Салауатты өмір салты— бұл ең әуелі денсаулықты сақтауға және нығайтуға бағытталған сауықтыру жолындағы белсенді іс-әрекет. Өмір Адамның өмір салты өздігінен қалыптаспайды, ал салауатты өмір салты өмір сүру барысында мақсатты түрде қалыптасады. Қазіргі мәліметтер бойынша денсаулық 53-55%- ға салауатты өмір салтына тәуелді болады екен.

Міне осы орайда Қостанай қалалық "Жайлаубай ата"мешітінің имамдары мен шәкірттері бірігіп, сенбі сайын Құптан намазынан кейін "Спорт-денсаулықтың кепілі" тақырыбында жамағат арасында волейбол жарысын ұйымдастырып келеді.

Мұндағы негізгі мақсат - жамағаттың ынтымақ-бірлігі мен өзара сыйластығын, салауатты өмір салтын барынша нығайту.

Қостанай облыстық мешітінің баспасөз қызметі

Мешіт тек ғибадат үйі ғана емес. Ол жерден жақсылықты үміт еткен әрбір жанға жақсылық нәсіп болатыны шүбәсіз.

Осы орайда өткен күндері Жітіқара аудандық «Ержан Тәтішев» мешітінде «Қайырымды жұма» шарасы өткізілді. Онда әлеуметтік жағынан аз қамтылған 12 отбасыға азық-түлік берілді.

Осы мақсатқа 144 000 теңге жұмсалды. Қуанышқа бөленген жанұялар өздеріне жасалған қамқорлық үшін жүрегі жомарт жандарға шынайы алғыстарын білдірді.

Қостанай облыстық мешітінің баспасөз қызметі

Лисаков шаһарындағы Мәдениет үйінде Мұхаммед Пайғамбарымыздын туған күніне орай ғибраты мол рухани кеш өткізілді. Оған Қостанай облыстық «Аймағанбет қажы Спанұлы» мешітінің Бас имамы Бахытбек қажы Тәжімбет бастаған өңірдегі қала және аудан имамдары қатысты.

Жиналғандар алдында қала әкімінің орынбасары Саят Жұматұлы сөз сөйлеп, жерлестерін Мәуліт мерекесімен құттықтады. Сондай-ақ, Бахытбек Нұрғабылұлының ізгі лебізі мен айтқан уағыз–насихатын жұртшылық ұйып тыңдады.

Рухани кештен кейін қала әкімі Абай Ибраев Мәуліт мейрамының құрметіне ас берді. Дастархан басында облыстың Бас имамы, жергілікті абыз ақсақалдар тебіреніске толы тілектерін жеткізді. Қостанай қалалық «Жайлаубай ата» мешітінің ұстазы Әлібек қари Құран оқып, Шоқан қажы Әмірханов бата берді.

Қостанай облыстық мешітінің баспасөз қызметі

Қостанай облыстық «Аймағанбет қажы Спанұлы» мешітінің Бас имамы Бахытбек қажы Тәжімбет арнайы іс-сапармен Лисаков қаласында болды. Онда ол шаһар әкімі Абай Ибраевпен кездесті.

Қала басшысының қабылдауындағы әңгіме барысында жергілікті мешітте шешімін күтіп тұрған өзекті мәселелер қаралды. Абай Сәрсенбайұлы халық үшін аса маңызды «Қамқор – шарапат» салттық қызмет көрсету орталығына бөлінген жерді кеңейту және келесі жылы мәйітхана құрылысын жүргізуді бастап, оны толық аяқтауға сөз берді.

Қостанай облыстық мешітінің баспасөз қызметі

ҚМДБ-ның бастамасы аясындағы ұйымдастырылып жатқан жұмыстар аясында Қостанай облыстық «Аймағанбет қажы Спанұлы» мешітінің найб имамы, Зекет және қайырымдылық қорының жетекшісі Бақытжан қажы Икрамұлы Жітіқара қаласында қуанышты жәйтке куә болды.

