Жақында Сарыкөл ауданының бас имамы Нұрбол қажы Балахмет осы аудандағы Злотоуст ауылында болды. Оны аталмыш ауданның әкімі Мырзағали Омаров қарсы алды.

Имам ауыл әкімі екеуі осы елді мекеннің орталығында кішкентай балдырғандар және олардың ата-аналарымен кездесті. Онда бүлдіршіндерге ұлағатты имани тәрбие беру туралы насихат айтылды және мешіт атынан сыйлық жасады.

Содан кейін осы ауылдың қарт тұрғыны, еңбек ардагері Ұлтуған Есжанова әжейдің үйіне барып, 83 жасқа толған туған күніменен құттықтап, оған мешіт атынан ықылас білдірді.

Сондай-ақ Күнтимес елді мекеніндегі Шоқан Уәлиханов мұражайында болып, ауыл тұрғындарына ұлтаралық және дінаралық татулық туралы әңгіме өрбітті.

Әулиекөл ауданындағы бірқатар мешіттерде халықтың игілігіне айналар жұмыстар атқарылып жатқандығы қуантады. Жалаң сөзге салынбас үшін нақты дәлелдер келтіре кетелік.

Мәселен, осы аудандағы Құсмұрын елді мекенінің 105 отбасы бірігіп, ауылдағы мешіттің асханасына күрделі жөндеу жұмыстарын жүргізіп жатыр. Болашақта онда дүниеден өткен кісінің жаназа асы, қырқы, жылы секілді рәсімдер өткізілетін болады.

Мұнда асхананың төбесіне ерекше назар аударылды. 100 литрге лайықталған су ысытатын жаңа бойлер, 2 газ плитасы қойылды. Еденге линолеум төселіп, ыдыс қоятын стеллаждар жасалуда.

Жоғарыда аталған «Хақ» мешітінің жанашыр жамағаттары барлық жөндеу жұмыстарын өздері ұйымшылдық көрсете отырып, атқарғандықтарын ерекше атап өткен жөн. Жұмыла көтерген жүк жеңіл болатындығының жарқын дәлелі емес пе.

Аталған шараға қазақтың тұңғыш журналисі Мұхамеджан Сералин атындағы №3 қазақ орта мектебінің 1-10 сынып оқушылары қатысты.

Шәкірттер ұлы ақынның өлеңдерін оқыды. Бұл өлеңдерде оқу, білім, ғылым, жыл мезгілдері, табиғат көрініс тапқан. Сондай-ақ қара сөздер де қамтылды.

Әділқазылар алқасы оқушыларға лайықты бағасын берді. Жеңімпаздарға құрмет көрсетіліп, ізденістері аталып өтті

Салауатты өмір салтын ұстану қазіргі таңдағы еліміздің алдына қойған үлкен міндеттерінің бірі. Бұл орайда өңірдегі мешіттерде де бірқатар игі шаралар жүзеге асырылып жатқандығы қуантады.

Нақты дәлелдерге сүйенетін болсақ, таяуда ғана Қостанай қалалық «Жайлаубай ата» мешіті жамағаты мен екі айлық сауат ашу курсында білім алып жатқан шәкірттердің бас қосуымен Қостанай құрылыс колледжінің спорт залында волейболдан жарыс болып өтті.

Оған21 адамнан тұратын3 топ атсалысты.Аталмыш спорттық шараның жоғары дәрежеде өтуіне әңгімеге арқау болған мешіттің наиб имамы Нұрлан Сейдағалиев мұрындық болды.Онда «Қалалық жамағат», «Шәкірттер», «Жастар» құрамалары арасындағы ойын өте тартысты өтті.

Ойынның нәтижесінде «Шәкірттер» құрамасы шеберлік көрсетіп, баршаны тәнті етті. Міне, осындай игі шаралар облысымыздың барлық аудандары мен қалаларында жалғасын тауып жатса, құба-құп.

Ислам дінінде аналардың қадірін «Жәннат аналардың аяқтарының астында» деген хадис бар. Бұл деген аналардың қаншалықты қадірлі екендігін көрсетеді.

Науырзым ауданы «Түркебай» мешітінің Бас имамы Есет Сейтқалиұлы бастаған мешіт жамағаты сол аудан орталығындағы сырқаттанып жатқан аналардың хал-жағдайымен танысты.

