Көпшілікке мәлім, жылдағы қалыптасқан дәстүр бойынша Құрбан айт мейрамында мүмкіндігі келген бауырларымыз бір қой, жеті адамға дейін қосылып ірі қараны құрбандыққа шалды. Биыл да, індетке қарамастан, бұл дәстүр сақталып, жүзеге асырылды.

Осыдан бұрын хабарлағанымыздай, облыс орталығында және Тобыл қаласына қатысты құрбан шалынатын арнайы орын Федоров тас жолында орналасқан «Амиго» кешені болып бекітілген-ді.

Бұдан құлағдар болған ағайын биыл құрбан шалу рәсімін қашықтан өткізуге арналған qurban2021.kz сайты арқылы тапсырыс берген болатын.

Ал құрбандық еті қайырымдылық мақсатында көмекке мұқтаж отбасыларына таратылатын болады. Осы игілікті істің басы-қасында Бахытбек қажы Нұрғабылұлы бастаған мешіт қызметкерлері және арнайы қасапшылар ғана болды.

Қостанай облыстық мешітінің баспасөз қызметі

Наурызбай қажы ТАҒАНҰЛЫ,

Қазақстан мұсылмандары діни

басқармасының Төрағасы, Бас мүфти

 Аса Қамқор, ерекше Мейірімді Алланың атымен бастаймын!

Құрметті жамағат, қадірлі отандастар!

Баршаңызды ұлық мейрам – Құрбан айттың келуімен шын жүректен құттықтаймын! Айт қабыл болсын! Сіздерге амандық пен саулық, бірлік мен береке тілеймін.

Бағзы заманнан бері Ислам дінін ұстанып келе жатқан халқымыз Құрбан айтты ерекше дайындықпен қарсы алады. Ұлық мейрамда үлкенге құрмет, кішіге ізет көрсету, көңілі жабырқаған жанға қуаныш сыйлау, мұқтаж адамға құрбандық етін таратып, сауап алу сынды ізгі амалдар ұрпақтан-ұрпаққа жалғасып келеді.

 «Құрбан» сөзі «жақын болу», «жақындау» деген ұғымды білдіреді. Бұл – шынайы ниет пен Аллаға деген сүйіспеншілікті паш ететін мейрам. Ұлық мерекенің тәрбиелік мәні мен мағынасы осында жатыр. Қасиетті Құранда: «Ұмытпаңдар, олардың еті де, қаны да ешқашан Аллаға жетпейді. Оған жететін нәрсе – жүректеріңізге ұялаған тақуалықтарың (шынайы ниеттерің)» («Хаж» сүресі, 37-аят), – делінген. Аятта айтылғандай, Құдай жолында жақсылық жасауға ниеттенген пенде бұл амалды риясыз оймен орындайды.

Қаржылай мүмкіндігі бар, əрі жолаушы емес мұсылманға құрбандық шалу – уəжіп, мұсылмандық міндет. Ал шамасы келмеген адамға Алла Тағала мұндай міндет жүктемеген. Айт күндері аз да болса садақа беріп, қараусыз қалған қарттарға, жетімдер мен көпбалалы отбасыларға көңіл бөлу – сауапты іс.

Адам баласы құрбандық шалу арқылы Алланың берген ризық-несібесіне шүкір етеді. Көмекке мұқтаж жанға қол ұшын беріп, айналасына шуағын түсіріп, шапағатын тигізеді. Мұсылман қауымын мейірімділік пен бірлікке үндейтін мерекеде барынша жақсылық жасауға тырысайық. Әсіресе әлемді шарпыған жұқпалы дерттен науқастанып, шипа тілеген жандарға көмектесіп, оларға дұға етіп қойғанымыз абзал.

Алла Тағала еліміз бен жерімізді, барша адамзат баласын түрлі сынақтардан аман етіп, жақсылығы мен берекесін нәсіп еткей. Шалған құрбандықтарыңыз, берген садақаларыңыз, айт күндері амалға асырған Аллаға ұнамды әрбір игі істеріңіз қабыл болғай.

Айттан айтқа аман-есен жете берейік. Әмин!

Қазіргі дүние жүзінде қалыптасқан пандемия қай салаға болмасын өзінің зардабын тигізіп жатыр. Соған қарамастан, әлем мұсылмандары ұлық мереке Құрбан айтты ойдағыдай өткізу үшін қолдан келген жағдайды жасауда.

Індетке қарсы барлық сақтық шараларын сақтай отырып, облыстық мешітте Құрбан айт намазы аулада өткізілді.

