Қай заманда болмасын адамзат алдында тұратын ұлы мұрат-міндеттердің ең бастысы ол – салауатты, саналы ұрпақ өсіріп-тәрбиелеу. Яғни жас ұрпақты имани тәрбиемен адамгершілік пен ізеттілік секілді құндылықтарды бойларына сіңіру, рухани тазалыққа үйрету.

Осындай мақсатты алға қойған Арқалық қалалық «Мухтасиб Әлмұхаммед» мешіт ұжымы қаладағы №6-шы А.Құнанбаев атындағы мектептің бастауыш сыныбында «Ислам және отбасы» жылы аясында күлімдей келген ырысты Наурыз мерекесіне орай «Асыл дінім – рухани азығым, ата ғұрып салт дәстүрім – қазығым» атты тәрбие сағатын өткізіп, ауқымды мерекелік іс-шара ұйымдастырды.

Оған ата-аналар, мұғалімдер, сынып оқушылары қатысты. Мешіт имамы Бектұрсын Уәлиев асыл дінімізбен сабақтасып жатқан ұлттық әдет-ғұрыптарымыздың зор мәнге ие болған тәрбиелік жағына тоқталып өтті. Салт-дәстүрімізді қадірлей отырып, дінімізді түсінуге мол мүмкіндік барын айтып, бала тәрбиесінде ата-ананың орны мен жауапкершілігі жайлы әңгімелеп берді.

Сауат ашу курсында тәлім алушы мешіт шәкірттері дүниеге келген сәбиге ат қою рәсімін арнайы қойылымдар арқылы көрсетіп, сәбиге азан айтудың хикметі мен пайдасын түсіндіріп берді.

Онда сұрақтар қойылып, нақты жауап берілді. Маңызы терең сауалға дұрыс жауап қайтарған жеткіншектерге сыйлықтар тапсырылды. Сонымен қатар аталмыш мерекеге орай мешіт атынан барлық сынып оқушыларына хадия-сыйлықтар да берілді.

Тағылымды басқосуға куә болған ата-аналар мен ұстаздар қалалық мешіттің дін қызметкерлеріне шынайы алғыстарын білдірді.

ҚМДБ-ның Қостанай облысы бойынша өкілдігінің баспасөз қызметі

Рудный қалалық «Нұр» мешітінің ұйымдастыруымен Елбасымыздың «Рухани жаңғыру» бағдарламасы аясында, Рудный және Қашар кенті жамағаттары арасында «Қазақша күрес» бойынша жарыс өтті. Аталмыш жарыста палуандар үш түрлі келі салмақ бойынша күш сынасты.

«Спорт – денсаулық кепілі» демекші, жастарымыздың спортқа деген ынтасы мен ықыласы артып келе жатқандығын осы жарыс айқын байқатты. Өйткені, қатысушылар оған жақсы дайындықпен келгендерін көрсете білді.

Сайыс нәтижесі бойынша ҚМДБ-ның Қостанай облысындағы өкіл имамы Бахытбек Тәжімбет пен Рудный қалалық «Нұр» мешітінің Бас имамы Азамат Серікбайұлы өздерін жан-жақты көрсеткен спортшыларға алдағы уақытта да биік шыңдарды бағындырып, тек жеңістерге жете берулеріне тілектестіктерін білдірді. Сонымен қатар жүлдеге ие болған қатысушыларды бағалы сыйлықтармен марапаттады.

«Ислам – бірліктің негізі, яғни адамдар арасында ынтымақтықты, ауызбіршілікті, сондай-ақ, ұлтаралық достықты қамтитын ізгі дін. Сол үшін де шаһарда ұйымдастырылған бұл игі бастама тек жастарымыздың арасында ғана емес, барша спорт сүйер қауымның арасындағы достықтың нығаюына да өз септігін тигізері сөзсіз» екендігін Бахытбек Нұрғабылұлы атап өтті.

ҚМДБ-ның Қостанай облысы бойынша өкілдігінің баспасөз қызметі

Жуырда Рудный қалалық «Нұр» мешітінде «Ислам және отбасы» жылы аясында мешіт қызметкерлерінің ұйымдастыруымен әйел-қыздар жамағатымен дөңгелек үстел өткізілді.