Ардақты аналарымыз да Бас имамның игі бастамасына ризашылықтарын білдіріп, ақ баталарын беріп жатты.

Қостанай қалалық «Жайлаубай ата» мешітінің ұжымы 8-наурыз Халықаралық әйелдер күні қарсаңында Қостанай облыстық онкологиялық диспансеріне барды.

Ондағы мақсат науқастанған әйелдер қауымына құрмет көрсетті. Сол жерде емделіп жатқан 15-тен асатын әйелдерге арнайы гүл шоқтары таратылып, жазылып шығуларына тілектерін білдірді.

Бұл олар үшін күтпеген қуаныш болды. Оларға Бас имам Шоқан Ғазизұлы жүрекжарды лебізін білдіріп: «Барлық аурудың еміне шипа Жаратушы Иеміз екендігін хақ. Сіздер үшін тез арада сауығып отбасыларына оралуларыңызды Алладан сұрап дұға етеміз» деді.

Осындай игі шаралар науқастанған жандардың көңіліне ерекше әсер етіп қуандырып тастады.

Тілсіз жау өрттің алдын-алу, оған жол бермеу әрбір ұжымның алдында тұрған үлкен міндеттердің бірі болып табылады.

Сондықтан да болар, өңірдегі Денисов ауданындағы «Жұма» мешітінде өртке қарсы іс – шараларды пысықтау үшін өрт сөндірушілердін кезекті жаттығуы өткізілді.

Бұл маңызды жаттығуды ұйымдастыруға жоғарыда аталған мешіттің бас имамы Руслан Маратұлы мұрындық болды.Осынау іс – шараға екі өрт сөндіру техникасы мен онға жуық құтқарушы қатысты.

Олар өздерінің дайындықтарын көрсетіп, қашан да сақадай сай екенін дәлелдей білді. 

Жуырда Қарабалық ауданына қарасты Новотроицк ауылындағы орта мектептің 8-11 сынып оқушыларымен теріс ағымдардың алдын алуға байланысты кездесу болып өтті.

Бұл елді-мекенде түрлі ұлт өкілдері ғұмыр кешуде. Аралас мектеп болғандықтан өзекті тақырып шәкірттерге қазақ және орыс тілдерінде түсіндірілді.

Сонымен білім ордасындағы жүздесуде аудандық «Ғашура ана» мешітінің бас имамы Серік Рахым әңгіме арқауына айналған «Терроризм мен экстремизмнің зардаптары» тақырыбын кеңінен айтып берді.

 Ал, аудандық ішкі саясат бөлімінің бас маманы Ұлдана Мағауияқызының заңнама туралы ой-пікірін оқушылар ұйып тыңдады. Қатысушылардың сұрақтарына да тыңғылықты жауап берілді.

Қасиетті Ережеп айында облыстық мешіттің Бас имамы, найб имамдар және ЖАНТ өкілдері бірнеше тағылымы мол кездесулер өткізді. 

Мәселен, жұма күндері Қостанай облыстық мешітінің Бас имамы Бахытбек қажы Нұрғабылұлы Қалалық «Жайлаубай ата» мешітінде, облыстық мешіттің найб имамы Дархан Сыздықов Алтынсарин аудандық «Алдиярұлы Жанұзақ» мешітінде, найб имам ТимурТуребаев Тобыл қалалық «Маңдай батыр» мешітінде жұртшылықпен жүздесіп, уағыз айтты. 

Сондай-ақ облыстық мешіттің найб имамы Абзал Сұлтанғалиұлы Әулиекөл ауданында ғибратты кездесулер өткізді. Ол сапар барысында Әулиекөл аудандық Ш. Уәлиханов атындағы, Аманқарағай ауылдық №2 қазақ орта мектептерінің оқушыларымен, аудандық білім бөлімінің қызметкерлерімен кездесті.

Ол қазіргі кездегі діни экстремизмнің тигізер зардабы және одан сақтанудың жолдары жайлы баяндады. Жүздесулер соңында аудандық «Әмит ишан» мешітінде болып, жамағатқа насихат айтты. Көпшіліктің көкейінде жүрген сұрақтарға жауап берді.