Жуырда Рудный қалалық «Нұр» мешітіне қарасты Қашар кентіндегі мешітте Мәуліт мерекесі аталып өтті.

Жиналған жамағатқа Бас имам Ерлан Өмірбекұлы пайғамбарымыз Мухаммед (ﷺ) туылған күнін атап өту мұсылмандар қауымы үшін ғибратты екендігін түсіндіре келіп, өмірі жайында уағыз айттып, мәуліт оқылды.

Сондай-ақ аталмыш шараға арнайы келген Рудный қалалық «Нұр» мешітінің Бас имамы Азамат Серікбайұлы жұма намазының алдында барша жиналған жамағатқа Пайғамбарымыздың (ﷺ) асыл сипаттары мен көркем мінезі жөнінде әңгімеледі.

Ғибратқа толы мереке соңында жиналған қауым арнайы жайылған дастарханнан дәм татты. Мешіт ақсақалдары мен ақ жаулықты аналарымыздың ізгі тілектерін тыңдады.

Осы арада тоқтала кетер бір жай, Қашар кентінің имамы мен қызметкерлерінің қажырлы еңбегінің арқасында мешітке келушілер саны жылдан-жылға көбейіп келеді.

Олардың арасында имандылыққа бет бұрген жастар да аз емес. Бұл бәрімізді де шексіз қуанышқа бөлейді.

ҚМДБ-ның Қостанай облысындағы
өкілдігінің баспасөз қызметі

Мен де мемлекет басшысы Нұрсұлтан Назарбаевтың «Қазақстанның Үшінші жаңғыруы: жаһандық бәсекеге қабілеттілік» деп аталатын Қазақстан халқына Жолдауын аса бір ықыласпен оқып шықтым.

Елбасының қайсы Жолдауы болсын маңызды. Бұл жолы да еліміздің алдында тұрған үлкен келелі міндеттер қамтылып, нақты мақсаттар айқындалған.

Осы маңызды құжатқа арқау болған жайлардың бәрі де мемлекетіміздің өсіп-өркендеуіне тікелей ықпалын тигізетін мәселелер. Жолдауда «Қазіргі заманда адамзат терроризмнің белең алуымен бетпе-бет келіп отыр. Бұл ретте деструктивті күштерді қаржыландыратындарға, шетелдік террористік ұйымдармен байланыс жасайтындарға қарсы күрес жүргізу ісі негізгі мәселе болып саналады» делінген.

Бұл бәрімізді де толғандыратын өзекті мәселе. Сонымен қатар діни экстремизмді насихаттаудың алдын алуға да айрықша назар аударуымыз қажет. Осы жайларға байланысты Қостанай өңіріндегі барша мешіттердің имамдары мен қызметкерлері де елеулі жұмыстар атқаратын болады.

Жастар арасында да теріс ағымдарға еліктеуге жол бермеуіміз қажет. Олардың діни сауаттылығын көтеру бағытында да елеулі істер жүзеге асырылады. Өйткені, біз үшін Отанымыздағы тыныштық, тұрақтылық, халықтар арасындағы ауызбірлік қашан да ерекше орын алады.

Қазіргі таңда облыстағы аудандар мен қалалардың бас имамдары жауапкершілікті терең сезініп, жұртшылық арасында Жолдаудың аса маңыздылығын түсіндіріп, түрлі басқосулар өткізуге мұрындық болуда.

Ендігі біздің алдымыздағы мақсат - осы маңызды құжатта көрсетілген міндеттерді жүзеге асыруға өзіміздің лайықты үлесімізді қосу. Менің пікірімді барша әріптестерім де қолдайтындығына нық сенімдімін.

Қазақстан мұсылмандары
діни басқармасының Қостанай
облысындағы өкіл имамы
Тәжімбет Бахытбек Нұрғабылұлы

Өңірімізде аудандар мен қалалардың дін қайраткерлері жұртшылықпен жүздесіп, маңызды тақырыптар бойынша әңгімелер өткізуде.

Мәселен, жуырда Федоров ауданының Бас имамы Абзал Сұлтанғалиұлы аудандағы №2 қазақ орта мектебінің жоғары сынып оқушыларымен кездесті.

