Жақында «Иманды жастар - Ел болашағы» бағдарламасы аясында Рудный қаласы қарасты «Кәмшат ана» мешітінде өңірдегі мешіт шәкірттері арасында «Білім сайысы» атты жарыстың екінші кезеңі өткізілді.

Бұл сайысқа жоғарыда аталған шаһардың «Нұр», Қостанай облыстық «Аймағанбет қажы Спанұлы», Қостанай қалалық «Жайлаубай ата», Қашар кенті «Кәмшат ана», Лисаков қаласы «Әбдіхаим Саламатұлы» мешіттерінің шәкірттері қатысты.

Жарыста «Фикһ», «Ақида», «Мәзһабтар тарихы», «Сира» пәндерінен сұрақтар қойылды. Сайысқа қатысушылар терең білімі және белсенділіктерімен көзге түсті.

Сайыс соңында бірінші орын алған Рудный қалалық «Нұр», екінші орынды иеленген Қашар кентіндегі «Кәмшат ана», үшінші орынды жеңіп алған Қостанай облыстық «Аймағамбет қажы Спанұлы» мешіттерінің шәкірттеріне қаржылай сыйлықтар мен марапат қағаздары табыс етілді.

«Иманды жастар – Ел болашағы» деп аталатын бағдарлама аясында ұйымдастырылған аталмыш білім сайысы талапты шәкірттердің рухани жағынан дамуына игі әсерін тигізетіндігі даусыз.

Қазақстан мұсылмандары діни басқармасының төрағасы, Бас мүфти Серіқбай қажы Ораздың тапсырмасы бойынша жат ағымдардың алдын алу мақсатында Денис ауданының бас имамы Руслан Жиенбаев Гришинка ауылының және осы аудандағы №2 орта мектеп оқушыларымен кездесу өткізді.

Кездесу барысында имам қазіргі дәстүрлі емес діни ұйымдар мен діни сауаттылық жайында қатысушыларға мол мәлімет берді.

Ол өз сөзінде: «Жат ағымдардан сақ болу үшін біз ақ пен қараны ажыра білуіміз керек,сауатты тек діни мамандардан алуымыз қажет.Сонда ғана біз жат ағымдарға тосқауыл қоямыз. Ислам дінінде терроризм, экстремизм жат ұғым» деді.

Бас имам жүздесу соңында оқушылардың көкейінде жүрген сұрақтарға жауап берді.

Қостанай облысының барлық мешіттері Қазақстан мұсылмандары діни басқармасының филиалы болып табылады (бұдан әрі - ҚМДБ). Міне, осы аталған мешіттердің 2019 жылғы атқарылған жұмыстары қорытыланды.

Енді осы жүзеге асырылған істерге тоқталып өтелік.

Мәселен, өтіп бара жатқан жылы қызметіміздің бір бағыты болып табылатын Шариғат және пәтуа бойынша жұртшылық 423 сұрақ түсті. Оларға жазбаша, ауызша және телефон арқылы толыққанды жауап берілді.

Ал «Уағыз-насихат» мәселесінде 13 040 шара ұйымдастырылып, 253 333 адам қамтылды.

Жастар жылы аясында арнайы жоспар бойынша 187 іс-шара өткізіліп, оған 7 561 адам қамтылды. Әйел-қыздар секторын аясында қайырымдылық мақсатында 156 шара ұйымдастырылды, оған 1 728 адам қатысты.

Діни қызметтегі имамдарымыз түзету мекемелерімен де жұмыс істейді. Осы орайда 516 кездесу өткізіліп, 2 257 адам ақпаратпен қамтылды.

Атқарылған нақты жұмыстардың нәтижесінде теріс ағым жетегінде жүрген 18 адам дәстүрлі Ислам дініне бет бұрды.

ҚМДБ-ға қарасты діни оқу орындарында Қостанай облысынан оқып жатқан шәкірттер саны 49. Үстіміздегі жылы облысымыздан діни оқу орындарына 14 талапкер қабылданды.

Өкілдік тарапынан тікелей қолдау көрсету арқасында Нұр-Мүбарак университетінде 2 шәкірттің оқу ақысы төленуде.

ҚМДБ тарапынан болған тапсырмаға сәйкес облыстық мешіттен 20 шәкіртке және қалалық мешіттен 15 шәкіртке арналған 2 қайырымдылық мекемесі жұмыс істеуде.

