Жақында Қарабалық аудандық «Ғашура ана» мешітінде Қазақсан Республикасы Президентінің кезекті Жолдауын талқылауға байланысты жиын болып өтті.

Онда Қостанай облыстық «Аймағамбет қажы Спанұлы» мешітінің ұстазы «Дәстүрлі емес діни ағымдардың студенттер мен өскелең ұрпаққа теріс әсері» деген тақырыпта жасаған баяндамасын халық ұйып тыңдады.

Сондай-ақ аудандық ардагерлер кеңесінің төрайымы Сәния Қабылова «Ғашура ана» мешітінің бас имамы Төлеген Керімбаевтардың сөздері де көпшілікке үлкен әсер қалдырды.

Бұл Жолдауды талқылауға мешіттің алқа мүшелері Қайырхан Байқанұлы, Райхан қажы Әмірханқызы, №3 Қарабалық орта мектебінің директорының тәрбие ісі жөніндегі орынбасары Ақтолқын Ботабайқызы, мешіт жамағаты, мектеп, колледждердің қызметкерлері және студенттері қатысты.

ҚМДБ-ның Қостанай облысындағы
өкілдігінің баспасөз қызметі

Науырзым аудандық «Түркебай» мешітінің бас имамы Нұрлан қажы Сейілханұлы, аудандық әкімдіктің ішкі саясат бөлімінен жастар ісі орталығының директоры Ганди Ерболұлы және аталған мешіттің алқа мүшесі Хасенғали Камалұлы Раздольный ауылында болды.

Олар ауыл әкімі Ерлан Кәкімұлы мен мектеп директоры Қымбат Тұрғымбекқызының ұйымдастыруымен өткізілген ауыл жастары және мектептің жоғары сынып оқушыларымен басқосуда «Ислам және Зайырлы мемлекет пен қоғам», «Діни экстремизм мен терроризмді насихаттаудың алдын алу» және «Ислам мен дастүр сабақтастығы, жастар тарбиесі туралы» тақырыптарды қозғаған басқосуға қатысты.

Ауданнан келген қонақтар өздеріне қойылған сауалдарға нақты жауап берді. Осы арада бір тоқтала кетер жай, аталған елді-мекенде мәуліт мерекесі тиісті деңгейде өткізіліпті. Оны ғибраттық жағы ерекше етіп, ұйымдастыруда ауыл әкімі және басқа да жанашыр азаматтар өздерінің лайықты үлестерін қосты.

Онда діни рухани әндер орындалды. Басқа да жиналғандарға ой саларлық уағыздар айтылып, ауданның бас имамы Нұрлан қажыға Сейілханұлы сөз сөйлеп, мәуліттің мәні мен мағынасы хақында әңгімеледі.

Басқосуда ауыл молдасы Бейсенбай ақсақал бата беріп, жиналған қауым мәуліт жайлы көп тағылым алды.

ҚМДБ-ның Қостанай облысындағы
өкілдігінің баспасөз қызметі

Еліміздің ауызбіршілігі мен тыныштығын нығайту мақсатында өңірімізде көп деген шаралар мен нәтижелі жұмыстар іске асырылып келуде. «Елдің күші - бірлікте»- демекші, еліміздегі көп ұлыстар мен ұлттардың ауызбіршілікте, бір шаңырақ астында тыныш өмір салтын ұстанып келе жатуы Алла тағаланың бізге берген үлкен нығметі болмақ.

Осы орайда Рудный Индустриялдық Институтында «Қазақстан – Конфессияаралық келісімнің орталығы. Қазақстанның мәдени құндылықтарын алға тарту» атты тақырыпта дөңгелек үстел болып өтті. Аталмыш жиынға Рудный қалалық «Нұр» мешітінің ұстазы Саян Айтжанұлы, сондай-ақ қаламыздың түрлі мемлекеттік мекемелерінен қызметкерлер мен оқушылар келіп қатысты. Дөңгелек үстелдің негізгі тақырыбы ұлтаралық келісімнің нығаюы мен еліміздің бірлігі жайында болды.

«Ислам- бірлік пен мейірімілік діні» - деп сөз бастаған Рудный қалалық «Нұр» мешітінің наиб имамы Саян Айтжанұлы дөңгелек үстел қатысушыларына дініміздің әр қашанда бейбітшілік пен тыныштықтың тарапында екенін жеткізді. Сонымен қатар дінімізге қара күйе жағып жүрген жат ағымдағылардың жауыздық әрекеттері асыл дінімізге түкте қатысы жоқтығын, ауызбірлікті әрқашанда мақсат тұтқан Ислам дінін жауыздықпен шатыстырмауын ескертіп өтті.

