Жалпы, адамның ойы рухани жағдайына әрі адамның адамгершілігінің дамуына зор әсерін тигізеді. Яғни кез келген жағдайдың жақсы жағын ғана ойлай білу рухани дамуға сеп болмақ. Ал, жаман ойлаудан жағымсыз әдеттер әсерінен көптеген жандарда күмән, сенімсіздіктер пайда болады. Сенімсіздік пен күмән адамдар арасындағы қарым-қатынасқа кері әсер етеді.

Адамға қандай бір жағдай болмасын, дереу жаман ой келеді. Міне, осы уақытта мұсылман басқа адам жайында жақсы ойда болып, жаман ойға түсуден сақтануы тиіс. Яғни, басқа адамның «айыбын» көрсе, оны дереу жамандыққа жорып, шешім қабылдамай, ол турасында жақсы ой ойлау.

Қазақтың ұлы данышпан ойшылы, қазақ философиясында ар, ұят, ынсап мəселелерін философиялық логикада тұңғыш рет қарастырған ойшыл Шәкәрімқажы атамыз өз еңбектерінің бірінде былай дейді:

 «Кейде дос та жамандар жоқ нәрсе үшін,

Дұшпан сөгер сыртыңнан қайрап тісін.
Өнері жоқ, өсекшіл ел жамандар,
Өтірік пе, рас па, көрмей ішін» - демекші, тіпті есту былай тұрсын, адам көзімен көрген істің сыртқы бейнесін көргенімен, оның шынайы мазмұнын білмеуі де әбден мүмкін.

Хазіреті Әли (Алла оған разы болсын): «Алланың құлдары жайында жақсы ойда бол! Егер сондай болсаң, көптеген ауыртпалықтардан құтыласың» деп өсиет еткен. Құранда Алла тағала: «Ей иман келтіргендер, көп күмәнді (жаман ойдан) сақтаныңдар. Өйткені кейбір күмәнді ойлар күнә» - деп ескерткен. (Хұжұрат сүресі-12). Ардақты пайғамбарымыз (с.ғ.с): өсиет сөзі хадисінде: «Жаман ойдан сақтаныңдар! Өйткені жаман ой, орынсыз айыптау – сөздердің ішіндегі ең жаманы. Басқалардың сөздерін аңдып-тыңдамаңдар, кемшілік іздемеңдер, мақтанып өркөкіректік көрсетпеңдер. Бір-біріңді қызғанып, кек сақтамаңдар, бір-біріңнен жүздеріңді теріс бұрмаңдар. Ей, Алланың құлдары! Сендерге Алла бұйырғандай бір-біріңе бауыр болыңдар».

Жаман ойлар қайдан келе береді? Бәлкім бұл – білімнің аздығынан болар. Адамның білімі қаншалықты төмен болса, шариғаттың кейбір тұстарын түсінуде соншалықты қателесуі ықтимал. Сондықтан діни білімді барынша арттырып отыруға көңіл бөлгеніміз абзал.

Жағымсыз ойлар адамның табиғи қалпына, яғни кез келген дүниені ашумен қабылдау және айналасын тек қара түнекте көруге бейімділігіне байланысты туындайды. Ондай адамдар реті келе қалса шағымданып, айналасындағылардың қателігі мен кемшілігін жаны кіре айтып беруге дайын тұрады. Олардың осы қалпы әдетіне, кейін тіпті мінезіне айналып кетуі бек мүмкін.

Кімде-кім Алла Тағалаға жақын болуды қаласа, әуелі өзінің ойы мен Раббысымен байланысты нығайтып, жүрегіндегі жағымсыз ойлар мен күмәндармен күресуге тырысуы қажет. Санамызды жағымсыз ойлар келіп түрткен кезде ары қарай кіруіне жол бермей керісінше, жағымсыз ойды санамыздан шығарып тастауға талпыныс жасаған жөн. Жақсы ой Алланы көбірек еске алуға мүмкіндік беретінін естен шығармайық.

