Әрине, періште мәселесі айтылған жерде еріксіз «Періштелердің саны бар ма екен?» деген сауалдың туындайтыны белгілі. Асылында, періштелердің саны жайлы аят пен хадисте ешқандай мәлімет жоқ. Бірақ, олардың саны өте көп екендігі басы ашық мәселе. Ғалымдарымыздың айтуы бойынша, періштелердің көптігі соншалық, әрбір жер бетіне түскен жаңбыр мен қар түйіршіктерінің жеке-жеке өз періштелері болады. Енді осыдан-ақ олардың сансыз көптігі тұрғысында қорытынды шығаруға әбден болар. Асылында, біз үшін періштенің санынан гөрі, олардың барлығына деген сенімнің мол болғаны абзал.

Алла Тағала періштелерді жаратқаннан соң оларға түрлі қызметтер жүктеген. Ол қызметтерді жердегі, көктегі және арштағы деп үш топқа бөліп қарастыруға болады. Осы жіктемеге сай періштелердің өзін де төмендегідей реттілікпен сипаттап шығамыз:

1. Жәбірейіл періште. Пайғамбарларға уахи мен қасиетті кітаптарды әкелуші ең үлкен періштелердің бірі. Жәбірейіл сөзінің мағынасы негізінен «Алланың құлы, Алланың күші» деген ұғымға саяды. Олай болса, Жәбірейілді ең ұлы мақамның төріндегі періште ретінде танимыз. Келтірілген аят та осыны растайды: «Негізінен Құран әрине, бір ардақты Елшінің сөзі. Ол күшті Елші, ғаршының иесінің қасында беделді [1]». Құран Кәрімде Жәбірейіл періште бірнеше атымен аталады. Мысалы: «Рухул қудс [2]», «Рух [3]», «Расули Карим [4]», «Жибрил [5]» және «Рухул Әмин [6]». Жәбірейіл (ғ.с.) періштелердің ең ұлығы, ең үлкені және Алла Тағалаға ең жақыны болғандықтан, ол «Сәйидул-Мәләикә» (періштелердің құрметтісі) деген абыройлы есіммен аталады.

Микайл періште. Төрт үлкен періштенің бірі Микайлдың (ғ.с.) қызметі жер бетіндегі мақлұқаттар мен тіршілік атаулының ырыс-несібесі мен ауру, шипа, рахмет, берекет секілді жайттарды адамдарға жеткізу.

Исрафил періште. Исрафилдың (ғ.с.) қызметі – сүрді (сырнай) үрлеу. Ақырзаман болғанда Исрафил сүрді бірінші үрлегенде, аспан мен жердегі бүкіл тіршілік атаулы қиямет қайымның басталуымен тіршілігін тоқтатады, яғни өледі. Ал, екінші рет үрлегенде, қайта тіріліп, қабірлерінен шығады да махшар алаңына жиналады.

Әзірейіл періште. Үлкен періштелердің төртіншісі Әзірейілдің қызметі – тіршілік атаулының жанын алу. Сондықтан оны «Мәләкулмәут – өлім періштесі» деп атайды.

Кирамән катибин. Әрбір адамның бұл дүниеде істеген ісін айна-қатесіз жазып отыратын екі періштеге берілген есім. Бірі – пенденің (оң жағында) жақсылығын жазса, екіншісі (сол жағындағысы) жамандығын жазады. Адамның жасаған титтей жақсылығы мен жамандықтары түгелімен осы екі ардақты періште арқылы жазылып, ақыретте әрбір жанның амал дәптерінде сол қалпында алдынан шықпақ: «Оның оңынан да, солынан да екі байқаушы отырады. Аузынан бір сөз шықса болды, алдында аңдушы дайын [7]».

Мункәр мен Нәкир періштелері. Бұл екі періште дүниеде дәм-тұзы бітіп, қабірге барған адамнан сұрақ алу қызметін атқарады. Өлген адам қабірге қойылған соң, оған жан беріліп, қайта тірілген соң осы екі періште оған сұрақтар қояды. Сұралатын сауалдар негізінен: Раббың кім? Пайғамбарың кім? Дінің не? және т.б. осы тақырыптың төңірегінде болып келеді. Дұрыс жауап бергенге қабір сыйы, бұрыс жауап бергенге қабір азабы беріледі. Мүнкәр-Нәкир «бейтаныс, бөтен» деген мағыналарды білдіреді. Қабірдегі адамға бұрын-соңды көрмеген кейіпте, бейтаныс көрінетіндіктен осы атпен аталған.