Бұл басқосуда ол Пайғамбарымыз Мұхаммедтің (ﷺ) өнегелі өмірінен уағыз айттып, білім ордасының шәкірттеріне үлкенді сыйлау, кішіге қамқорлық көрсету және әрқашан да кешірімді болу жөніндегі өзінің ойларын білдірді.

Осы жүздесуде бас имамға оқушылар көкейде жүрген сауалдарын қойды. Осы сұрақтарға дін қайраткері өмірден нақты мысал келтіре отырып, жауап берді.

ҚМДБ-ның Қостанай облысындағы
өкілдігінің баспасөз қызметі

Жақында Арқалық қалалық «Мухтасиб Әлмұхаммед» мешіті мен Нәзипа Құлжанова атындағы Торғай гуманитарлық колледж ұстаздарының ұйымдастыруымен «Иманды ұл, инабатты қыз» тақырыбында тәрбие сағаты өткізілді.

Колледжде өткен тағылымға толы, тәрбиелік мәні зор басқосуға қалалық мешіттің бас имамы Бектұрсын Торғайбайұлы және колледждің тәрбие жөніндегі әдіскер ұстаздары қатысты.

Дана халқымыз қыз баланың тәрбиесіне ежелден ерекше көңіл бөлген. Өйткені, олар ұлтымыздың айнасы, ертеңгі жар, бір шаңырақтың ұйытқысы болар ана.

Сол себептен де аталмыш жүздесуде осынау халқымыз үшін аса маңызды мәселеге байланысты ой-пікірлер ортаға салынды.

Жалпы, ағайындар «Жақсы қыз –жағадағы құндыз», «Ел боламын десең бесігіңді түзе» деген ғибратты сөздерді үнемі басшылыққа алып отырса, нұр үстіне нұр.

Мешіт имамы жүздесуде ислам дініндегі жастарға байланысты қағидалар мен ұлы пайғамбарымыздың тағылымға толы өсиет сөздері жайлы кеңінен әңгімеледі.

Сондай-ақ шара барысында қазіргі уақыттағы өзекті мәселе болып тұрған дәстүрлі емес діни ағымдар жайлы да көптеген мағұлмат беріліп, бейне роликтер көрсетілді.

ҚМДБ Қостанай облысы бойынша
өкілдігінің баспасөз қызметі

Жуырда Қазақстан мұсылмандары діни басқармасының төрағасы бас мүфти Ержан қажы Малғажыұлының тағайындауымен Рудный қалалық «Нұр» мешітіне Азамат Серікбайұлы бас имам қызметіне бекітілген болатын. Өз жұмысына жауапкершілікпен кіріскен бас имам мешіт жамағатымен тез тіл табысып, алдағы күндерге біраз жұмыстарды жоспарлап қойды.

«Еңбек ептілікті сүйеді» демекші ынталықпен жұмысына кіріскен бас имамның сілтемесімен мешітке келуші жамағатқа күнделікті уағыз-насихаттар жүргізіліп келуде. Айтар болсақ аптасына жеті күн бекітілген кесте бойынша мешіт имамдары мен ұстаздары келуші жамағатқа дәстүрлі дініміз бен Құран құндылықтарын барынша жеткізуде. Сонымен қатар дәстүрлі дінімізді түсінуге құлшыныс білдіріп, ислам дінінен сусындап ілім аламын деген Рудный қалалық «Нұр» мешітінің жамағатына Қостанай облыстық мешітінің имамдары да аянбай қызме тетуде.

ҚМДБ-ның Қостанай облысындағы
өкілдігінің баспасөз қызметі

Есімі елімізге танымал дін қайраткері, Қазақстан мұсылмандары діни басқармасының РАНТ мүшесі Ризабек Батталұлы өткен аптада іс сапармен Қостанай облысында болды.

Ол осы сапарында облыстық және Қостанай, Рудный қалаларына ат басын бұрып, мешіт жамағаттарымен жүздесті. Жерлестеріміз мәртебелі қонақты жылы жүзбен қарсы алды.