Әлдекімнің қандай да бір қателіген көрсеңіз немесе біреу сізді ренжітсе, оны ақтап алатын дәлел табуға тырысыңыз. Ибн Сирин: «Егер әлдебір бауырың сені сөзбен не ісімен ренжітер болса, оны ақтайтын дәлел ізде, ал егер ештеңе таппасаң, онда: "бәлкім, оның мен білмейтін дәлелі бар шығар деп айт"», - деген.

Қадірменді оқырман қауым! Жоғарыда айтылғандардан ой түйіп, баршамызда өзімізді адамдар туралы жақсы ойлауға баулуға тырасайық. Әрине бұл көп күш-жігер мен сабырлы еңбекті талап етеді, өйткені адамның ажырамас серігі шайтан ешқашан қарап қалмайды, ол адамдардың арасына бүлік пен дұшпандықты тудыруды қалайды. Адамдар жайында жақсы ойда болу, жақсылық тілеу және жақсы жақтарын көру бұл – Құдай тағаланың разылығына бөлейтін керемет қасиет әрі сауапты амал. 

«Біреудің мінін тергенше,Жамандығын көргенше,

Өз ойыңды мазалап,Өз бойыңды тазалап

Өзіңмен күрес өлгенше» - деп басқаның айыбын көріп кінә артпас бұрын өз кемшілігімізді жоюға асығайық ағайын.

Алла Тағаладан баршамызға шынайы иман, таза жүрек нәсіп етуін, сондай-ақ діндес бауырларымыз туралы тек жақсы ойда болуды тілейік.

Рудный қалалық «Нұр» мешітінің имамы Бектұрсын Торғайбайұлы

Қазіргі таңда ата-бабамыздан келе жатқан салт-дәстүрімізді жаңғырту аса маңызды. Ұлдарымыз ұлықты, қыздарымыз қылықты болып өскенге не жетсін. Бұл әрбір саналы ата-ананың арманы.

Жуырда Арқалық шаһарындағы Назипа Құлжанова атындағы Торғай гуманитарлық колледжінде «Иманды ұл, ибалы қыз» және медициналық колледждің жатақханасында «Дін және заң» тақырыптарында тәрбиелік жағы зор кездесу ұйымдастырылды.

Осы жиын барысында шаһардағы мешіттің бас имамы Нұрхан Асанұлы жалпы діни ағым хақында түсінік бере келіп, әлеуметтік желілердегі жалған ақпараттардан, қауіпті сайттардан сақтану және аулақ болу жөнінде мағлұмат берді.

Сонымен қатар қатысушыларға имандық тәлім-тәрбие, әдеп жайында да баяндады. Оның әңгімесін студенттер ұйып тыңдады.

Кездесуге оқу орнының ұстаздары мен студенттері қатысып, көкейде жүрген сұрақтарына тағылымы мол жауап алды. Колледж ұжымы қаланың Бас имамы Нұрхан Асанұлына басқосуға келіп, ғибратты әңгімесі үшін ризашылықтарын білдірді.

Қостанай облыстық мешітінің баспасөз қызметі

Шоқан қажы Ғазизұлы басқаратын Қостанай қалалық "Жайлаубай ата" мешітінің қызметкерлері имандылық ордасының ауласына жасыл шырша отырғызуды көптен бері ойластырып жүрген еді.

Соның сәті осы жақында ғана түсті. Оның жүзеге асуына демеушілер, намазхандар мен дін жанашырлары белсене атсалысты. Сөйтіп мешіттің ауласына он алты түп жасыл шырша отырғызылды.

Бас имамның өзі бас болып арнайы ұйымдастырылған ұйымшылдықтың арқасында қасиетті орынның жан-жағы жасыл желекке бөленіп, жайнап шыға келді. Ол қаланың көркіне ерекше ажар беріп тұр.

Мұндай игі істер алдағы уақытта да жалғасын таба бермек. Оған мешіт ұжымының мүмкіншілігі баршылық.