«Бірлік - біздің күшіміз, тыныштық - біздің бақытымыз, сол күш пен бақытқа әр дайым бір шаңырақ астында бірлесе күш жұмсасақ еліміз әр дайым көк аспан астында тыныш ғұмыр кешеді» деп сөзін қорытындылай келе, Саян Айтжанұлы тыныштыққа кір келтірер терроризммен күресеміз деп асыл дінімізбен күресіп кетпеуімізге мұқият болу керектігін айтып кетті.

Алла тағала елімізге тыныштығын нәсіп етіп, қазақ елінің бірлігімен бақытын сақтағай!

ҚМДБ-ның Қостанай облысындағы
өкілдігінің баспасөз қызметі

Рудный қаласының «Горняк» мәдениет орталығында Мәуліт мерекесі кең көлемде аталып өтті. Мұсылмандар үшін өзіндік орны бар, пайғамбарымыздың тағылымға толы өмірбаяны мен хадистерін жан-жақты насихаттайтын ауқымды шара қасиетті Құран оқумен басталды. Одан кейін ҚМДБ-ның Қостанай облысы бойынша өкіл имамы Бақытбек Нұрғабылұлы жамағатты Мәуліт мерекесімен құттықтап, оның мәні мен маңызы жайлы терең әңгіме қозғады.

Рухани кешті әрі қарай Әсел Тасмағанбет, Берік Козылев, Ерлан Қасым, Зарина Рахманбердиева, Адай Батинов, Әсет Қуанышев, Мұқан Ноғаев, Әбілқайыр Қанафин сынды өнерпаздар жалғастырып, иләһи ән-жырларды нақышына келтіріп орындады. Бұдан соң «Нұр» мешітінің наиб имамы Ғұмар Нәбиұлы мен РИИ студенттері араб тілінде айтып шыққан Мәулітті халық сілтідей ұйып тыңдады.

Шара барысында мүмкіндігі шектеулі жанның бір күндік өмірінен сыр шертетін «Дерт пен дауа» көрінісі сахналанды. Тәрбиелік маңызы зор көрініс көрермен көңіліне ой салып, ерекше әсерге бөлегені анық.

Мәуліт мерекесінің соңында «Нұр» мешітінің бас имамы Азамат Мырзақанов сөз сөйлеп, жамағатты арнайы жайылған ақ дастархан басына шақырды.

ҚМДБ-ның Қостанай облысындағы
өкілдігінің баспасөз қызметі

Қазақстан Республикасы Ұлттық қауіпсіздік комитетінің баспасөз қызметі Қазақстан азаматы А.Абдужаббаровтың Сауд Арабия Патшалығынан елімізге депортацияланғаны туралы хабар таратты.

Баспасөз баянында А.Абдужаббаровтың дінаралық алауыздық тудырғаны, терроризмді насихаттағаны үшін 2015 жылы халықаралық іздеу жарияланғаны хабарланды.

А.Абдужаббаров 2000 жылдар басында Қазақстанның батыс аймағындағы діндарлар арасында «тәкфир» идеологиясын таратқаны анықталған.

Ислам атын жамылып, Ақтөбе, Атырау, Орал қалаларында теріс уағыз таратып, жасырын радикалды ұяшықтар құрған. Оның идеясын қолдаушы кейбір азаматтар елімізде болған террористік акцияларға қатысып, кейбір бөлігі Ауғанстан және Сириядағы қарулы соғысқа аттанған.

2006 жылы А.Абдужаббаров Сауд Арабиясындағы діни оқу орындарында оқып жатқан Қазақстан азаматтарына «тәкфир» идеологиясын таратуын жалғастырған.

Айта кетейік, соңғы кездері еліміздің кейбір азаматтары жүректеріне күмән салатын адамдармен жиі кездесуде. Олар – «тәкфиршілер» деп аталатын жамағат өкілдері. Бұл жамағат өкілдері өздерінің жалған сенімдері арқылы көптеген мұсылмандарды сенім мен күпірлік («таухид» және «ширк»), бірқұдайылық пен серік қосу («иман» және «ширк») мәселесінде адастырып, өздерінен басқа мұсылмандарды адасқан деп айыптауда.

