Облыстық мешіттегі семинар: «Әл-Азһар» университетінің түлегі, Шығыс Қазақстан облысындағы «Халифа Алтай» мешітінің ұстазы Бекзат Азатбекұлы Құсанбаев Қостанай қаласына арнайы іс-сапармен келді.
Ол алдымен облыстық «Аймағанбет қажы Спанұлы» мешітінде ЖАНТ өкілдерімен «Діни талас-тартыстың салдары» тақырыбында семинар өткізді. Жиыннан дін қызметкерлері көп жайды көңілдеріне түйді.
РАНТ мүшесі курсанттармен кездесуі: Қостанай облыстық «Аймағанбет қажы Спанұлы» мешітінің найб имамы Абзал Сұлтанғалиұлы Қазақстан Республикасы ішкі істер министрлігіне қарасты Қостанай академиясының курсанттарымен кездесті.
Онда олар қазіргі қоғамдағы өзекті мәселелер туралы айта келіп, жастарды толғандыратын жайлар жөнінде ой-пікірлерін ортаға салды. Тыңдаушылар көкейде жүрген сауалдарына тұщымды жауап алды.
«Марал ишан» мешітінде: РАНТ мүшесі Бекзат Құсанбаев Қостанай қалалық «Марал ишан» мешітіне де ат басын бұрды. Онда жиналған жамағатпен «Ихсан жүрек тәрбиесі» тақырыбын қозғады.
Ұстаз көтеріліп отырған көкейтесті мәселе хақында жан-жақты әңгімеледі. Жүздесу барысында мәртебелі қонақ қатысушыларды қызықтырған сұрақтарға жауап берді.
Жазасын өтеушілермен жүздесті: Елімізге танымал азамат, Шығыс Қазақстан облысындағы «Халифа Алтай» мешітінің ұстазы Бекзат Құсанбаев Қостанай қаласындағы № 38 түзету мекемесінде де болып, жазасын өтеушілермен кездесті.
Онда «Фиқһтағы мазһап түсінігі мен Ақида мәселесіндегі мазһап түсінігі» тақырыбында әңгіме өрбітті.
Қостанай облыстық мешітінің баспасөз қызметі
Қазақстан мұсылмандары діни басқармасының төрағасы Наурызбай қажы Тағанұлы Арқалық қаласында су тасқынынан зардап шеккен отбасылардың жаңа пәтеріне арнайы құттықтап барды.
Бас мүфти Арқалық қаласындағы қуаныш иелерін қоныс тоймен құттықтап: «Қиындыққа жеңілдік беріп, қайғы соңын қуанышқа ұластырған Алла Тағалаға сансыз шүкірлер болсын. Жаратушы Иеміз жаңа баспаналарыңызға бақ-береке беріп, отауларыңыздан елге, жерге қызмет ететін ұл-қыздардың өсіп шығуын нәсіп еткей» деп ақжарма тілегін арнады.
Айта кетейік, бүгін ҚМДБ Төрағасы Арқалық қаласында су тасқынынан зардап шеккен отбасыларға пәтер кілтін табыс етті. Олардың қатарында Әйел-қыздар секторының ұйытқы болуымен баспаналы болған Дәулет Дүйсенбаевтың көпбалалы отбасы бар.
Бүгін Қазақстан мұсылмандары діни басқармасының төрағасы Наурызбай қажы Тағанұлы Қостанай өңіріне сапары барысында Арқалық қалалық «Мұхтасиб Әлмұхаммед» мешітінің тынысымен танысты.
Бас мүфти аудан әкімі Әмірхан Біркенұлы және мешіт ақсақалдарымен жүздесіп, сұхбаттасты. Сондай-ақ мешіт музейін тамашалап, Қостанай өңірінің дін қайраткері, тарихи тұлға Әлмұхаммед Оспанұлының қолданған заттары, киімдері мен қолжазбалары, кітаптарымен танысты.
Айта кетейік, бүгін Бас мүфти Наурызбай қажы Тағанұлы Арқалық қаласында үйі суға кетіп, баспанасыз қалған өңір тұрғындарына пәтер кілтін табыстайды.
Дереккөз: https://www.muftyat.kz/kk/news/qmdb/2024-05-28/44746-bas-mfti-aralyi-meshtne-arnajyi-bardyi-foto
Қазақстан мұсылмандары діни басқармасының төрағасы, Бас мүфти Наурызбай қажы Тағанұлы Қостанай облысындағы Арқалық қаласына арнайы іс-сапармен келді.
