Достық үйіндегі рухани кеш үлкен ой салды.

Жуырда облыстық «Марал ишан» мешіті және Қазақстан қажылар қауымдастығы облыстық филиалының ұйымдастыруымен Достық үйінде рухани кеш болып өтті. Бұл басқосу қасиетті Рамазан айының танымдық, тағылымдық жақтарына арналды.

Аталмыш жиынды Қазақстан қажылар қауымдастығы облыстық филиалының төрағасы, «Зекет» қорының өңірдегі өкілі Жақсылық қажы Ғайсин ашты. Ол өзінің сөзінде жылына бір келетін Рамазан айының тәрбиелік мәні мен маңызына ерекше тоқталды.

Содан кейін облыстық «Марал ишан» мешітінің жаңа тағайындалған найб имамы Абдукахар Ерматов жұртшылық алдына шығып, жиналған барша қауымды алда келе жатқан Рамазан айымен шын жүректен құттықтады.

Білімді де білікті маман көптің көкейінде жүрген әрі оларды ерекше қызықтыратын осынау киелі айдың танымдық жағына көп көңіл бөлді. Рамазан айында жұртшылықтың ерекше күтетін себебі дәл осы айда Құран түскендігін ағайындардың есіне салды.

Басқосуда облыстық Дін істер жөніндегі басқарманың бас маманы Сапарғали Әбдиев те залға жиналған қауымды Рамазан айымен құттықтай келіп, жуырда ғана елордамыз Астанада әлемнің бірқатар елдерінің өкілдері бас қосқан съездің маңызы жөнінде де айтып өтті.

Сондай-ақ жиналған жұртшылық дін тақырыбына көптен бері қалам тартып жүрген көрнекті ақын Ақылбек Шаяхметтің Ораза туралы айтқан ғибратты сөздерін де ұйып тыңдады.

Біз көп ұлтты мемлекетте тұрамыз. Сол себептен де осынау жиынға өңірімізде тұратын өзге ұлт өкілдері де арнайы келіп, мұсылмандарды Рамазан айымен шын жүректен құттықтады.

Бұл орайда орыс қауымдастығынан арнайы келген Раиса Завгородняя және облыстық орыс драма театры директорының орынбасары Александр Чернышовтардың шын жүректен шыққан игі лебіздері де жиналған жұртшылықтың көңілінен шықты.

Мұндай берері мол кештер қашанда ән-күйсіз өтпейтіндігі белгілі.

Сондықтан Әсел Жұмақұлова, Манапбек Кәдіров, Қыдырбек Қиысхан және Светлана Обухованың орындаған әндері мен толғауларын көпшілік жылы қабылдады.

Басқосудың соңында өңірдегі абыз қарттарымыздың бірі Сапар қажы ағайындарға алдағы Рамазан айына байланысты өзінің жылы лебіздерін білдіріп, өзінің ақ батасын берді.

Біз рухани кешке құрметті қонақ ретінде шақырылған ардақты ақсақалдарымызды әңгімеге тартқан едік. Облыстық мешіттің жанашыры Сайлаубай қажы Молдаш тағылымды жиыннан алған әсері жайлы былай деді:

- Мұндай кештердің ұйымдастырылғаны өте жақсы. Ол үшін облыстың бас имамы Асылхан қажы Мұханбетжанұлы мен облыстық қажылар қауымдастығының төрағасы Жақсылық қажы Ғайсинге айтар алғысымыз шексіз.

- Бұл биылғы Ораза алдындағы көпшілікке ой салар игі шара болды. Рамазан айының қадірі мен қасиеті жайлы жан-жақты айтылды. Меніңше, үлкен мен кіші басқосудан өздерінің таным көкжиектерін кеңейткендіктері даусыз.

- Жоғарыда баяндалған жиынға облыстық «Марал ишан» мешітінің найб имамдары Дархан Сыздықов, Асқар Қуатбекұлы және БАҚ өкілдері қатысты.

ҚМДБ-ның Қостанай облысындағы
өкілдігініңбаспасөз қызметі