Осыған орай, Қазақстан мұсылмандарының діни басқармасы «тәкфир және хижрет» жамағаты туралы өз мәлімдемесін жариялады.

Атап айтқанда, тәкфир жамағаты діннің ақиқатын білмейді, дәлел-құжаттарды түсінуге зер салмайды, харам үкімдерінде шектен шығады, діни көзқарастары тұрақсыз, тарихты, саясатты, өмір мен қоғамды және әһл ас сунна уәл жамағат ұстанымын түсінгісі келмейді.

Тәкфир мұсылмандардың арасына іріткі салып, олардың бірлік-ынтымағын кетіреді, үлкен дау-жанжал шығарады, мемлекеттің саяси-экономикалық бағдарламасының нығаюына бөгет салады, әрдайым діни экстремисттік және лаңкестік әрекеттерге дайын тұрады, халықтың дінге деген ықыласын сөндіріп, үлкен зиян келтіреді.

Ендеше, «тәкфир және хижрет жамағатының» құрылымы әһли сүнна ұстанымына қарама қайшы, әрі Астана қаласы Сарыарқа аудандық сотының 2014 жылғы 18 тамыздағы шешіміне сәйкес, бұл ұйымға тыйым салынған.

Сондықтан ханафи мәзһабын негіз етіп ұстанған Қазақстан мұсылмандарының діни басқармасы діндар бауырларымызды бұл ағым мүшелерінің жалған уағыздарына ермеуге шақырады. Ғаламтордағы тәкфирлік сайттардың адастырушы ақпараттарынан өздерін аулақ ұстауды ескертеді.

ҚМДБ баспасөз қызметі br www.muftyat.kz

Қостанай облысы Арқалық қалалық «Мухтасиб Әлмұхаммед» мешітінің қыздар және әйелдер секторы «Ене мен келін арасындағы қарым-қатынас» деген тақырыпта дөңгелек үстел өткізді.

Оған ақ жаулықты аналар мен жас келіндер, діни сауат ашу курсында дәріс алып жүрген әйелдер мен қыздар қатысты.

Сауат ашу курсының ұстазы Диана Қайырбекқызы басқосудың негізгі мақсатына тоқталып, отбасында ене мен келіннің сыйластығының мәні ерекше екендігін айтып өтсе, ал шәкірт Алуа Ұзақбаева Күләйхан қажыдан қазіргі қоғамдағы ене мен келін арасындағы қарым-қатынас жайлы сұхбат алды.

Бұл өзекті мәселеге біздің асыл дініміз бен ұлттық әдет-ғұрпымызда да үлкен мән берілген. Жас келіннің жаңа ортаға үйренісіп кетуі көп жағдайда сол отбасының мүшелеріне байланысты.

Психолог маман Әсел Лайыққызы «біздің халқымызда келінді қызындай көріп, енесін анасындай сыйлайтын қарым-қатынас ғасырлар бойы жалғасып келетіндігін» айтып өтті.

Дөңгелек үстелге қатысушылар да тақырыптың өмірімізде алатын ерекше орнына тоқтала келіп, өздерінің көкейлерінде жүрген ой-пікірлерін ортаға салды.

Бұл кешті жүргізуші Алуа өзінің пікірін: «Жақсы ене келінге қашан да өнеге. Мұны жаңа түскен келіншектер жете ұғынып, оларға да ерекше құрметтерін көрсетуге тиіс. Өмірде ене мен келіннің арасындағы сыйластық болған жағдайда ғана шаңырақтың ырыс-берексі артып, әулеттің мәртебесі өседі» деген сөздермен түйіндеді.

Тоқсан ауыз сөздің тобықтай түйініне келсек, қыздар және әйелдер секторы ұйымдастырған дөңгелек үстел өте тағылымды болды.

Ондағы айтылғандар барша енелер мен келіндерге ғибрат. Мұнда қозғалған жайлар бойжеткендер яғни болашақ келіндерге де үлкен ой салады деген ниеттеміз.

ҚМДБ-ның Қостанай облысындағы
өкілдігінің баспасөз қызметі

Қостанай облысындағы өкіл имамы Бақытбек Тәжімбет Нұр-Мүбарак университетіндегі студенттермен кездесті. Негізгі мақсат: биылғы түлектерді жұмысқа шақыру және өзге студенттерді жазғы маусымда аймақ мешіттеріне тәжірибелік жұмыстарға баулу.

