Баршаға мәлім, Қазақстан мұсылмандары діни басқармасының төрағасы, Бас мүфти Наурызбай қажы Тағанұлы осы жылды «Ислам және дәстүр құндылығы» деп жариялаған болатын. Содан бері еліміздің өңірлерінде қаншама жұртшылықпен жүздесулер өткізіліп жатыр.

Қостанай облыстық «Аймағанбет қажы Спанұлы» мешітінің Бас имамы болып тағайындалған Бектұрсын қажы Торғайбайұлы өңірімізде ислам дінін өркендетуге лайықты үлесін қосып жүрген, бірқатар аудандық және қалалық мешіттерді басқарған дін қайраткері.

Ол жаңа лауазымдағы жұмысын өмір көрген, тәжірибесі мол, елдің қазынасы болып табылатын аға ұрпақ өкілдерінің басын қосып, олармен «Аталар сөзі – ақылдың көзі» тақырыбындағы мәнді де мағыналы кездесуден бастады.

Бұл жүздесуге облыстық ардагерлер кеңесінің төрағасы Батырбек Ахметов бастаған ел ағалары, қоғам қайраткерлері, зиялы қауым өкілдері арнайы шақырылды.

Осынау қалың жұртшылыққа танымдық – тағылымдық жағынан берері мол басқосуды найб имам Әлішер Ертайұлы жүргізді. Алдымен Бектұрсын қажы қатысушыларға жиынның алға қойған мақсатын түсіндірді. Өзінің қызметінде әрқашан да бүкіл саналы ғұмырын еліміздің дамуына қомақты үлес қосқан ардақты ардагерлердің ақыл-кеңесін басшылыққа алып отыратындығын жеткізді.

Содан кейін сөз алған Батырбек Мықансалықұлы Бектұрсын Уәлиевті жаңа қызметімен шын жүректен құттықтай отырып, облыстың өндіріс пен ауылшаруашылығын өркендетудегі табыстарына қысқаша шолу жасады. Өзі жетекшілік ететін ұйымның мүшелері әрдайым мешіт қызметкерлерін қолдауға дайын екендігін білдірді.

Ал, жерлестерімізге қайраткер тұлға, ғалым ретінде белгілі Есімхан Махметов діннің мұсылман бауырларымызды имандылыққа ұйытатын қасиетті орын екендігін, аталмыш мешіттегі өз саласы бойынша аянбай тер төгіп жүрген Бақытжан Икрам және басқа да қызметкерлердің есімін атады. Бас имамға алдағы уақытта табыс тіледі.

Сондай-ақ, Ахмет Байтұрсынов атындағы Қостанай өңірлік университетінің профессоры Қалқаман Жақып, Қазақстанның Еңбек Ері Сайран Бұқанов, Қазақстан Жазушылар Одағының облыстағы өкілі, қаламгер Жанұзақ Аязбеков, абыз ақсақал Жандарбек Сейітов, елге танымал азамат Төлеген Шоланов және басқалар өздерін көптен бері толғандырған ой-пікірлерін ортаға салды.

Одан кейін мешіт асханасында жайылған дастархан басында ардагерлердің маңызды әңгімелері жалғасын тапты. Онда халық құрметіне бөленген Торғайбай Уәлиев, Жақсылық Кәкенов және өзге де қадірменді ақсақалдар ұлағатты сөздерімен жиналғандарды баурады.

Жалпы, басқосуда жастардың үлкендерді сыйлауы, ұлттық құндылықтар мен ислам дінін ұлықтауы, діни рәсімдерді бір ізге келтіру, ұрпақтың ана тілінде сөйлеуі, ауылдық жерлерге де сауатты дін қызметкерлерін тарту және өзге де жұртышылықты ойландыратын өзекті жайлар қамтылды.

Кезесудің соңында Бас имам ел ардақтылары мен өмір белестерінен өткен барша ақсақалдарға шын жүректен шыққан алғысын білдіріп, оларға болашақта мықты денсаулық тіледі.