Осынау «Ислам мәдениетіндегі әйелдің мәртебесі» тақырыбында басталған жиынды бас имам Азамат Серікбайұлы ашып, Ислам дінінде әйел мәртебесінің рөлі жайында сөз қозғады.

Бұл басқосуға арнайы келген Қостанай әйел-қыздар секторының өкілі Гүлдана Жаңабайқызы аса маңызды тақырыпты одан әрі жалғастырды. Исламдағы әйелдің отбасында алатын ерекше орнын қатысушыларға өзіндік ойлы-пікірлерімен жеткізді.

Сөйтіп, Рудныйлық мұсылман қауымы дөңгелек үстелге арқау болған жайдан айрықша әсер алды. Олар жалпы әйел затының отбасындағы ынтымақ бірлікті нығайтудағы жетекші рөлге ие екендіктеріне көздері айқын жетті.

Жиын соңында барша нәзік жандылар арнайы жайылған дастархан басына жиналып, дайындалған тағамнан дәм татты. Ел арасында абыройлы да беделді ақ жаулықты аналарымыздың ақ батасын алды.

Баршаға Ұлы Пайғамбарымыздың «Жәннәт – аналар аяғының астында» деген хадисінде айтылған жайлар бұрыннан мәлім. Сондықтан аналар мен апаларымызды, қарындастарымызды күнделікті өмірде ерекше құрметтеп, оларға деген жылы сөзімізді аямайық ағайын.

Отбасы – қоғамның негізі. Ендеше тәуелсіз еліміз бұдан да өркендеп, әлемдегі дамыған 30 елдің қатарына қосылу үшін әрбір шаңырақ бақытты ғұмыр кеше берсін деген ізгі тілегімізді білдіреміз.

ҚМДБ-ның Қостанай облысы бойынша өкілдігінің баспасөз қызметі

Отбасы – қоғамның маңызды буыны, мемлекеттің де негізі осы шағын ұжымнан қаланатыны ақиқат. Биылғы 2018 жылды Қазақстан мұсылмандары діни басқармасының төрағасы, Бас мүфти Серікбай қажы Сатыбалдыұлы ақылдастар алқасымен бірлесе отырып: «Ислам және Отбасы» жылы деп жариялаған болатын.

Осы орайда дін қызметкерлері «Неке және отбасы», «Қазақтың таным-түсінігі бойынша отбасы құндылықтары», «Бала тәрбиесі», «Жарасымды жанұя» сынды түрлі маңызды тақырыптар аясында арнайы іс-шаралар өткізуді қолға алды.

Қоғамымызда зор мәнге ие тақырып аясында Арқалықтағы «Мухтасиб Әлмұхаммед» мешітінің ұйымдастыруымен «Ислам және Отбасы» жылы аясында «Ислам мәдениетіндегі әйел мәртебесі» атты дөңгелек үстел өткізді.

Келелі басқосуға қалалық мәслихат хатшысы, Ішкі саясат және Білім бөлімінің мамандары, мектептер мен оқу орындарының тәрбие жөніндегі әдіскер-мұғалімдері, перзентхана, «Ана мен бала» орталығының қызметкерлері, «Ана–дария» мектебінің төрайымы мен мүшелері, Ішкі істер басқармасының әйелдерді зорлық-зомбылықтан қорғау бөлімінің инспекторы арнайы шақырылды.

Жиын Ыбырай Алтынсарин атындағы мемлекеттік педагогикалық институтта өтті. Дөңгелек үстелді ұйымдастырған мешіттің бас имамы Бектұрсын Торғайбайұлы осы мәселеге байланысты өз ойын ортаға салып, Исламдағы әйелдің орны мен рөлі айрықша екендігін де тілге тиек етті.

Бұл басқосуда бейне роликтер көрсетіліп, «Ана – дария» мектебінен келген аяулы жандарға сөз берілді. Сөйтіп, өмірлік тәжірибесі мол қажы апаларымыз да өз пікірлерін айтты.

Сондай-ақ қалалық мәслихат хатшысы Г.Төкенқызы өз сөзінде қоғамдағы отбасының рөлі, мемлекеттің бала тәрбиесіне деген қамқорлығы жайлы баяндады.