Бүгінде Нұр-Мүбарак университетінде Қостанай облысынан барлығы 24 студент білім алуда. Оның 4 бесеуі қыз бала.

Өкіл имам студент шәкірмен Алла жолында елге қызмет етудің артықшылығы жайлы сұхбат өткізді.

ҚМДБ-ның Қостанай облысындағы
өкілдігінің баспасөз қызметі

Облыс орталығымен іргелес жатқан Рудный қалалық „Нұр„ мешітінің бас имамы Азамат қажы Серікбайұлы адамгершілік қырларымен көпшіліктің құрметіне бөленіп келе жатқан жан.

Жақында дін қайраткерінің бастамасымен және шаһардағы кәсіпкерлердің демеушілігімен қаладағы қарттар үйіне қамқорлық көрсетілді. Олар осы мекемеде болып, ғұмыр кешіп жатқан аға буын өкілдерінің хал-жағдайларымен танысты.

Сондай-ақ ардагерлерге ақ дастархан жайып, оларға шын жүректен шыққан шынайы лебіздерін білдірді. Сөйтіп, ақсақалдардың ризашылығына бөленді.

Бас имам қарттарға қамқорлық жасау- әрбір саналы азаматтың парызы екендігіне ерекше тоқталды. Рудныйлық дін қызметкерлерінің осынау игі істері өзгелерге де жұғысты болғай!

ҚМДБ-ның Қостанай облысындағы
өкілдігінің баспасөз қызметі

Өңірдің Науырзым ауданында да адамгершілік, ізгілік мақсатындағы жұмыс барынша жанданып, бірқатар тағылым болар істер атқарылды. Соның бірі аудандағы ақпараттық-насихаттық тобының өзгелерге өнеге болар игі қадамдары дер едік.

Жақында осы топтың мүшелері яғни Түркебай мешітінің имамы Н. Сыздықов, аудандық әкімдіктің ішкі саясат бөлімінің басшысы Б.Сұлтанова, әдіскер Д.Тасанова және Жастар ресурстық орталығының психологы Ә.Шалдыбаевалар осындағы ауылшаруашылық колледжінде болды.

Ақпараттық-насихат тобының мүшелері оқу орнында студенттермен „Қазақстан — зайырлы мемлекет„ және басқа да тақырыптар бойынша дөңгелек үстел және психологиялық тренинг өткізді.

Бұл кездесу жастарға ерекше әсер қалдырды.

ҚМДБ-ның Қостанай облысындағы
өкілдігінің баспасөз қызметі

Қазақстан мұсылмандары діни басқармасының Қостанай облысындағы өкіл және облыстық мешіттің бас имамы Бахытбек Тәжімбет Торғай өңірінде сапарда болып, жергілікті мұсылман ағайындармен жүздесті.

Қос аудандағы мәуліт мерекесінде сөз сөйлеп, жиналған жұртшылықты осы мерекемен шын жүректен құттықтап, ізгілік, молшылық тіледі.

Бірінші ұлы Пайғамбарымыздың (ﷺ) туған күніне арналған мәуліт іс-шарасы Жангелдин ауданының орталығындағы Оспанқожа әулие атындағы мешітте өтті.

Бұл рухани кеш «Сағындым сені ия, расулалла» деп аталып, оған Бахытбек Нұрғабылұлымен бірге Арқалық қаласының бас имамы Бектұрсын Торғайбайұлы және Жангелдин ауданы әкімінің орынбасары Дінмұхаммет Серікұлыда қатысты.

Сондай-ақ Амангелді ауданындағы ұйымдастырылған мәуліт мерекесі де жоғары деңгейде өтті. Мұнда имандылық жайында насихат айтылды. Аудандық жасөспірімдер және балалар спорт мектебінде қазақ күресінен жарыс ұйымдастырылды.

Оған 11 ауылдық округтен оқушылар қатысып, бақтарын сынады. Мәуліт мерекесіне орай дастархан басында Бахытбек Нұрғабылұлы діни сұрақтарға нақты жауап берген азаматтарға сыйлықтар табыс етті.

Сонымен өкіл имамның Торғай өңіріне сапары жемісті болды. Жергілікті бауырларымен жүздесіп, аудандардың тыныс-тіршілігімен кеңірек танысты.

ҚМДБ-ның Қостанай облысындағы
өкілдігінің баспасөз қызметі