Қостанай аудандық "Маңдай батыр" мешіті ұжымының ұйымдастыруымен Тәуелсіздік мерекесіне орай өңірдегі дін қызметкерлері мен жамағаттарының арасында футболдан жарыс өткізілді.

Әділқазылардың шешімі бойынша І орынды облыстық "Аймағамбет қажы Спанұлы", ІІ-ІІІ орындарды Қостанай қалалық "Жайлаубай ата" және Рудный қалалық "Нұр" мешіттерінің командалары иеленді.

Жарыс қорытындысында жүлдегерлерге арнайы кубок, медаль және ақшалай сыйлықтар табыс етілді.

Қостанай облысының баспасөз қызметі

Таяуда Қостанай ауданына қарасты Әлжан елді-мекеніндегі мешіттің халық игілігіне берілгеніне бір толды. Бұл оқиға Тәуелсіздік мерекесіне тұспа тұс келді.

Сондықтан қос қуаныш дәл осы күні аталып өтілді. Салтанатты жиынға алыс жақыннан келген құрметті қонақтар, аталған мешіттің ірге тасы қалануына белсене атсалысқан азаматтар, ел ағалары және жамағат қатысты.

Онда алдымен Қостанай облысының Бас имамы Бектұрсын қажы Уәлиев сөз сөйлеп, барша қауымды мерекемен құттықтады. Жұртшылыққа имандылық ордасы жайлы бейне фильм көрсетілді.

Мешіттің ірге тасын қаласуға атсалысқан бірқатар азаматтарға Алғыс хаттар тапсырылды. Мұндай құрметке Медет Байзақов, Сапар Сейтқалиев және Ғизат Дарбаева ие болды.

Сөздің орайы келгенде, жоғарыда аталған шараның бас-қасында болған Ертарғын Жұбанышевтің және басқалардың да сіңірген еңбегін ерекше атап өткен жөн.

Жергілікті халықтың шынайы ықыласымен мешіттің асханасында дастархан жайылып, ас берілді. Онда өнерпаздар ән мен күйден шашу шашты.

Есімі өңірімізге кеңінен танымал Торғайбай ақсақал ақ батасын берді. Тобыл қаласының имамы Дархан Сыздықов бастаған қала және ауыл имамдары Тәуелсіздіктің қадір-қасиеті жайлы насихаттарын айтты.

Қостанай облыстық мешітінің баспасөз қызметі

Тәуелсіздік күніне орай Қостанай аудандық "Маңдай батыр" мешітінің ұжымы және жанашыр жамағаттың ұйымдастыруымен "Ел бірлігі – ең асыл қасиет" атты рухани кеш өткізілді.

Бұл жиында Қостанай облысының Бас имамы Бектұрсын қажы Торғайбайұлы, Түркістан облысына қарасты Сайрам аудандық “Ы. Иманалиев” мешітінің Бас имамы Арыстан Оразалыұлы және ұстаз, ақын, абайтанушы Абай Қалшабек, тарихшы Рүстем Үсеновтер көпшілік қауымға дін мен дәстүрді байланыстыра отырып, уағыз-насихат айтты.

Қостанай облыстық мешітінің баспасөз қызметі

Қостанай облыстық «Аймағанбет қажы Спанұлы» мешітінің жанындағы Зекет және қайырымдылық қорының қызметкерлері Тәуелсіздік мерекесінің құрметіне көмекке мұқтаж жандарға қолдау көрсету мақсатында қайырымдылық іс-шарасын өткізді.

Мәселен, 20 отбасыға күнделікті тұтынатын азық-түлікті тапсырды. Мешіт тарапынан жасалған мұндай нақты көмекке дән риза болған шаңырақ иелері шынайы алғысын білдірді.

Қостанай облыстық мешітінің баспасөз қызметі

Тәуелсіздік мерекесі қарсаңында, Қостанай облысының Бас имамы Бектұрсын қажы Уәлиев арнайы іс сапармен өңіріміздегі Сарыкөл ауданында болып, бірқатар маңызды кездесулер өткізді.

Ол аталған аудан әкімінің орынбасары Әлия Бекмағанбетовамен жүздесу барысында қалыптасқан діни ахуал және алдағы кездері атқарылатын жұмыстар жайлы әңгіме өрбітті. Оған «Ұлы дала төсіндегі Ислам» кітабын сыйға тартты.

Ол жергілікті «Аққозы қажы» мешітіндегі жамағатпен өткен жиында «Ислам және дәстүр құндылығы» тақырыбында насихат айтты. Жұртшылық оның уағызын ұйып тыңдады.

Бас имам аудандық кітапханада мәдениет үйінің қызметкерлерімен ұйымдастырылған кездесуде «Дін мен дәстүр» хақында тағылымды сөз қозғалып, қатысушылардың сауалдарына нақты жауап берілді.

