Қазақстан мұсылмандары діни басқармасының Қостанай облысындағы өкіл имамы Бахытбек Тәжімбет өңірдің аудандары мен қалаларын аралап, мешіттердің тыныс-тіршілігімен танысуды одан әрі жалғастырды.
Бұл жолы облыс орталығынан едәуір жерде жатқан Денисов ауданы мен Лисаков қаласында және Жітіқара ауданында болды. Іссапар өте жоғары деңгейде өтті.
Облыстың бас имамы Бахытбек Нұрғабылұлын жоғарыда аталған Денисов ауданы мен Лисаков қаласының әкімдері Ерлан Жаманов пен Алмат Исмағұлов жылы жүзбен қарсы алып, өздерінде атқарылып жатқан игі жұмыстар жайлы айтып берді. Имандылық ордаларына қолдан келген көмектерін аямайтындықтарын жеткізді.
Сондай-ақ жергілікті жердегі мешіттерде жамағаттармен жүздесті. Бас имамға ақсақалдар ақ батасын берді. Бахытбек Тәжімбет өзінің тәжірибесі мол, терең білімді азамат екендігін танытты. Ол айтқан уағыз насихатты жұртшылық ұйып тыңдады.
Содан кейін өкіл имам Жітіқара ауданына ат басын тіреді. Осындағы „Ержан Тәтішев„ мешітінде мұсылман бауырларымызбен кездесті. Бас имам өзінің алдағы жұмыс жоспарларымен таныстырып, ислам дінін өркендетуге көп болып жұмылу керектігін атап өтті.
ҚМДБ-ның Қостанай облысындағы өкілдігінің
баспасөз қызметі
Сенбі күнінің кешінде, яғни 14 қарашада Әмит ишан атындағы мешітке іс-сапармен ҚМДБ-ның Қостанай облысы бойынша өкіл имамы болып жаңадан тағайындалған Б.Тәжімбет келді.
Әмит ишан атындағы мешіттің бас имамы Нұрбол қажы Балахмет жаңа имамды таныстырды.
Бақытбек Нұрғабылұлы Қызылорда облысының тумасы, жасы 35-те. Жаңа имам облысқа жұма күні келіп, сол күннің кешінде Рудный қаласына барған. Ал аудандардың ішінен алдымен іс-сапарын Әуликөлден бастады. Имам өз сөзінде Алла тағала қалап сіздердің облысқа келдім. Міне, сіздерді көрейін, танысайын, сәлем берейін және дін жолында қасық қаным қалғанша, қолымнан келгенше қызмет етемін деген ниетпен келдім. Бүгін мешіттен жастардан гөрі үлкен кісілерді көріп қуанып отырмын. Одан әрі имам әсерлі әңгіме қозғап, жамағатты имандылыққа ұйытып, уағыз-насихат айтты.
Аудан әкімі Амантай Балғарин әулиелі Әулиекөл жеріне келген сапарыңыз оң болсын. Дін жолындағы игі істеріңіз алға бассын, жақсылық болсын деген тілегін білдірді. Ауданның қадірменді ел ағалары, ауданның Құрметті азаматтары Әкімбек қажы Қабден мен Сағындық Досмағамбетовтер мән-мағыналы сөз қозғап, имамның жұмысына табыс және сәттілік тіледі.
Одан кейін Бақытбек Тәжімбет жамағатпен бірге Ақшам намазын оқыды. Елдің үлкен қариясы Қазиқан ақсақал бата берді.
ҚМДБ-ның Қостанай облысы
бойынша баспасөз қызметі
Қалың жұртшылыққа Бахытбек Тәжімбеттің Қазақстан мұсылмандары діни басқармасының Қостанай облысы бойынша өкіл имамы болып тағайындалғаны белгілі.
Ол алғашқы сапарын облыс орталығына жақын орналасқан Рудный шаһарында бастады. Осындағы «Нұр» мешітіне ат басын бұрып, жергілікті намазхандармен жүздесті.
Аталмыш мешіттің бас имамы Сейіт Темірбекұлы өкіл имамды қарсы алып, өзі басқаратын киелі орынның тыныс-тіршілігімен таныстырды.
Облыстың бас имамы халықпен кездесу барысында рудныйлық бауырларымызға ғибратты уағыздар айтып, жиналған қауымға үлкен әсер қалдырды.
Өкіл имамның сапары одан әрі Әулиекөл ауданында жаслғасты онымен бірге. Онымен бірге облыстық мешіттің найб имамы Дархан Сыздықов болды.