Онда облыстың бас имамы Бахытбек қажы Тәжімбет жиналғандарды осынау мерекемен шын жүректен құттықтап, әрбір отбасына молшылық, зор денсаулық тіледі.

Қостанай облыстық мешітінің баспасөз қызметі

Қостанай қалалық «Жайлаубай ата» мешітінің ұйымдастыруымен жазғы «Имани ұрпақ» атты сауат ашу курс аяқталды.

Мұнда білікті ұстаздары дәріс беріп, шәкірттерге имандылық, адамгершілік құндылықтарымен қатар алғашқы сатылы діни білім үйретілді.

Айта кету керек бұл осы жаз мезгіліндегі екінші кезеңнің түлектері. Осыған дейін 27 мамыр – 23 маусым арлығында болса, екінші 25 маусым – 19 шілде аралығында өтті. Жалпы алғанда курста 70 бала тәлім алды. 

Соның ішінде 35 бала қасиетті «Құран Кәрімді оқу және жаттау» денгейіне жетті. Осылайша бұл түлектерге де арнайы сертификат беріліп, дастархан жайылды.

Қостанай облыстық мешітінің баспасөз қызметі

Қостанай облыстық мешітінде алдағы Ұлық мереке Құрбан айтқа әзірлікке байланысты жиын өткізілді. Оған облыс бойынша Бас имамдар қатысты.  

Бас қосуда Бас имам Бахытбек Нұрғабылұлы осы мереке аясында ұйымшылдық көрсетіп, қазіргі пандемия кезінде барлық санитарлық талаптарды сақтау қажеттігіне жан-жақты тоқталды.

Ал Құрбан айт намазын оқы бойынша арақашықтықты сақтай отырып намаздың негізгні шарттарын орындап, құрбандық шалуға көңіл бөлу қажеттігі де айтылып, пысықталды.

Айт кету керек Қостанай облыс бойынша Құрбан айт намазы 20 шілде күні сағат 8:00-де оқылады. Негізгі талаптар мешітке дәретпен келуі, бетперде киіп және өзімен бірге жеке жайнамаз алып келуі қажет. 

Қостанай облыстық мешітінің баспасөз қызметі

Дүние жүзі мұсылмандарының ұлық мерекесі Құрбан айтқа да саусақпен санарлықтай күндер ғана қалды. Кеше «Қазақстан-Қостанай» телеарнасының баспасөз клубында осы үлкен мейрамға арналған брифинг болып өтті.

Бұл бұқаралық ақпарат құралдары өкілдері жиналған басқосуға Қостанай облысының Бас имамы Бақытбек қажы Тәжімбет пен Қостанай аудандық «Маңдай батыр» мешітінің наиб имамы Азамат Мурзаканов қатысты.

Бақытбек қажы Нұрғабылұлы өз сөзінде Құрбан деген ұғымның араб тілінде «Жақындау» деген түсінікті білдіретіндігіне, ол жер бетіндегі мұсылман бауырларымыздың өмірінде ерекше орын алатындығына тоқталды. Мейрам 3 күн тойланып, құрбандыққа мал шалынатындығын, бауырларымыз бір-біріне мейірімділік танытып, әруақтарға Құран оқылатындығын айтты.

Оның пікіріне қарағанда, биылғы мерекенің алғашқы күні 20 шілдеге дәл келгендіктен еліміздің халқы демалады. Бұрын өкпе-реніштері болса біржолата ұмытып, татуласады. Көмекке мұқтаж жетім-жесірге қамқорлық жасайды.

Аталмыш брифинг қос тілде жүргізіліп, жерлестеріміздің Құрбан айтқа байланысты қойған сауалдарына нақты жауап берілді. Бас имам барша өңір жұртшылығын мейраммен құттықтап, ырыс-береке, мықты денсаулық тіледі.

Жерлестеріміздің назарына сала кетер бір жай, облыс орталығында және Тобыл қаласына қатысты құрбан шалынатын арнайы орын Федоров тас жолында орналасқан «Амиго» кешені болып бекітілді.

Қостанай облыстық мешітінің баспасөз қызметі

ҚМДБ Төрағасы Наурызбай қажы Тағанұлы Орталық Коммуникациялар қызметінде өткен брифингте биыл құрбан шалу рәсімін қашықтан өткізуге арналған qurban2021.kz сайты іске қосылғанын хабарлады.

Бас мүфти qurban2021.kz жобасының мақсаты қайырымдылыққа дәнекер болу, халықтың денсаулығы мен өміріне төнген қауіпті сейілтуге үлес қосу, құрбан шалуға ниет білдірген жандарға карантин жағдайында оңтайлы жол ұсыну екенін атап өтті.