Облысымызда қайырымдылық мақсатында атқарылған жұмыстар аз емес. Жалпы 471 шара өткізіліп, онда 11 683 адамға 28 960 691 теңгенің азық-түліктей және қаржылай көмегі жасалды.

Өткен Құрбан айтта 1 920 адамға 12 720 келі ет үлестірілді. Ал Рамазан айында 54 110-ға жуық адамға ауызашар берілді.

Сонымен қатар «Мектепке жол» қайырымдылық акциясы аясында 1000 балаға оқуға қажетті құрал жабдығы, киімі үлестірілді.

Жалпы алғанда, облыс бойынша 68 713 адамға 116 214 691 теңгенің қайырымдылық көмегі жасалды.

«Ел үлесі пәтерге» акциясы аясында баспанаға мұқтаж 5 отбасына демеушілердің қолдауымен үй берілді.

Халал өнімдерін стандарттау бойынша өңірімізде «Халал» сертификатын 6 кәсіпорын алды, 9 қасапшыға рұқсат куәлігі тапсырылды.

Облыс көлемінде 30 мешіт, 26 намазхана халыққа қызмет көрсетуде.

Республикамызда және облыс көлемінде болып жатқан жаңалық, хабарлама, іс-шаралар туралы akmechet.kz сайтында жариялап отырамыз.

Жалпы, сайтымызды күніне орта есеппен 458, ал жылына 222 487 адам қарайды.

Әлеуметтік желілерде Instagram парақшамыз және Youtube каналымыз бар. Онда діни тақырыптардағы уағыздарымыз, жаңалықтарымыз жарияланып тұрады.

Таяуда облыстың бас имамы Бахытбек Тәжімбет Алматы қаласында өткен Қазақстан мұсылмандары діни басқармасының кеңейтілген төралқа мәжілісіне қатысып, өңірдегі атқарылған жұмыстарға есеп берді.

Сол сапардан оралған соң облыстық мешітте жыл қортындысына байланысты жиын өткізді. Оған қала және аудандардың бас имамдары қатысты.

Бахытбек Нұрғабылұлы барлық әріптестеріне келер жылы да халыққа барынша жақындай түсіп жұмысты жандандыру қажеттілігіне ерекше тоқталды.

Алдағы жылы Қазақстан мұсылмандары діни басқармасының 30 жыл толуына орай жүзеге асырылатын бірқатар игі бастамаларды көтерді.

Оның ішінде мүфтияттың тапсырмасына орай республика көлемінде 30 мешітке күрделі жөндеу өткізу, 30 дін қызметкеріне үй беру, 30 көпір салу, 30 құдық қазу және 30 000 түп ағаш отырғызу секілді маңызды шараларға атсалысу мүмкіндігі тұрғандығын атап өтті.

Қазақстан мұсылмандары діни басқармасының Қостанай облысындағы Бас имамы Бақытбек қажы Тәжімбет және басқа да облыстардың бас имамдары Нұр ­Мүбарак университетіндегі студенттермен кездесті.

Негізгі мақсат түлектерді дін жолындағы қызметке шақыру және өзге студенттерді жазғы маусымда аймақ мешіттеріне тәжірибелік жұмыстарға баулу.

Бүгінде Нұр ­Мүбарак университетінде Қостанай облысынан барлығы 25 студент білім алуда. Оның 18 ер 7 қыз бала оқуда. Алдағы 2020 жылы студенттердің сегізі бакалавр дәрежесіне ие болу алдында тұр.

Арқалық қаласындағы «Мухтасиб Әлмұхаммед» мешіті және жастар ресурстық бастамалар орталығы бірлесе отырып, Қазақстан мұсылмандарының рухани тұғырнамасын таныстыру мақсатында «Жеті рухани қазық» тақырыбында насихат-форумын өткізді.

Бұл басқосуға шаҺардағы қазыналы қарттар, ардагерлер және жас буын өкілдері қатысты.

Форумның негізгі мақсаты: қоғамда рухани құндылықтарды насихаттап, өскелең ұрпаққа имани тәлім-тәрбие беру, дәстүрлі ислам құндылықтарын олардың бойына сіңіру.

Жиын модераторы– жастар ресурстық орталығы директоры Аманкелді Ахметжанов Нұр-Сұлтан қаласында өткен форум туралы айтып берді.