Қостанай облыстық мешітінің баспасөз қызметі

Қостанай қалалық "Жайлаубай ата" мешітінде Тәуелсіздік күні қарсаңында "Тәуелсіздік -Тәңір берген тәтті сый" атты жамағатпен кездесу өткізілді.

Онда наиб имам Бақберсін Ізбасаров Тәуелсіздіктің қадір-қасиетін жете ұғыну, ата-бабаларымыздың қазіргі егемендікке қол жеткізу үшін қаншама тер төккенін, соны әрбір азамат бағалай білуі қажет екендігін баяндады.

Қостанай облыстық мешітінің баспасөз қызметі

Тәуелсіздік күні қарсаныңда Ұзынкөл аудандық «Құрман баба» мешітінде жастарға арналған танымдық-тәрбиелік маңызы зор «Отанды сүю иманнан» тақырыбында кездесу өткізілді.

Онда ата – бабамыздың егемендік жолындағы ерлігі үлгі етіліп, өскелең ұрпаққа өз Отанын сүюге, еліне, халқына адал қызмет етуге байланысты ұлағатты насихаттар айтылды. Жергілікті спорт сарайында дзюдо күресінен жарыс ұйымдастырылып, жеңімпаздар марапатталды. Содан кейін мешіттің асханасында жиналғандарға дастархан жайылды.

Сонымен қатар Кәмшат Дөненбаева атындағы жалпы білім беретін мектепте ұстаздардың қатысуымен «Жаса, жайна тәуелсіз Қазақстан!» атты кеш те есте қаларлықтай әсер қалдырды.

Ал, «Айгөлек» бөбекжайында «16 - желтоқсан Тәуелсіздік алған күн!» мерекелік шарасы жалғасын тапты. Бүлдіршіндер ән шырқап, би биледі. Мұндағы тәрбиешілерге лайықты құрмет көрсетілді.

Осы басқосуларда аудандық мешіттің Бас имам Есенгелді қажы Сақтағанұлы барша қауымды мейраммен құттықтап, қойылған сұрақтарға нақты жауап берді.

Қостанай облыстық мешітінің баспасөз қызметі

Еліміздегі айтулы мереке Тәуелсіздік күні қарсаңында өңіріміздегі бірақатар мешіттерде танымдық - тағылымық жағы мол жиындар болып өтті.

Мәселең, Лисаков қалалық "Әбдіхаим Саламатұлы" мешітінің ұжымы Тәуелсіздік күніне орай ұйымдастырған «Тәуелсіздік тәңір берген тәтті сый» атты басқосу қатысушыларға үлкен әсер қалдырды.

Жиын барысында мешіттің Бас имамы Әкімбек Нұрханұлы және қалалық "Жастар ресурстық орталығының" басшысы Ділдә Хайратқызы сөз алып, Тәуелсіздік, Отан, мемлекет туралы өз ойларын ортаға салды.

Сондай-ақ Арқалық қалалық «Мұхтасиф Әл-Мұхаммед» мешітінде де ел өмірінде ерекше орын алатын мерекеге байланысты іс-шара ұйымдастырылды. Онда егемендік жөнінде насихаттар айтылып, ақида, фиқһ, намаз пәндері жөнінде сұрақтар қойылды. Жеңімпаздарға сертификаттар тапсырылды.

Сонымен қатар Әулиекөл аудандық «Әмит ишан» мешітінде өткізілген жамағат арасындағы "Тәуелсіз ел бақытты" деп аталатын интелектуалды сайыстың да тәрбиелік мәні өте жоғары болды.

Аталған сайыстың әділқазылар құрамына ауданға қарасты ауылдардың имамдары енді. Олар әрбір қатысушыға әділ бағасын берді.

Қостанай облыстық мешітінің баспасөз қызметі

Бір қойды тарту етті

Сонау оңтүстіктен өңіріміздегі Бейімбет Майлин ауданының Новоильин ауылына Сабыржан Таджиевтің отбасы қоныс аударған болатын. Әрине, оларды жергілікті ағайындар үлкен қуанышпен қарсы алды.

Орталарына қосылған жанұяға деген құрметтің белгісі ретінде осы ауданның азаматы Бақберген Қасымұлы бір қойды тарту етті.

Имамның ауылдарға сапары

Жоғарыда аталған ауданның бас имамы Ислам Шамғынұлы облыстық мешітте ұйымдастырылған «Дін мен дәстүр: ысырапшылдықтың алдын алу» жөніндегі конференцияда қабылданған шешімдерді халыққа түсіндіру мақсатында бірқатар елді-мекендерде кездесулер өткізді.

Мәселен, ол Тобыл кенті мен Байшуақ және Новоильин ауылдарында болып, жергілікті жұртшылыққа өзекті мәселе жайлы тілге тиек етті. Жиналғандар көп жайды көңілдеріне түйді.

