Қасиетті Рамазан айында Рудный қаласының №15 орта мектебінің оқушылары қалалық «Рудный қаласының Нұр» мешітіне келіп, мешіттің көркі мен сәулетіне тәнті болды. Сонымен қатар оларға Бас имам Азамат Серікбайұлы уағыз-насихат айтып, Ислам діні туралы және Алланың үйі болып табылатын мешіттің сәулеті жайында баяндап берді.

Сондай-ақ Рудный балалар көркемөнер мектебінің де шәкірттері мешітке жиналып, ішін аралап, арнайы қойылған жердігерлермен танысып, оның келбетін тамашалап кескіндеді.

Мешіт ұжымы осы жиналған балалардың арасында «Ең адемі салынған мешіт» атты сайыс ұйымдастырып, жас суретшілердің ішінде мешіттің суретін түрлі бояулармен әсемдеп салғандарына арнайы сый-сияпат жасады. Осылайша жас буын мешіттің қандай жер екенін біліп, дініміздің адамды тек жақсылыққа ғана үндейтінін түсініп, жүректерінде мешітке деген жылу ұялады.

Пайғамбарымыз с.а.с «Балаға мейір танытпаған, Алланың мейірінен құр қалады» деп балаларды сүйюге, оларға әрдайым мейірім көрсетуге үндеген. Әрине бұл сөзден де үлкен тәлім алуға болады.

«Баланың өскен бесігі — кең дүниенің есігі» деп қазақ халқы бекер айтпағаны белгілі. Елімізде жас ұрпақтың бойында имандылық пен тәлімді тәрбие қалыптастыру мақсатында мешіттерде көптеген өнегелі шаралар жүзеге асырылуда.

ҚМДБ-ның Қостанай облысы бойынша өкілдігінің баспасөз қызметі

Оразада ниетіміз қабыл болғай,
Сақтасын қасіреттен Алла құдай.
Есімізге өлім сәтті жиі алайық,
Бұл фәни, тәтті болмас күнде бұлай.

Рамазан мол сауаптар жинайтын ай,
Оңай сауап күтпегің, нәпсі тимай.
Жүрек дүрсіл соққанда жинап қалғың,
Ертең соңғы күн болмасын тұрма қимай.

Жаратқаннан сұрайық біз кешірім,
Таңдамайық әр істің бар кесірін.
Біліп тұрып істемеу, үлкен күнә,
Иман болсын жолдасың жігіттерім.

Алланың өзі де рас сөзі де рас,
Исламмен достасқан жан, еш кем қалмас.
Өмірдің ұзақ жолын жаяу кешсең,
Шөлін қанбай қалмайды, аяқ талмас.

Иманды жан көбейсін жерімізде,
Иман ғой байлығымыз, кеніміз де.
Алланың хақ жолымен жүрген жандар,
Алла алдында өседі шеніңіз де.

Жақсылықтан аспайды бұл тура жол,
Барлық қазақ ұрпақтары иманды бол.
Ешкім күліп жүрмес еді сыртымыздан,
Тура жолдан көрсе олар, арманым сол!

Қостанай облысы Наурызым ауданы «Түркебай» мешіті жамағаты
Қойбағаров Болатбек Бөлтірікұлы

ҚАДІР ТҮНІ – ТАҒДЫР ТҮНІ

Бисмилляхир-Рахманир-Рахим!

Әр жылдағы ауыз бекітудің өз ауыртпашылығы мен жеңілдігі бар екені белгілі. Биылғы жылы мұсылман үмбеті мамыражай мамырдың бел ортасынан саратанның сартап ыстығына дейін отыз күн ораза тұтуға ниет етті. Қыстан жүдеп шыққан төрт түлік малдың аузы көкке ілініп, диқаншы қауым қара жерге тұқым сеуіп, шаруаны ыңғайлаған сәтте – қасиетті Рамазан айы кіріп келді. Мінекей, Рамазан айы туғаннан бері мұқым мұсылман баласы күндіз ауыз бекітіп, кеш-құрым жапа-тармағай мешітке ағылып, тарауих оқып, қаздай шулап Хақ-Тағаланы ұлықтап, құлшылық етуде. Әлбетте, парқына жете білгенге уақыт деген ағыстың ішіне бүккен өз сыр-хикметі бар екені хақ. Десе де, қасиетті айдағы теңдессіз илаһи тағдыршешті сәт – ол Қадір түні екені әмбеге аян. Сонымен, мұсылман үмбеті үшін Қадір түні несімен қастерлі? Не себепті қадірлі?