Ол «Зекет және қайырымдылық» қорының «Ел үлесі – пәтерге» жобасы аясында көктемгі су тасқынынан зардап шеккен жеті отбасына баспана кілтін тапсырды.
Дін қайраткері жиналғандар алдында тебірене сөз сөйлеп, мұндай қиын сәттерде халқымыз қашан да ынтымақ пен бірліктің жарқын үлгісін көрсетіп отырғандығын айтты.
Жалпы, Торғай өңіріндегі апатта баспанасыз қалған шаңырақтарға қолдау танитуда облыстағы бауырлас әзербайжан-түрік бауырлар да аянып қалған жоқ. Олар Амангелді селосында 1, Жангелдин ауданында 2 үйді алуға өздерінің қомақты үлестерін қосты.
Бұл орайда «ЮК-Логистик», «Бест-Костанай», «Атамекен ДС», «Вадиса-М», «Лиман», «Агро-Корн», «Вита-Гарден» жауапты шектеулі серіктестіктері мен «Кызылдаш» дәмхана ұжымдарының демеушілік жасағандарын ерекше ықыласпен атап өткен жөн.
Қостанай облыстық мешітінің баспасөз қызметі
Рудный қалалық «Нұр» мешітінде мектеп жасындағы шәкірттер арасында Құранның 30-шы парасы және оның жартысын жатқа оқудан “Құран сарқылмас қазына” атты облыстық деңгейде құран жарысы ұйымдастырылды.
Аталған іс-шараға өңірдің қалалары мен аудандарынан үміткерлер қатысып, бақтарын сынады. Оларға облыстық «Аймағанбет қажы Спанұлы» мешітінің найб имамы Тимур Туребаев, Қостанай қалалық «Жайлаубай ата» мешітінің ұстазы Әлібек Қылышбек және Арқалық қалалық «Мухтасиб Әлмухамед» мешітінің ұстазы Арлан Нұғмановтар әділқазылық етті.
Жарыс қорытындысы бойынша 30-шы параны жатқа оқу бойынша І орынды Дінмұхаммед Ғазиз, ІІ орынды Еркебұлан Алдажаров, ІІІ орынды Ернар Ермағамбет, ал жарты пара бойынша І орынды Әділет Алдажаров, ІІ орынды Абдуррахман Сәндібек, ІІІ орынды Арсен Ермағамбет иеленді.
Жеңімпаздарға ақшалай және естелік сыйлықтар табыс етілді. Жиналған қонақтар мен шәкірттерге, жамағатқа «Ықылас» дәмханасында дастархан жайылды. Онда ұстаздар Құран құндылығы жайлы насихат айтып, үлкендер бата берді.
Қостанай облыстық мешітінің баспасөз қызметі
Арқалық қалалық «Мухтасиб Әлмұхаммед» мешіті ұжымының ұйымдастыруымен жергілікті ақсақалдармен арнайы жиын өтті. Оны ашқан Бас имам Нұрхан Асанұлы «Қарты бар елдің қазынасы бар» дегендей, аға ұрпақ өкілдерінің көмегі мен ықпалы қашан да маңызды екендігіне тоқталды.
Басқосуда ақсақалдар мектебін құру, қабір зиратын бір ізге түсіру, ас беру мәдениеті сынды өзекті тақырыптар қозғалып, көтерілген мәселелер толықтай қолдау тапты.
Жиын соңында көпшілікке дастархан жайылды. Онда осы өңірге сыйлы абыз ақсақал бата берді.
Қостанай облыстық мешітінің баспасөз қызметі
Жақында Қостанай қалалық “Жайлаубай ата” мешітінің ұстазы Әлібек қаридың үйымдастыруымен жамағат арасында Құранды мәнерлеп оқудан жарыс өтті.
Онда әділқазылар алқасы қатысушылардың білімін саралап, қорытынды шығарды. Соның нәтижесінде жүлделі бірінші орынды - Бақдаулет, екінші орынды - Иса, үшінші орынды - Арсен есімді бауырларымыз иеленді.
Бас имам Шоқан қажы Әмірхановтың айтуына қарағанда, осы жарысқа қала бойынша 18 шәкірт қатысып, бақтарын сынады. Жүлдегерлерге лайықты құрмет көрсетіліп, бағалы сыйлықтар тапсырылды.