Хәмәләй арш – Алланың жаратқан нәрселерінің ең үлкені Аршты тасушы 8 періштеге берілген есім. Бұлар жайында аятта былай дейді: «Періште көктің айналасында болады. Сондай-ақ, Раббыңның аршысын сегіз періште үстеріне көтереді [8]». Бұл сегіз періштеден басқа көптеген періштелер арштың айналасында болатындығы мына аятта айтылған: «Сондай ғаршыны көтерген және оның маңындағы періштелер, Раббыларын мақтаумен дәріптейді. Оған сенеді [9]». Арштың айналасындағы періштелердің нақты санын Алла ғана біледі.

8. Хафаза періштелері. Әрбір адамның қорғаушы періштелері болады. Міне, сол періштелерді хафаза (қорғаушы) періштелері деп атайды. Аятта: «Әркімнің алдынан, артынан Алланың әмірі бойынша, өкшелеп, қорғаушы (періштелер) бар [10]», – дейді. Кейбір деректер бойынша, әрбір адамды бақылап жүретін 384 [11] немесе 360 періште болады. Бұның мәнісі адам баласының бүкіл жаратылыс ішіндегі ең кәміл, әрі тамаша етіп жаратылған тіршілік иесі екендігімен байланысты [12].

Хадистерде айтылғандай, 360 періште әрбір мүмінді, әсіресеі қарттар мен сәбилерді қорғап жүреді. Әлбетте, осы айтылған 360 періштенің әрбірінің өзіндік міндеттері бар [13]. Адамға тура жолды нұсқап, мүмін пенде үшін дұға әрі истиғфар ететін, кәпірлердің жүрегіне үрей салатын, ғибадат, зікір және ілім мәжілістеріне қатысатын, таң және екінті намаздарында жамағатпен бірге сап құратын, Құран аяттары мен жұма күндері айтылған салауаттарды тыңдайтын, намаз оқитын, әттахиятта шахадат сөзін бірге ілесіп оқитын, мұсылмандармен сәлемдесетін т.б. түрлі қызметтерді атқаратын періштелер бар.

9. Жәннәт пен жәһәннамды бақылаушы періштелер. Жәннәт пен жәһәннамда арнайы бақылаушы періштелер болады. Жәннәт періштелерінің саны да өте көп. Олар жәннәтқа кірген мүміндерге қызмет етеді және олармен бірге болады. «Зумәр» сүресінде: «Оларға оның сақшылары: «Сендерге сәлем, қош келдіңдер, жәннәтқа мәңгі қалатын түрде кіріңдер», – дейді», – деген айқын мағлұматтар бар. Жәннәттағы періштелердің басшысын «Ридуан» деп атайды.

Ал, жәһәннамдағы зәбани періштелер кәпірлерді азаптау қызметімен айналысады. Олардың арасындағы басшыларын «Малик» деп атайды. Құранда жәһәннам періштелерінің қызметтері жайлы аяттар да жеткілікті: «Әй, мүміндер! Өздеріңді әрі үй-іштеріңді отыны адамдар мен тастардан болған оттан қорғаңдар. Оның басындағы періштелер ірі денелі, қатал. Олар Алланың өздеріне берген әмірлеріне қарсы келмейді. Не бұйырса, соны орындайды [14]»; «Ол тозақтың не екенін сен білесің бе? Кейін қалдырмайды да шала тастамайды. Ол адам терісін өртеп кетеді. Оған он тоғыз (періште) қарайды. Тозақтың күзетшілерін періштелерден ғана тағайындадық. Кәпірлерді сынау мақсатымен олардың санын дәл белгіледік [15]».

Жәһәннам періштелері тозаққа кірген кәпірді сұрақтың астына алатыны Құран Кәрімде былайша баян етіледі: «Қарсы келгендер топ-топ тозаққа айдалады.Сондай-ақ, оған барғандарында, оның есіктері ашылады. Оларға оның күзетшілері: «Сендерге іштеріңнен өздеріңе Раббыларыңның аяттарын оқитын және бұл күнге жолығатындарыңды ескертетін елшілер келмеді ме?» – дейді. Олар: «Әрине, келді. Бірақ азап үкімі қарсы болушыларға шындыққа айналды», – дейді [16]».