«Қадір» сөзінің анықтамасы

Қасиетті кештің (ليلةُ القدر – ләйләтул-қадір) ерекшелігін жан-жақты таратып айтатын Құран Кәрімде Қадір сүресі бар. Қадір сүресі бес аяттан тұратын қысқа ғана зәм сүресі саналғанымен, оның рухани салмағы аса зор. Мәшһүр муфассир-ғалым Ибн Кәсир өз еңбегінде «Қадір» сөзіне төмендегідей анықтамалар берген:

Біріншіден, «Қадір» сөзі «үкім кесілетін түн» мағынасын береді. Бұл хақында Құран Кәрімде:

فِيهَا يُفْرَقُ كُلُّ أَمْرٍ حَكِيمٍ

«Ол кеште барлық хикметті істер айырылады», (Дұхан, 4) – деп бұйырылады. Осыған орай, Қадір түнінде Алланың тағдырды үкім ететін мезгілі, яғни әуелгі тағдырдың (ләухул-махфуз) паш етілуі меңзелген.

Екіншіден, «Қадір» сөзі «абырой, ұлылық, орасан зор» мағынасын береді. Себебі, Қадір түні – ұлық және аса қасиетті кеш болып саналады. Бұл түннің салмағы мың айдан да қайырлы. Құран Кәрімде бұл турасында:

لَيْلَةُ الْقَدْرِ خَيْرٌ مِّنْ أَلْفِ شَهْرٍ

«Қадір түні мың айдан да қайырлы», (Қадір, 2) – деп баяндалады.

Үшіншіден, «Қадір» сөзі «сығылысу, нығыздалу» мағынасын береді. Өйткені, бұл түні бүкіл періштелер жер бетіне түскенде жер жүзі тарлық етіп, олар сыймағандықтан бір-біріне сығылысады. Бұл жайлы Құранда:

تَنَزَّلُ الْمَلَائِكَةُ وَالرُّوحُ فِيهَا بِإِذْنِ رَبِّهِم مِّن كُلِّ أَمْرٍ

«Періштелер және Жәбірәйіл (ғ.с.) осы түні Раббыларыңның рұқсатымен барлық іс үшін түседі», (Қадір, 3) – деп баяндалады.

Мың айдан да қайырлы түн

Ибн Әбу Хатм жеткізген риуаятта: «Алла Елшісі (Алланың оған салауаты мен сәлемі болсын) сахабаларына Исрайл ұрпақтарының ішінде Аюб, Зікірия, Хазикал, Нұн атты төрт адамның Хақ жолында сексен жыл қызмет еткенін, басқа риуаятта мың ай мүлтіксіз құлшылық жасағанын баян етеді. Алла Елшісінің (Алланың оған салауаты мен сәлемі болсын) үзеңгілестері сексен жыл Алла жолында күрескенін немесе құлшылық еткен Исрайл ұрпақтарының жансебіл әрекетін естіп, оған таңдай қағады. Осы сәтте, Жебірейіл періште Хақ Елшісіне (Алланың оған салауаты мен сәлемі болсын):

لَيْلَةُ الْقَدْرِ خَيْرٌ مِّنْ أَلْفِ شَهْر

«Қадыр түні мың айдан да қайырлы» (Қадыр, 2-3) – деген аятты нәзіл етіп, мұсылман үмбетін теңдессіз қуанышпен сүйіншілейді.

Әлбетте, сүйіншіленген бұл илаһи қуаныш Алла Тағаланың мұсылман үмбетіне деген шексіз қамқорлығы мен рақымдылығын әйгілейді. Себебі, мың айды жылдарға шағатын болсақ, сексен үш жылдан астам мезгілді қамтиды. Бұл дегеніміз бір адамның өміріне татитын уақыт мөлшері. Яғни, Қадыр түнінде Хақ Тағалаға ынты-шынтымен құлшылық қылған пенде ғұмыр бойы құлшылық еткен болып саналады. Ал, әрбір жыл сайынғы Қадір түнін қаперге алсақ, онда мұсылман баласының қамшының сабындай қысқа ғұмырда жинаған сауабынан биік тау тұрғызатынын көзге елестетуге болады.