Қостанай облыстық мешітінің баспасөз қызметі
Қостанай облыстық «Аймағанбет қажы Спанұлы» мешітінің жанындағы Зекет және қайырымдылық қорының қызметкерлері өткен сәуір айында да уақытпен санаспай жұмыс істеді.
Мәселен, өңір бойынша 51 іс-шара өткізіліп, 2 335 отбасына көмек берілді. Осы мақсатқа 33 646 996 теңге жұмсалды.
Баршаға мәлім, аталған айда өңірде бірқатар елді-мекендердегі тұрғындар күтпеген табиғат апатынан зиян шекті.
Облыстық мешіттің найб имамы, қор жетекшісі Бақытжан қажы Икрамның айтуына қарағанда, негізінен қайырымдылық көмектер су тасқынынан зардап шеккендер мен өзге де әлеуметтік жағынан аз қамтылған жанұяларға көрсетілді.
Қостанай облыстық мешітінің баспасөз қызметі.
Адамзаттың санаулы ғұмырында көптеп кездесетін, сананы еліктіріп өзіне тартатын нәрсенің бірі – құмар ойындары десек болады.
Құмар негізі арабша сөз, бірақ аятта «майсир» сөзі келтірілген. Бұл сөз жеңіл жолмен мал табу мағынасын білдіреді.Асыл дінімізде құмар ойындарына тыйым салынып, лағынеттелген.
: يَا أَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالْأَنصَابُ وَالْأَزْلَامُ رِجْسٌ مِّنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ إِنَّمَا يُرِيدُ الشَّيْطَانُ أَن يُوقِعَ بَيْنَكُمُ الْعَدَاوَةَ وَالْبَغْضَاءَ فِي الْخَمْرِ وَالْمَيْسِرِ وَيَصُدَّكُمْ عَن ذِكْرِ اللَّهِ وَعَنِ الصَّلَاةِ ۖ فَهَلْ أَنتُم مُّنتَهُونَ «Әй мүміндер! Арақ, құқмар, тігілген тастар(пұтттар) және бал ашатын оқтар лас, шайтанның істерінен. Одан сақтаныңдар, құтыларсыңдар. Негізінен шайтан арақта, құмарда араларыңа дұшпандық әрі кек салып, Алланы еске алудан және намаздан қалдыруды қалайды?».
Мінеки Құранда құмар ойындарының адамды мас қылатын ішімдіктермен бір қатарға қойылып, олардың адамға, отбасына, қоғамға, моральдық құндылықтарға тигізетін кесірінің бірдей екендігі анық айтылған. Сонымен қатар құмар ойындары дос- жаран мен туған- туыстың арасына да іріткі салатын нәрсе.
Құмар ойындары сондай-ақ, қоғамды жалқаулармен, еріншектермен, ар-ұятын сатушылармен толтырып, өзін, отбасын, айналасын, дінін ұмыттырады. Ондайға ұшыраған жанның барар жері белгілі.
Осы орайда дана Абай атамыздың: -Өтірік, өсек, мақтаншақ, еріншек бекер мал шашпақ, - немесе: -Тамағы тоқтық, көйлегі көктік, аздырар адам баласын, - деген өлең жолдары еріксіз ойға оралады.
Шын мәнінде, шариғат адамға зиян келтіретін ойындардың бәріне тыйым салған. Бұл туралы Пайғамбарымыз ﴾ﷺ﴿ : «Кім өз досына: «Жүр, құмар ойын ойнайық» десе, садақа берсін»,-дейді. Бұдан аңғаратынымыз, кімде-кім досына құмар ойынды ойнауға ұсыныс жасаса оның садақа беруі - міндет. Демек, ол күнәсі үшін садақа беріп қана құтыла алады деген сөз.
Сонымен қатар, хадисте айтылып тұрған мағынада ойынды ойнау былай тұрсын, тек шақырудың өзі де харам екенін білдіреді. Сол себепті өтеу ретінде садақа беру - үкім болып табылады. Пайғамбарымыздың ﴾ﷺ﴿ бұл хадисте садақа беріңдер деп меңзеп тұрғаны ол жеке адам емес, бүкіл қоғамға зиян келтіретіндіктен жеккөрінішті құмар ойындарға тыйым салынғандығын көрсетеді. Өйткені қазіргі таңда құмар ойыны адам баласын өз-өзіне қол жұмсау, бір-бірін өлтіру, ажырасу, ұрлық-қарлық, зорлық-зомбылық, қарызға бату сияқты халге де жеткізіп отыр. Бұдан да сорақысы құмар ойынға елітушілердің арасында өз әйелін, үйін, көлігін, т.б. қажеттіліктерін бәске тігушілердің де кездесетіндігі жасырын емес. Осылардың салдарынан қаншама отбасы ойран болып, жапа шегуде.
