Жақында өңіріміздің Жангелдин ауданының орталығында тұратын Саят Нысағалидың қайғылы жағдай баршамыздың қабырғамызды қайыстырды.

Оның отбасында тілсіз жау – өрттің кесірінен сол кезде анасы, жұбайы және екі баласы қайтыс болған болатын.

Ол бала шағасын өрттен құтқарамын деп жүргенде денесін өрт шалып күйіп қалған болатын. Алайда ол да жұма күні жаны бақилық болды.

Бұл жағдайды естіген қалың жұртшылық бейжай қарай алмады. Облысымыздағы барлық аудан және қала мешіттерінің ұжымдары «Көп түкірсе, көл болар» демекші, қайырымдылық мақсатында 1 миллионнан астам қаржат жинап, әр намазда тілекші болды.

Осы жиналған қаражатты Жангелдин ауданының бас имамы Рүстем Әмірханов өрттен зардап шеккен шаңырақтың туған-туыстарына арнайы барып тапсырды. Сөйтіп, дін қызметкерлері де күтпеген жерден болған апатқа немкетті қарай алмайтындығы мен жоғары адамгершілік қасиеттерін көрсетті.