Жуырда Рудный қалалық «Нұр» мешітінің имамы Азамат Серікбайұлы Қашар кентінде болып, ауқымды кездесулер өткізді. Мәселен, ол аталмыш елді мекенде «Қашар кен өндіру басқармасы» жұмысшылары және «Қашар кенті №2 қазақ мектебі» оқушыларымен «Ислам діні - бейбіт дін» тақырыпта әңгіме өрбітті.

Жүздесулер барысында дін қайраткері жиынға қатысушыларға асыл дініміздің негіздерімен құндылықтарын түсіндірді. Мешіт қызметкерлерінің негізгі мақсаты - еліміздегі халықтар арасындағы бірлік пен ынтымақты барынша нығайту екендігіне тоқталды.

Сонымен қатар, бауырларымыз бойларын теріс ағымдардан аулақ ұстаулары қажет екендігін еске салды. Кездесулер өте мағыналы да мәнді ұйымдастырылды.

Басқосу кезінде жиналған қауым тарапынан өзекті тақырыптарға байланысты сауалдар да қойылды. Имам Азамат Серікбайұлы оған нақты жауап берді. Сөйтіп жұртшылық қаншама мәліметтер мен деректерге қанықты. 

Қостанай облыстық мешітінде ҚМДБ-ның «Халал даму» бөлімінің жауапты өкілі Әлішер Ертайұлы жамағат алдында сертификаттарды салтанатты түрде тапсырды. 

Ол қаламыздағы «Beefstream» қасапханасының төрт қасапшысы арнайы оқытылып, «Халал» қасапшы куәліктеріне ие болды. Ол деген аталмыш құжатты алған тұлғалар әрдайым дастарғанымызда болатын еттің адал болуына кепілдік береді.

Сонымен қатар аталған қасапхана «AltynEt» сауда белгісі арқылы ет сататын дүкен ашып, халық игілігі мақсатында жұмыстарын бастап та кетті.

Сондай-ақ, «Arzu» дәмханасы да алғаш рет халал сертификатын алды. Ерекше тоқталатын жай, дәмхана халал талаптарына толық сай келеді.

Адамзат айрықша құрмет тұтатын сүйікті пайғамбарымыз Мұхаммедтің (оған Алланың игілігі мен сәлемі болсын) туған күні - Мәуліт. Бұл жер бетіндегі барша мұсылман жамағаты үшін ерекше күн болып табылады.

Көпшілікке мәлім, мәуліт мерекесі еліміздің барлық өңірлерінде қасиетті мейрам ретінде аталып келеді. Қазір Қостанай облысының аудандары мен қалаларында аталмыш мейрамға жеткілікті көңіл бөлінуде. Мұның айғағы ретінде мәні мен мазмұны есте қаларлық рухани кештер ұйымдастырылып мешіттерде аталып өтуде. 

Қасиетті жұма күндері Қостанай облыстық, Арқалық және Рудный қалалық мешіттерінде Пайғамбарымыздың ғұмыры жайлы уағыз айтылып салауат шәриф оқылды.

Жақында өңіріміздегі Меңдіқара ауданы орталығында "Зұлқарнайұлы Мұса қажы" мешітінің бас имамы Еркебұлан Қошантегі қазақтың көрнекті ақыны Ғаббас Жұмабаев атындағы мектеп-гимназиясының ұлағатты ұстаздары мен жоғары сынып оқушыларымен кездесу өткізді.

Бұл жиынға Қазақстан Республикасының еңбек сіңірген мәдениет қызметкері, сазгер әрі әнші Бақытжан Сәуекенов арнайы шақырылды. Онда қазан айында ел ордамыз Нұр-Сұлтан қаласында өткен Республикалық 3-ші имамдар форумында қабылданған аса құнды үш құжаттыңмәні мен мазмұны таныстырылды.

Жүздесуде «Жеті рухани қазық» деп аталатын тұжырымдаманың алар орны жайлы жан-жақты айтылды. Ұстаздар мен оқушылар маңызды құжаттардың әрбір отбасы үшін аса құнды екендігін жете ұғып, ерекше әсер алды.

