Республика күні қарсаңында Қостанай қалалық «Жайлаубай ата» мешітінде Қазақстан мұсылмандары діни басқармасының «Ізгі қоғам» бағыты аясында жас бүлдіршіндер үшін ойын ұйымдастырылды.
Мешітке жиналған балақайлар құрылған батутта секіріп, мәз-мәйрам болды. Оларға дастархан жайылып, тәтті тағамдар берілді.
Қуанышқа бөленген сәбилердің жүздерінен көтеріңкі көңіл-күй мен шат-шадыман күлкі айқын сезілді.
Қостанай облыстық мешітінің баспасөз қызметі
Меңдіқара аудандық «Қарамақы ата» мешітінің бас имамы Еркебұлан Жаңбырбайұлы Боровское ауылының Ғаббас Жұмабаев атындағы мектеп-гимназиясының жоғары сынып оқушыларымен кездесті.
Бұл жиында қазіргі қоғамдағы өзекті мәселе теріс діни ағымдардың келтірер зияны, оның алдын алу жайы әңгімеге арқау болды. Сонымен қатар, білім алу барысында қазақы мінезге сай әдептілікті ұстану да сөз болды.
Өйткені, адам баласы қанша білімді болса да мінезге бай, адамгершілігі мол, кісілік қасиеттері жоғары болуы тиіс. Кімге болсын, асыл қасиеттермен қатар, жан сұлулығы да аса қажет. Өзіңді тәрбиелеп дәріс беруші ұстазды сыйлаудың орны бөлек.
Дана халқымыз «Әдепті бала - арлы бала» деп босқа айтпайды. Барлық ізгілік мектеп қабырғасында қалыптасады. Сондықтан мұндай жүздесулердің жеткіншектерге берер пайдасы зор.
Кездесудің соңында бас имам осындай басқосуды ұйымдастырған аудандық ішкі саясат бөлімі басшылығы мен мектеп-гимназияның ұжымына шынайы алғысын білдірді.
Қостанай облыстық мешітінің баспасөз қызметі
13.10.2023
Қостанай қалалық "Жайлаубай ата" мешітінде алдағы Республика күніне орай жиналған жамағатқа дастархан жайылды. Жұртшылыққа мерекелік көңіл-күй сыйлау үшін ұлттық ойындар ұйымдастырылды. Мәселен, садақ ату, асық жарысы, гір көтеру, арқан тартыс халыққа жақсы әсер қалдырды.
Бір ғажабы, арқан тартудан ақсақалдар құрамы жеңімпаз атанды. Олар өздерінің әлі де дайындықтары жоғары екендігін дәлелдеді. Жарыс соңында жеңімпаздарға діни кітап пен сыйлық табыс етілді.
Қостанай облыстық мешітінің баспасөз қызметі
Қостанай аудандық "Маңдай батыр" мешітінде Мәуліт мерекесіне орай елімізге танымал дін қайраткері Садуақас Ғилманидің "Мәуліт шәриф" атты Мұхаммед пайғамбарымызға арналған қасидалары имандылық ордасына келуші жамағатқа насихат ретінде оқылды. Онда салауат пен мархаба айтылып, рухани кеш жоғары деңгейде өтті.
Жұма намазынан соң ұлттық дәстүріміз бойынша мерекенің құрметіне дастархан жайылды. Содан кейін аудандық мешіттің ардақты қарттарының бірі Сайым ақсақал жұртшылыққа жүрекжарды лебізін білдіріп, ақ батасын берді.
Қостанай облыстық мешітінің баспасөз қызметі
Қазақстан мұсылмандары діни басқармасының жанындағы "Қамқор шарапат" мекемесінің тапсырмасы бойынша елімізде «Ас беру мәдениеті» жөнінде жиындар өткізілуде.
Жуырда осынау маңызды құжат аясында Ұзынкөл аудандық «Балықты» мешітінде де аудан мен ауыл тұрғындарына, ерлер мен әйелдер жамағатына дөңгелек үстел өткізілді.
Жайылған дастархан басына жиылған халыққа «ҚҰДАЙЫ АС БЕРУ МӘДЕНИЕТІНІҢ НЕГІЗГІ ЖЕТІ ТІРЕГІ» жан-жақты түсіндірілді. Халықтың қойылған сұрақтарына нақты жауап берілді.
Қостанай облыстық мешітінің баспасөз қызметі
Бұл күндері жер-жерде қаржы пирамидасы хақында жиындар өтіп, халықты одан сақтандыру жөнінде білікті мамандар пікірлерін ортаға салуда.