«ҚМДБ-ның qurban2021.kz сайты бүгін сағат 15:00-де іске қосылып, Құрбан айттың үшінші күні, яғни 22 шілдеге дейін жұмыс істейді. Құрбан шалуға ниет еткен азаматтар осы аралықта тапсырыс бере алады. Сондай-ақ 17 шілдеден бастап осы сайт арқылы мұқтаж отбасылардың құрбандық етін алу үшін өтініш беруіне болады. Мұқтаж отбасылардың өтініштерін қабылдау, сараптау және құрбандық еттерін жеткізіп беру жұмыстарымен ҚМДБ-ның жергілікті өкілдіктері және еріктілер айналысады» деді Наурызбай қажы Тағанұлы.

Брифингте Бас мүфти ауылдық жерде жеке тұрғын үйде тұратын әр адамның құрбан шалуына ҚМДБ тарапынан ешқандай шектеу болмайтынын жеткізді.

Бұдан бұрын хабарлағанымыздай, Қостанай облысының Бас имамы Бахытбек қажы Тәжімбет тәуелсіздігіміздің 30 жылдығы қарсаңында өңіріміздің аудандары мен қалаларында халықпен кездесулер өткізуде.

Бұл жолы белгілі дін қайраткері Рудный қаласының маңындағы Горняк елді-мекеніне атбасын бұрып, жергілікті жұртпен жүздесті. Әңгімеге негізінен еліміз егемендік алған кезең ішіндегі қол жеткен жетістіктер, облыстағы діни ахуал және алда тұрған өзекті мәселелер арқау болды.

Әрине, әлемді жайлаған пандемия жайлы да айтылды. Онда әсіресе, мешіттердегі сақтық шаралары, яғни бетперде тағу, арақашықтықты сақтау жөнінде де тілге тиек етілді. Қойылған сұрақтарға нақты жауап берілді. Бір сөзбен айтқанда, Бас имамның ауылдағы халықпен кездесуі өте әсерлі өтті.

Қостанай облыстық мешітінің

баспасөз қызметі

Әлемді жайлаған пандемия қай салаға болмасын өзінің қиындығын тигізбей қойған жоқ. Алайда соған қарамастан, өңірдегі мешіттерде жылдағы қалыптасқан дәстүр бойынша оқушылардың жазғы діни сауат ашу курстарының жұмысы бір сәтке де тоқтатаған жоқ.

Бұл орайда, облыстық Марал ишан мешітіндегі жүзеге асырылған жарқын істер өзге имандылық ордаларына өнеге болды. Осындағы игі жұмыстарды басшылыққа алған Науырзым ауданыңда да оқушылардың жазғы демалысын барынша тиімді ұйымдастыруға ерекше назар аударылды.

Мысалы, осы кезге дейін жалпы 87 бала дәріс алып, білімдерін шыңдады. Таратып айтатын болсақ, Шилі ауылында 17, Дәмді ауылында 35, аудан орталығы Қарамеңдіде 20 бала зейінділік танытты. Мешіттердегі ұстаздар оларға алғашқы күндерден бастап тиянақты да, терең ілім беруге тырысты.

Дәріс барысында шәкірттерге  Құран әліппесі,  Сира  (Пайғамбар өмірбаяны), Сенім мәселесі, Исламдағы 100 сұраққа байланысты маңызды жайлар оқытылды. Осылайша, талапкерлер көпшілікке мәлім ислам әдебін жан-жақты меңгерді.Сондай – ақ тағлымы мол салауаттар мен дұғаларды жаттап, таным көкжиектерін кеңейтті.

Оқушылар бос уақыттарында рухани жан дүниелерін байыту мақсатында болашақта ұмытылмас өнегелерді, эстетикалық мәні зор құңдылықтарды бойларына сіңірді.

Қостанай облыстық мешітінің баспасөз қызметі

Қостанай облысының Бас имамы Бахытбек қажы Тәжімбет Жітіқара қаласына болған сапарында осы ауданның әкімі Нұржан Өтегеновпен кездесті.

Жүздесу барысында Бас имам аудандық мешітте үстіміздегі жылы атқарылар маңызды жұмыстар жайлы хабардар етті. Сондай-ақ мешітке қызмет бабына байланысты қажетті көлік жайлы тілге тие кетті.

Әкіммен кездесу кезінде онымен бірге ауданның бас имамы да бірге болды. Жалпы Бахытбек Нұрғабылұлының сапары өте іскерлік жағдайда өтті. Жергілікті мешіттің көкейтесті мәселелері болашақта шешімін табады деген үміттеміз.

Қостанай облыстық мешітінің баспасөз қызметі