Муқаррабун – Алла Тағалаға ең жақын әрі ең ұлық періштелердің есімі. Олар жайында аятта былай дейді: «Иса да, Аллаға жақын періштелер де Аллаға құл болудан әсте арланбайды [17]».

Адамның жүрегіне ақиқат пен шындықты толтырып, кейін өзіне аян беретін періштелердің бар екендігін Пайғамбарымыз (с.ғ.с.) бір хадисінде айтып өтеді: «Адам баласына әрі шайтанның азғыруы, әрі періштенің аяны бар. Шайтанның азғыруы –жамандықпен қорқытып, шындықты өтірік ету. Періштенің аяны – жақсылықты өсиет ету мен шындықты растау. Ішкі дүниесінде осындай бір нәрсе сезген кісі, оның Алладан екендігін білсін. Егер керісінше болса, шайтаннан сақтану үшін Аллаға сиынсын» [18].

Муминдер үшін дұға ететін періштелер бар. Аятта: «Сондай-ақ, иман келтіргендер үшін (періштелер): «Раббымыз! Мәрхаметің, білімің әр нәрсені сыйдырып, ішіне алған. Сондықтан тәубе етіп жолыңа түскендерді жарылқа! Әрі оларды тозақтан сақтай көр!», – деп тілейді [19]».

Намаз оқыған кезде «Фатиха» сүресін тәмәмдаған соң «әмин» деп айтатын арнайы періштелер бар. Пайғамбарымыздың (с.ғ.с.): «Имам әмин деген кезде, сіз де әмин деңіз. Өйткені, кімнің әмин деуі періштелердің әмин деуіне сәйкес келетін болса, оның өткен күнәлары кешіріледі [20]», – дегені де бұған бірденбір дәлел бола алады.

[1] «Тәкуир» сүресі, 19-аят
[2] «Бақара» сүресі, 87-аят; «Нахыл» сүресі, 102-аят
[3] «Мариям» сүресі, 17-аят; «Қадір» сүресі, 4-аят
[4] «Тәкуир» сүресі, 19-аят
[5] «Бақара» сүресі, 97-аят; «Тахрим» сүресі, 4-аят
[6] «Шуғара» сүресі, 193-аят
[7] «Қаф» сүресі, 17-18-аяттар
[8] «Хаққа» сүресі, 17-аят
[9] «Ғафыр» сүресі, 7-аят
[10] «Рағыд» сүресі, 11-аят
[11] Мухтасар илмихал, Истанбул, Фазилет баспасы, 9-бет.
[12] М. Абдулфеттах Шахин, Инанжын гөлгесинде, Измир, 1992, 1-том, 124,141-бет.
[13] М. Абдулфеттах Шахин, ж.к.е., 1-том, 141-бет
[14] «Тахрим» сүресі, 6-аят
[15] «Муддәсир» сүресі, 27-31-аяттар
[16] «Зүмәр» сүресі, 71-аят
[17] «Ниса» сүресі, 172-аят
[18] Тирмизи, Тәфсир – 3, 2988 х
[19] «Ғафыр» сүресі, 7-аят
[20] Бухари, Азан 111; Муслим, Салат72; Тирмизи, Салат 71

Періштелер нұрдан жаратылғандықтан, сол жаратылысына тән өзіндік ерекшеліктерге ие. Олардың бұл ерекшеліктерін төмендегідей реттілікпен жүйелеп көрсетуге болады:

1. Періштелер – нұрдан жаратылған көзге көрінбейтін тіршілік иесі. Олар ішу, жеу, жынысқа бөліну, үйлену, ұйықтау, шаршау, жалығу, жас, кәрі болып бөліну секілді адамзатқа тән сипаттан ада. Олар Аллаға құлшылық ету ісінде ешқандай шаршау дегенді білмейді, толассыз құлшылық ете береді. Құранда бұл жайында: «Көктер мен жердегілер Алланікі.Оныңқасындағылар Оған құлшылық қылудан дандайсымайды да шаршамайды. Олар күндіз-түні Алланы дәріптеуден (тасбих айтудан) жалықпайды» [1], –дейді.

2. Періштелер Аллаға ешқашан қарсы келмейді. Тек Алланың әмірлерін бұлжытпай орындайды да, қандай мақсат үшін жаратылған болса, соны ғана істейді. Үнемі Алланы дәріптеумен, мадақтаумен, тасбих айтумен болады. Періштелердің бұл кейпін Құран аяттары анық түрде біздерге білдіреді. Аяттарда былай дейді: «Өздерінен үстем болған Раббыларынан қорқады. Әрі берілген бұйрықтарды орындайды» [2].

