Арқалық қалалық «Мухтасиб Әлмұхаммед» мешітінің бас имамы Нұрхан қажы Асанұлы алқа мүшелерін жинап, маңызды мәселені тілге тиек етті.

Оның айтуына қарағанда, шаһар маңындағы дүниеден өткен кісілердің мәйітін жерлейтін орын толуға жақын. Сондықтан бұл маңызды мәселе қала әкімімен келісілген. Жаңа жер дайын, оған тиісті қаражат та бөлінген. Енді беделді ақсақалдардың қолдауы қажет.

Бас имам алдағы уақытта қолға алынатын қорымның бұрынғыдан ерекшелігі, Шариғат талабына сай, Қазақстан бойынша қолға алынға «Жаназа және жерлеу» рәсімдеріне сай салынбақ.

Жасыратын ештеңесі жоқ, жаназадан кейінгі жайылған дастарханда немесе басқа да ас беру секілді рәсімдерде ысырапшылдыққа жол берілуде. Бұл мәселеде де бірізділік пен тәртіпке сай болуы керек. Жиынға қатысқан алқа мүшелері Нұрхан қажы Асанұлының ұсынысын бір ауыздан қолдады.

Қостанай облыстық мешітінің баспасөз қызметі

Қари, дін және қоғам қайраткері әрі ақын Файзолла қари Сатыбалдыұлының туғанына 140 жыл толуына орай Амангелді ауданы "Сатыбалды Ишан" мешітінде ұйымдастырылған Құранның 30-шы бөлігін жатқа оқудан облыстық жарыс болып өтті.

Жарысқа Қостанай облысының қалаларымен аудандарынан жиырмаға тарта үміткер қатысып жүлдені сарапқа салды.Жарысқа қатысушылар өз бойындағы Құран және тәджуид ілімдерін айырықша көрсетті.Жарыс көрермендері үміткерлердің сан қилы мақаммен оқыған Құран аяттарын зейін салып сүйсіне тыңдады.

Қарилардан құралған әділқазылар алқасы әділ бағаларын беріп оза шыққан жүлдегерлерді анықтап берді.

Нәтижесінде 3-ші орынды Арқалық қалалық "Әлмұхаммед Мұхтасиб"мешітінің шәкірті Дуйсенов Қуандық иеленді.

2-ші орынға Қостанай облыстық "Аймағанбет қажы Спанұлы" атынан шыққагн Пірмағанбетов Ғабит.

Ал 1-ші орынды Қостанай қалалық "Жайлаубай ата"мешітінің шәкірті Ғазиз Дінмұхаммед ие болып көрерменнің ыстық қошеметіне бөленді.

Қостанай облыстық мешітінің баспасөз қызметі

Арман Қуанышбаевтың келесі сапары Рудный қалалық «Нұр» мешітінде кешкі уағызға ұласты.

Рудный мешітіне жиналған жұртшылықпен жүздесуі де өте әсерлі өтті.

Ол имандылық ордасында жиналған жамағатқа «Заманауи мұсылманның келбеті» тақырыбында ақшам уағызына қатысып, халықтың алғысына бөленді.

Жалпы, оның облыстағы сапары алдын-ала жоспарланған бағдарламаға сай нәтижелі әрі есте қаларлықтай ұйымдастырылды.

Қостанай облыстық мешітінің баспасөз қызметі

РАНТ мүшесі Арман Қуанышбаев Қостанайдағы сапары барысында қаладағы №38 еңбекпен түзету мекемесінде болды.

Онда жазасын өтеп жатқан 60 адаммен және сонымен бірге жеке кездесулер де болды.

Жалпы кездесу кезінде «Шынайы мұсылманның келбеті» тақырыбында насихат айтты.

Қостанай облыстық мешітінің баспасөз қызметі

Қостанайдағы арнайы сапарында Арман Баймаханұлы Қуанышбаев ұстаз Қостанай облыстық «Аймағанбет қажы Спанұлы» мешітінде жұма уағызымен жалғастырды.

Бұл күнгі қасиетті жұма уағызының тақырыбы «Ардақты Пайғамбарымызды (оған Алланың салауаты мен сәлемі болсын) жақсы көру» болатын.

Махаббатпен жаратқан адамзатты,

Сен де сүй, ол Алланы жаннан тәтті, – деп Хакім Абай айтқандай, Алланы танып, Оны жақсы көрген пенде, Жаратушының адамзат үшін мейірім ретінде жіберген хақ Пайғамбарын да жақсы көруіміз тиіс деп, соңында мешіт жамағатын мүбәрак Мәуліт айымен құттықтады. Әсерлі уағыз жамағаттың көңілінен шықты.

