Қостанай ауданына қарасты Озерный ауылында жергілікті халық көптен күткен "Алима" намазханасының ашылу салтанаты болып өтті.

Бұл елді-мекендегі имандылық ордасының пайдалануға берілуіне белсене атсалысқан барлық демеушілер мен тұрғындар қатысты.

Мешіттің лентасын Қостанай облысының Бас имамы Бектұрсын қажы Уәлиев пен «Карл Маркс» жауапкершілігі шектеулі серіктестігінің директоры Иван Матвеевич қиды.

Қалыптасқан дәстүр бойынша демеушілерге Алғыс хаттар тапсырылып, иықтарына шапан жабылды.

Ашылу салтанатынан кейін алғашқы жұма намазында Бас имам Бектұрсын Торғайбайұлы "Жақсы сөз- жарым ырыс" тақырыбында уағыз айтты. Қостанай аудандық «Маңдай батыр» мешітінің Бас имамы Дархан қажы Манарбекұлы жұма намазын оқыды.

Аталмыш қуанышта бас қосқан жұртшылыққа ауылдағы дәмханада дастарқан жайылып, ас берілді.

Қостанай облыстық мешітінің баспасөз қызметі

Жуырда Қазақстан мұсылмандары діни басқармасының қорытынды Төралқа мәжілісі барысында «Мүфтият үздігі – 2024» номинациясымен марапаттау рәсімі болып өтті.

Салтанатты жиынға Бас мүфти Наурызбай қажы Тағанұлы арнайы қатысып, номинация иегерлерін марапаттады. Қостанай облысы Ұзынкөл аудандық «Құрман баба» мешітінің имамы Есенкелді Сақтағанұлы Әжімаханның көп жылғы дінімізді өркендетуге қосқан ерен еңбегі бағаланып, «Үздік аудан имамы» атанды.

Өңірдегі барша әріптестері оны осынау мәртебелі марапатымен құттықтап, оған алдағы уақытта да мықты денсаулық, отбасында ырыс-береке, жауапты қызметінде табыс тілейді.

Қостанай облыстық мешітінің баспасөз қызметі

Қазақстан мұсылмандары діни басқармасының Қостанай облысындағы өкілдігінде Бас имам Бектұрсын қажы Уәлиевтің төрағалығымен өңірдегі қала және аудан имамдарының жылдық есебі тыңдалды.

Онда олар діни басқарманың бекіткен Шариғат және пәтуа, ихсан және насихат, дін мен дәстүр, ізгі қоғам, діни оқу-ағарту, жат діни ағымдардан сақтандыру бағыттары бойынша тапсырмалардың орындалу барысы жөнінде есеп берді.

Бас имам әріптестерінің жыл бойы атқарған қызметтеріне тоқтала келіп, үздік көрсеткіштерге қол жеткізген сегіз дін қайраткерлеріне Алғыс хаттарды табыс етті.

Қостанай облыстық мешітінің баспасөз қызметі

Қазақстан мұсылмандары діни басқармасына қарасты «Мұнара» газеті мен «Иман» журналының Бас редакторы, Қазақстан Жазушылар Одағының мүшесі, елімізге танымал қаламгер Серікбол Хасанов арнайы іс-сапармен Қостанайға келді.

Ол алдымен облыстық «Аймағанбет қажы Спанұлы» мешітінде өткізілген өңірдегі аудан және қала имамдарының жылдық есеп беру жиынына қатысты.

Білікті журналист өзінің бай тәжірбиесіне сүйене отырып, әлуметтік желілерде шығып жатқан ақпараттардың жалғандығы мен шындығын ажырата білу қажеттігіне тоқталды. Олардан сақтану жолдары жайлы мысалдар келтірді.

Сондай-ақ дін қызметкерлері қашанда өздеріне күмән тудыратын жайлардан аулақ болып, күнделікті өмірде нақты әрі көпшілікті адастырмайтын деректер мен дәйектерге ғана сүйену қажеттігін еске салды.

Серікбол Тілепбергенұлы өзі басқарып отырған қос басылымдағы мақалалардың сапасы, өзектілігі, көтеретін тақырыптары, журналстердің тың ізденістері жөнінде қысқаша айтып берді. Алдағы уақытта өңіріміздегі өз саласын жетік білетін имамдар және іргелі мешіттердің тыныс - тіршілігі баяндалатын дүниелерді жариялауға дайын екендігін білдірді.

Басқосуда имамдар оған көкейде жүрген сауалдарын қойып, тиянақты жауап алды.

Жиын соңында Қостанай облысының Бас имамы Бектұрсын қажы Уәлиев белгілі қаламгерге мазмұнды да берері мол танымдық әрі құнды кеңестері үшін шынайы алғысын жеткізді.

Қостанай облыстық мешітінің баспасөз қызметі

Жақында Қостанай қалалық “Жайлаубай ата” мешітінде белгілі дін қайраткері Шоқан қажы Ғазизұлы басқаратын ұжымның ұйымдастыруымен осы мешіттің ашылғанына 10 жыл және кәсіпкер, меценат Төлеген Жайлаубаевты еске алу кешіне арналған қазақ күресінен облыстық жарыс өткізілді.

Осынау салтанатқа қатысқан облыстың Бас имамы Бектұрсын қажы Уәлиев сөз сөйлеп, барлық палуандарға сәттілік тіледі.

«Күш атасын танымас» демекші, жігіттер өздерінің жан-жақты дайындықпен келгендігін көрсетті. Жарыстың қорытындысы бойынша Бас жүлдені жеңіп алған түйе палуанға «Умраға» жолдама берілді.

