Науырзым аудандық “Түркебай ата” мешітінің ұйымдастыруымен Мәуліт айының құрметіне есте қаларлық мерекелік іс-шаралар өткізілді.

Аса маңызды жиында Қостанай облысының Бас имамы Бахытбекқажы Тәжімбет, аудан әкімі Қайрат Әбішев сөз сөйлеп, жұршылықты құттықтады.

Сондай-ақ еліміздегі «Ел үлесі-пәтерге» қайырымдылық жобасы аясында көмекке мұқтаж 1 отбасына үйдің кілті табыс етіліп, жанұя мүшелері үлкен қуанышқа кенелді.

Аудандық мешітте әлеуметтік жағдайы төмен көп балалы 11 шаңырақ иелеріне күнделікті тұтынатын азық-түлік берілді.

Жергілікті «Шапағат» кафесінде 200 адамға дастарқан жайылды. Мұнда алдымен ұлы Мұхаммед Пайғамбарымызға Құран бағышталды. Өңірімізге белгілі имамдар Нұрбол Балахмет пен Дархан Сыздықовтар «Салауат шариф» оқыды.

Ас барысында Бахытбек қажы Нұрғабылұлы көпшілікке уағыз-насихат айтты. Мәуліт кешінің жоғары деңгейде өтуіне лайықты үлестерін қосып, демеушілік жасаған бауырларымызға Алғыс хаттарды тапсырды.

Ұлттық спортымыз қазақ күресіне арналған «Түйе палуан» сайысы көрермендерге үлкен әсер қалдырды. Жарыста 70 келіге дейін және одан жоғары салмақта палуандар бақ сынасты.

Сайыс қорытындысында қадірменді ақсақалдар жеңімпаздардың иығына шапан жапты. Бас имам топ жарған азаматтарға ақшалай сыйлықты тапсырып, олардың мәртебесін асқақтатты.

Қостанай облыстық мешітінің баспасөз қызметі

Қостанай облыстық мешітінде Мәуліт айының құрметіне имандылық ордасының найб имамы, діни сауат ашу курсына жауапты Тимур Туребаевтың ұйымдастыруымен «Адамзаттың асыл тәжі» атты интеллектуалдық білім сайысы өткізілді.

Пайғамбарымыздың өмірбаянынан сыр шертетін жарысқа өңіріміздің барлық қалалары мен аудандарынан 30 талапкер қатысып, бақтарын сынады. Аталмыш сайысқа 85 сұрақ қамтылды. Қатысушылар ұялы телефондары арқылы қойылған сауалдарға жауап берді.

 «Жүзден жүйрік, мыңнан тұлпар» демекші, жарыс қорытындысы бойынша жүлделі бірінші және екінші орындарды Рудный қалалық «Нұр» мешітінен келген Серікболсын Өтеш пен Дәулетбай Мұратхан жеңіп алды.

Ал, үшінші орынды Арқалық қалалық «Мұхтасиб Әлмұхаммед» мешітінен қатысқан Закария Жамантай иеленді. Жеңімпаздарға Алғыс хаттар мен қаржылай сыйлықтар табыс етілді.

Қатысушылардың ой-өрісін, таным көкжиегін кеңейтуге ерекше ықпал еткен білім сайысы өте қызықты әрі ұйымшылдықпен өтті.

Қостанай облыстық мешітінің баспасөз қызметі

Жуырда ұлт ұстазы, Алаш ардақтысы Ахмет Байтұрсынұлының 150 жылдық мерейтойы аясында Қостанай облыстық мешітте жұртшылыққа жаңа кітапхана есігін айқара ашты. Оған қазақ халқының жарқын болашағы үшін бүкіл саналы ғұмырын арнаған дара тұлғаның есімі берілді.

Рухани орданың ашылу салтанатына белгілі дін қайраткерлері, өңіріміздегі зиялы қауым өкілдері, жамағат қатысты. Оның лентасын Қазақстан мұсылмандары діни басқармасының наиб мүфтиі Сансызбай қажы Құрбанұлы, абыз ақсақалдар – Рудныйлық Торғайбай қажы Уәлиұлы, Ұзынкөлдік Кенесары Мырзахметовтер қиды.

Кітапхана алдағы уақытта ислам дініне ден қоюшыларға құнды дүниелер ұсынады, пайдалы кеңес береді. Қазір ондағы сөрелерден фиқһ, ақида және басқа да білім көкжиегі мен дүние танымыңды кеңейтер кітаптарды қиналмай табасыз.