Жер беті сәлеметке тұнады

Ибн Аббас жеткізген риуаятта: «Алла Елшісі (Алланың оған салауаты мен сәлемі болсын): Қадір түні Сидратул-Мунтаһадан барлық періштелер, оның ішінде Жебірейіл (ғ.с) де бар, жер бетіне түседі. Олар өздерімен бірге бірнеше ту ұстап түседі. Тудың біреуін менің қабірімнің үстіне, біреуін Байт-ул-Мақдистің үстіне, бірін Масжид-Харамның үстіне, біреуін Туру Синаның үстіне тігіп, желбіретеді. Олар сәлем бермеген жер бетінде мүмін еркек пен мүмін әйел адам қалмайды. Ішімдік ішкен, доңыз етін жегендерден тыс» деп хабарлайды. Бұл туралы Алла Тағала Құран-Кәрімде:

تَنَزَّلُ الْمَلَائِكَةُ وَالرُّوحُ فِيهَا بِإِذْنِ رَبِّهِم مِّن كُلِّ أَمْرٍ

«Періштелер және Жебрейіл (Ғ.С.) ол кеште Раббыларының рұқсаты бойынша барлық іс үшін түседі» (Қадір, 4) – деп бұйырылады.

Иә, Қадір түнінің құт-берекесі шексіз. Себебі, жер бетіне сан мыңдаған періштелер түседі. Періштелер тіпті жер бетіне сыймай, бір-біріне сығылысады. Алла Елшісінің (Алланың оған салауаты мен сәлемі болсын) келесі бір хадис-шарифінде: «Ол түні жер бетіне түскен періштелердің саны ұсақ тастардың санынан да көп» (Ахмад, 10316) деп хабарлайды.

Періштелер мүміндерді айнала қоршай Алла Тағаланың оларға деген кешірімі мен мейірімін айтып сүйіншілейді. Бұл турасында Алла Тағала Құран Кәрімде:

سَلَامٌ هِيَ حَتَّى مَطْلَعِ الْفَجْرِ

«Ол бейбітшілік кеші, таң рауандағанға дейін жалғасады (Қадір, 5) – деп баяндайды.

Қасиетті түнді құлшылықпен өткізген мұсылманға періштелер салауат айтып, оған бейбіт өмір тілейді. Таң ағарып атқанға дейін періштелер сәлеметі жер бетіне себезгілеп, мұсылман үмбетінің жүрегіне тыныштық пен жан рахат орнайды. Сайд ибн Мансур келтірген риуаятта: «Бұл түн – бейбітшілік түні. Қадір түнінде шайтанның адамдарға жамандық жасауға қауқары жетпейді. Бұл түні барлық істер белгіленіп (тағдыр жазылады), рызықтар айырылады» деп хабарланған.

Қадір түні. Ол қай түн?

Хақ Елшісінің (Алланың оған салауаты мен сәлемі болсын) Қадір түні туралы мәшһүр хадис шарифтердің бірі Әбу Сайд ал-Худридің риуаяты еді. Бұл риуаятта Алла Елшісі (Алланың оған салауаты мен сәлемі болсын) былай дейді: «Мұхаммед (Алланың оған салауаты мен сәлемі болсын) Рамазанның алғашқы он күнінде иғтикаф жасады. Ортаңғы он күнде жабағы жүннен жасалған Түрік шатырында иғтикаф жасады. Шатырының есігінде саздан жасалған перде болатын. Алла Елшісі (Алланың оған салауаты мен сәлемі болсын) пердені шатырдың бір бұрышына ысырып қойды. Сосын терезеден басын шығарды. Дүйім жұрт оған жақын келді. Ол (Алланың оған салауаты мен сәлемі болсын) былай деді: «Мен Қадір түнін іздеп Рамазанның алғашқы он күнде иғтикаф жасадым. Содан кейін ортадағы он күннен іздеп, тағы да иғтикаф жасадым. Кейін маған періште келіп: «Қадір түні соңғы он күнде» деді. Және: Менімен бірге иғтикаф жасағандар қаласа соңғы он күнде де иғтикаф жасасын» деді. Естіген адамдар Пайғамбарымызбен (Алланың оған салауаты мен сәлемі болсын) бірге иғтикаф жасады. Алла Елшісі (Алланың оған салауаты мен сәлемі болсын) оларға: «Маған Қадір түні тақ түні көрінді» деді.