«Періштелер Алланың өздеріне берген әмірлеріне қарсы келмейді. Не бұйырылса, соны орындайды» [3]

3. Періштелер қанатты болғандықтан өте жылдам әрекет етеді. Күш-қуаттарының молдығы сондай, олардың күші жетпейтін нәрсе жоқ. Жылдамдықтары біздің қиялымызға келмейтіндей дәрежеде өте жылдам, аспан мен жерді бір сәт ішінде аралап шығатындай қабілетке ие. Бірақ, олардың аталмыш ерекшеліктері әркез Алла Тағаланың рұқсатымен ғана жүзеге асады. Осы айтылған ерекшеліктер төмендегі аяттан да белгілі болып отыр: «Көктерді және жасаған сондай-ақ, екі-үш және төрт қанатты періштелер ді елші қылған Аллаға барлық мақтау лайық. Ол жаратуда қалағанын арттырады. Күдіксіз Алланың әр нәрсеге толық күші жетуші» [4].

Аятта періштелердің қанаты болатындығы айтылады. Сондықтан да мұсылман кісі үшін періштелердің қанаты болатындығына сенуі парыз. Ал, періштелердің қанатының қандай екендігін оларды жаратқан Алла Тағала мен періштені өз бейнесінде көрген пайғамбарлар ғана біледі. Періштелердің қанаттарының әртүрлі болуы олардың Алланың әмірлерін орындау барысындағы жылдамдығы мен Алла құзырындағы дәрежелеріне байланысты [5].

«Көкті төңіректеп періштелер ұшып жүреді. Раббының аршысын сегіз періште (төбелеріне) көтеріп тұрады» [6]. Алланың жаратқандарының ішіндегі ең үлкені – Арш. Міне, осыншама үлкен нәрсені қияметке дейін 8 періште көтеріп жүретін болса, олардың қаншалықты алып екенін және де орасан зор күшке ие екенін көзге елестету де, ойлау да мүмкін емес.

Періштелер әп-сәтте өте ұзақ қашықтықтағы бір мекенге барып-келу қабілетіне ие. Шамамен айтсақ, періштелердің жылдамдығын жарық сәулесіне теңеуге болады. Мәселен, жарық сәулесінің жылдамдығы 1 секундта 300 000 шақырым делік. Сол секілді періштелер де 1 секундта 300 000 шақырым, бәлкім одан да жылдам қозғалар. Ал, жер шарының диаметрі 40 000 шақырым екенін ескерсек, періште көзді ашып-жұмғанша жер шарын 7 рет айналып шығу қабілетіне ие болып шығады. Дегенмен, періштенің көкке шығуы, түсуі адамдардың әрекетіне ұқсамайды. Олар осыншама жылдам бола тұрып, кейбір мекенге жету үшін бір күндік уақыт жұмсайды: «Ол жоғары орынға періштелер және Жәбірейіл бір күнде шығады. Оның қашықтығы (жер өлшемімен) 50 000 жылдық [7]».

4. Періштелер Алланың әмірі мен рұқсаты бойынша түрлі бейнеге өте алады. Мәселен, Жәбірейл Пайғамбарымызға (с.ғ.с.) уахи әкелгенде кейде Дихя есіміндегі сахабаның бейнесінде келген. Сонымен қоса, ешкім танымайтын өзге де кейіпте келетін кездері де болған. Құранның мазмұндық желісіне сүйенсек, періштелер Алланың әмірі бойынша адам бейнесінде Хазіреті Мариям анаға, Ибраһим (ғ.с.) және Лұтқа (ғ.с.) келген.

Мариям анаға Алла Иса пайғамбарды әкесіз туылатындығын білдіру үшін Жәбірейілді адам бейнесінде жібереді: «(Мұхаммед(с.а.у.) Құрандағы Мариямды айтып бер. Сол уақытта ол тұрған үйінің шығыс жағындағы бір орынға некеленіп барды. Сонда олардың бер жағынан шымылдық ұстап қойған еді. Сондай-ақ,оған рухымызды (Жәбірейлді) жібердік те, ол оған толық адам бейнесінде көрінді. (Мариям): «Егер сен тақуа болсаң да, сенен Аллаға сиынамын», – деді. (Рух): «Мен сағанбір таза бала беруге жіберілген Раббыңның елшісімін», – деді» [8].