Білімді азамат жұмыс барасында Аймағанбет қажы Спанұлы атындағы облыстық орталық, Қостанай және Рудный қаласындағы парасат ордаларында мұсылман ағайындарға бүгінгі таңда аса маңызды әрі тәрбиелік, тағылымдық жағы мол тақырыптар бойынша уағыз-насихат айтты.

Өз саласының білгірі жоғарыда аталған жүздесулер мен қатар, Қостанай облысындағы барлық мешіттердің бас имамдарына семинар өткізіп, келелі мәселелерге тоқталды.

Бұл басқосуда оған қатысушылар Ризабек Батталұлына өздерін толғандырған сауалдарын қойып, нақты да тиянақты жауап алды.

ҚМДБ-дан арнайы келген азаматтың терең біліміне, шешендігіне жұртшылық дән риза болды.

ҚМДБ-ның Қостанай облысындағы
өкілдігінің баспасөз қызметі

Жақында Кеншілер қаласындағы Рудный қалалық «Нұр» мешітіне жаңадан тағайындалған Бас имам Азамат Серікбайұлы тез дегенде өз жұмысына ықыласпен кірісіп кетті.

«Сен істі сүйсең, іс саған бас иеді» демекші бүгін Бас имам «Рудный тау-кен технологиялық колледжінде» болып, ол жердегі үшінші курс студенттерімен кездесу өткізді. Кездесу барасында Бас имам «Терроризмнің алдын алу» тақырыбында сөз қозғап, студеттерге жат ағымның сипаттары мен негізгі қателіктерін кеңінен түсіндіріп берді. Қазіргі кездегі қоғамның негізгі қауіптің бірі болған терроризімнің жетегіне еріп, білімсіз еліктеулермен теріс пиғылды әрекеттердің арты жақсылыққа жетемелеуін және бұл ұстаным дәстүрлі дінімізге мүлде қайшы келетінін айқындап өтті. Сондай-ақ келешек өсер ұрпақтың жат ағымның жетегіне еріп кетпеу мақсатында, дәстүрлі дінімізді де уағыздап, мұсылманның бойынан табылу керек болған негізгі сипаттарды келтіріп өтті.

Кездесу соңында Бас имам студенттерді қызықтырып жүрген сұрақтарға тоқталып, келешекте дінге қатысты барша сұрақтарды тек мешіт имамдары мен ұстаздарынан сұрау керектігін ескертті.

ҚМДБ-ның Қостанай облысындағы
өкілдігінің баспасөз қызметі

Қазақ елі тәуелсіздік алғалы бері дініміз өркендеп, ұмытуға шақ қалған салт-дәстүріміз, әдет-ғұрыптарымыз арамызға қайта оралды. Соңғы біраз жылдардан бері Ұлы Мұхаммед Пайғамбарымыздың туған күні яғни Мәуліт мерекесі де тиісті деңгейде аталып келеді.

Бұл орайда белгілі дін қайраткері Бахытбек Нұрғабылұлы Тәжімбет басқаратын облыстық мешіттің ұжымы да іскерлік пен ұйымдастырушылықтың жарқын үлгісін көрсетуде.

Бұған нақты мысал ретінде өткен жұма күні қаланың бір шетінде орналасқан „Мирас„ мәдениет сарайында өткізілген „Адамзаттың абзалы„ деп аталатын Мәуліт мерекесіне арналған рухани кешті ерекше атап өтер едік.

Бір ғажабы, алдын ала құлақтанғандықтан болар, әлгі аталған сәнді ғимаратқа халық өте көп жиналды. Олардың арасында өмірдің талай өткелдерінен өткен ақсақалды қарттарымыз, ақ жаулықты аналарымыз, тіпті студент жастар да аз емес еді.

Залға жайғасқан үлкенді-кішілі қауымның назары бір сәт сахнаға ауды. Онда алдымен „Азан үні„ бейне жазбасы көрсетілді. Содан кейін есімдері елімізге белгілі әріптестеріміз Қыдырбек Қиысхан мен Заңғар Санай ғибратты кештің ашылғанын жариялады.

Жалпы, жүргізушілердің де осы басқосуға үлкен дайындық жасағандықтары бірден көзге ұрды. Олардың сөз саптасы, дін ілімінен хабарларының молдығы көпшілікті тәнті етті.