Қостанай облыстық мешітінің баспасөз қызметі

Жуырда Қазақстан мұсылмандары діни басқармасының төрағасы, Бас мүфти Наурызбай қажы Тағанұлының бұйрығымен Қостанай облысындағы өкілдіктің және облыстық «Аймағанбет қажы Спанұлы» мешітінің Бас имамы болып Уәлиев Бектұрсын Торғайбайұлы тағайындалғаны белгілі.

Ол бұған дейін Қостанай қалалық «Марал ишан» мешітін басқарып, талай әріптестеріне өнеге боларлық жұмыстар атқарғаны жұртшылыққа аян. Дін саласында жинақтаған бай тәжірибесі жерлестерімізге жақсы таныс.

Жаңа жауапты қызметке кіріскен өкіл имам өңірдегі қалалар мен аудандардың бас имамдарымен арнайы кездесуінде алда тұрған келелі міндеттерге жан-жақты тоқталды.

Сондай-ақ ол аталмыш мешіттің тыныс-тіршілігімен жан-жақты танысып, көзбен көріп, көңілге түйгенін ортаға салды.

Қостанай облыстық мешітінің баспасөз қызметі

Жақында Қостанай облысының Бас имамы Бахытбек қажы Тәжімбет және Рудный қалалық «Нұр» мешітінің Бас имамы Сабыржан Есмурзин Тобыл қаласында болды.

Олар аудандық «Маңдай батыр» мешітінде жастармен кездесу өткізді. Онда қазіргі таңда қоғамдағы өзекті мәселе лудомания яғни құмар ойындарының тигізетін зардабы және оның алдын алу жөнінде уағыз-насихат айтты. Жүздесу қазақ және орыс тілдерінде жүргізілді.

Жиналған өскелең ұрпақ өкілдері дін қайраткерлерінің маңызды да мәнді әңгімелерін ұйып тыңдап, өздерінің алғыстарын білдірді.

Кездесу соңында аудандық мешіттің Бас имамы Дархан қажы Сыздықов әріптестеріне шын жүректен шыққан шынайы лебізін жеткізіп, мықты денсаулық, жауапты қызметтерінде табыс тіледі.

Қостанай облыстық мешітінің баспасөз қызметі

Бұл күндері Мұртаза Балахметті еліміздің жұртшылығы жақсы біледі. Ол белгілі дін қайраткері Ертай Исламұлының болашағынан үміт күткен дарынды перзенттерінің бірі.

Жас та болса республикалық бас мешіттің ұстазы әрі қари. Жуырда Қостанай облыстық «Аймағанбет қажы Спанұлы» мешітінің арнайы шақыруы бойынша өңірдегі имамдарға "Құран және Тәджуид ережелері" бойынша семинар өткізді.

Жиналғандар Мұртаза Ертайұлының терең біліміне тәнті болып, өздерінің көкейінде жүрген сауалдарына нақты жауап алды. Енді олар семинардан түйгендерін күнделікті қызметтерінде басшылыққа алатын болады.

Қостанай облыстық мешітінің баспасөз қызметі

Жақында Қазақстан мұсылмандары діни басқармасының тапсырмасы бойынша Қостанай аудандық «Маңдай батыр» мешітінің Бас имамы Дархан Сыздықовтың ұйымдастыруымен салтанатты жиын болып өтті.

Онда «Имани жаз 2024» діни сауат ашу курсын тәмәмдаған 25 шәкіртке арнайы сертификаттар мен сыйлықтар табыс етілді. Сабақ барысында оларға ұстаздар Бекзат Қапар мен Мәдениет Нарбаев дәріс берді.

Түлектер сабақ барысында «Құран әліппесі», «Ұлттық құндылықтар», «Дін мен дәстүр» және «Ислам әдептері» тақырыптарынан білім алды.

Қостанай облыстық мешітінің баспасөз қызметі

Жақында Қостанай қалалық «Жайлаубай ата» мешітінің имамдары «Генерал Самат Бәкіров» атындағы демалыс базасында болып, Рудный қаласындағы ата-ана қамқорлығынсыз қалған балаларды үлкен қуанышқа кенелтті.

Онда ұлдар мен қыздар өздерінің бойларындағы өнерлерін көрсетіп, би билеп, ән салды. Жазғы демалыстарын жоғары көңіл-күймен өткізіп жатқан өскелең ұрпаққа дастархан жайылып, қазақтың ұлттық тағамы ет ұсынылды.