Жиын барысында оқу орындарының өкілдері яғни маман-ұстаздар да әңгімеге арқау болған тақырыпқа орай өз ойларын ортаға салды.

Басқосудың соңында мешіттің бас имамы жанұялардың ұйытқысы болып отырған аналарға ең ізгі тілегін білдіре келіп, оларға «Исламдағы жанұя» атты кітаптарды сыйға тартты.

ҚМДБ-ның Қостанай облысы бойынша өкілдігінің баспасөз қызметі

Қазақстан мұсылмандары діни басқармасының Қостанай облысы бойынша өкілдігінің насихат және қоғаммен байланыс бөлімінің әйел-қыздар секторы кейінгілерге өнеге боларлық бірқатар тағылымды шараларды жүзеге асырды.

Мәселен, мешіт жамағаты мен шәкірттер арасында «Тәні саудың жаны сау» атты спорттық сайыс ұйымдастырылды. Онда эстафета, волейбол және баскетбол ойындары бойынша сайыстар өтті.

Сонымен қатар өткен «Алғыс айту» күнінде де тоғызқұмалақ, шахмат және дойбыдан жарыстар болып, жеңімпаздар жүлделі орындарға ие болды.

Біздің қазақ «Адам көркі шүберек» деп босқа айтпайды. Әйел затына әсемдік қашан да жарасады. Есімі өңірімізге кеңінен таныс аяулы жан, Қостанайдағы «Сұлтан» сән үйінің басшысы Мәлика Ғалымжанқызы Төлемісова мешітте болып әйелдер-қыздар жамағатымен кездесті.

Ол өзінің «Заманауи мұсылман киімдері» коллекциясымен таныстырып, орамал тартудың өзіне тән қыр-сырын көрсетті.

ҚМДБ-ның Қостанай облысындағы өкілдігінің баспасөз қызметі

Биыл да дәстүрге айналған Алғыс айту күніне орай «Алғыс айту – рухани байлығымыз» деген атпен Арқалық қаласы «Мухтасиб Әлмұхаммед» мешітінің ұжымы шаһарда бірнеше қайырымдылық іс-шаралар мен кездесулер өткізді.

Алдымен олар көмекке мұқтаж жандарға қолұшын беру мақсатында, әлеуметтік жағынан аз қамтылған және көпбалалы отбасылардың үйлеріне арнайы барып, күнделікті тұтынатын азық-түлікті таратты.

Сондай-ақ мешітке келуші барша жамағатқа 600-ге жуық нан таратылды.

Сонымен қатар қаладағы ерекше білім берілу қажеттілігі бар мектепте өткен кездесуде мешіт алқасы оқушыларға сый-сияпат жасап, оларға шын жүректен шыққан ізгі ниетпен баталарын берді.

Осындай тағылымды жағы мол жүздесу Арқалықтағы «Агроколледж» студенттерімен де болып өтті. Онда жастарға имандылық, тәлім-тәрбие жөнінде дәрістер оқылды.

Осы айталғандармен қатар №12-ші жатақхана тұрғындарымен «Алғыс айту – ризашылық белгісі» атты дөңгелек үстел де ұйымдастырылды.

Мұнда білім бөлімінің тәрбие жөніндегі әдіскерлері мен психолог мамандар да қатысты. Сұхбат барысында өмірде кездесетін қиыншылық кездері әрдайым сабырлылық пен ұстамдылық таныту қажеттілігі жайында да айтылды.

Аталмыш үш мекемеде қалалық мешіт тарапынан әрдайым жасалатын қайырымдылық шаралары мен жастар тәрбиесіндегі сауапты да игі істер үшін дән ризашылық білдірілді. Дін қызметкерлері арнайы Алғыс хаттармен марапаттады.

ҚМДБ-ның Қостанай облысындағы өкілдігінің баспасөз қызметі

Көпшілікке аян, қазір еліміздің барлық аймақтарында «Рухани жаңғыру» бағдарламасы аясында мазмұнды шаралар ұйымдастырылып жатыр.

Соның бір көрінісі ретінде Таран ауданының «Әйет» мешітінің ұйытқы болуымен аймақтық мешіттер арасында спартакиада болып өтті.