Облыстық «Аймағанбет қажы Спанұлы» мешітінде де осындай маңызды мәселені қозғаған семинар болып өтті. Оған облыстық, Костанай, Тобыл, Рудный қалалық мешіттерінің имамдары қатысты.
Дін қызметкерлерінің алдында Қостанай облысы бойынша экономикалық тергеп-тексеру департаменті басшысының орынбасары Әлібек Төлепбергенов сөз сөйлеп, көптің көкейінде жүрген өзекті жайға жан-жақты тоқталды.
Ол қаржы пирамидасына анықтама беріп, одан қорғану мен басты белгілері жөнінде әңгімеледі. Имамдар көп мәселенің жай-жапсарына қанықты.
Қостанай облыстық мешітінің баспасөз қызметі
Жуырда Әулиекөл ауданының Құсмұрын елді-мекенінде Мәуліт мерекесі жоғары деңгейде аталып өтті. Онда ауданның Бас имамы Нұрбол қажы Балахмет және Аманқарағай ауылының молдасы Серікбай Испулов жиналған жамағатқа Мәуліт қасидаларын оқып берді.
Басқосуда мұсылман бауырларымыз салауаттар айтты. Көзге түскен жеңімпаздарға ақшалай сыйлықтар табыс етілді. Мерекенің құрметіне дастархан жайылып, аруақтарға бағышталып құран оқылды.Ақсақалдар бата берді.
Жиын соңында 10 мұқтаж отбасыларына азық-түліктей көмек көрсетілді. Рухани кешті жергілікті «Хақ «мешітінің молдасы Омар Закарин ұйымдастырды.
Қостанай облыстық мешітінің баспасөз қызметі
Қазақстан мұсылмандары діни басқармасының ұстанған негізгі бағыттарының бірі - оқу-ағарту саласы екендігі белгілі. Сондықтан оны жүзеге асыруда өңірдің имамдары да өздерінің лайықты үлестерін қосуда.
Бұл орайда тәжірибе алмасудың жөні бөлек. Жуырда Федоров аудандық «Жиентай қажы» мешітінің Бас имамы Руслан Маратұлы Қарабалық ауданынды болды.
Ол сапар барысында жергілікті Жастар ресурстық орталығында «Діни ағымдардың зардабы», «Ұрпақ тәрбиесі», Агротехникалық колледжінде «Құмар ойынның зардабы», «Суицид ұрпақ дерті», аудандық «Ғашура ана» мешітінде «Ғайбаттың зардабы» деген маңызды тақырыптарда насихат айтты.
Қостанай облыстық мешітінің баспасөз қызметі
Жітіқара аудандық «Ержан Тәтішев» мешітінде ерлер жамағаты арасында «Менің сүйікті Пайғамбарым» атты рухани- танымдық сайыс болып өтті.
Жарысқа қатысушылар 5 топқа бөлініп, алдын-ала арнайы дайындалған сұрақтарға билет арқылы жауап берді. Сайыс соңында жүлдегер командаларға құрмет көрсетілді.
Онда І орынға ұялы телефон, ІІ орынға 20 000 теңге, ІІІ орынға 10 000 теңге табыс етілді.
Қостанай облыстық мешітінің баспасөз қызметі
Қостанай облысының Бас имамы Бақытбек қажы Нұрғабылұлы арнайы іс-сапармен Рудный қаласына келді. Ол жергілікті «Нұр» мешітінде болып, имандылық ордасының жертөле қабатында салынып жатқан асхана құрылысымен танысты.
Содан кейін қаладағы аға буын өкілдері және мешіт қызметкерлерімен кездесіп, «Үлкенге құрмет - кішіге ізет» мәселесі қозғалған семинарға қатысты. Басқосуда мешіттің жанашыр қарияларын өткен қарттар күнімен құттықтап, сый-сияпат жасады.
Сондай-ақ, қазіргі таңдағы өзекті «Зират пен зиярат» тақырыбына байланысты мешіт ұжымы және ақсақалдар алқасымен дөңгелек үстел өткізді. Дін қайраткері онда өз ойын ортаға салып, пікір бөлісті. Қатысушылар сауалдарына нақты жауап алды. Абыз ақсақалдар бата берді.
Бас имам сапарының соңында мешіт маңындағы сауда дүңгіршегіндегі діни кітаптарды сараптаудан өткізді. Иесіне дәстүрлі дінімізді дәріптейтін имам Ағзам Абу Ханифа мазхабының аясындағы кітаптар ғана сатылуға тиіс екендігін, оның бағасын шарықтатпай, жұртшылыққа қол жетімді болуын ескертті.
Қостанай облыстық мешітінің баспасөз қызметі
Григорианский
Хиджра