Мұндай жиын ән-күйсіз, музыкалық тартусыз өтпейтіндігі жалпыға аян. Осы кеште сахнада ойналған күй, мәртебелі қонақтарға арналған шашу рәсімінің де әсері ерекше болғандығын жасырмаймыз.

Мәселен, „Сағындым сені иә, Расулуллаһ„ бейне көрсетілімі де көпшілікке ой салды. Оның тәрбиелік мән-маңызы да ерекше болатын. Сондықтан да жерлестеріміздің ұйып тыңдауынан оны аңғармау да мүмкін емес-ті.

Сахнаға көтерілген Қостанай облысы әкімінің орынбасары Марат Жүндібаев барша қауымды Мәуліт мерекесімен шын жүректен құттықтады. Жерлестерімізге мықты денсаулық, отбасында қуаныш пен ізгілік тіледі.

Өңірден арнайы келген қонақтар мен барша мұсылман жұртшылығын Қазақстан мұсылмандар діни басқармасының Қостанай облысындағы өкіл имамы Бахытбек Нұрғабылұлы Мәуліт мерекесімен құттықтай келе оның маңызына да ерекше тоқталды.

Сондай-ақ облысымыздағы Ислам дінінің өркендеуіне өздерінің лайықты үлестерін қосып келе жатқан мешіт жанашыларына және демеушілерге шынайы алғысын білдіріп, Алғыс хаттармен марапаттады.

Әрине, мұндай құрмет көрсету кімді болсын қанаттандырып, олардың халық арасындағы абырой-беделін барынша асқақтата түсері де хақ. Бір байқағанымыз, мұндай қолы ашық, жүрегі жомарт іскер азаматтардың аз еместігі көңілімізге қуаныш ұялатты.

Көрнекті мемлекет қайраткері, даңқты жерлесіміз Ілияс Омаровтың есімі берілген облыстық қазақ драма театрының сахна шеберлері де Мәуліт мерекесін жоғары деңгейде өткізуге белсене атсалысты. Осы руханият ордасының әртістері белгілі ақын, драматург Ақылбек Шаяхметтің „Өкініш„ деп аталатын туындысын көпшілік назарына ұсынды.

Бұл драмалық шығарманы әсіресе, өскелең жастарға тағылымды жағы ерекше еді. Себебі, мына өмірде жүрегінде иманы бар адам ешқашан да жамандыққа жол бермейді. Жек көрінішті әрекеттерден өздерін әрдайым аулақ ұстайды. Шіркін, ұлдарымыз ұлықты, қыздарымыз қылықты болып өскенге не жетсін!

Айтыс десе делебесі қозбайтын қазақ жоқ. Сондықтан талай мәртебелі сайыстарда топ жарып жүрген дарынды бауырымыз Айбек Қалиев пен айтыс өнерінің аққуы атанған Салтанат Өтелбай сахнаға шыққанда залға жиналған ағайын айрықша құрмет көрсетті.

Олардың өнері шын мәнінде баршаның көңілінен шықты. Суырып-салмалығымен дараланған ағалы-қарындас қандастарымызға жоғары көңіл-күй сыйлады. Сөз құдіреті қашан да жоғары тұратындығын тағы да бір дәлелдей түсті.

Мәртебелі қонағымыз, ҚМДБ-ның „Ақпараттық насихат тобының„ мүшесі Ризабек Батталұлы ұлы Пайғамбарымыздың өмірінен ғибраты мол уағыз айтты. Жиналған жұртшылық одан көп тағылым алды.

Мәуліт мерекесі барысында дін тақырыбына байланысты жазылған өлеңдерді мәнерлеп оқуға да айрықша назар аударылды. Талапкерлердің таудай талабына үлкенді-кішілі қауым дән риза болысты.

Өңірдегі дарынды азамат Абзал Алпысовтың орындауындағы терме де өзінің айрықша мәні, терең мазмұнымен күллі ағайындарды үлкен ойға қалдырды. Сонымен қатар жоғарда аталған қазақ драма театрының әртістерінің орындауындағы „Үш бидің өсиеті„ қойылымы да көптің көңілінен шықты.