Ғалымдар еңбексіз келетін табыстың негізгі түрлерінің бірі ретінде құмар ойындарын алға тартады. Сахаба Абдулла ибн Омардың ﴾р.а.﴿: «Құмар ойын – еңбексіз, оңай табыспен келеді», – деген сөзі бар.
Сондықтан, Ислам діні әр мұсылманды Алланың көрсеткен жолымен өз ризығын тауып, адал ас ішіп, иманның кәусардай таза бұлағынан сусындауын қалайды. Ал, құмар ойындардың адамды еңбек етуден тыйып, оны бос армандарға жетелейтіндігі анық. Құмаршы құмарға берілудің нәтижесінде Алланың алдындағы, қоғам, өзі мен отбасы алдындағы барлық жауапкершілікті ұмытып, өзіне берілген мүмкіндіктерден айырылады.
Расына келгенде, шариғатта рұқсат етілген ойындардың да бар екендігін айтуға тиіспіз. Ондай ойындардың басты ерекшеліктері – олардың адамға пайдалы және мағыналы болуында деп түсінуіміз керек. «Адамның денесі секілді, жүрегі де қалжырайды, сондықтан мағыналы ойын-сауық құрыңыздар», «Жүректі уақытымен демалдырып тұрыңдар, әйтпесе демалмаған жүрек соқыр жүрекке айналады», дейді.
Мысалы, той-томалақтарда, салтанатты кештерде және сәби дүниеге келген кездерде мұсылман үмметі жиналып, өзара қуаныштарын бөліседі. Мұндай басқосулар шариғатта рұқсат етілген амалдар арқылы жүзеге асырылса құба-құп. Ал, арақ-шарап ішу, даңғазалық жасап билеу, дарақы күлкіге,бос әңгімелер мен өсек-аяңдарға жол беру – шайтанның істерінен саналатындықтан олардан сақтану қажет. Сондықтан демалыстың түрін жан-жақты өлшеп барып қана таңдаған дұрыс. Сонымен қатар, шариғатта әртүрлі спорттық ойындар мен жарыстарға да ерекше назар аударылады. Жалпы, спорт адамның денсаулығын жақсартып, өз-өзін сергек сезінуге күш беретіндіктен онымен айналысушы күнделікті діни құлшылықтарын да құштарлықпен жасайтын болады. Өйткені, спортшыда қалжырау, еңсесі түсу деген болмайды.
Жалпы, құмар ойындарының зардабы елдің дамуына өзіндік кері әсерін тигізіп, адамның кері кетуіне ерекше ықпал ететіндігі сөзсіз екендігін нақты ұғынуға тиіспіз. Ел болып, бесігімізді түзейік десек, құмар ойындарына шатылып, шайтанның арбауына түспейік. Иманымызды күшейтіп, өзімізге, отбасымызға, айналамызға, қоғамға, қоршаған ортаға пайдалы істермен айналысайық. Алла тағала біздерді құмар сияқты лас ойындардың шырмауына түсуден сақтасын деп тілейік.
Қарабалық ауданы «Ғашура ана» мешітінің имамы Рахым Серік
Қазақстан мұсылмандары діни басқармасы «Qamqor-Sharapat» салттық қызмет көрсету орталығы еліміздің барлық өңірлерінде зират тазалығына айрықша назар аударуда.
Мәселен, облыстағы Федоров ауданына қарасты мұсылман зираттарында тазалық жұмыстары жүргізілді. Бұл орайда осынау игілікті іске өздерінің лайықты үлестерін қосқан азаматтар да аз емес.
Сөздің орайы келгенде, Федоров ауылдық округінің әкімі Болат Арманұлы, техника жағынан қол ұшын берген «Ақжан және біз» жауапкершілігі шектеулі серіктестігінің басшысы Рахым Жұмағалиұлы және барша жергілікті тұрғындар белсене атсалысты.
«Өлі риза болмай, тірі байымайды» демекші, аруақтарға құран бағышталып, қабірлеріне зиярат етілді.
Қостанай облыстық мешітінің баспасөз қызметі
Миләди
Хижри
