сол үшін діннен қорықпау керек.

Ислам біздің ата-бабамыз таңдаған дәстүрлі дініміз. Кеңестік кезде де дәстүрлі дінінен қол үзбеген халқымыз алдағы уақытта да одан алыстап кетпесі анық. Тарихқа қарасақ, қазақ зиялылары медреселерде алғаш сауаташқан, дінисауаты мол болған. Олар дінге қауіпдеп қарамады, керісінше руханияттан күш ала отырып, қоғамға қызмететті. Сондықтан діннен қорқып, баланы оған жолатпауға әрекет жасағаннан гөрі баланың дұрыс діни танымы қалыптасуына көңіл бөлген дұрыс. Өскелең жастарымыз үшін дәстүрін дәріптейтін, өзге сенім иелеріне толерантты діни сана қалыптастыру аса маңызды.

Қорыта айтқанда, дін саласындағы келеңсіздіктердің алдын алуда, діни экстремизм мен терроризммен күресуде діни сауатсыздыққа жол бермеу, қайта діни сауаттылыққа күш салу аса маңызды. Дәстүрлі дініміздіоқып- үйрену мүмкіндіктерін молайтып, жалпы діни сауаттылықты отбасы, мектеп, қоғам болып қолға алу, діннен қорықпай, жасөспірімдерге дұрыс діни таным қалыптастыру мемлекетіміздің қауіпсіздігі тұрғысынан уақыт ұттырмайтын қажеттілік.

Денисов ауданы «Жұма» мешітінің Бас имамы Руслан Маратұлы

Биылғы қасиетті Рамазан айы өз деңгейінде өткеніне халық куә. Шарапаты мол айда өңір бойынша қайырымдылық мақсатына жете көңіл бөлінді. Барлығы 434 шара ұйымдастырылды. Онда 60 330 отбасы қамтылды. Осы игі іске 121 млн. 487 819 теңге жұмсалды.

Зекет және қайырымдылық қорының жетекшісі, найб имам Бақытжан қажы Икрамның мәліметіне сүйеніп, оны таратып айтатын болсақ, қыруар жұмыстар атқарылғанына көзіміз айқын жетеді.

Қасиетті Оразадағы 30 күннің ішінде бірқатар маңызды жобалар жүзеге асырылды. Мысалы, «Ел үлесі - пәтерге» жобасы бойынша бір отбасыға 1 млн. теңге табыс етілді.

«Қолдан – қолға» шарасында көмекке зәру бір кісіге емделу үшін 76 мың теңге тапсырылды. Ал, «Өмірге үміт сыйла» жобасында мүмкіндігі шектеулі жанға 70 мың теңгенің мүгедектер арбасы тарту етілді.

Сонымен қатар, «Алтын құрсақты батыр анаға тосын сый» шарасында көп балалы анаға 45 500 теңгенің көмегі көрсетілді.

Алматыдағы Нұр-Мүбарак Египет ислам мәдениеті университетінде Қостанайдан білім алып жатқан екі шәкіртке оқу ақысы үшін 864400 теңге төленді. Киім-кешекпен қолдауға зәру 62 отбасына 348000 теңге жұмсалды.

«Рамазан тәттісі» атауымен кішкентай 33 балаға 36 000 теңге бөлінді. Осы айда 2 145 отбасына 23 млн. 820 919 теңгенің азық-түлік салынған «Рамазан қоржыны» үлестірілді.

Сондай-ақ, 334 адамға 227000 теңгенің «Ауызашар себеті» тапсырылды. Облыстағы мешіттердің жанында 57 750 адамға 95 млн. теңгенің ауызашары берілді.

Қостанай облыстық мешітінің баспасөз қызметі

Жуырда Қостанай қалалық «Жайлаубай ата» мешітінде «Жомарт жұма күні» деп аталатын қайырымдылық акциясы ұйымдастырылды.

Онда қолдауға мұқтаж 12 отбасына көмек көрсетілді. Олар өздерін шапағат нұрына бөлеген азаматтарға шынайы алғысын білдірді.

Қостанай облыстық мешітінің баспасөз қызметі

Ұлы Отан соғысындағы Жеңістің 77 жылдығына орай Рудный қалалық «Нұр» мешітінің қызметкерлері жергілікті майдангер қарттарды құттықтап, сыйлықтарын табыс етті.