Қостанай облыстық мешітінің баспасөз қызметі

Жақында Алтынсарин ауданының тұрғындары үлкен қуанышқа кенелді. Жергілікті «Алдиярұлы Жанұзақ» мешіті күрделі жөндеуден өткізіліп, пайдалануға берілді. Оның ішінде ерлер мен әйелдерге арналған дәретханалар кеңейтілді. Жылытылған еден орнатылды. Мешіттің жанынан 250 адамға лайықталған асхана салынды.

Салтанатты жиынға Қостанай облысының Бас имамы Бахытбек қажы Тәжімбет қатысып, мұсылман қауымын аудан өміріндегі айтулы оқиғамен шын жүректен құттықтады. Имандылық ордасына демеушілік еткен жүрегі жомарт кісілерге Қазақстан мұсылмандары діни басқармасының атынан Алғыс хаттарды табыс етті.

«Жұмыла көтерген жүк жеңіл» демекші, мешіттегі ізгі мақсаттағы істердің жүзеге асырылуына «Алдияр» бірлестігі, Жамановтар әулеті және Алтынсарин ауданының кәсіпкерлері өздерінің қомақты үлестерін қосты. Жанашыр азаматтардың иығына шапан жабылып, құрмет көрсетілді. 

Қостанай облыстық мешітінің баспасөз қызметі

Қазақстан мұсылмандары діни басқармасының Қостанай облысы бойынша өкілдігі жыл сайын Ұлы Мұхаммед Пайғамбарымызға арналған Мәуліт мерекесін өткізуді дәстүрге айналдырып келеді.

Биыл ол облыс орталығындағы «Сұлтан сарайы» мейрамханасында «Мәуліт айы мүбәрәк болсын» деген атпен тиісті деңгейде өткізілді. Тағылымдық – тәрбиелік маңызы зор мейрамға алыс-жақыннан қонақтар, дін қайраткерлері, зиялы қауым өкілдері қатысты.

Рухани кешті елімізге танымал журналистер Заңғар Санай мен Қыдырбек Қиысхан жүргізді. Алдымен Пайғамбарымыз жайлы ғибратты фильм көрсетілді.

Өңірімізге белгілі мешіт имамдары Әлішер Балахмет, Дархан Сыздықов, Әли және Нұғман қарилар, шәкірттер өздеріне тән мақаммен Мәуліт шарифін оқыды.

Содан кейін Қазақстан мұсылмандары діни басқармасының найб мүфтиі, шариғат және пәтуа бөлімінің басшысы Сансызбай қажы Құрбанұлы бата берді. Талай мұндай жиындарда шешендік қырларымен танылып, көптеген дарынды жастардың тәлімгері, ұлағатты ұстаз атанған азамат басқосуға арқау болған Пайғамбарымыз жайлы танымдық жағы мол уағыз айтты.

Баршаға мәлім, соңғы біраз жылдардан бері республикамызда «Ел үлесі – пәтерге» жобасы жүзеге асырылуда. Бұл жолы кеш барысында найб мүфти қолдауға мұқтаж қос жерлесімізге 601-ші және 602-ші пәтерлердің кілттерін тапсырды.

Жиында облыстық мешітке тұрақты демеушілік етіп жүрген бір топ іскер азаматтарға Бас мүфтидің Алғыс хаттары беріліп, қасиетті Құран кітабы тарту етілді.

Сондай-ақ, басқосуға арнайы шақырылған Рудный шаһары қарттар үйіндегі қамқорлыққа алынған аталарымыз бен әжелерімізге құрмет көрсетіліп, сый-сияпат жасалды. Оны Зекет және қайырымдылық қорының жетекшісі Бақытжан қажы Икрам табыс етті.

Мейрамға арналған салтанат ән-күйсіз өтпейтіні белгілі. Онда жыршы-термеші Абзал Алпысов пен дәстүрлі әнші Қыдырбек Қиысханның домбырамен орындаған терме-толғаулары көпшілікті бір серпілтіп тастады.

Есте қаларлық кеш соңында Қостанай облысының Бас имамы Бахытбек қажы Тәжімбет Мәуліттің әрбір адамның жүрегінде алар ерекше орнына, өткен жылдардағы өкілдікте жүзеге асырылған жарқын істерге тоқталды. Құрметті қонақтарға және жиынды ұйымдастыруға белсене қатысып, өздерінің қомақты үлестерін қосқан имамдарға, мешіт қызметкерлеріне, жанашыр азаматтарға шынайы алғысын білдірді.

Қостанай облыстық мешітінің баспасөз қызметі

Үстіміздегі жыл руханиятымызда ерекше орын алатын көрнекті тұлғалардың мерейтойларына толы. Солардың арасында Алаш ардақтысы, ұлт ұстазы Ахмет Байтұрсынұлының 150 жылдығы елімізде кең көлемде аталып өтілді.