Мешіт қызметкерлері оларға болашақта еліміздің нағыз патриоттары атануларына ең ізгі тілектерін білдірді.

Қостанай облыстық мешітінің баспасөз қызметі

Қостанай облысының Бас имамы Бахытбек қажы Тәжімбет қалалық «Марал ишан» мешітінде болды. Ол мұнда жамағатпен кездесіп, «Ислам және дәстүр құндылығы» тақырыбында дәріс оқыды.

Жүздесуде қазіргі таңдағы қоғамдағы дәстүрдің алар орны жайлы жан-жақты насихат айтылды. Тәлімді уағыз жиналғандардың көңілінен шығып, үлкен әсер қалдырды.

Белгілі дін қайраткері дәріс соңында жамағаттың қойған сауалдарына тұшымды жауап берді. Көкейінде жүрген ой-пікірлерін ортаға салды.

Қостанай облыстық мешітінің баспасөз қызметі

Қазақстан мұсылмандары діни басқармасының Қостанай облысындағы өкілдігі діни оқу-ағарту бөлімінің ұйымдастыруымен жасөспірімдер арасында облыстық Құран жарысы болып өтті.

Әділқазылар алқасының шешімі бойынша І орынға Арқалық қалалық "Мұхтасиб Әлмұхаммед" мешітінен Манаш Русланұлы (80 000 теңге) ие болды. ІI орынға Наурызым аудандық "Түркебай ата" мешітінен Ерасыл Қоқаев (50 000 теңге) көтерілді. Ал ІII орынға Қостанай қалалық "Марал ишан" мешітінен Мухаммадсодиқ Сайдмуродов (30 000 теңге) ие болды.

Жарысқа қатысқан барша талапкерлерге облыстың бас имамы атынан арнайы ынталандыру сыйлықтары табыс етілді.

Қостанай облыстық мешітінің баспасөз қызметі

Жұртшылықтың есінде болар, жалпы тасаттық – көпшілік жиылып атқаратын діни рәсім. Онда мұсылман қауымы жиналып, құрбандық шалады. Сауабын аруақтарға бағыштайды. Қасиетті Құран оқылып, құдайдан жаңбыр жаууын тілейді.

Міне, жұма күні Қостанай қаласының Тобыл өзенінің жағалауына халық көп жиналды. Онда Қостанай облысының Бас имамы Бахытбек қажы Тәжімбет сөз сөйлеп, дініміздегі тасаттықтың мән - маңызына жан-жақты тоқталды.

Содан кейін елордамыз Астанадағы республикалық Бас мешіттің Қары әрі Құраннан ұстаз Мұртаза Ертайұлы намаз өткізді. Бұл жиынға облыс әкімі Құмар Ақсақалов, абыз ақсақалдар, ел ағалары және зиялы қауым өкілдері қатысты.

Жалпы, өңір бойынша әзірше тасаттыққа 21 ірі қара сойылып, оның еті көмекке мұқтаж отбасыларға таратылып берілді. Оған шаруа қожалықтарының басшылары демеушілік етуде.

Жиын соңында Бас имам егін өсіріп отырған барша ағайынға бітік астық, елімізге амандық, жұртымызға тыныштық, әрбір шаңыраққа ырыс-береке мен молшылық тіледі.

Қостанай облыстық мешітінің баспасөз қызметі

Арқалық қалалық «Мухтасиб Әлмұхаммед» мешітінде маусым айының 10-28 күндері аралығында «Имани жаз-2024» сауат ашу курсы ойдағыдай өткізілді.

Онда Бас имам Нұрхан Асанұлы балаларға үлкенге құрмет, кішіге ізет көрсету жайында ақыл - кеңесін айтты. Сондай-ақ, өздерін жақсы қырларымен көрсеткен шәкірттерге тәттілер үлестіріліп, дастархан жайылды.

Жоғарыда аталған мерзімде шәкірттер тиянақты діни білім алып, уақыттарын барынша тиімді пайдалануға тырысты. Ұстаздар оларды ізгілікке, адамгершілікке баулыды.

Қостанай облыстық мешітінің баспасөз қызметі