Қостанай облыстық мешітінің баспасөз қызметі

Ата-бабамыздан келе жатқан мұрамызды жаңғырту мақсатында ұлттық дәстүрлі садақ ату клубы ашылып, оған куә болған жерлестеріміз ерекше қуанышқа бөленді. Бұған қазақтың аяулы қызы Науырзым ауданының тумасы, садақ атудан республикамызда чемпионы Аяулым Аппазова жетекшілік етеді.

Намысты да жігерлі бауырымыздың ендігі көздеген мақсаты-алдағы уақытта ұлттық спортымыздың осы түрін өңірімізде жаңғырту. Сол мақсатта Қостанай аймағындағы кәсіпкерлер палатасының көмегіне сүйенген. Кәсіпкерлер оның бастамасына қолдау білдірді.

Жоғарда аталған клубтың салтанатты ашылуына Қазақстан мұсылмандары діни басқармасының өңірдегі Бас имамы Бахытбек қажы Тәжімбет қатысып, Аяулым Аппазоваға шынайы алғысын білдіріп, батасын берді.

Сонымен қатар өңірдегі «Олжа-Агро» серіктестігі де ұлттық спорт ойындарына қолдау білдіретін болды. Енді осы клубта Қостанайдың жас жеткіншектері, талапты ерлер мен әйелдерге садақ ату үйретілмек.

Қостанай облыстық мешітінің баспасөз қызметі

Қарабалық ауданының бас имамы Серік Рахым жастарды деструктивті теріс ағымдардан сақтандыру мақсатында Қазақстан агротехникалық колледжінің студенттерімен кездесті.

Онда ол бүгінгі таңдағы аса маңызды «Теріс ағымдардың зардаптары» тақырыбында студенттерге кеңінен әңгімеледі. Олардың қойған сауалдарына нақты жауап берді.

Жалпы жоғарыда аталған білім ордасында мұндай тағылымы мол жүздесулер жиі ұйымдастырылады.Баяндалған басқосу осы сөзіміздің жарқын айғағы.

Қостанай облыстық мешітінің баспасөз қызметі

Өткен аптада Рудный қалалық «Нұр» мешітінде сенбілік ұйымдастырылды. «Тазалық – иманның жартысы» деген қағиданы берік ұстанған мешіт қызметкерлері мен жамағаттар белсенділік танытты.

Олар мешіт аумағын жинастырып, айналаның айнадай тазалығына айрықша назар аударды. Соның нәтижесінде барлық қоқыстар арнайы техникаға тиеліп, тиісті орындарға шығарылды.

Қалалық мешіттің бас имамы Бектұрсын Уәлиев қараша айының алғашқы жұмасында игілікті іс тындырған жерлестеріне, жамағаттар мен шәкірттерге ұйымшылдықтың жарқын үлгісін көрсеткендері үшін шын жүректен шыққан шынайы алғысын білдірді.

Қостанай облыстық мешітінің баспасөз қызметі

Жылдағы қалыптасқан дәстүр бойынша Қостанай өңіріндегі дін қызметкерлері Ұлы Пайғамбарымыздың туған күні, яғни Мәуліт мерекесінің есте қаларлықтай болуына айрықша назар аударды.

Осы сөзіміздің жарқын айғағы ретінде Қазақстан мұсылмандары діни басқармасының облыстағы өкілдігінің бастамасымен барша аудандық, қалалық, кенттердегі мешіттерде мәуліт мейрамына орай салауат шәриф оқылды.

- Қасиетті жұма күні өңірдегі бүкіл имандылық ордаларында Мұхаммед Пайғамбарымыздың өмірін насихаттауға бағытталған тағылымдық жағы мол ғибраттық шаралар ұйымдастырылды, - деді облыстық мешіттің найб имамы Әлішер Балахмет.

Қостанай облыстық мешітінің баспасөз қызметі

Жақында Қостанай ауданына қарасты Алтын дала ауылында Пайғамбарымыздың туған күніне орай Мәуліт мерекесі ұйымдастырылды. Бұл мейрамға облыстық Марал ишан мешітінің найб имамы, ұстаз Абдулқаһар Ерматов, Тобыл қалалық «Маңдай батыр» мешітінің бас имамы Дархан Сыздықов қатысты.