ҚМДБ-ның Қостанай облысындағы өкілдігінің
баспасөз қызметі
Бас имам іске кірісті
Жақында Қостанай облыстық «Марал ишан» мешітінде жиын болып өтті. Онда Қазақстан мұсылмандары діни басқармасының Діни істер бөлімінің басшысы Камалжан Тұрдыбаев сөз алып, жаңа имаммен таныстырды.
Қазақстан мұсылмандары діни басқарамасының төрағасы, Бас мүфти Ержан қажы Малғажыұлының арнайы бұйрығымен Бахытбек Нұрғабылұлы Тәжімбет Қостанай облысы бойынша өкіл имам және Қостанай облыстық «Марал ишан» мешітінің бас имамы болып тағайындалғандығын жеткізді.
Сондай-ақ Камалжан Бекбосынұлы бұрынғы облыстың бас имамы Асылхан қажы Түсіпбек Бас мүфтидің бұйрығымен Қостанай облысы Қостанай аудандық «Маңдай батыр» мешітіне бас имам болып тағайындалғаны туралы бұйрықты оқып берді.
Облыстың бас имамы Бахытбек Нұрғабылұлы осы уақытқа дейін Ақтөбе қалалық мешітінің бас имамы болып қызмет атқарған. Оның есімі еліміздегі дін саласында жүрген барша бауарларымызға жақсы таныс.
Қостанай өңіріндегі күллі мұсылмандар қауымы облыстың жаңа бас имамы Бахытбек Тәжімбетке деніне саулық қызметінде табыс тілейді.
ҚМДБ-ның Қостанай облысындағы өкілдігінің
баспасөз қызметі
Мекке шаһарындағы Әл-Худайбия мешіті толықтай іргесіне дейін құлатылып, жаңартылады. Осы тарихи мешітті қайта қалпына келтіру жобасы оның ислам дініндегі маңыздылығын көтеру мақсатында қолға алынып отыр. Аталмыш мешіт 628 жылы Мұхаммед пайғамбардың (иманы жолдас болсын) Мекке мүшріктерімен бейбітшілікке қол жеткізіп, тарихта «Худайбия келісімі» аталған келісім орнаған жерде бой көтерген. Аудан Меккенің батысында орналасқан, - деп Ислам хабарлады.
Сауд Арабиясы Ұлттық мұралар және туризм жөніндегі комиссияның бас директоры Фейсал әл-Шариф мешітті өңдейтін науқаны құрылыс барысында ең соңғы ғылыми жетістіктері мен инновациялық материалдарын қолданып тәжірибелі фирма жетектейді.
Комиссия мен «Әл-Турат» мұралар қоры бүгінгі күнге дейін корольдік аумағындағы 21 мешітке қайта жаңарту жұмыстарын жүргізіп шыққан.
Қазақ рухани әлемі тағы бір тамаша туындымен толықты. Тәпсір саласындағы саусақпен санарлықтай азғана әдебиеттің қатарын арттырған тамаша туындының бүгін Астана жұртшылығына таныстырылымы болып өтті.
ҚМДБ-ның төраға орынбасары, «Әзірет Сұлтан» мешітінің Бас имамы Серікбай қажы Сатыбалдыұлының қаламынан туындаған «Тәпсір тұнығының» осыдан бір жыл бұрын І-томдығы (30-пара) жарық көрген болатын. Қызметтік қарбаласқа қарамастан қаламын қолынан тастамаған Серікбай Сатыбалдыұлы араға жылға жуық уақыт салып, аталмыш көптомдықтың екінші томдығын (29-пара тәпсірін) жұртшылық игілігіне ұсынып отыр.
Тәпсір саласындағы дүниелердің жалпақ жұртқа түсінікті һәм қызықты болуы автордың терең діни білімімен бірге, көркем сөздің көрігін қыздыратындай шеберлігіне де байланысты. Бұл орайда аталмыш кітапты парақтай отырып, автор тілінің шұрайлылығына еріксіз тәнті боласыз. Қасиетті Құран Кәрім аяттарының ақиқатын қазақы ұғымымызға лайықтап, асқан дәлдікпен аударған Серікбай қажы Сатыбалдыұлының қаламынан алдағы қазақ халқына қажетті әлі талай дүниелер туатыны даусыз.