Қадір түні туралы Убай ибн Кағб жеткізген риуаятта: «Аллаға серт! Ибн Масғуд (р.а.) оның Рамазанның жиырма жетінші түнінде екенін білді. Бірақ босап кетулеріңнен қорқып, оны сендерге білдіруді жек көрген болатын» (Бұхари, Қадір: 1) дейді.

Осы соңғы риуаятты негізге алған ислам ғұламалары мұсылман үмбетін жыл сайын Қадір түнін Рамазан айының жиырма жетісі түні қарсы алуға үндейді. Әлбетте, Рамазан айының соңғы он күні, оның ішінде тақ күндері Қадір түні болуы әбден ықтимал.

Қасиетті кеште атқаратын амалдар

Ислам ғұламалары қасиетті Қадыр түнін төмендегіше атқаруды үндейді:

Қадір түнінде Алла ризашылығы үшін ғибадат жасап, намаз оқып, құлдық сезімдерімізді арттыруымыз керек.

Құран Кәрім оқып, тыңдап, түсінуге ынта қойып, оған деген сүйіспеншілік байланыс орнатуға тиістіміз.

Алла Елшісіне (Алланың оған салауаты мен сәлемі болсын) салауат айтып, шапағатынан үміттеніп, оның үмбетінен болғанымызға шүкіршілік жасап, оның жолын берік ұстануымыз шарт.

Мешітке барып уағыз-насихат тыңдап, жүректі кір-қоқыстан шайып, көңіл айдынын илаһи нұрға толтыруымыз керек.

Қадір түніне қатысты жеткілікті мағлұмат беретін дін мамандарымен сұхбат құрып, мұсылман үмбетінің бірлігі мен ынтымағын арттыруға мән беруге тиістіміз.

Жаббар Хаққа тәубе мен истиғфар жасап, нәпсімізді есептен өткізіп, қателік жасаудан сақсынып, қайырлы істерді жасауға құмбыл болуымыз шарт.

Алла Тағаланы зікір етіп, тафаккур жасап, Ұлы Жаратушының құдіретімен жоқтан бар болған жаратылыстың сырларын ұғынуға ұмтылып, иман һәм иһсан байлығын күшейтуіміз қажет.

Дәйім дұға жасауымыз керек. Алла Елшісі (Алланың оған салауаты мен сәлемі болсын) үмбетін бұл түні: «Уа Аллам! Сен кешірімдісің, кешіруді сүйесің, мені кешіре гөр» деп дұға жасауға шақырған.

Қадір түнінің күндізін де бейне кеш секілді өткізу ләзім. Осылай болса, мүбәрак түннің рухымызға төккен шұғыласы сіңімді болып, жүректен орын алады.

Қадір түні Раббымыздан бүкіл исі бүтін мұсылман үшін дұға-тілек жасауымыз керек. Қала берді, бейбіт ғұмыр сұрап: «Күллі адамзатты апаттардан сақта» деп тілеуіміз шарт.

Түйін

Хақ-Тағаланың бір түндік ғибадатты мың айдан да қайырлы етуі, сөз жоқ, Жаббар-Хақтың мұсылман үмбетіне деген ерекше мейірімі мен рахымдылығы еді. Алла Елшісі (Алланың оған салауаты мен сәлемі болсын) бір хадисінде: «Кімде-кім Қадір түнінің артықшылығына нанып, Алладан сауабын күтіп, құлшылық қылса, жасаған күнәлары ғафу етіледі» (Бұхари, Қадір, 1) дейді. Иә, мұндай мүмкіндік һәм мұндай мың айдан да қайырлы мезет мұсылман үмбетінің пешенесіне ғана жазылған илаһи тарту. Олай болса, қадірменді ағайын Қадыр түнінің мүмкіндігінен мақұрым қалмай, таң рауандаған шаққа дейін жансебіл рухта Хаққа құлшылық қылып, жан-жүрегімізбен Алаштың қамы үшін дұға-тілек жасайық. Алла-Тағала Рамазаннан Рамазанға аман-есен жетіп, дәйім қасиетті Қадір түнін қарсы ала беруді жазсын! Әумин!