Ал, Ибраһим (ғ.с.) пайғамбарға келген періште оған ұлды болатындығын білдіріп сүйіншілейді. Хазіреті Ибрахим пайғамбар (ғ.с.) әдепкіде оларды құдайы қонаққа балап, ас дайындайды. Аятта бұл мәселе былайша баян етіледі: «Расында, елшілеріміз (періштелер) Ибраһимге хош хабар мен сәлем берді. Ибраһим олардың сәлемін алып, сонда дереу пісірілген бұзауәкелді. Ибраһим олардың қолдарын тигізбегенін көріп, оларды жатырқады да олардың бұл әрекетін жақтырмады. Олар: «Қорықпа! Расында, біз Лұт қауымына жіберілдік», – деді» [9].

Періштелердің ең басты ерекшелігі – олардың көзге көрінбейтіндігі. Періштелердің көзге көрінбеуі олардың нұрдан жаратылу ерекшелігі мен біздің оларды көруге қабілетіміздің жетпейтіндігін білдіреді. Егер Алла бізге толықтай кәміл көру қабілетін беретін болса, онда біз періштені де, қала берді шайтанды да көрер едік. Бірақ, бұл Алланың заңдылығынаүйлеспейді. Асылында, періштелерді тек пайғамбарлар ғана өз бейнесінде көре алады.

Періштелер ғайыпты, яғни келешекті білмейді. Себебі, ғайып тек Алла Тағалаға ғана аян. Ал, періштелердің тек Алланың үйреткен нәрселерін ғана біле алатындығы аятта анық айтылған: «Алла Адамға (ғ.с.) атауларды тегіс үйретті де сонан соң оларды періштелерге көрсетіп: «Айтқандарың рас болса, Маған осы нәрселердің аттарын айтып беріңдер», – деді. Періштелер: «Сен пәксің! Біз Сенің үйреткеніңнен басқа білеріміз жоқ. Әрине, Сен толық білуші, өте данасың», – деді» [10].

Ал, мына аят ғайыпты, яғни келешекті Алладан басқа ешкімнің білмейтіндігін паш етеді: «Ғайыптың кілттері Оның жанында. Оны Ол өзі ғана біледі» [11]. «Көктер мен жердегі көместі (ғайыпты) Алладан басқа ешкім білмейді» [12].

[1] «Әнбия» сүресі, 19-20-аяттар
[2] «Нахыл» сүресі, 50-аят
[3] «Тахрим» сүресі, 6-аят
[4] «Фатыр» сүресі, 1-аят
[5] Сайил Сабиқ, Әл-Ақаидул-Исламия, Бәйрут, 115-бет
[6] «Хаққа» сүресі, 17-аят
[7] «Мағариж» сүресі, 4-аят
[8] «Мариям» сүресі, 16-19-аяттар
[9] «Худ» сүресі, 69-70-аяттар
[10] «Бақара» сүресі, 31-32-аяттар
[11] «Әнғам» сүресі, 59-аят
[12] «Нәміл» сүресі, 65-аят

Періштелерге сену – иман шарттарының басты қағидаларының бірі. Себебі, періштеге иман келтіру, алдымен уахиге, пайғамбардың хақ екендігіне, пайғамбардың әкелген кітабына, оның жеткізген діни үкімі мен тыйымдарына сену деген сөз. Ал, періштеге сенбеу – осы айтылғандардың бәрін қабыл етпеумен тең. Бүкіл діни үкімдер періште арқылы пайғамбарларға жеткізілетіндіктен, періштелерге иман – Алла Тағалаға иманнан кейінгі кезекте өте маңызды рөлге ие. Құран періштелерге иман етудің парыз екендігін білдіреді және періштелердің бар екендігі мен олардың нендей жаратылыс екендігін де айтып өтеді. Періштелерге иман етудің парыздығы мына аяттарда білдірілген: «Пайғамбар өзіне Раббы тарапынан түсірілгенге иман келтірді. Мүміндер де барлығы Аллаға, періштелерге, кітаптарға және пайғамбарларға иман келтірді» [1].

«Кім Аллаға, ақырет күніне, періштелерге, кітаптарға, пайғамбарларға иман келтірсе... міне, солар – шыншылдар әрі солар тақуалар» [2].

