Елордада Қазақстан Республикасының ұлттық мерекесі – Республика күніне орай ұйымдастырылған І халықаралық Құран жарысы жалғасуда.
Қазақстан мұсылмандары діни басқармасының төрағасы, Бас мүфти Наурызбай қажы Тағанұлының бастамасымен өтіп жатқан Құран жарысы бүгін қорытындыланады. Жарыстың екінші күнін отандасымыз Әлібек Жалиев бастады. Сондай-ақ бүгін Дағыстан Республикасы, Сауд Арабиясы Корольдігі, Иран, Әзербайжан мен Малайзия қарилары, тағы бір отандасымыз Иманәлі Мырзагелді бақ сынайды.
Айта кетейік, Құран жарысы мүфтияттың төл «Munara TV» телеарнасынан, «Муфтият ҚМДБ» YouTube арнасынан, Діни басқарманың @muftiyatkz ресми инстаграм-парақшасынан тікелей эфир арқылы көрсетіліп жатыр.
Бүгін елордада Қазақстан мұсылмандары діни басқармасының ұйымдастыруымен Қазақстан Республикасының ұлттық мерекесі – Республика күніне орай тұңғыш рет өтіп жатқан І халықаралық Құран жарысында Бас мүфти Наурызбай қажы Тағанұлы осылай деді.
«Құран оқылған үйге, жерге Алланың берекесі мен тыныштығы орнайды. Құран оқылған үй ерекше нұрға бөленеді. Бұл туралы Алла Елшісі (оған Алланың салауаты мен сәлемі болсын) былай деген екен: «Жер бетіндегілерге жұлдыздар қалай көрінсе, Құран оқылған үй де көктегілерге дәл солай көрінеді». Бүгін қазақ даласы көктен қарағанда шоқ жұлдызға айналғай деп тілейміз.
Пайғамбарымыз (оған Алланың салауаты мен сәлемі болсын) тағы бір хадисінде: «Құранның әрбір (жатталған) аяты (жаттаған кісінің) жәннаттағы дәрежесін көтереді және үйлерінде (оқылған Құран) шамдар секілді (көктегілерге жарық шашады)» деп баяндайды. Алла Тағала мешітте оқылып жатқан қасиетті Құран аяттарымен жерімізді нұрландырғай» деді Бас мүфти Наурызбай қажы Тағанұлы.
Республикалық бас мешітте өтіп жатқан І халықаралық Құран жарысы ертең де жалғасады.
Жақында Республика күніне орай Арқалық қалалық “Мухтасиб Әлмұхаммед” мешітінде ұлттық нақышта жәрменке және қолөнерлік каллиграфия көрмесі ұйымдастырылды.
«Жақсыны көрмек үшін» демекші, қасиетті жұма намазына арнайы келген мешіт жамағаттары көрмені тамашалап, он саусағынан өнері тамған жерлестеріне өздерінің дән ризашылығын білдірді.
Қостанай облыстық мешітінің баспасөз қызметі
Республика күні қарсаңында Меңдіқара ауданындағы «Қарамақы ата» мешітінде Мұхаммед Пайғамбарымызға арналған Мәуліт мерекесі болып өтті. Онда жамағатқа мейрам құрметіне дастарқан жайылды.
Жиын барысында, алдымен, қасиетті Құран оқылып, ата-бабаларымыздың рухына дұға жасалды. Жаңадан ашылған асханада Мәуліт қасидасы мен салауаттар айтылды.
«Қарамақы ата» мешітінің бас имамы Еркебұлан Қошан мешітке демеушілік еткен барша кәсіпкерлерге Алғыс хат, салауат айту іс-шарасына белсене атсалысқан жамағаттарға ақшалай сыйлық пен Құран кітабын табыс етті.
Ал мерекелік басқосуға қатысқан аудан әкімінің орынбасары Мирас Ахметов барша қауымды Мәуліт және Республика күнімен шын жүректен құттықтап, ең ізгі тілегін білдірді.
Содан кейін елімізге танымал сазгер, Қазақстан Республикасының еңбек сіңірген мәдениет қызметкері, ел ағасы Бақытжан Сәуекенов мұсылман қауымға ақ батасын берді.
Іс-шара барысында жасөспірімдер қазақтың ұлттық ойыны - асық, ұл мен қыз балалар арасында сақа атудан жарыс өткізілді. Мұнда көзге түскен жеңімпаздарға бас имам Еркебұлан Жаңбырбайұлы мен жұртшылыққа есімі жақсы таныс Алқар Абзалбек ақшалай жүлделерді тапсырды.
Қостанай облыстық мешітінің баспасөз қызметі
Таяуда Арқалық қалалық “Мухтасиб Әлмұхаммед” мешітінің бас имамы Нұрхан қажы Асанұлы жергілікті Қазтұтынуодағы көпсалалы колледжі директорының оқу-тәрбие ісі жөніндегі орынбасары Анюта Ахметбекованың арнайы шақыруы бойынша аталмыш білім ордасының студенттерімен кездесті.