Тәуелсіздік мерекесіне арналды

Жуырда Бейімбет Майлин аудандық әкімдіктің мәдениет және тілдерді дамыту бөлімінің қызметкерлерімен «Тәуелсіздік Тәңір берген тәтті сый» атты кездесу болып өтті.

Онда егемендіктің арқасында өткен жылдарда еліміздегі қол жеткен толағай табыстар әңгімеге арқау болды. Жиында қатысушылар көкейінде жүрген сауалдарын қойып, оған нақты жауап алды.

Қостанай облыстық мешітінің баспасөз қызметі

Намаз Ислам дініндегі негізгі тіректерінің бір тірегі болып табылады. Алла Тағала Кұран Кәрімде (اقيموا الصلاة) Намаздарыңызды тұрғызыңыздар деп көптеген аяттарда бұйырған. Яғни толық тәмәм етіңіздер дейді. Пайғамбар (Алла Тағаланың игілігі болсын) өсиетінде имам Муслимнің сахих жинағында Әбу Хурайрадан (оған Алла разы болсын) жеткен хадисте: ابو هريرة عن رسول الله صلى الله عليه وسلم قال( اقيمو الصف في الصلاة فإن إقامة الصف من حسن الصلاة )

«Намазда саптарыңызды түзу етіңіздер, әлбетте саптың түзулігі намаздың көркемділігінен» делінген. Пайғамбарымыз Мұхаммед (Алла Тағаланың игілігі болсын) жамағат намазындағы саптың түзулігі маңызды болғаны себепті, намазға сапталудың көрінісін Сахабаларға баяндап, көрсетіп кетті.
(البراء بن عازب قال؛ كان رسول الله صلي الله عليه وسلم يتخلل الصفوف من ناحية إلى ناحية ويمسح مناكبنا و صدورنا يقول (لا تختلفوا فتختلف قلوبكم)

Барроғу ибн Ғазибтен (оған Алла разы болсын) жеткен хадисте бұл хадис имам Ахмад, Әбу Дәуід және имам Нәсәидің еңбектерінде келген:

Алла елшісі (Алла Тағаланың оған игілігі мен сәлемі болсын) саптың бір жағынан екінші жағына қарай өтіп, сапты түзететін және иықтарымыз бен кеуделерімізді туралап айтатын сап ретін бұзбаңдар, (сапта) әрқилы болмаңыздар, нәтижеде жүректеріңізде алауыздық пайда болады. Расында Алла Тағала мен Оның періштелері әуелгі қатарда тұрғандарға Хақ Тағаланың рахметін тілейді.

Әнәс ибн Мәликтен (оған Алла разы болсын) жеткен хадисте:
(عن أنس بن مالك عن النبي صلي الله عليه و سلم قال؛ أقيموا صفوفكم ,فإني أراكم من وراء ظهري و كان أحدنا يلزق منكبه بمنكب صاحبه و قدمه بقدمه)

Пайғамбарымыз Мұхаммед (Алла Тағаланың игілігі болсын) «саптарыңызды түзу етіңіздер, әлбетте мен сіздерді артқы тарапымнан да көремін делінген.

Міне осы секілді жамағат намазындағы саптың көрінісін баян еткен хадистер көп келген. Бұл хадистерден түсінілетін нәрсе ол намаздағы саптың түзулігін сақтау. Бұл түзулік хадисте келгеніндей, пенде сапта тұрғанда иығын қатарлас тұрған адамның иығымен теңестіріп, кеуделерін саппен қатар ұстап, тобықтарын тең ету. Бұл намаздың әдебінен болып табылады.. Намаз пенденің Раббысымен байланыста болатын кезі. Сол себепті ғибадат етуші намаз құлшылығын өтеуде өзінің пенде екенін сезініп Раббысына деген толық ықыластығы мен көркем әдебін сақтауы тиіс.

Ал кәзіргі таңдағы кейбір намазхандардың жамағат намазында хадисте Паиғамбарымыз (Алла Тағаланың игілігі болсын) (سدوا الخلل) «бос орынды бекітіңіздер» деген деп, намазда сапталуларында аяқтарын өз иық мөлшерінен алшақ ашып тұрулары намаз әдептеріне сәйкес келмейді. Өйткені хадисте айтылған сөздің біріне амал етемін деп басқасын тәрк етуі дұрыс емес. Пайғамбарымыз (Алла Тағаланың оған игілігі мен сәлемі болсын) «бос орынды бекітіңіздер» дегенде екі аяқ арасындағы орын емес бәлкім екі адам арасындағы орын айтқан.

Айбек Аманқосұлы Жітіқара аудандық «Ержан Тәтішев» мешітінің бас имамы