Алдын ала хабарланғандықтан іс шарада оқушылар тәлімдік-тәрбиелік мәні зор салауаттарды орындады. Ұлы Пайғамбарымыздың өмірбаянынан қасидалар оқылды.

Кеш соңында жиналған қауымға ас берілді. Онда да жергілікті жамағат пен бауырларымызға ой саларлық әңгімелер айтылды.

Қостанай облыстық мешітінің баспасөз қызметі

Рудный қалалық «Нұр» мешітінде мерейлі Мәуліт мейрамына байланысты тағылымы мол іс-шара ұйымдастырылды. Онда Пайғамбарымыздың өмірі баяндалып, салауаттар оқылды.

Бұл мерекеге ерлер жамағатымен қатар қыз-келіншектер секторының ұстазы Аяулым Смағұлова бастаған әйелдер қауымы да белсене атсалысты. Олар «Соқыр яһуди» атты ғибратты көріністі дайындап, мешіт шәкірттері тәлімді қойылымды жұртшылықтың назарына ұсынды.

Сонымен қатар Алла елшісі жайлы мазмұнды уағыздар айтылып, діни әндер орындалды. Сұрақ-жауап ойыны өткізіліп, тапқырлық танытқан қатысушыларға естелік сыйлықтар табыс етілді. Мерекелік шарадан балалар үйі мен басқа дін өкілдері үлкен әсер алды.

Жиналғандар Мәуліт мейрамының құрметіне жайылған дастарқаннан дәм татты.

Қостанай облыстық мешітінің баспасөз қызметі

Ислам дінінің көрнекті өкілі Сатыбалды ишан Ғабдоллаұлының 195 жыл толуына орай Торғай аймағы бойынша «Құран кәрім - мәңгілік мұғжиза» атты қасиетті Құран Кәрімнің 30-шы парасын жатқа және мәнерлеп оқудан сайыс өтті.

Бұндағы басты мақсат – өскелең ұрпаққа қасиетті Құранды оқытып, үйренуді насихаттау. Аталмыш жарыста Аманкелді ауданының әкімі Талғат Тойшыбекұлы жиналған қауымға ізгі лебізін білдірді. Сонымен қатар, ишанның ұрпақтары Құран жаттаушылардың қатары көбейе берсе деген тілектерін жеткізді.

Байқауға мәртебелі қонақтар, яғни облыс орталығындағы «Жайлаубай ата» мешітінің бас имамы Шоқан Ғазизұлы, Рудный қалалық мешітінің бас имамы Бектұрсын Уалиев пен найб имамы Әкімбек Нұрханұлы әділ қазылық жасады.

Жарыстың қорытындысы бойынша жүлделі 1-ші және 2-ші орындарды Арқалықтық Көбей Қалмырзаев пен Ербол Мұқанов, 3-ші орынды Амангелді ауданынан қатысқан Данияр Білімұлы иеленді.

Ал, 30-шы параны жатқа оқудан 1-ші орынға Жангелділік Бекболат Наурыз, 2-ші орынға Арқалық қаласының өкілі Қуандық Алдабергенұлы, 3-ші орынға Жангелді ауданынан келген Дінмұхаммед Ғазиз ие болды. Сондай-ақ, ынталандыру сыйлығы Амангелді ауданынан қатысқан Осман Абзалұлына берілді.

Барлық қатысушыларға «Сатыбалды ишан Ғабдоллаұлы» кітабы мен ақшалай сыйлықтар табыс етілді.

Бұл байқаудың өтуін Әмірхамзин Жандарбек имам мен мешіт ұжымы ұйымдастырып, ишанның ұрпақтары демеушілік етті. Олар бабаларының құрметіне мешіт асханасында қонақтар мен сайысқа қатысушыларға арнайы дастарқан жайды. Онда өңірімізге есімі танымал Мұхтар қажы және Кәкей ақсақал сөз сөйледі. Ас соңында Құран оқылып, бата берілді.

Қостанай облыстық мешітінің баспасөз қызметі