Қазақ оқырмандарын қуанышқа бөлеген «Тәпсір тұнығы» кітабының ІІ-томдығының танытымына еліміздің бірқатар дінтанушылары мен ғалымдары, ҚМДБ-ның қызметкерлері мен медресе шәкірттері, зиялы қауым өкілдері қатысты. Игі шара барысында Астана қаласында Л.Н.Гумилев атындағы Еуразия Ұлттық университетінің дінтану кафедрасының меңгерушісі Әшірбек Құрбанұлы мен белгілі дін ғалымы Мұхан Исахан баяндама жасап, аталмыш кітап жайлы оң пікірлерін білдірді. Жиналған жұртшылық кітап авторына көкейде жүрген сұрақтарын қойып, танытым кеші тағылымға толы болды.
Солтүстік Қавказ мамандары БАҚ қызметкерлері мен төрелерге «Ислам мемлекеті» деген терминді пайдаланудан бас тартуды ұсынады, себебі, олардың ойынша, осы термин мұсылмандардың сезімдеріне тиеді.
Сарапшылардың айтуынша, осы лаңкестік ұйым адамзатқа қарсы қылмыс жасайды, деп Раша Тудей хабарлады. ИМ жауынгерлердің ойлары дәстүрлі ислам құндылықтарынан алыс тұр. Осыған байланысты, қылмыскерлерді «Ислам мемлекеті» деп атап, Ресейде тұратын миллиондаған мұсылмандардың қорлауға салынатынын сарапшылар атап өтті.
Ислам – барша адам баласын бейбiтшiлiкке, амандыққа, ешкiмге соқтықпай тыныш өмiр сүруге шақыратын дiн. Сондай хақ дiнiмiз жер бетiнде нағыз адамгершiлiктiң, сыйластықтың рухын жайып, алауыздыққа, қантөгiске, қастық пен дұшпандыққа тыйым салғаны да мәлiм. Адамзат баласына жақсылықты түсiндiрiп, көркем мiнездi кемелiне келтiрсiн, жүректердi тазартсын деп Алла Тағала адамзаттың ең ардақты тұлғасы сүйікті елші Мұхаммедтi (с.ғ.с.) таңдап, пайғамбар еттi. Демек, Ислам дiнi тыныштықты бұзу үшiн емес, бұзықтықты тыю үшiн жiберiлдi.
Адамзатқа Исламмен бiрге жеткен өркениеттiң бәрiн санап тауысу мүмкiн емес. Ілгеріде мұсылмандық дегенде, ғылымның да, әдептiң де, мiнездiң де, қарым-қатынас ережелерiнiң де ең биiк шыңы елестейтiн. Ал, ардақты пайғамбарымыз дүниеден озып, саңлақ сахабалар оған iлесе кетiп, iзгi керуен бiртiндеп арғы дүниеге көшкен сайын сол Ислам дiнi бiрте-бiрте өзiнiң биiк тұғырынан төмендей бастағандай. Себебi, бүгiнгi таңда асыл дiнiмiзге қойылмаған ат, таңылмаған айдар жоқ. «Террор» дейсiз бе, «экстремизм» дейсiз бе, қысқасы, дiнiмiзбен үш қайнаса сорпасы қосылмайтын сан түрлi атаулар бүгiнде Исламға қатысты айтылатын болды. Бұлай болуының себебi не, бұл кімдердің жасаған қитұрқысы екені беймәлiм. Бiр анығы, Алла Тағаланың жер бетiне «Ислам – бейбiтшiлiк» деп жiберген ақиқи дiнiнде ондай шектен шығушылықтардың бiрi де жоқ. Экстремизм деген сөз шектен шыққан көзқарастарды ұстану дегендi бiлдiрсе, онда бұл нәрсенi Исламнан iздегендер қатты қателеседi. Лаңкестiктiң ұлты, дiнi болады дегенге кiм сенедi? Ендеше, нағыз мұсылман ешуақытта «экстремист бола алмайды». Ал, қасақана Исламға жала жапқандар ауыр күнәға батушылар. Алла Тағала қасиеттi Құран Кәрiмде:
الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الإِسْلاَمَ دِيناً
«Бүгiн дiндерiңдi толықтастырдым және нығметiмдi тәмамдадым. Сондай-ақ, сендерге Ислам дiнiн қоштап ұнаттым» (Мәйда сүресі 3-аят) - деп баян еткен. Демек, Ислам дiнi бүкiл ғаламдардың иесi, ұлы Алланың қош көрiп ұнатқан дiнi. Олай болса, оған күйе жағу – Алланың қаһарына ұшырау болып табылмақ. Қай-қайдан шығып, қоғамдағы тәртiптi бұзып жүргендердi Исламмен байланыстырып қою, саналы адамның қисынына да келмейдi.