Ислам дінін түсіріп әлемді нұрға бөледің,
Адамзат хаққа сыйынып зор бақытқа кенелдің,
Ақ жолыңнан тайдырма жетеле бізді жарыққа,
Жүрегім таза муминмін деп айтамын халыққа.

Кеште болса сыйынып намазға мен де жығылдым,
Тура жолды өзіңнен табарымды ұғындым,
Коммунистік кезеңнің ықпалынан шыға алмай,
Кеше гөр Алла пендеңді, апырай солай сүріндім.

Мың шүкірлік айтамын мұсылман болып туғанға,
Сыйынам Алла өзіңе, сенемін кәміл құранға,
Тыныштық бер еліме, береке, бірлік бәрін де,
Уа жаратқан құдірет лайық атың ұранға.

74 жыл біздерді Құдайсыздар басқарды,
Қарсы үгіттеп дінімнен алшақтатты жастарды,
Қызыл-қасап, қырғын жасап ақ –қызыл боп бөлінді,
Білімдарлар, оқығандар халық жауы атанды.

Ширек ғасыр тәуелсіз ел болғаның,
Үш жүз жылдай бодандықта сорладың,
Қасиетті дінімізде ортамызға оралды,
Елімізге, баршамызға сыйы ғой бұл Алланың.

Ислам діні бірте-бірте әлемді нұрға бөледі,
Жүректерде сенім орнап қанат жайып келеді,
Тура жолды тауып жастар Сәждеге бас иеді.
Ұлы Алланы Пайғамбарды бәрінен артық көреді.

Сенің атың, сенің сөзің орнықтырды жүректі,
Сенің нұрың жарық етті қараңғылық түнекті,
Прақпенен бірақ түнде жеті қат көкті аралап,
Пайғамбарым Ғалайиссалам муғжизасын көрсетті.

Сабырлылық, нәпсі тыйу имандылық өлшемі,
Жамандыққа жақсылық қыл ол иманның бөлшегі,
Алланың атын шын ниетпен ауызыңнан тастама,
Қыйындықтан әрқашанда алып шығар ол сені.

О, Жаратқан нұрыңды төк менің байтақ еліме,
Берекең мен бақытыңды құй аяма жеріме,
Тыйыштық пен татулықты біздің елге көпсінбе,
Қыдыр ата қонақ болсын әрбір үйдің төрінде.

О, жаратқан сен ұлысың бар ғаламды жаратқан,
Бұл әлемге нұрың төгіп құдретіңді таратқан,
Үлкен-кіші бәріңе айтар бір тілек,
Құранды үйрен оқы оны оқимын деп талаптан.

Қасиетті құран кәрім бар ғылымның бастауы,
Ізгі ниет әдеп иман адамдықтың асқары,
Көңіл қойып бар ынтаңмен үйренсең,
Сенімдісің көрінеді ісіңнің алға басқаны.

Барлық мадақ арналады жаратушы өзіңе
Жүрегімде жатталады иланам әрбір сөзіңе
Береке бірлік татулықты,молшылықты бер бізге,
Қасиетті Қазақстан ұлы дала еліне.

Қостанай облысы
Науырзым ауданы
Қарамеңді ауылы
Халықов Жақсылық
Түркебай ата мешітінің алқа мүшесі

Рудный қаласында Рамазан айының құрметіне арналған «Рамазан мүбәрәк болсын» атты рухани кеш болып өтті. Ауқымды басқосуды осы шаһардың әкімдігі мен Рудный қалалық «Нұр» мешіті ұйымдастырды.