Періштелерге иман келтіру Алла Тағала мен Оның елшісінің әмірі болғандықтан қандай да бір періштені қабыл етпеу не қарсы шығу шариғат үкімі бойынша күпірлік болып саналады. Құран Кәрімде бұл мәселеде айқын белгілер бар: «Кім Аллаға, періштелеріне, елшілеріне, сондай-ақ, Жәбірейл, Микайлге дұшпан болса, әлбетте Алла кәпірлерге дұшпан» [3].

Негізінде, біз періштелерді сезім мүшелерімізбен ажырата алмаймыз. Себебі, олар – көзге көрінбейтін нұрдан жаратылған рухани жан иелері. Періштелер жайындағы мәліметтердің қайнар көзі де Құран аяттары мен пайғамбар хадистері ғана.Асылында, періштелердің көрінбеуі – оларды көруге біздің қабілетіміздің жетпейтіндігін білдіреді. Сондықтан да мұсылманның міндеті періштеге, оның бар екендігіне (аят пен хадисте айтылған ерекшеліктеріне) сенумен шектеліп, олардың қандай екендігі, заты, болмысы аса қызықтырмағаны абзал.

Құранның баяндауына қарағанда періштелер адамнан бұрын жаратылған. Себебі, қасиетті кітабымызда Алла Тағала періштелерге Адам атаны жарататындығын және оны жер бетінде халифа етіп дүниеге әкелетінін айтады. Бұл адамзат жаратылмастан бұрын періштелердің бар екендігін білдіреді. Аятта бұл мәселе жайында былай дейді: «Сол уақытта Раббың періштелерге: «Әрине, мен жерде бір орынбасар жаратамын!» – деген еді. Періштелер: «Онда бұзақылық істеп, қан төгетін біреу жаратасың ба? Негізінен біз Сені дәріптеп, мақтау мен пәктеудеміз», – деді. Алла: «Мен сендердің білмегендеріңді жақсы білемін», – деді» [4].

Періштелердің неден жаратылғандығы жайында Құран Кәрімде ешқандай мәлімет келтірілмейді. Айша анамыздан (р.а.) жеткен хадисте Пайғамбарымыз (с.ғ.с.) періштелердің нұрдан жаратылғандығын жеткізеді: «Періштелер нұрдан, жындар жалындаған оттан, Адам болса топырақтан жаратылған [5]».

[1] «Бақара» сүресі, 285-аят
[2] «Бақара» сүресі,177-аят
[3] «Бақара» сүресі, 98-аят
[4] «Бақара» сүресі, 30-аят
[5] Муслим, Зухд – 10; Ахмед Ханбал, Муснад VI, 168)

Жітіқара ауданында күллі түркі әлеміне әйгілі наурыз мейрамы тойланды. Аудан орталығында қазақи салт дәстүріміздің нышаны, көшпелі мәдениетінің сынығы – киіз үйлер тігіліп, алты бақан қойылып халық көтерінкі көңіл күйде қарсы алды. Биылғы жылы наурыз мейрамы жылдағыдан ерекшелігі ауданымызға, оның ішінде аудандық «Ержан Тәтішев» мешітіне Ресей федерациясының Орынбор ауданының шығыс жағының ахун-имамы, Орынбор облыстық мұсылмандары діни басқармасының наиб имамы Нуртышев Аязбек Мырзабекұлы қонаққа келді.

Наурыз құрметіне тігілген киіз үйлерді ауданымыздын христиан провослав шіркеуінің басшысы игумен Максимде Бойков қатысып ресейлік қонағымызбен танысып мерекелік лебізін білдірді.

Аязбек қажы Мырзабекұлы намазға келетін намазхан жамағатымен түскі бесін намазында кездесіп танысты. Арнайы қонақтарға жайылған мешіт дастарханынан дәм татып, мешіт қызметкерлерінің дайындаған ұлттық тағамымыз науырыз көжеден ауыз тиді.

Дастархан басында Ресей федерациясынын Кваркин ауданының әкімінің орынбасары Курманбаев Хамза Байтақұлы және ауданымыздын тілдер дамыту орталығының директоры, ақын айтыскер Тоба Өтеппаевпен «Жітіқара ауданы әкімдігінің Тұрғын үй – коммуналдық шаруашылық жолаушылар көлігі және автомобиль жолдары бөлімі» ММ басшысы Хакимов Асылхан Болатұлы бірге болды.

Жітіқара мешіті