Ол үлкен жоба аясында 63 жастағы жалғыз басты азамат Есенғали Саматұлына шаһардағы үш қабатты үйден 2 бөлмелі пәтердің кілтін табыс етті. Бұл осымен елімізде қолға алынған "Ел үлесі - пәтерге" жобасы бойынша жерлестерімізді үстіміздегі жылы қуанышқа бөлеген № 709-шы баспана.

Қостанай облыстық мешітінің баспасөз қызметі

Қостанай қалалық “Жайлаубай ата” мешітінде мектеп жасындағы қыздар арасында діни-танымды викториналық сайыс ұйымдастырылды.

Ағымдағы жылдың аяқталуына байланысты шәкірттер өздерінің білімдерін сарапқа салды. Әділқазылардың шешімімен І орынды “Фирдаус”, ІІ орынды “Кәусар”, ІІІ орынды “Раян” топтары иеленді.

Жүлдегерлерге бағалы сыйлықтар мен мадақтама табыс етілді.

Қостанай облыстық мешітінің баспасөз қызметі

Қалалық «Мухтасиб Әлмұхаммед» мешітінің Бас имамы Нұрхан қажы Асанұлы, Ербол және Азамат есімді бауырларымыздың қолдауымен Қазақстан мұсылмандары діни басқармасының «Ислам және ізгі қоғам» жобасы аясында бейсенбі күндері жергілікті студентер және жамағаттар арнайы шақырылып, берекелі дастархан жайылды.

Бұл іс-шараларда Бас имам «Сабырлық — асыл қазына», «Имандылық айнасы» тақырыптарында уағыз айтып, жұртшылықты әрдайым тіршілікте сабырлы, иманды болуға шақырды. Содан кейін құптан намаздары оқылды.

Нұрхан қажы Асанұлы қос азаматқа ізгі лебізін білдіріп, отбастарына шадыман шаттық және баянды бақыт тіледі.

Алдағы уақытта да жамағаттың ауыз бірлігі мен ынтымағын нығайту мақсатында әр бейсенбі сайын осындай дастархан басындағы маңызды әңгіме жалғасын таба бермек.

Қостанай облыстық мешітінің баспасөз қызметі

Жітіқара аудандық «Ержан Тәтішев» мешітінде «Қайырымды жұма» шарасы өткізілді. Онда әлеуметтік жағынан аз қамтылған 12 отбасыға азық-түлік берілді.

Осы мақсатқа 144 000 теңге жұмсалды. Қуанышқа бөленген жанұялар өздеріне жасалған қамқорлық үшін жүрегі жомарт жандарға шынайы алғыстарын білдірді.

Қостанай облыстық мешітінің баспасөз қызметі

Жітіқара аудандық «Ержан Тәтішев» мешітінде Мұхаммед Пайғамбарымыздың туған күніне арналған Мәуліт мерекесі өткізілді.

Онда дін қызметкерлері араб және қазақ тілдерінде Пайғамбарымыздың өмір жолдарын баяндайтын Мәуліт жырларын оқыды. Сондай-ақ, дастархан жайылып, түрлі викториналық сайыстар ұйымдастырылды.

Жиында дініміздің өркендеуіне қомақты үлес қосып, мешітке тұрақты демеушілік жасап жүрген азаматтарға Алғыс хат тапсырылды.

Қостанай облыстық мешітінің баспасөз қызметі

Арқалық қалалық полиция басқармасының бастығы, полковник Орал Баймурзиннің бастамасымен кейінгілерге тағылым болар жиын өткізілді.

Оған жергілікті “Мухтасиб Әлмұхаммед” мешітінің Бас имамы Нұрхан Асанұлы арнайы шақырылды. Кездесу барысында ол арақтың адам баласына зияндылығы, оның қоғамдағы болып жатқан қылмыстардың орын алуына ықпал ететіндігін, жастардың ішімдіктен аулақ болулары жөнінде әңгіме өрбітті.

Басқосуға қатысушылар дін қайраткеріне көкейде жүрген сауалдарын қойып, тұщымды жауап алды.

Полиция басқармасының басшысы Бас имамға өзекті мәселені арқау еткен ой-толғаныстары үшін шынайы алғысын білдірді.

Қостанай облыстық мешітінің баспасөз қызметі