Оған ел ағалары мен қала тұрғындары және мешіт жамағаты қатысты. Аталмыш кешке ҚМДБ-ның Қостанай облысындағы өкілі бас имам Бақытбек қажы Нұрғабылұлы қатысып, жиылған жұртшылыққа оразаның қадір-қасиеті жайлы әңгімелеп «Пайғамбар (оған Алланың игілігі мен сәлемі болсын) өмірі, отбасы» тақырыптарында уағыз айтты.

Басқосқан халыққа Рудный қаласының әкімі Бақытжан Темірұлы дастархан жайып, ауыз ашар берді. Онда қасиетті Құран оқылды. Қалың жұртшылық шаһар басшысына өздерінің шынайы алғыстарын білдірді.

Рухани кеште діни әндер орындалып, шараның шырайын ашты. Осы кешке қатысқан әрбір қандастарымыз ұмытылмас әсер алды.

ҚМДБ-ның Қостанай облысындағы өкілдігінің баспасөз қызметі

Мына дүниеде баланың бақытты болуы мен жүзінен шаттық күлкісін көруден артық не бар дейсіз. Сондықтан да болар Арқалық қалалық „Мухтасиб Әлмұхаммед» мешітінің ұжымы демеушілер көмегімен жуырда ғана болып өткен халықаралық балаларды қорғау күніне орай қайырымдылық іс-шараларын ұйымдастырды.

Олар әлеуметтік жағынан аз қамтылған отбасындағы бүлдіршіндерге киім-кешектер мен тәттілер беріп, шаттыққа бөлесе, «Ана мен бала» үйіндегі Жұлдыз есімді жас анаға қол ұшын созып, кішкене бөбегіне қажетті заттар мен киімдерді табыс етті.

Сондай-ақ намазхан Рүстем Асанханұлымен бірге шаһардағы ата-ана құқығынан айырылған сәбилердің көңілін көтеру мақсатында спорттық жабдықтар яғни ойын доптары және басқа да заттарды сыйға тартты.

-Біз жылда балалар мерекесінде әсіресе әлеуметтік жағынан аз қамтылған отбасы балаларына шама-шарқымыз келгенше қамқорлық жасауға тырысамыз. Биыл да қасиетті Рамазан айында қайырымдылық көрсетуге ұмтылдық. Балалардың мәз-мәйрам болғанын өз көзімізбен көрдік,- дейді жоғарыда аталған игі істі ұйымдастырушы, Арқалық қаласы мешітінің бас имамы Бектұрсын Уәлиев.

ҚМДБ-ның Қостанай облысы бойынша өкілдігінің баспасөз қызметі

Қазақстанда 1997 жылдан бері 31 мамыр-саяси-қуғын сүргін құрбандарын еске алу күні ретінде аталып келеді. Кешегі, нәубет жылдары қаншама қазақ азаматтары жазықсыз құрбан болғаны тарихымыздан белгілі.

Кешегі Алаш қозғалысының белді мүшелері Ахмет Байтұрсынов, Міржақып Дулатов және басқалар қазіргі жарқын өміріміз үшін ештеңеден аянған жоқ.

Міне, осындай саяси қуғын-сүргін құрбандарына арналған тағылымдық шалалар облыстық барлық аудандары мен қалаларындағы мешіттерде ұйымдастырылып, қатысқан ағайындарға тағылымдық жағы зор болды.

Жуырда сол кезеңдерде қайтыс болған азаматтардың рухына бағышталып, Рудный қалалық «Нұр» және Қашар кентінің «Кәмшат ана» мешіттерінде де жамағаттарға ауыз ашар берілді. Содан кейін арнайы Құран бағышталды.

Қысқасы, қазір арамызда жүрген жастар өткен тарихына құрметпен қарап, сол ұлтымыздың басына қара бұлт болып үйірілген жылдарды ешқашан да ұмытпау керек.

ҚМДБ-ның Қостанай облысындағы өкілдігінің баспасөз қызметі

Он екі айдың сұлтаны атанған берекелі Рамазан айы келіп, мұсылман қауымы зор қуанышқа кенелуде. Шарафатты Рамазан басталғалы барлық жерде ауызашарлар өткізіліп, бес парыздың бірі – оразаның мәртебесі көтерілуде.