Рухани кештің сәні болған болашағы жарқын талантты өнерпаз Дінмұхаммад Бектұрсынұлының ән айтудағы шеберлігі бұрынғыдан да өсе түскендігіне де куә болдық.

Басқосуда өңірдегі халық үшін адал қызмет атқарып жүрген имамдар Мәуліт шариф оқыды. Кештің соңында дін саласында аянбай тер төгіп келе жатқан Қостанай қалалық мешітінің бас имамы Шоқан қажы Әмірханов бата берді.

Осы жиын жоғары деңгейде өтті. Оған арнайы келген аға буын өкілдері мен Ислам дінін ерекше ардақ тұтатын ағайындардың сөзі нақты дәлел.

-Өз басым осы рухани кештен үлкен ләззат алдым. Онда қаншама тың ойлар, ғибратты сөздер айтылды. Бұл басқосу өңірімізде дінімізге айрықша назар аударылып келе жатқанын айқын көрсетті„,-дейді абыз ақсақал Мырзағали Ғабдулин.

Оразалы Жақсанов

Қостанай өңірінде қасиетті Мәуліт мерекесін тойлау жалғасын табуда. Әлемнің рақым нұры, екі дүниенің сәруары, пайғамбарлардың сұлтаны Хазіреті Мұхаммедтің (с.ғ.с.) туған күні — исі мұсылман үшін қуанышты бір мерекелердің бірі.

Әдеттегідей «Мирас» мәдениет үйінің залы халыққа лық толы болды. Бұл Алла елшісіне деген зор құрмет екені анық. Мерекенің құрметіне мәуліт-шариф оқылып, пайғамбарымызға салауаттар айтылды, дұғалар бағышталды.

Мерекелік жиынның алғашқы сөзін Қостанай облысы әкімінің орынбасары Марат Жүндібаев алып, аймақ басшысы Архимед Мұхамбетовтың құттықтау лебізін жеткізді.

Ал мәні зор мәжіліске Қазақстан мұсылмандары діни басқармасы ақпараттық насихат тобының мүшесі Ризабек Батталұлы арнайы келіп қатысып, пайғамбарымыздың өмірі мен кейінгі үмбеттері алдында орындап кеткен жауапкершілігі жайында уағыз-насихат айтты.

Бүгінгі таңда мешіттеріміз жастарды тура жолға бастап отырған басты рухани орда болса, өңірлердегі өнер ошақтарының да кейінгі буынның адасып кетуіне жол бермей келе жатқанын айтуымыз керек. Жазушы-драматург Ақылбек Шаяхметтің өмірдің ащы шындығын бейнелейтін «Өкініш» спектаклі дәл қазіргі тасбауыр қоғамның дертін тап басқандай.

І.Омаров атындағы облыстық қазақ драма театрының шығармашылық ұжымы сахнада аталған қойылымнан үзінді көрсеткенде, көпшілік көз жасына ерік берді.

Дегенмен ортаға қазақтың марғасқа ұлдарының бірі белгілі айтыскер Айбек Қалиев пен елдің аяулы қызы Салтанат Өтелбай шығып, сөз жарыстырғанда, халықтың еңсесі көтеріліп қалды. Бұл жерде пайғамбарымыздың ұлы тұлғалығын насихаттаған қос ақын жарасымды әзіл-қалжыңды да ұмыт қалдырған жоқ. Қазақстан мұсылмандары діни басқармасының Қостанай облысы бойынша өкіл-имамы Бахытбек Тәжімбет бірқатар жүрегі ізгі азаматтарға алғыс хаттар тапсырды.

Жылда салтанатты шарадан кейін қалталы азаматтар жиналып, жұртшылыққа ас беретін. Ал биылғы Мәуліт мерекесінде Қостанай облысының Жастар бөлімі мен Әйелдер-қыздар секторының ұйымдастыруымен Аймағанбет Спанұлының ұрпақтары бастап, қаладағы «Сәтті» мейрамханасында 150-ге тарта жағдайы төмен отбасыларының балалары мен жетімдер үйінің тәрбиеленушілеріне берді.

ҚМДБ-ның Қостанай облысындағы
өкілдігінің баспасөз қызметі