Жақында Қазақстан мұсылмандары діни басқармасының Қостанай облысы бойынша өкілдігінің ұйымдастыруымен Ахаңның есімі берілген университетте «Ахмет Байтұрсынұлы және Қазақ руханияты» деп аталатын конференция болып өтті.

 Тағылымы мол жиынды жүргізушінің кіріспе сөзінен кейін облыстық мешіттің ұстазы Әли Әбдіхамид қасиетті Құран оқудан бастады. Алғашқы баяндаманы Қазақстан мұсылмандары діни басқармасының найб мүфтиі, көрнекті дін қайраткері Сансызбай қажы Шоқанов жасады.

Оның тың деректерден тұратын сөзін жиналғандар ұйып тыңдап, ұлт үшін бүкіл саналы ғұмырын арнаған тұлға жайлы қаншама мағлұмат алды.

Қостанай өңірлік университетінің ректоры, география ғылымдарының докторы, профессор Сейітбек Қуанышбаев конференцияға қатысқан барша қауымды айтулы оқиғамен шын жүректен құттықтап, қонақтарға табыс тіледі.

Аталған жоғары оқу орнының «Рухани жаңғыру» жобалық офисінің жетекшісі, филология ғылымдарының докторы, профессор Алмасбек Әбсадық Ахаң жайлы ұдайы ізденіс үстінде жүрген азамат. Оның «Ұстаз жолы, ауыл мұғалімінен – білім министрлігіне дейін» тақырыбындағы баяндамасы да құндылығымен жерлестеріміздің көңілінен шықты.

Облыс жұртшылығы Абзал Нағашыбайұлының руханият саласында сіңірген еңбегін жақсы біледі. Оның үлкен сахнада орындаған термесі терең мағынасымен жүректерді қозғады.

Аузы дуалы ардагер, Қостанай облысы ақсақалдар алқасының мүшесі Торғайбай қажы Уәлиұлының «Ахаң өскен орта» атты баяндамасы да ұлт мақтанышының көпшілікке белгісіз қырларын жан -жақты ашуымен дараланды.

Елімізге белгілі ғалым, Қостанай өңірлік университетінің профессоры Қалқаман Жақып «Рухы биік, есімі мәңгі» деген тақырып айтып тұрғандай, Алаштың біртуар перзентінің кейінге жастарға өнеге боларлық қайраткерлік, тұлғалық, білімпаздық, ұлтжандылық, қаламгерлік жақтарын жұртшылыққа жеткізді.

Конференция жоғары деңгейде өткізіліп, бас қосқан үлкенді-кішілі қауым көп жайды көңілдеріне түйді. Қазақ халқы бар кезде Ахмет Байтұрсынұлының есімі мәңгілік өшпейді.

Қазақстан мұсылмандары діни басқармасының найб мүфтиі Сансызбай қажы Құрбанұлы арнайы іс-сапармен Қостанайға келді.

Ол алдымен облыстық мешіттегі қасиетті жұма намазына қатысты. Жиналған жамағат алдында "Бірінші тілек тілеңіз бір Аллаға жазбасқа" тақырыбында уағыз айтты.

Бұл тақырыптағы уағызды жиналған жұртшылық ұйып тыңдады.

Жақында Қазақстан мұсылмандары діни басқармасының ұйымдастыруымен Астана қаласынла «Халал - ЕХРО 2022» Халықаралық көрмесі өткізілді.

Онда Қостанай облысының «Коко» яғни, «Жас Қанат» атауымен танымал құс фабрикасы топ жарып, республикада «Ең үздік халал» номинациясын жеңіп алды.

Жерлестерімізді табысымен шын жүректен құттықтаймыз! Олардың жеңісі өзгелерге үлгі болып, өңірімізде мұндай адал ас - халал өнімдерін шығаратын зауыт-фабрикалардың қатары арта берсін деген ізгі тілегімізді білдіреміз.

Қостанай облыстық мешітінің баспасөз қызметі

Қостанайдағы Ахмет Байтұрсынов атындағы өңірлік университетте 18 қазан - Рухани келісім күніне орай «Ел бірлігі – рухани келісімде» деп аталатын дөңгелек үстел ұйымдастырылды.

Онда қазіргі таңда республикамыздағы халықтар арасындағы сыйластық, мызғымас достық, бірлік пен береке ерекше орын алатындығы айтылды. Бұл орайда болашақ жас мамандарға жүктелетін міндеттер де аз емес. Өйткені, мемлекетіміздің келешегі олардың іскерлігі мен терең біліміне тікелей байланысты.

Жоғары оқу орнындағы өткізілген жиын ұйымшылдықпен өтті. Басқосуда жастар өздерінің көкейінде жүрген сауалдарын қойып, оған тиянақты жауап алды.

Қостанай облыстық мешітініңбаспасөз қызметі