Онда спорттың футбол, стол теннисі, мылтық ату, арқан тарту, қол күресі секілді түрлерінен сайыстар өткізілді.

Осынау салауатты өмір салтын насихаттайтын шараға Рудный және Лисаков қалалары мешіттерінің жамағаттары да қатысып, өздерінің бақтарын сынады.

Сайыстың қорытындысы бойынша бірінші орынды Лисаков, екінші орынды Рудный қаласы және үшінші орында Таран ауданының жамағаттары өзара бөлісті.

Аталмыш жеңімпаздарға лайықты құрмет көрсетіліп, бағалы сыйлықтармен марапатталды. Содан кейін мәртебелі қонақтарға дастархан жайылып, бұл кездесу тағылымды әңгімелерге ұласты.

ҚМДБ-ның Қостанай облысындағы өкілдігінің баспасөз қызметі

Қазақстан мұсылмандары діни басқармасының тапсырмасы негізінде «Алғыс айту» күнінде Қостанайды біршама шаралар атқарылды. Осы күні Қостанай облысының Діни проблемаларды зерттеу орталығының қолдауымен облыстық «Жастар ісі» және «Қыздар секторы» бөлімдерінің ұйымдастыруымен «Тоғыз құмалақ», «Шахмат» және «Дойбы» ойындарынан сайыс болып өтті.

Аталмыш жарысқа қостанайдың түпкір-түпкірінен 55 адам қатыстып бақтарын сынады. Нәтижесі бойынша жарыстың соныңда жеңімпаздарға мақтау қағазы мен бағалы сыйлықтар табыс етілді.

Сонымен бірге Мәселен, демеушілердің қолдауы арқасында мешітте күнкөрісі төмен он бес отбасына қайырымдылық мақсатында азық-түлік жағынан көмек көрсетілді.

Сондай-ақ өңірдегі «Зекет» қорының өкілі Жақсылық қажы Ғайсин мен найб имам Сеит Темірбекұлы «Қостанай балалар арнаулы әлеуметтік қызмет көрсету орталығы» коммуналдық мемлекеттік мекемесіне барды. Онда ата-анасының қарауынсыз қалған балалар тәрбие алуда. Оларға мейрімділік, татулық туралы тәрбие аларлық өнегелі сөздерден соң, тәттілер мен сусындар үлестірілді.

Мұндай шаралар басқа өңірлерде де жалғасын тапты. Қарабалық ауданының «Ғашура ана» мешіті атынан бас имам Серік Темірбекұлы аудандағы қарттар үйінде ұжымымен болып, жақсы лебіздермен көңілі қаяу қарттарды бір қуантты.

Кездесу соңында тәттілер мен базарлықтар таратылды. Қарттар болса өз кезегінде алғыстарын жаудырып, баталарын беріп жатты.

ҚМДБ-ның Қостанай облысындағы өкілдігінің баспасөз қызметі

Қостанай ауданы «Маңдай батыр» мешітінің ұйытқы болуымен бірнеше есте қаларлық кездесулер мен дөңгелек үстелдер болып өтті. «Нұр Отан» партиясы Қостанай аудандық филиалының ғимаратында Бас имам Асылхан Түсіпбек, ауыл молдалары және ішкі саясат қызметкерлері «Жаназа және жерлеу рәсімдері» тақырыбында тағылымдық іс-шара ұйымдастырды.

Онда діни басқарманың тапсырмасы бойынша жаназадағы ысырапшылдық және өзге де мәселелер қаралды. Жүздесуге еліміздегі ғұламалар кеңесінің бастамасымен жарық көрген «Жаназа және жерлеу рәсімдері» кітабы арқау болды.

Бас имам ауыл молдаларына жаназа кітабын таратып, оларға нақты тапсырмалар берді. Одан кейін жат ағымдардың алдын-алуға байланысты осы аудандық «Маңдай батыр» мешітінің найб имамы Абзал Сұлтанғалиұлы және Ішкі саясат бөлімінің маманы Кымбат Қоянбаева, Қостанай ауылшаруашылық колледж студенттері, аудандық кітапхана оқырмандары, сондай-ақ «Қазақ тұлпары» жылқы зауыты қызметкерлерімен кездесу болып өтті.

