Бүгін Әулиекөл ауданындағы Құсмұрын кентінде Ұлы Пайғамбарымыз Мұхаммедтің (оған Алланың игілігі мен сәлемі болсын) туған күніне арналған Мәуліт мерекесі жергілікті Мәдениет үйінде аталып өтті.

Жиналған қауымның алдында облыстық мешіттің найб имамы Әлішер Ертайұлы, Нұр Мүбарак ислам мәдениеті университеті шәкірті Әлинұр Нұрболұлы, Тобыл қалалық «Маңдай батыр» мешітінің бас имамы Дархан Манарбекұлы мәуліт оқыды.

Ал, облыстың Бас имамы Бахытбек қажы Тәжімбет, Нұр-Мүбарак Египет ислам мәдениеті университетінің ұстазы Тілекқабыл Аманкелді аталған мейрамның мәні мен маңызы жөнінде уағыз айтты.

Осы шара кезінде Қазақстан мұсылмандары діни басқармасының бастамасы бойынша «Ел үлесі пәтерге» жобасы аясында 468 баспана кілті табысталды.

Сонымен, Құсмұрындық ағайындар тәрбиелік жағынан берері мол қос қуаныштың куәсі болып, рухани жағынан жан дүниелерін байытты.

Қостанай облыстық мешітінің баспасөз қызметі

Қасиетті жұма күні Әулиекөл ауданына қарасты Құсмұрын кентінің тұрғындары үлкен қуанышқа кенелді. Мұнда мұсылмандар қауымы көптен күткен «Хақ» мешіті қайта салынып, салтанатты түрде ашылды.

Аталмыш мешіттің ашылуы кезінде Қазақстан мұсылмандар діни басқармасының Қостанай облысының Бас имамы Бахытбек қажы Тәжімбет және облыстық Дін істері басқармасының басшысы Жанболат Үмбетов барша жұртшылықты кент өміріндегі елеулі оқиғамен шын жүректен құттықтап, жиналғандарға мықты денсаулық, отбасына ырыс-береке тіледі.

Сондай-ақ, Бахытбек қажы Нұрғабылұлы мешітке ескерткіш ретінде қасиетті Қағбадан жеткен тәбәрік «Кисуа» сыйға тарту етті.

Енді Құсмұрын елді-мекеніндегі пайдалануға берілген имандылық ордасы жергілікті халықтың жиі бас қосатын әрі жерлестерімізді адамгершілікке, ізгілікке үндейтін киелі орыны екені шүбәсіз.

Қостанай облыстық мешітінің баспасөз қызметі

Кешегі нәубет жылдары қаншама бауырларымыз күн көріс қамымен шетелдерге амалсыздан қоныс аударғаны белгілі. Тек еліміз тәуелсіз алғаннан кейін ғана олар көштің басын атамекенге бұрды.

Бұл күндері Б.Майлин ауданында да арамызға қосылған ағайындар ғұмыр кешіп жатыр. Жергілікті «Әйет» мешітінің бас имамы Ислам Хамзин олардың басын қосып, кейінгі жастарға өнеге боларлық ғибратты кездесу өткізді.

Тағылымды кешке ұлтжанды, бауымал азаматтар шақырылды. Қатысушылар тәуелсіздігіміздің 30 жылдығы және қандастарымыздың қазіргі таңдағы тұрмыс-тіршілігі жайлы әсерлі әңгіме қозғады.

Қостанай облыстық мешітінің баспасөз қызметі

Тазалық барлық ізгілік пен игіліктің бастауы. Мұны Әулиекөл аудандық «Әмит ишан» мешітінің бас имамы Нұрлан қажы Сыздықов жете түсінеді. Сондықтан да шығар, оның ұйытқы болуымен өткен бейсенбі-жұма және демалыс күндері жаңадан салынып жатқан мешітте тазалық өткізілді.

Әйелдер жағы іші-сыртының шаңын сүртті, айналаны тазартты, батареяларды сырлады. Ал ерлер қауымы өздеріне бекітілген істерді абыроймен атқарды.

Бұл іске мешіттің алқа мүшелері, Аманқарағай ауылы «Сабыр молда», Мәскелеу ауылы «Айша ана» намазханаларының молдалары Серікбай қажы мен Ораз қажы жамағатымен келіп атсалысты.

Бұ істе Әулиекөл ауылының әкімі Райымбек Едіресов пен барша жүректері ізгілікке толы азаматтар да ортақ іске өздерінің лайықты үлестерін қосты.