Ислам дiнi – жер бетiнде бейбiтшiлiк пен тыныштықты орнату үшiн жiберiлген соңғы иләһи дiн. Мiне, сондықтан, әрбiр мұсылман, тiптi, сәлем бергеннiң өзiнде «әссәламу ғалейкум» деп бейбiтшiлiк пен тыныштық тiлеп амандасады. Ата-бабаларымыз да сан ғасыр бойы дәстүрлі Ислам дiнiн өмiрмен бiте қайната ұстанып, ауызбiршiлiкпен бейбiт ғұмыр сүрiп келдi. Дiни дүрдараздық деген ұғым қазақ даласында күнi кешеге дейiн болмаған. Қазақ даласы түгiлi, ешбiр Ислам дүниесiнде кешегi ХIХ ғасырларға дейiн «дiни экстремизм» деген ұғым болып көрмеген. Өкiнiшке орай, соңғы жылдарда асыл дiнiмiздi жеккөрiнiштi етiп көрсететiндер жер-жерден бой көтере бастады. Кешеге дейiн бар қазақ бiр дiндi, бiр мәзһабты ұстанып келдi. Сенiмi де, мақсат-мүддесi де бiр болып келдi. Ендi бүгiн әлемде түрлi мүдделер кертартпа ағымдар пайда болып, дiнiмiзге әлгiнде аталғандай жаман атаулар таңылуда. Бiздiң дiнiмiз өз отандастары мен қандастары, жерлестерi былай тұрсын, өзге сенiм иелерiмен де бейбiт ғұмыр кешудi бұйырады. Екi дүниенiң бақытына жетудiң жолдарын үйрететiн Исламда
أَنَّهُ مَن قَتَلَ نَفْساً بِغَيْرِ نَفْسٍ أَوْ فَسَادٍ فِي الأَرْضِ فَكَأَنَّمَا قَتَلَ النَّاسَ جَمِيعاً
«Бейкүнә бiр адамды өлтiру – күллi адамзатты өлтiрумен тең» (Мәйда сүресі, 32-аят) - деген. Олай болса, қаншама жазықсыз адамдарды, көздерi мөлдiреген жап-жас сәбилердi өлтiруге Ислам дiнi бұйырды деу қисынға сыймайтыны ақиқат. Адам өлтiретiн лаңкестiк әрекеттер әлбетте Құранға да, мұсылманшылыққа да жат. Адам түгiлi, малды қорқыту Исламға қайшы. Сойылатын малдың көзiнше пышағын қайраған сахабаға пайғамбарымыз қатты кейiп: «Сен малды неше рет өлтiрмексiң? Пышағыңды малды жатқызбас бұрын қайрап алмадың ба?», - деп қатаң ескерту жасаған.
Өзгелердiң жанын қию үшiн өзiне де қол жұмсаған жанкештiлер өздерiн «шәһидпiз» деп есіредi. Шәһидтiк мәртебе бейкүнә жандарды өлтiрумен келетiн оңай нәрсе емес. Дәстүрлі діндердің ешқайсында жазықсыз жанды өлтіріп, шәһид болу деген қағида жоқ. Сондай-ақ Исламның негiзгi қайнар көзi саналатын Құран мен Сүннетте жазықсыз адамның қанын төгу қажет деп насихатталмаған. Сонда Ислам мен «экстремизмде» қандай байланыс болуы мүмкiн? Әлбетте ешқандай байланыс жоқ. Керiсiнше, Ислам дiнi дұрыс түсiндiрiлмегендiктен түрлi орынсыз әрекеттер бой көрсетуi ықтимал. Сондықтан қазіргі таңда әсіресе жас ұрпаққа рухани тәрбие берiп, дiни сауатын ашу үшiн барлық жағдайды жасауымыз қажет. Асыл дініміздің құндылықтарын жан-жақты жеткізіп, насихаттай отырып, ұлттық дәстүріміз бен әдет-ғұрпымыздың аясында тәлім-тәрбие беру аға буын өкілдері үшін жауапты міндет екендігін жадымыздан шығармайық ағайын.
«Мухтасиб Әлмұхаммед» мешітінің
бас имамы Бектұрсын Уәлиев
Миләди
Хижри