Жақында Қостанай ауданына қарасты «Алтын дала» ауылында Мәуліт аталып өтті. Шараны ұйымдастырған сол елдің дін қызметкері Ахметов Берік және айналасындағы жамағаты.

Осынау көпшілікке үлкен әсер қалдырған мерекеге ҚМДБ-ның «Зекет» қорының басшысы Талғат Сейіткәрімұлы, Қостанай облысының бас имамы Бақытбек Нұрғабылұлы және Қостанай ауданы «Маңдай батыр» мешітінің бас имамы Асылхан Мұханбетжанұлы қатысты.

Дін қайраткерлері жиналған жұртшылықты мәуліт мерекесімен құттықтап, оларға мықты денсаулық, шаңырақтарына бақыт тіледі. Ал, ауыл молдасы Берік Ахметовтың шәкірттері Ұлы Пайғамбарымыздың құрметіне салауат оқытты.

Қостанай қалалық «Жайлаубай ата» мешітінде Нұр-Сұлтан қаласында болып өткен ІІІ Республикалық имамдар форумында қабылданған «Жеті рухани қазық» құжаттамасына байланысты «Жеті рухани қазық» атты кездесу болып өтті.

Оған Ахмет Байтұрсынов атындағы Қостанай мемлекеттік университеті Аграрлық-техникалық институтының студенттері қатысты. Мұнда аталмыш жоғары оқу орнының профессоры, философия ғылымдарының кандидаты Қалқаман Жақып қозғалған маңызды тақырыпты басшылыққа ала отырып, Отан, бірлік, ұлтты сүю жөнінде әңгімеледі.

Бұл кездесуге жиналған жастар көкейлерінде жүрген сауалдарын қойып нақты жауаптарын алды.

Басқосуда шаһарымыздағы «Жайлаубай ата» мешітінің наиб имамы Дархан Қосылбаев «Жеті рухани қазық» тұжырымдамасын жан-жақты түсіндірді. Сондай – ақ, оның әріптесі Мейрамбек Жетесов те кездесудің өз деңгейінде өтуіне белсене атсалысты.

Қостанай облыс орталығындағы зәулім «Сұлтан сарайы» мейрамханасында ұлы Пайғамбарымыз Мұхаммедтің (оған Алланың игілігі мен сәлемі болсын) туған күніне арналған «Қариясы бар елдің қазынасы мол» атты мерекелік рухани кеш өтті.

Оған белгілі дін қайраткерлері, қажылар, зиялы қауым өкілдері және ақ сақалды қарттарымыз бен ақ жаулықты аналарымыз қатысты. Бахытбек қажы Нұрғабылұлы бастаған мешіт қызметкерлері мен қала аудан бас имамдары үлкен дайындықпен келгендіктерін көрсетті.

Бұл мағыналы кешті арқалықтық дарынды, өнерлі бала Дінмұхаммед Бектұрсынұлы илләһи әнді, Жасұлан Махат термені аса бір шеберлікпен орындады.

Кешке арнайы шақырылған Қазақстан мұсылмандары діни басқармасының «Зекет» қорының директоры Талғат Сейіткәрімұлы Мәуліт мерекесіне орай құттауын білдіріп Пайғамбарға салауат айтудың маңыздылығына тоқталды.

Осы жиында даңқты жерлесіміз Ілияс Омаров атындағы облыстық қазақ драма театрының әртістері кейінгі жастарға үлкен тағылым болар «Қайырым жаса», «Молда мен шәкірт» деп аталатын сахналық көріністерді көпшілік назарына ұсынды.

Жылдағы қалыптасқан дәстүр бойынша өңірдегі аудан мен қалалардың имамдары ұйымшылдық көрсетіп, Мәуліт шарифін орындады. 

Мәуліт мерекесінің соңында Қостанай облысының бас имамы Бахытбек Тәжімбет мешіт жанашырларынан игі шараларды атқарудағы белсенділіктері үшін естелік сый-сыйапат жасады.