-Жалпы, болашақта жерлестеріміздің имандылық ордасына келіп, дініміздің құндылықтарын бойларына молынан сіңірулеріне қолдан келген жағдайдың бәрін жасаймыз. Әлі де мешіт жанашырлары қарбалас шақтарда жанымыздан табыла беретіндігіне сеніміміз мол,- дейді ауданның бас имамы Нұрлан қажы Сейілханұлы өз сөзінде.

Қостанай облыстық мешітінің баспасөз қызметі

Тобыл қалалық Маңдай батыр» мешітінің Бас имамы Дархан Манарбекұлы Қостанай ауданына қарасты елді-мекендерге ат басын бұрып, жергілікті намазханалардың тыныс тіршілігімен танысты.

Ол өз сапарын қалаға іргелес орналасқан Жамбыл және Алтын дала ауылдарының жұртшылығымен кездесуден бастады. Бұл сапарда жамағатқа Ислам дінінің құндылықтары жайлы уағыз-насихат айтты.

Жауапты қызметіне құлшыныспен кіріскен білімді де білікті имамның жүректен шыққан ойлы пікірлері мен жылы лебіздерін аталған елді-мекендердегі мұсылман бауырлар тыңдай келе көкейлеріндегі сұрақтарын қойып, ойларымен бөлісті.

Қостанай облыстық мешітінің баспасөз қызметі

Б.Майлин аудандық «Әйет» мешітінің бас имамы Ислам Хамзин басшылық ететін ұжымда да өзгелерге өнеге боларлық ізгі шаралар өткізіліп, жұртшылық тарапынан лайықты бағасын алуда.

Жақында ғана олардың ұйытқы болуымен аудандық Мәдениет үйінде «Рухани келісім – қоғамдағы тұрақтылықтың негізі» атты дөңгелек үстел ұйымдастырылды. Оған аудандық ішкі саясат бөлімінің қызметкерлері және Рудный қаласы ардагерлер кеңесінің мүшесі Рысбике Сүймекова қатысты.

Жиында қатысушылар қазіргі таңда елімізде тұрақтылық пен ауыз бірліктің айрықша орын алатындығына тоқталды. Елге сыйлы азаматттардың пікірлерін зиялы қауым ұйып тыңдады.

Қостанай облыстық мешітінің баспасөз қызметі

Жуырда Меңдіқара аудандық «Зұлқарнайұлы Мұса қажы» мешітінің бас имамы Еркебұлан Қошан аудан орталығындағы Кәмшат Дөненбаева атындағы ауылшаруашылық колледжінің 2 курс студенттерімен жүздесті.

Онда ол жастарға ел тарихы, жер тарихы, Отанды сүю, үлкенге құрмет, кішіге ізет көрсету жөнінде әңгіме өрбітті. Сонымен қатар аудандық ардагерлер үйінің төрағасы Есет Көбеков студенттерге болашақтарына бағдар болар ақыл-кеңесін айтып, ақ батасын берді.

Қатысушылар бұл тағылымды кездесуден ұмытылмас әсер алып, мешіт қызметкерлеріне дән ризашылықтарын білдірді.

Қостанай облыстық мешітінің баспасөз қызметі

Жақында Рудный қалалық «Нұр» мешітінде «Ихсан – рухани кемелдену жолы» атты басқосу болып өтті. Мұнда «Ихсан» ілімі жайлы жан-жақты мағлұмат беріліп, Хәкім Абай атамыздың кемел адам концепциясы да насихатталды.

Жиналған жамағатқа толық адам болуға үндеген Абай мұрасын рухани көзқарас тұрғысынан түсінуге зор мүмкіндік берілді.

Бас имам Бектұрсын қажы өз сөзінде: «Біз Абай мұрасын таныған сайын рухымыз байып, жан-дүниеміз Ислам құндылықтарынан сусындай түседі. Мәселен: «Үш-ақ нәрсе – адамның қасиеті: ыстық қайрат, нұрлы ақыл, жылы жүрек» деп ұлы ақын саналы жанға тағылымды да асыл қасиеттерді терең ұғындырады» деді.

Аталмыш басқосуда осындай рухани тәлімді жайлар айтылды. Жиналғандар болашақта өздеріне бағыт-бағдар болар құнды пікірлерді көңілдеріне түйді.

Қостанай облыстық мешітінің баспасөз қызметі