Таяуда Жітіқара қалалық №12 орта мектебінде есте қаларлықтай кездесу болып өтті. Оған осы білім ордасындағы 45 жоғары сынып оқушылары қатысып, көп жайды көңілге түйді.

Басқосуға «Духовно нравственное ценности Ислама и Христианства» деген тақырып арқау болды. Жүздесу орыс тілінде өтті. Жиналғандар өздерін толғандырған сауалдарына нақты жауап алды.

Кездесуге христиан проваслав шіркеуінің басшысы игумен Максим және «Ержан Тәтішев» мешітінің бас имамы Сабыржан Есмурзин қатысты. Мұндай басқосулардың жастарға берер тағылымы мол екендігін осы жиын да айқын көрсетті.

ҚМДБ Қостанай облысы бойынша
өкілдігінің баспасөз қызметі

Қазақстан мұсылмандары діни басқармасы Қостанай облысы «Марал ишан» мешітінің жастар ісі бойынша өкілі Ғұмар Жұмағұлов бірқатар жастармен бірге облыстық балалар үйіне ат басын тіреді.

Әдетте мұндай жасөспірімдерді ізгілікке, адамгершілікке, инабаттылыққа тәрбиелеп жатқан орындарға азық-түлік табыс етіліп, ақшалай, заттай сыйлықтар тарту етілетіндігі белгілі.

Бұл жолы жоғарыда аталған жастар тәрбиеленушілерге рухани азық сыйлап, оларды ерекше қуанышқа бөледі. Онда концерт бағдарламасы барысында күй шертіліп, әсем ән орындалды.

Сондай-ақ балалардың жүрек қылын шертіп, жан-дүниелерін байытатын тағылымды ойындар көрсетті.

Осы көріністерді тамашалаған балалар ата-бабамыздан келе жатқан салт-дәстүрімізге ерекше ден қойып, ұлттық аспабымыз киелі домбыраны үйренуге ынталы екендіктерін білдірді.

ҚМДБ Қостанай облысы бойынша
өкілдігінің баспасөз қызметі

Қазақстан Мұсылмандары діни басқармасының айнасы іспеттес Қостанай облыстық «Марал ишан» мешіті де тұрақты негізде қайырымдылық іс-шараларын жасап отырады.

Үстіміздегі аптада мешіт демеушілері арқылы мүгедек жандарға қолдан келгенінше көмек қолын созып азық-түлік үлестірілді.

Сонымен бірге Қостанай облысы әкімдігінің білім басқармасына қарасты «Қостанай балалар мен жасөспірімдер баспанасы» КММ қиын өмір жағдайына кезіккен, уақытша күтім, дағдылану, білім алу мен дамуды қажет ететін 3 пен 18 жас аралығындағы 40 бала тәрбиеленетін үйге де жанашыр демеушілердің арқасында көмек көрсетілді.

Мұндай шаралар осы кезге дейін де болған және одан әрі де жалғасын табатынына үміттіміз. Себебі Қостанайда қайрымдылық жасағысы келетін бірақ өзін жарнамалағысы кемейтін азаматтарымыз баршылық.

ҚМДБ Қостанай облысы бойынша
өкілдігінің баспасөз қызметі

Қазақстан мұсылмандары діни басқармасының «2020 жылға дейін діни білім беруді дамыту» тұжырымдамасы негізінде, Қостанай облыстық «Марал ишан» мешітінің ұйымдастыруымен, Қостанай қалалық мешітінде 2015 жылдың 10-желтоқсаны мен 2016 жылдың 10-ақпаны аралығында екі айлық «Сауат ашу курсына» қатысып, Фиқһ, Ақида, Құран және Араб тілі мен тәджуид пәндерінен білім алған шәкірттерге сертификаттар берілді.

Облыстың өкіл имамы Бахытбек Нұрғабылұлы өңірдің әр тарапынан келген шәкірттерге алған білімдерін Ислам дінінің дамуы жолында қолдануды тілеп ақ батасын берді. Сонымен бірге осы шәкірттерге білім нәрімен сусындатқан ұстаздар мен демеушілік жасаған барлық азаматтарға ризашылығын білдіріп рахметін айтты.

ҚМДБ Қостанай облысы бойынша
өкілдігінің баспасөз қызметі

Қостанай облыстық «Марал ишан» мешітінің наиб имамы Бақытжан Икрам және жастар ісі бойынша жауапты Ғұмар Жұмағұлов ақпараттық насихат жұмыстарын Қостанай қалалық әкімдік қызметкерлерімен кездесуден бастап, онан соң Ахмет Байтұрсынов атындағы Қостанай мемлекеттік университетінде және Қостанай экономикалық колледжінде де жалғастырды.

Мұндай кездесулердің мақсаты жастарды ізгілікке, ел тыныштығын сақтауға, адамгершілікке, мейірімділікке, патриоттыққа баулуға бағытталған.

Мұндай жүздесулер өз нәтижесін де беруде. Өйткені, Қостанай жастарының Ислам дініне деген құрметі ерекше арта түсуде.