ҚМДБ-ның Түркия елімен арадағы келісімі бойынша, елімізге биыл да бірнеше қарилар келген болатын. Сол хафиздардың бірі - Кокен Амре Арқалықтағы «Мухтасиб Әлмұхаммед» мешітінде жамағатпен тарауықта қасиетті Құран кәрімді толық хатым жасауда.

Мешіт қызметкерлерінің ұйымдастыруымен жылдағы дәстүр бойынша ауызашарлар жалғасуда. Рамазанның алғашқы күні қала басшылығы, екінші күні қажылар қауымдастығы және үшінші күні «Мухтасиб Әлмұхаммед» мешітінің барша қызметкерлері ауыз ашар дастарханын жайып, үрдіс жалғасуда.

Аталмыш мешіт бас имамы Бектұрсын Торғайбайұлының айтуына қарағанда, Рамазанның әр күніне ауызашар өткіземін деп ниет етіп отырған азаматтар аз емес. Ауыз ашар былтырғы жылдары мешіт жанындағы арнайы құрылған шатырларда өтіп келсе, биылғы ауа-райының қолайсыздығына орай мешіт жанындағы «Достар» атты дәмханада берілуде.

Ауызашарларда дін қызметкерлері тарпынан жамағатқа Рамазан айының қасиеті және басқа да тақырыптарда тағылымды уағыздар айтылып, ұлттық дәстүрге сай, ғибратты жыр термелер де орындалуда.

ҚМДБ-ның Қостанай облысы бойынша өкілдігінің баспасөз қызметі

Ардақты Пайғамбарымыз (с.ғ.с.): "Ағаш бесіктен жер бесікке дейін білім алыңдар!" ­- деген. Білім алу – әрбір мұсылман ерге де, әйелге де парыз.

Арқалық қалалық «Мухтасиб Әлмұхаммед» мешітінде жыл сайын 7 айға созылатын 2 кезеңдік білім беру курсы толассыз жүргізіліп келеді.

Мешіт жанында тұрақты түрде жүргізіліп отырған аталмыш сауат ашу курсында діни біліммен сусындаған шәкірттер арасында еңбектеген баладан еңкейген кәріге дейін білім алып жүргендер бар.

Шәкірттер кезекті оқу мерзімін аяқтап, емтихан тапсырды. Білім алушылар арасында сынақты үздік тапсырып, алған білімін көрсете білген шәкірттерге мешіт имамы мен ұстаздар атынан сертификат табысталды.

Шара барысында ұстаздар: Арлан Бауыржанұлы, Бахытбек Сәндібекұлы және Балғабай Оразханұлы ілім алудың артықшылығы жөнінде тартымды уағыз-насихат айтып, білім алуды орта жолда  қалдырып қоймауға үндеді.

Мешіт имамы Бектұрсын Уәлиев: "Білім алыңдар! Білім алу – Алладан қорқу. Білімді талап қылу – ғибадат, алған білімді қайталау – тасбих, білімге ынталану – жихад, алған білімді тарату – құрбандық, білімді білмегендерге үйрету – садақа"-деген саңлақ сахабалардың саралы сөздерін келтіріп, шәкірттерді лайым кішіпейіл де әдепті болуға шақырды.

Еске сала кетсек Арқалық мешітінде жылма-жыл қазан мен мамыр айларының аралығында ұстаз Арлан Нұғымановтың тікелей жауапкершілігімен арнайы сауат ашу дәрістері жүргізіліп келеді. Мұнда әсіресе қаладағы колледж және институт студенттері көптеп дәріс алады. Мұндағы тәлім алушылар тек қана жергіліктілер емес, еліміздің түкпір-түкпірінен жиналған шәкірттер бар.

Мешіттен рухани нәр алған ынталы шәкірттер тек қана оқып қойған жоқ, мешіттің тыныс-тіршілігіне де зор қолғабыс тигізді. Атап айтар болсақ, қайырымдылық шараларға қатысты. Яғни қаладағы жалғызбасты қариялардың тұрмыс-тіршілігіне қатысты отын-суын әзірлеп, қыс мезгілдерінде үй-аула маңын қардан тазартып берді.

Сондай-ақ атаулы мерекелерде де жан-жақты үлес қосып, белсене араласты.

Іс-шараны толығырақ www.akmechet.kz  фотогалерея айдарынан көруге болады.