Осы басқосуда қала әкімінің орынбасары Түбекбай Әубәкіров «Сана түзелсе – адам түзеледі» деген тақырыпта, «Мухтасиб Әлмұхаммед» мешітінің имамы Бектұрсын Торғайбайұлы дініміздегі асыл құндылықтар хақында баяндама жасады.

Сондай-ақ, форумға келген көпшілік қалалық «Рухани жаңғыру» кеңсесі директоры Роман Аймағанбетұлының, ардагерлер кеңесі төрағасы Жәнібек Ғапбасұлының, Фурманов ауылы «Тәубе» мешітінің имамы Нұрхан Асанұлының, тарихшы-этнограф Шөптібай Байдилдиннің ұлағатты да мазмұнды ой-пікірлерін ұйып тыңдады.

Жақында Қамысты ауданының мәдениет үйінде ардақты Мұхаммед пайғамбарымыздың (Алланың игілігі мен сәлемі болсын) туылған күніне байланысты Мәуліт мерекесі өткізілді. Бұл шараға аталмыш ауданның әкімі Ғазиз Ерболатұлы және белгілі дін қайраткері, Қостанай облысының бас имамы Бақытбек Тәжімбетұлы қатысты.

Мәдениет үйіндегі есте қаларлық рухани басқосуға аудан орталығындағы барлық мекеме қызметкерлері, ауылда ғұмыр кешіп жатқан мұсылман бауырларымыз келіп, арнайы дайындалған бағдарламаны тамашалады.

Жиыннан кейін Мұхаммед пайғамбарымыздың (Алланың игілігі мен сәлемі болсын) құрметіне мешітте дастархан жайылып, көпшілікке ас берілді. Мұнда да кейінгі жастарға қаншама тәрбиелік мәні зор,өмірлік ғибрат болар ұлағатты сөздер айтылды.

Облыстың бас имамы Бақытбек қажының көкейде жүрген дінге байланысты пайымдары жергілікті ағайындарға үлкен ой салды. Оның адамгершілік, имандылық жайлы құнды пікірлері барша аудан тұрғындарына өнеге болары сөзсіз.

Жуырда Рудный қалалық «Нұр» мешітінің имамы Азамат Серікбайұлы Қашар кентінде болып, ауқымды кездесулер өткізді. Мәселен, ол аталмыш елді мекенде «Қашар кен өндіру басқармасы» жұмысшылары және «Қашар кенті №2 қазақ мектебі» оқушыларымен «Ислам діні - бейбіт дін» тақырыпта әңгіме өрбітті.

Жүздесулер барысында дін қайраткері жиынға қатысушыларға асыл дініміздің негіздерімен құндылықтарын түсіндірді. Мешіт қызметкерлерінің негізгі мақсаты - еліміздегі халықтар арасындағы бірлік пен ынтымақты барынша нығайту екендігіне тоқталды.

Сонымен қатар, бауырларымыз бойларын теріс ағымдардан аулақ ұстаулары қажет екендігін еске салды. Кездесулер өте мағыналы да мәнді ұйымдастырылды.

Басқосу кезінде жиналған қауым тарапынан өзекті тақырыптарға байланысты сауалдар да қойылды. Имам Азамат Серікбайұлы оған нақты жауап берді. Сөйтіп жұртшылық қаншама мәліметтер мен деректерге қанықты. 

Қостанай облыстық мешітінде ҚМДБ-ның «Халал даму» бөлімінің жауапты өкілі Әлішер Ертайұлы жамағат алдында сертификаттарды салтанатты түрде тапсырды. 

Ол қаламыздағы «Beefstream» қасапханасының төрт қасапшысы арнайы оқытылып, «Халал» қасапшы куәліктеріне ие болды. Ол деген аталмыш құжатты алған тұлғалар әрдайым дастарғанымызда болатын еттің адал болуына кепілдік береді.

Сонымен қатар аталған қасапхана «AltynEt» сауда белгісі арқылы ет сататын дүкен ашып, халық игілігі мақсатында жұмыстарын бастап та кетті.

Сондай-ақ, «Arzu» дәмханасы да алғаш рет халал сертификатын алды. Ерекше тоқталатын жай, дәмхана халал талаптарына толық сай келеді.