Бұл жүздесулерде Қазақстанда тыйым салынған ағымдар және олардың болашақ ұрпаққа келтірер зияны мен одан сақтану жолдары туралы түсіндірмелер жасалды. Қатысушылар қойған сұрақтарына нақты жауап алды.

ҚМДБ-ның Қостанай облысындағы өкілдігінің баспасөз қызметі

Бүгін Астана қаласында Қазақстан мұсылмандары діни басқармасының ұйымдастыруымен «Еуразия кеңістігіндегі Ислам өркениеті: өткені, бүгіні және болашағы» атты тақырып аясында Еуразия мұсылман ғұламаларының форумы басталды.

Халықаралық форумға ҚР Парламенті Сенатының Төрағасы Қасым-Жомарт Тоқаев, ҚР Дін істері және азаматтық қоғам министрі Нұрлан Ермекбаев, Бас мүфти Серікбай қажы Ораз, Сенат және Мәжіліс депутаттары, зиялы қауым өкілдері, мемлекет және қоғам қайраткерлері, Еуразияның 21 елінен 35-тен астам делегат, еліміздің беделді дін ғалымдары мен Ғұламалар кеңесінің мүшелері, жалпы 250-ден астам адам қатысуда.

ҚР Парламенті Сенатының Төрағасы Қасым-Жомарт Тоқаев шетелден келген мәртебелі меймандарға құттықтау сәлемін жолдап, форум жұмысына сәттілік тіледі. Өз кезегінде сөз алған ҚР Дін істері және азаматтық қоғам министрі Нұрлан Ермекбаев әлемдегі діни тұрақтылық пен халықтар арасындағы бірлікті сақтауда дін қызметкерлерінің рөлі үлкен екенін атап өтті.

Мінберде сөз алған Бас мүфти Серікбай қажы Ораз:

«Бүгін Қазақстан мұсылмандарының рухани өмірінде тарихи күн. Өйткені, біздің бастамамызбен тұңғыш рет Еуразия еліндегі Ислам ғалымдары Астанада бас қосып, әлемдегі діни ахуал туралы пікір алмасып, ортақ Қарар қабылдап отыр. Ислам діні Еуразия мұсылмандары арасында Қарахан кезеңінде тарала бастап, Алтын Орда дәуірінде аяқталғаны баршамызға мәлім. Мәураннахр мен Анадолы және Каспий мен Еділ бойында жаңа түркі-ислам өркениетінің негізі қаланды. Яғни, біздің діни-рухани тұтастығымызды қамтамасыз етіп отырған ортақ тарихымыз бен мәдениетіміз бар. Олай болса, сырттан келіп жатқан тасқындарға төтеп беру үшін Еуразия мұсылмандарының ортақ мәдени және рухани құндылықтарын жандандыруымыз керек. Еуразия мұсылмандары радикализмнің кез-келген түрін, оның ішінде дін атын жамылған содырлық әрекеттерді ешқашан қолдамауға тиісті. Керісінше, исламға қатысты ксенофобия орын алмас үшін діни радикализмге қарсы орынды сын айтып, ортақ ұстанымдарымызды жариялап отыруымыз керек», – деді.

Халықаралық форумның мақсаты мен міндеті – жаңа замандағы мұсылман қауымының жауапкершілігі мен өзара түсінігін қалыптастыру, әлемдегі сын-қатерлерге жауап беру, бүгінгі мұсылман үмбетінің діни экстремизм мен терроризмге қарсы иммунитетін арттыру, ортаазиялық тарихи діни мектептің рөлін арттыру, Елбасының «Рухани жаңғыру» бастамасына орай қазақ топырағынан шыққан әлемге танымал діни тұлғалардың еңбегін насихаттау, Еуразия елдерінің ортақ пәтуалар базасын қалыптастыру, Еуразия кеңістігінде діни ықпалдастық пен рухани қауіпсіздікті қамтамасыз етуге үлес қосу, т.б.

Форум жұмысы соңында «Бүгінгі мұсылманның келбеті» құжаты қабылданып, жиынға қатысушылардың Қарары жарияланады.