Әрине, арамызда жүрген ардақты ағаларымыздың алдында біз мәңгілік қарыздармыз. Олар от пен оқтың астында жүріп, қайтпас қайсарлық танытты. Соғыс ардагерлерінің патриоттық рухы жастарға өнеге.

Көргені мен түйгені мол, ғасыр жасаған Ілияс ақсақал кешегі қиын-қыстау жылдарды еске алып, тебірене сыр шертті. Мешіттің бас имамы Бектұрсын Торғайбайұлы оған шын жүректен ізгі тілегін білдірді.

Имандылық ордасы қызметкерлерінің көрсеткен ілтипатына ардагерлер дән риза болып,алғыстарын жаудырды.

Қостанай облыстық мешітінің баспасөз қызметі

Жеңіс күні қарсаңында Қостанай қалалық «Жайлаубай ата» мешітінің ұжымы кешегі қанды майданда ерлік пен батылдықтың үлгісін көрсеткен ардагерлерге құрмет көрсетуді ұйғарды.

Қазір қарап отырсақ, облыс орталығында Ұлы Отан соғысына қатысқан 23 майдангерлер ғұмыр кешуде. Оларды қалай ардақтасақ та жарасады. Өйткені, жастық шақтарын бүгінгі жарқын күндерге арнады.

Имандылық ордасының дайындаған сый-сияпатын «Барыс» еріктілер тобының мүшелері аға буын өкілдеріне табыс етті. Ал, мешіттің Бас имамы Шоқан қажы Әмірханов Отан үшін от кешкен абыз ағамыз, белгілі қаламгер Қасымхан Алдабергеновтың шаңырағында болып, оған ілтипат танытты. 

Қостанай облыстық мешітінің баспасөз қызметі

Өңірімізге есімі белгілі дін қайраткері Шоқан қажы Ғазизұлы басқаратын Қостанай қалалық «Жайлаубай ата» мешітінің ұжымы Рамазан айында қайырымдылыққа айрықша көңіл бөліп, жерлестерінің сауабын алды.

Мәселен, қасиетті Ораза айында 332 отбасы қамқорлыққа алынып, осы мақсатқа 3 млн. 324730 теңге жұмсалды. Әрбір жанұяға табыс етілген әлеуметтік қоржынның құны 15 600теңге. 

Сонымен қатар 35 бүлдіршінге «Айт құтты болсын» шарасы өткізіліп, сый-сияпат жасалды. Яодан бөлек тағы 40 балаға құны 390 000 теңгені құрайтын тәтті тағам мен жеміс-жидектер берілді.

Қостанай облыстық мешітінің баспасөз қызметі

Жақында Денисов ауданына қарасты Фрунзе ауылында мұсылмандар зираты тұтастай қоршалды. Сонымен қатар осы зират сыртында дәретхана салынып, қоқыс төгетін арнайы орын салынды.

Бұл игі бастамаға аудан кәсіпкерлері ментұрғындары ұйымшылдық танытып, өздерінің лайықты үлестерін қосты.

«Аят» намазханасының молдасы Болат Кәрімжанұлы жанашыр азаматтарға алғысын білдіріп, батасын берді.

Қостанай облыстық мешітінің баспасөз қызметі

Жуырда Қостанай ауданына қарасты Жамбыл ауылында еңселі мешіт пен оның жанына салынған асхананың ашылу салтанаты болып өтті. 

Онда облыстық мешіттің наиб имамы Әлішер Балахмет сөз сөйлеп, жергілікті ағайындардың қуанышына ортақ екендігін білдірді. Сондай-ақ, ауылдың құрметтісі Мейрам ақсақал және ауыл әкімі Жанай Алтынсарин жиналғандарды құттықтады.

Содан кейін облысқа танымал жыршы Абзал Алпысов терме орындап, жұртшылықты бір серпілтіп тастады. Мешіт пен асхананың салынуына тікелей атсалысқан демеушілердің иығына шапан жабылып, Алғыс хаттар тапсырылды. 

Мешіттің лентасын ел сыйлысы Кәмеш аға мен облыстық мешіттің наиб имамы Әлішер Ертайұлы қиды.

Мешітте намаз оқылып, әруақтарға құран бағышталды. Жиналғандарға дастарқан жайылып, «Маңдай батыр» мешітінің бас имамы Дархан Манарбекұлы уағыз айтты.

Қостанай облыстық мешітінің баспасөз қызметі