Жұма намазынан кейін Арман ұстаз мешіт жамағатымен бірге ел амандығы мен тыныштығы үшін дұға жасады.

Қостанай облыстық мешітінің баспасөз қызметі

Қостанайға арнайы сапармен келген Арман Қуанышбаев облыстық «Аймағанбет қажы Спанұлы» мешітте өңірдің дін қызметкерлерімен кездесті.

Ол осы кездесуде «Жат ағымның жақтастарымен жеке кездесулер өткізу әдістемесі» тақырыбында өтті.

Онда оңалту жұмысына бекітілген теологтар мен имамдар атқарып жатқан жұмыстар бойынша талқылады.

Қостанай облыстық мешітінің баспасөз қызметі

Көзі қарақты оқырманға өңірде арнайы сапармен болған Арман Баймаханұлы Қуанышбаевтың есімі жақсы таныс. Ол республикалық деңгейдегі білікті маман, РАНТ мүшесі, Түркістан облысы Кентау қаласындағы «Балаби қари» Құран жаттау орталығының директоры.

РАНТ мүшесі алдымен Қостанай қалалық «Марал ишан» мешітіне ат басын бұрды. Оны Бас имам Бектұрсын Уәлиев қарсы алып, имандылық ордасының тыныс-тіршілігімен таныстырды.

Киелі оңтүстіктен келген мейман жамағаттарға «Отбасының діндегі рөлі» атты ақшам уағызын өткізді. Жиналған қауым терең де мағыналы әңгімені ұйып тыңдап, шынайы алғыстарын білдірді.

Қостанай облыстық мешітінің баспасөз қызметі

Асыл дініміз Исламның Тобыл-Торғай жерінде тамыр жайып кемелденуіне үлес қосқан, ел тұтқасы бола білген дін қайраткері Сатыбалды ишан мен оның балалары. Біздің шағын жазбамызға негіз болған Файзолла Сатыбалдыұлы 1883 жылы Қостанай облысы, Аманкелді ауданында дүниеге келген. Әкесі Сатыбалды – сауатты, тақуа-діндар, ел құрметтеген ізгу жан, жұрт ол кісіні «Қыпшақ ишан» деп те атаған. Сатыбалды ишан – Бұхарада білім алған, құранды жетік меңгеріп, оқып жүріп «Ишан» деген атқа ие болған. Осындай текті әулеттен шыққан Файзолла ұари – алғаш сауатын өз әкесі Сатыбалдыдан алады. 9 жасында Тройцкідегі Ахун хазіреттен білімін ұштайды. Кейін Бұхараға барып, діни білімін тереңдетеді. Бұл жерде – қари Баһрам ұстаздан тәлім алып, әке сенімін, ел үмітін ақтап Құдай берген қабілет-қарымымен шариғат, фиқһ ілімімен қатар Алланың қасиетті кәләм-шәрифін де бойына сіңіріп 17 жасында қари атанады.

«Пенденің Тәңірі берер мұддұғасын, Тауфиқты қабыл етсе ирадасын. Ұстаздың ұлықсатын сол жерде алдым, Қарилық Құран Хатым фатихасын, - деп еске алады Файзолла ақын «Өмірбаян» атты жазбасында.

Файзолла елге қайтып келгеннен кейін туған жерінде діни қызмет жасайды. Торғайдағы атақты діндар тұлғалар – Оспанқожа, дәмолла Бәйту, Бейіс хазірет, Кәтен молла, Әлмұхамед Оспанұлы секілді ел ішіндегі ықпалы зор діни қайраткерлермен сырлас-дос болып, араласады. Осы кезде ақын Торғайдағы Алаштың көрнекті тұлғалары: Ахмет, Міржақып, Ахметсафа, Байқадам Қаралдин секілді тұлғалармен де тығыз байланыста болады. Патша құлап, қызылдар қыр көрсете бастағанда елдің іші де сан тарауға түскені белгілі. Кеңес үкіметі атқа мінгеннен кейін ел ішіндегі озық ойлы азаматтарға бүйідей тигені мәлім. Халық арасында беделге ие болған діндар тұлғалар ұсталды, қамалды, атылды.