Осы басқосуларда қазірігі таңда әлемде орын алған жат ағымдардың алдын-алу, әсіресе, одан жастарды барынша сақтандыру жөнінде сөз болды және ҚМДБ бекіткен Тұғырнама жайлы кеңінен айтылды.

Жиналғандар басқосудан соң өздерінің әзірлеген сұрақтарын қойып, дүниетанымдарын одан әрі кеңейте түсті.

ҚМДБ Қостанай облысы бойынша
өкілдігінің баспасөз қызметі

Түсінген адамға діннің берері мол. Әсіресе, ислам діні баршаны жақсыдан үйреніп, жаманнан жирендіруге үндейді. Сондықтан да өңірдегі барлық деңгейдегі мешіттерде бұл мәселеге айрықша назар аударылуда.

Әсіресе қазіргі таңда жастарды ешқандай берер пайдасы жоқ теріс ағымдардан сақтандыру мақсатында атқарылып жатқан жұмыстар ауыз толтырып айтарлықтай.

Осы арада нақты деректер мен дәйектерге сүйеніп өтелік. Жақында Жітіқара аудандық «Ержан Тәтішев» мешітінің бас имамы Сабыржан Есмурзиннің тікелей ұйымдастыруымен осындағы политехникалық колледж студенттерімен кездесу болып өтті.

Әрине, дін қайраткері аталған жүздесуге жан-жақты дайындалды. Теріс ағымның қоғамға, әрбір отбасына және кез – келген азаматқа тигізер зияндықтары жөнінде де айтылды. Жастардың қойған сауалдарына нақты жауаптар берілді.

Сондай-ақ кездесу барысында халқымыздың көне замандардан бері ұстанып келе жатқан дәстүрлі ислам дінінің негіздері, ұстанымдары да түсіндірілді.

Мұндай жүздесулердің өскелең ұрпағымызға берер ықпалы зор екендігін күнделікті өміріміз айқын көрсетіп отыр.

ҚМДБ Қостанай облысы бойынша
өкілдігінің баспасөз қызметі

Жуырда қасиетті жұма күні Сарыкөл ауданының бас имамы Дәулетбай қажы Әбдіхалық Қара-Оба ауылына арнайы барып, мектеп мұғалімдері және оқушылармен жүздесіп, діни дәріс өткізді.

Онда Дәулетбай қажы «Тәрбие негізі – имандылықта» екенін айта келіп, адамгершілік, ізеттілік, қайырымдылық, инабаттылық, ақыл-парасат жайына тоқталды.

Әр сөзін адам санасына сәуле шашар шапағаты ұшан-теңіз – Құран Кәрім мен Пайғамбарымыз Мұхаммедтің (с.ғ.у.) хадистерімен нақтылады. Сондай-ақ, қазіргі қоғамдағы ата-анасын сыйламай жүрген жүгенсіздерді, шаранасын шырылдатып түзге тастап жатқан жетесіздерді сынға алды.

Осынау ой салар кездесу кезінде: «Адам баласы Алла алдында не үшін ардақты?», «Адам немен құнды?», «Ислам дегеніміз не?», «Имандылыққа нелер жатады?», «Ата-бабамыз бізді кеше қалай тәрбиеледі?» - деген сауалдарға нақты жауап берді.

Жүздесу соңында Б.Өтетілеуов атындағы орта мектептің директоры Болат Қаденов сөз алып, оқушыларға ой салар тағылымды дәріс өткізгені үшін бас имамға шынайы алғысын білдірді.

ҚМДБ-ның Қостанай облысындағы
өкілдігінің баспасөз қызметі

Имандылық тәрбиесін беру арқылы келер ұрпақтың иманды да ибалы болуды насихаттау мақсатында Арқалық қалалық «Мухтасиб Әлмұхаммед» мешіті мен қалалық «Мәдениет сарайы» бірлесіп Абай Құнанбайұлы атындағы мектептің 9 сынып оқушыларына «Дін - ғылымның анасы» тақырыбында тәрбиелік сабақ өткізді.

Қазақстан Республикасының Мәдениет қайраткері, мешіттің алқа мүшесі Жұмағали Өмірбекұлы өскелең ұрпақты адамгершілікке, мәдениеттілікке, мейірімділік пен кішіпейілділікке тәрбиелеу және ұлттық әдет-ғұрыптар жайында насихат айтса, бас имам Бектұрсын Торғайбайұлы «Сәлем сөздің анасы» тақырыбында амандасудың мәдениеттілігі мен маңыздылығына тоқталып өтті.

Осы кездесуде аталмыш мектептің тәрбие ісі жөніндегі мамандары А.С.Карашинова, Л.С. Аскарова және сынып жетекшілері Л. Мұхамедиярова мен С. Бекеновада қатысқан болатын.

Кездесу барысында оқушылар өз ой-пікірлерінде білдіріп, көкейлеріндегі сауалдарына жауап алса, сынып жетекшілері осы шараны ұйымдастырушыларға шынайы алғыстарын білдірді.

ҚМДБ Қостанай облысы бойынша
өкілдігінің баспасөз қызметі