Көпшілікке белгілі, Қазақстан мұсылмандары діни басқармасының төрағасы, Бас мүфти Серікбай қажы Ораздың бастамасымен елімізде «Ел үлесі пәтерге» атты игі бастама қолға алынған еді.

Бұл игі бастама Қостанай өңірінде тағы да жалғасын тапты.

Бұл шараға Қостанай облысына арнайы сапармен келген «Зекет» қорының директоры Талғат Сейіткәрімұлы Қазақстан мұсылмандары діни басқармасы «Зекет» қорының ықпалымен «Ел үлесі пәтерге» жобасы бойынша қоныс тойын тойлағандығын жиналған қауымға жеткізді.

Міне соның 146 шы үй Сарыкөл ауданына бұйырды.

Ол үй аудандағы «Қабдеш ата» мешітіне қызмет етуге келетін діни қызметкерге ұсынылатын болады.

Осы баспананың 5-і Қостанай өңірінде берілгендігін айтты. Сонымен қатар, көпшіліктің алдында Сарыкөл ауданының бас имамы Нұрбол Балахметке пәтердің кілтін салтанатты түрде табыс етті.

Сондай-ақ «Тайқазан» жобасы бойынша қайырымдылық мақсатында 30 жанұяға арнайы азық-түлік берілді.

Көпшіліктің есінде болар, осы жылдың қазан айында елордамыз Нұр-Сұлтан шаһарында имамдардың республикалық ІІІ форумы өткізілген болатын.

Енді міне Қостанай облыстық мешітінде де сол маңызды басқосудың жалғасы ретінде аймақтық форум ұйымдастырылды. Осынау «Жеті рухани қазық» деп аталатын басқосуда еліміздің бас қаласында болған жиында қабылданған Қазақстан мұсылмандарының «Жеті рухани қазық» рухани тұғырнамасы, діни басқарманың атқаратын діни рәсімдер тізілімі және оның құрылымындағы діни лауазымдар тізілімі секілді қабылданған маңызды құжаттар әңгімеге өзек болып, жұртшылыққа жан-жақты таныстырылды.

Бұл аймақтық форумға Қазақстан мұсылмандары діни басқармасы «Зекет» қорының директоры Талғат Омаров, облыстық дін істері жөніндегі басқарманың басшысы Жанболат Үмбетов, есімі республикамызға белгілі ақын Ақылбек Шаяхмет және дарынды ғалым Қалқаман Жақып қатысты.

Форумды Қазақстан мұсылмандары діни басқармасының Қостанай облысы бойынша бас имамы Бахытбек қажы Тәжімбет ашып, жұртшылыққа бұл басқосудың негізгі мақсаты мен міндеті жайлы айтып берді.

Содан кейін мәртебелі қонақ, Талғат Омаров Бас мүфти Серікбай қажы Ораздың қостанайлық ағайындарға арнаған ең ыстық лебізін жеткізіп, «Жеті рухани қазық» рухани тұғырнамасына кеңінен тоқталды.

Көпшілікке аян, Ақылбек Шаяхмет тек талантты ақын ғана емес, діни тақырыптарға арнап талай жинақтар шығарған азамат. Сондықтан да болар, ол өңірдің барлық аудандары мен қалаларынан арнайы шақырылған ағайындардың алдында өзінің көкейінде жүрген көрікті ойларын ортаға салды.

Сондай-ақ Қостанай облыстық дін істері басқармасының басшысы Жанболат Үмбетов пен Қостанай мемлекеттік университетінің профессоры Қалқаман Жақып та өз ойларымен бөлісті.

Ал Лисаков және Арқалық қалалық мешіттерінің бас имамдары Сабыржан Зейнелғабиденұлы мен Бектұрсын Торғайбайұлы «Діни қызметкерлердің атқаратын рәсімдері» және «ҚМДБ құрылымындағы діни лауазымдар тізілімі» туралы толық баяндады.

Жиынның соңында облыстың бас имамы Бахытбек қажы Тәжімбет мұндай өзекті тақырыптарды қозғайтын жиындар алдағы уақытта облыс бойынша жалғасын табатындығын білдірді.