Мұнда ол «Жат ағымдардан сақтану» және «Ислам дінінің бірлігі» деген маңызды тақырыптарда уағыз-насихат айтты және қатысушылардың қойған сауалдарына жауап берді.
Бас имаммен жүздесуден кейін еліміздің ертеңі болып табылатын жастар жақсы әсер алып, дін қайраткерімен естелікке суретке түсті.
Қостанай облыстық мешітінің баспасөз қызметі
Науырзым аудандық «Түркебай ата» мешіті қызметкерлерінің ұйымдастыруымен Республика күні және Мәуліт мерекесінің құрметіне волейболдан турнир өткізілді.
Алдымен, Мемлекеттік әнұран шырқалды. Содан кейін аудан әкімінің орынбасары Нұрлан Амиров құттықтау сөз сөйлеп, жұртшылықты айтулы қос мерекемен құттықтады.
Спорттық жарыс жоғары деңгейде өткізілді. Жеңімпаздарға мақтау қағаздары мен ақшалай сыйлықтар табыс етілді.
Қостанай облыстық мешітінің баспасөз қызметі
Қарағандыдағы қайғылы жағдай Қостанай жұртшылығына да ауыр тиді. Күтпеген оқиғадан қаншама жазықсыз кісілер жапа шегіп, олардың отбасылары қайғы жұтты. Өткен жексенбі республикамызда аза тұту күні болып жарияланды.
Қарағандылық бауырларымыздың қазасы өңірдегі дін қызметкерлеріне де жеңіл соққан жоқ. Сондықтан облыстың аудандары мен қалаларындағы мешіттерде шахталарда қайтыс болған азаматтардың әруағына бағышталып, дұға жасалды.
Әрине, апаттан зардап шеккен кісілердің отбасы мен балалары мемлекеттің тарапынан қамқорлыққа алынады. Бұл жөнінде тиісті орындар нақты шаралар қабылдайды.
Қостанай облыстық мешітінің баспасөз қызметі
Облыс орталығында ғұмыр кешіп жатқан қырғыз қауымдастығы Қостанай қалалық "Жайлаубай ата" мешітінде Мұхаммед Пайғамбарға арнап мәуліт-шариф оқытты.
Онда есімдері көпке танымал дін қайраткерлері Әлішер Ертайұлы, Дархан Манарбекұлы, Әлібек қари және белгілі журналист Қыдырбек Қиысқан орындаған салауаттар жиналған жамағатқа өте әсерлі болды.
Қонақтар жайылған дастарқаннан дәм татты. Көпшілік құптан намазын оқып, жоғары көңіл-күймен тарқасты.
Қостанай облыстық мешітінің баспасөз қызметі
Биылғы «Ислам және ізгі қоғам» жылы аясында Қостанай қалалық «Марал ишан» мешітінде ақ жаулықты аналар арасынан әжелер мектебі құрылды. Олар негізі қаланған соң «Әжелер мектебі – тәрбие негізі» атты дөңгелек үстел ұйымдастырды.
Жиынды әйел-қыздар секторының ұстазы Гүлдана Жаңабайқызы жүргізіп, топтың мақсатын жан-жақтағы түсіндірді.
Содан кейін қоғамдағы дін мен дәстүрді негізге ала отырып, қыз балалардың тәрбиесі, жас отбасыларға кеңес беру және жанұялардағы ажырасудың алдын алу секілді маңызды тақырыптар көтеріліп, ұсыныс- пікірлер айтылды.
Ұлғайған жастарына қарамастан мешіт ұстаздарынан дәріс алып, ілім жолындағы ізденістерін еш үзбеген асыл әжелер бұған дейін де мешіттегі көптеген шараларға белсене қатысып, жастарға тәлім беруде.
Қостанай облыстық мешітінің баспасөз қызметі
Меңдіқара ауданындағы «Қарамақы ата» мешітінде әйел жамағаттары қолөнер көрмесін ұйымдастырды. Онда аяулы аналар өз қолдарынан шыққан түрлі туындыларын көрсетті.
Олар көздің жауын алатын жұмыстарымен таныстырып, өзара тәжірибе бөлісті. Аудандық мешіттің қызметкері Ұлболсын және әрдайым қамқорлық танытатын Ақбота Сыздық та қатысушыларға дастархан жайып, шынай алғысқа бөленді.
Басқосу соңында аудандық кітапхананың бөлім басшысы Роза Сағындыққызы көрмеге туындыларын ұсынған жандарға ризашылығын білдіріп, Алғыс хатпен марапаттады.
Қостанай облыстық мешітінің баспасөз қызметі
Миләди
Хижри