Сондай-ақ 60, 80, және 91 келі салмақтағы палуандарға жалпы 1 млн 50 мың теңгенің қомақты сыйлығы табыс етілді. Осы жарыстың жоғары деңгейде өтуіне есімдері көпке белгілі Абылай Тайгелдин мен Аманкелді қажы Еренғайыпұлы демеушілік етті.

Жеңімпаз палуандарға лайықты құрмет көрсетілген соң, жиналғандарға мешіттің асханасында дастарқан жайылды.

Қостанай облыстық мешітінің баспасөз қызметі

Қостанай қалалық “Жайлаубай ата” мешітінің наиб имамы Қазбек Кошеров № 99260 әскери бөлімшесінде болып, курсанттармен “Өз өміріне қол жұмсау” тақырыбында кездесу өткізді.

Онда қазіргі таңдағы өзекті мәселе жайлы жастарға кеңінен түсінік берді. Өзіне-өзі қол жұмсаудың қаншалықты шариғатқа қарсы амал екенін айтты. Жиналғандардың қойған сауалдарына нақты жауап берді.

Қостанай облыстық мешітінің баспасөз қызметі

Қазақстан мұсылмандары діни басқармасының «Зекет» қоры "Жылулық сыйла" атты акциясын қолға алғалы бері қаншама адамдардың шынайы алғысына бөленіп жатқаны белгілі.

Осы жоба аясында Қостанай облыстық мешіттің жанындағы наиб имам Бақытжан қажы Икрам басқаратын «Зекет және қайырымдылық» қорының қызметкерлері де қыс айларында нақты жұмыстар атқарып, көмекке мұқтаж жандардың нағыз жанашырына айналып отыр.

Таяуда осы қордың тікелей қолдауымен өңірдегі әлеуметтік жағынан аз қамтылған асыраушысы жоқ екі отбасының әрқайсысына 3 тоннадан көмір түсірілді. Енді олар аязды да суық күндері қыстан қысылмай шығатын болады.

Қостанай облыстық мешітінің баспасөз қызметі

Таяуда облыстық «Аймағанбет қажы Спанұлы» мешітінде Бас имам Бектұрсын қажы Уәлиев өмірімізде қазақ руханиятын дамытуда, дін мен дәстүр сабақтастығын насихаттауда елеулі еңбек сіңірген бір топ мәдениет пен өнер саласының қызметкерлерінің басын қосқан жиын өткізді.

Онда есімдері мұсылман қауымына жақсы таныс, ізденімпаз азаматтар Абзал Нағашыбайұлы, Қыдырбек Қиысхан, Заңғар Санай, Марғұлан Оспанов және Медет Байзақовтарға Алғыс хат табыс етті.

Бектұрсын Торғайбайұлы оларға жүрекжарды лебізін білдіре келіп, алдағы уақытта да тәуелсіздігімізді паш етіп, ел игілігі үшін табысты да абыройлы қызмет ете берулеріне тілектестігін жеткізді.

Қостанай облыстық мешітінің баспасөз қызметі.

Тәуелсіздік күні қарсаңында Федоров аудандық "Жиентай қажы" мешітінде "Ел бірілігі - ең асыл қасиет" атты жиын болып өтті.

Осы басқосу барысында Бас имам Руслан Маратұлы тәуелсіздік туралы уағыз айтты. Найб имам Ерлан Серікболатұлы егемендікке жету жолында құрбан болған ата-бабаларымызға хатым құран бағыштады.

Жиынға қатысқан қонақтарға дастарқан жайылды. Жұртшылық мешіт қызметкерлеріне мазмұнды тақырыпты қозғағандары үшін шын жүректен шыққан шынайы алғыстарын білдірді.

Сондай-ақ, Руслан Маратұлы жергілікті жастармен де кездесті. Олар дін қайраткерінің тәуелсіздіктің қадір-қасиеті жөніндегі насихатын ұйып тыңдады. Өздерінің көкейінде жүрген ойларын ортаға салды.

Қостанай облыстық мешітінің баспасөз қызметі

Колледждегі маңызды кездесу

Арқалық қалалық «Мухтасиб Әлмұхаммед» мешітінің бас имамы Нұрхан Асанұлы Ақылы шектеулі мектеп-интернатында болып, бүлдіршіндермен кездесті.

Ол жүздесу барысында жиналғандарға «Алланың үлкен нығметі-тәуелсіздік» туралы түсіндірді. Балаларға мейірімділік турасында тұшымды уағыз-насихат айтты.

Сондай-ақ бас имам 20 бүлдіршінге ақшалай сый-сияпат жасады. Олар көрсетілген ықыласқа дән риза болды. Мектеп басшылары дін қайраткеріне осындай басқосуға ұйытқы болғаны үшін алғысын білдірді.

11 оқушыға киім-кешек тапсырды

Бас имам Нұрхан қажы Асанұлы шаһардағы көмекке мұқтаж жандарға қайырымдылық көрсету бағытында елеулі жұмыстар атқарып келеді. Ол жуырда жоғарыда аталған колледжге арнайы ат басын бұрып, тәрбиеленіп жатқан балалардың жағдайымен танысты.

Осындағы асыраушысы жоқ 11 оқушыға қысқа қажетті жылы курткаларды табыс етті. Әрине, олардың қуанышында шек болған жоқ. Қайырымдылық көрсеткен дін қызметкерлеріне шынайы алғыстарын жеткізіп, естелікке суретке түсті.

Қостанай облыстық мешітінің баспасөз қызметі