Файзолла қари да діни қызметте жүргенде қамауға алынды. Ақыры Қостанайдың өкіл соты ақынды 14 жылға соттап, 1929-1935 жылдар арасында Ақтеңіз-Балтық, Новосібір каналдарын қазу жұмысына айдап жібереді. Алла қолдап, 14 жылға кесілген үкімді 6 жыл өтеп, аман-есен босайды. Алайда осы 6 жылда көрмеген мехнаты жоқ. Айдауда жүргенде Міржақып, Мырзағали Есполовтармен жүздескен. Ал, Мағжан Жұмабаевпен 2 жылдан астам бірге болған. Қапастан аман-есен оралған соң Алматыға келеді. Тігін цехында жұмыс жасап, ұлттық киім тігетін шеберлерге жетекші болады. Алайда басынан қиқу кетпей, Башқұртстанға өтіп, кейін Солтүстік Қазақстан облысы, Булаев ауданы және Қарағанды облысының Нұра ауданында тұрады.

Түрлі ауыр жолдарды бастан өткеріп, елге 1945 жылы ғана табан тірейді. Оның өзінде Қостанай облысының Әулиекөл ауданында тұратын досы Әлмұхаммед Ос¬панұлында аялдайды. Ал, туған жері Батпаққараға бір жылдан соң оралады. 25 жыл шамасында сыртта жүріп, қуғын-сүргінді бастан кешкен ақын туған жерінде өмірінің соңғы жылдарын өткізеді.

Файзолла ақынның қаламынан туындаған бірқатар шығармалары дін тақырыбын қамтиды. «Есің болса ер жігіт Алланы сүй»-өлеңі: Жаратқан жалғыз Алла сыйынарым, Ертелі-кеш мінәжат қып жалынарым. Одан басқа күштінің бәрі жалған, Жоқ оларға жалбаңдап жағынарым. Құдай берсе – кім оны ұстап тұрар, Ақылдылар – Алла ісін мақсат қылар. Жақсыға – жау жетеді ел ішінде, Бұғып тұрып тасадан тас лақтырар. Әділ жігіт – әр сөзді тергеп алар, Асықпай ақыл менен ойға салар. Халық – әділ қазы ғой, нақұрыстар, Байқамаса түбінде ұятқа қалар! Қызықпаймын бұл күнде бақ пен таққа, Жала жұқпас ешқашан көңілі аққа. Сол себептен бұл күнде таза жүріп, Сыйынамын Хақ Құдай, бір Аллаға! Бір Құдайдан басқаның бәрі бекер, Дүние – көзді арбаған бейне шекер. Есің болса ер жігіт Алланы сүй, Алдамшы бақ бір күні тастап кетер!...

Файзолла Сатыбалдыұлы – ең алдымен діндар тұлға, құранқари әрі ақын. Парсы, түркі, орыс және араб тілдерін жетік меңгерген. Оның өлеңдерінде терең философия, елдік, адамдық мұраттар басты орын алған. Ақын өлең-толғауларымен бірге үлкен дастан, поэмалар жазған. Оның: «Шәкір-Жамал», «Тоқымбет-Гүләйім», «Әбдіғапар хан», «Адамзаттың шежіресі», «Өмірбаян», «Ұзақ жол», «Ер Толыбай», «Имам Ағзам хазіреттің ақырғы ғұмыры» сынды шығармалары бар. Әрине, ұзақ жыл қуғын-сүргінде жүрген ақын көп қағажу көрді. Жазылған дүниелері дер кезінде жарық көрмеді. Өзі дүниеден озғасын да шығармалары бүркеуде болды.

Жазықсыз жапа шегіп, күйзелсе де Алланың рахметінен үміт үзбейді. Жабыққан көңілін жалынды жырымен серпілтуге тырысқан ақын бір сәт ширығып, өзіне-өзі қайрат беріп, жігерлендіріп қоюды да ұмытпайды.

«Ей Файз, сабыр ет, Бекем бол бейнетке!
Жар болса Кұдірет, Жетерсің зейнетке.
Қайғының қотырын қасыма, Көрсетпе көзіңнен тамшы жас!!
Мойыма мұңайып, жасыма, Азапқа қарсы тұр, бер шыдас!!»....

Өмірінің соңғы жылдары имандылықты біржола серік еткен ақын тұрғыластары Әлмұхаммед, Жарман, Өтеш, Нұрхан моллалармен бірлікте дін ісімен ғана шұғылданып, өткен өмір белестерін ой көзімен зерделеп, кейінгі ұрпаққа аталық, ұстаздық тағылымды ғибратымен нұр-шуақ болып төгіліп, ел құрметіне бөленіп ақсақалдық, қарттық кезеңге аяқ басады. Ол өзінің дүниеден өтерін де алдын-ала сезіне білді.