Астанада өтіп жатқан әлемдік және дәстүрлі дін лидерлерінің V съезінде Бас мүфти Ержан қажы Малғажыұлы осылай мәлімдеді.

«Қазіргі кезеңде әлемдік қауымдастық экономикалық дағдарысты, саяси, ұлтаралық, дінаралық шиеленістерді бастан кешуде. Әсіресе, адамзат жаңа ғасырда бұрын-соңды болмаған діни алауыздықтар, дау-жанжалдар, ұлтаралық қақтығыстармен бетпе-бет келді. Дінді саясиландыру арқылы жастар санасын теріс арнаға бұру үрдісінің куәгері болдық. Дінді өз саяси мақсаттарына икемдеп алған түрлі топтар әлемнің әрбір жерінен көріне бастады», – деді ҚМДБ төрағасы Е.Маямеров.

Бас мүфти мәлімдегендей, бүлікшілердің бұл әрекеті, сөз жоқ, дәстүрлі дінімізге деген анық қарсы әрекет, адамшылыққа да жат амал.

«Дін – бүкіл әлемде адамдардың рухани дүниетанымын байыта отырып, жер бетіндегі адамзат қауымының өмір сүру игілігіне өз үлесін қосатын қуатты күш. Сондықтан сол күшті адамдар арасындағы достық пен ынтымаққа және мемлекетіміздің дамуына жұмсауымыз қажет. Ал өзара келісім мен жарасымдылыққа Ислам дінінің қосар үлесі өлшеусіз», – деп атап өтті Ержан қажы Малғажыұлы.

Ағабек ҚОНАРБАЙҰЛЫ,
ҚМДБ Баспасөз хатшысы

Бүгін Алматы қаласында Қазақстан мұсылмандары діни басқармасының төрағасы Ержан қажы Малғажыұлы Ұлттық баспасөз клубында баспасөз мәслихатына қатысты.

Рамазан айына байланысты өткен кездесуге наиб мүфти, «Әзірет Сұлтан» мешітінің Бас имамы Серікбай қажы Ораз, ҚМДБ Шариғат және пәтуа бөлімінің меңгерушісі Мұхаммед-Хусейн Алсабеков, Алматы қаласының Бас имамы Нұрбек қажы Есмағанбет қатысты.

«Әр пенде сауапты амалымен, тақуалығымен Алланың алдында дәрежесі артады. Жомарт, жанашыр азаматтарды, кәсіпкерлерді көмекке мұқтаж адамдарға қамқорлық көрсетуге, мәселен, су тасқынынан үйсіз, шарасыз қалған отандастарымызға қайырымдылық жасауға, табиғи апат салдарынан бұзылған көпір мен жолды жөндеуге үлес қосуға, жетім мен жесірге мейірімділік танытып, қараусыз қалған қарттарға көңіл бөлуге шақырамын», – деді Бас мүфти Ержан қажы Малғажыұлы.

Сонымен қатар ҚМДБ төрағасы қасиетті айдың құрметі үшін халықтың тұрмыстық қажеттіліктеріне жеңілдік жасалып, Құдайы астар пен тойлар ауызашар уақытында ұйымдастырылса деген тілегін білдірді.

Серікбай қажы Ораз ҚМДБ-ның биылғы қажылық сапарына дайындық жұмыстарына қатысты жан-жақты түсініктеме берді.

Алматы қаласының Бас имамы Нұрбек қажы Есмағанбет қала бойынша мешіттердің қасиетті Рамазан айына дайындық шаралары туралы баяндады. «Биыл тұңғыш рет Бас мүфти бастамасымен Студенттер сарайында «Берекелі-мереке», «Қош келдің, Рамазан» атты рухани-мәдени кештер өтеді. Сонымен қатар Рамазан айы бойы қайырымдылық акциялар ұйымдастыруды жоспарлап қойдық», – деді Бас имам Н.Әуесханұлы.

Ағабек ҚОНАРБАЙҰЛЫ,
ҚМДБ баспасөз хатшысы

Бүгін Елордада «Бейбітшілік және келісім сарайында» Елбасы Нұрсұлтан Назарбаевтың қатысуымен дін қайраткерлерінің кезекті құрылтайы өз жұмысын бастады.

Халықаралық басқосуға әлемнің дәстүрлі дін өкілдері, халықаралық ұйымдардың жетекшілері қатысуда. 10-11 маусым күндері өтетін жиында 4 секциялық тақырыптар бойынша баяндамалар жасалынбақ. Осымен бесінші рет өтіп жатқан съезде «Діни және саяси лидерлер: адамзат алдындағы жауапкершілік», «Діннің жастарға әсері: білім, ғылым, мәдениет және бұқаралық ақпарат құралдары», «Дін және саясат: жаңа ағымдар мен преспективалар», «Дін лидерлері арасындағы бейбітшілік, құрмет, қауіпсіздік» тақырыптары төңірегінде талқылаулар, пікірлер, ой-тұжырымдар айтылады.

Төртінші секция отырысы бойынша еліміздің Бас мүфтиі Ержан қажы Малғажыұлы баяндама жасайды.

Құрылтай соңында қатысушылардың арнайы Декларациясы қабылданады.

Ағабек ҚОНАРБАЙҰЛЫ,
ҚМДБ Баспасөз хатшысы
Астана