Жуырда Қостанай қаласындағы Ахмет Байтұрсынұлы атындағы халықаралық әуежайда намазхана ашылды. Оның салтанатты жиынына облыстың Бас имамы Бахытбек қажы Нұрғабылұлы, найб имам Әлішер Ертайұлы, әуежай басшысы Юрий Ким қатысты.

Ерекше тоқтала кетер жай, келімді-кетімді кісілерден арылмайтын жердегі осынау намазхана қазіргі уақыт талаптарына толық сай келеді. Намаз оқитын бөлме жолаушыларға өте қолайлы.

Басқосуда Бас имам әуежай басшысына шынайы ризашылығын білдіріп, өз атынан Алғыс хат табыс етті.

Қостанай облыстық мешітінің баспасөз қызметі

Оқырмандардың есінде болар, осыдан бірнеше ай бұрын дүниеден өткен бүлдіршін Мәдина Ерланқызының артында қалған анасы мен бауырларына баспана алып беру жөнінде мешіт ұжымы бастама көтерген болатын. Халықтың және Олжа АГРО қолдауымен тиісті қаражат жиналған болатын.

Қазақстан мұсылмандары діни басқармасының «Ел үлесі – пәтерге» атты жобасының аясында сол қолға алынған игі мақсаттың жүзеге асуына қаламызда қызметін бастаған «КБС» құрылыс компаниясы атсалысып, үйге мұқтаж отбасы үлкен қуанышқа кенелді.

Жуырда пәтердің кілтін тапсыру рәсіміне облыстық мешіттің Бас имамы Бахытбек қажы Нұрғабылұлы, ҚМДБ-ның «Зекет және қайырымдылық» қорының өңірдегі өкілі Бақытжан қажы Икрам, Мәдинаның туған-туысқандары қатысты.

Тұрмысқа қолайлы үш бөлмелі пәтер Қостанай қаласындағы Әуежай шағын ауданында салынған көп қабатты үйден берілді. Баспана кілтін алған отбасы мешіт қызметкерлері мен демеушілерге дән ризашылығын білдірді.

Қостанай облыстық мешітінің баспасөз қызметі

Аталмыш шара Әулиекөл аудандық мәдениет үйінде қасиетті Құран аяттарын оқумен басталды. Алғашқы сөзді аудан әкімі Ерлан Теменов алып, облыс әкімі атынан жергілікті ақсақалдар мен мешіт құрылысына белсене атсалысқан азаматтардың иығына шапан жапты.

Содан кейін Қостанай облыстық мешітінің бас имамы Бахытбек қажы Тәжімбет жұршылықты аудан өміріндегі елеулі оқиғамен құттықтап, осы имандылық ордасының салынуына елеулі үлесін қосқан демеушілерге Бас мүфти Наурызбай қажы Тағанұлының «Алғыс хатын» табыстады.

Салтанатты жиында жаңа жаңа мешіттің лентасы қиылып, Бас имам Бахытбек қажы келген жамағатқа уағыз айтты. Алғашқы «Жұма» намазы оқылды.

Намаздан соң мешіт асханасына ас беріліп, осы жиынға арнайы келген Әмит ишанның ұрпақтары мешітке және еңбегі сіңген кісілерге алғыс айтып, сыйлықтарын табыс етті.

Қостанай облыстық мешітінің баспасөз қызметі

Рудный қалалық «Нұр» мешітінің «Әйел-қыздар секторының» ұйымдастыруымен Мәуліт мерекесінің құрметіне волейболдан «Әлді мұсылман, әлсіз мұсылманға қарағанда хайырлы» атты спорттық сайысы өтті.

Жарысқа Қостанай облыстық «Марал ишан», қалалық «Жайлаубай ата» және Рудный мешіттінің әйел-қыздар жамағаты қатысып, бақтарын сынады. Қызықты да бәсекелі дода төрт команда арасында өрбіді. Нәтижесінде «Жайлаубай ата» мешіті командасының қыздары айқын басымдықпен бірінші, облыстық «Марал ишан» мешіті екінші, ал Рудный қаласы «Нұр» мешітінің командасы үшінші орындарды иеленді. Барлық қатысушыларға арнайы Мадақтама қағаздар мен естелік медальдары табыс етілді.

Спорттық сайыстан соң, «Нұр» мешітінде Мәулітте салауаттар оқылды. Мешіт ұстаздары мен қажы апалар сөз алып, тағылымды кеңес, уағыз-насихат айтты.

Мерекелік дастархан жайылып, викториналық сұрақ-жауап ойындары ұйымдастырылды. Әйел-қыздар секторының ұстазы Аяулым Ермекқызы «Бұл шараның басты мақсаты - әйел-қыздар жамағатының ауызбіршілігін арттыру, ынтымақтастығын нығайту және салауатты өмір салтын ұстану. Сондай-ақ өскелең ұрпаққа дін насихатын басқаша қырынан жеткізу» екендігін айтты.

Қостанай облыстық мешітінің баспасөз қызметі

Қостанай облыстық мешітінің жанындағы найб имам Бақытжан қажы Икрам басқаратын Қайырымдылық және Зекет қорының бойынша өткен қазан айында ұйымшылдықтың үлгісін көрсетті.

Нақты мәліметтерге сүйенетін болсақ, облыс бойынша 41 іс-шара өткізілді. 1 883 отбасы қамтылып, оларға көмек көрсетілді. Осы мақсатқа 5 млн 280 мың 482 теңге жұмсалды.

Қолдауға мұқтаж жанұяларға дер кезінде қол ұшын беріп, демеушілік танытқан барша кәсіпкерлер мен жанашыр азаматтарға алғысымыз шексіз.

Қостанай облыстық мешітінің баспасөз қызметі

Науырзым аудандық “Түркебай ата” мешітінің ұйымдастыруымен Мәуліт айының құрметіне есте қаларлық мерекелік іс-шаралар өткізілді.

Аса маңызды жиында Қостанай облысының Бас имамы Бахытбекқажы Тәжімбет, аудан әкімі Қайрат Әбішев сөз сөйлеп, жұршылықты құттықтады.

Сондай-ақ еліміздегі «Ел үлесі-пәтерге» қайырымдылық жобасы аясында көмекке мұқтаж 1 отбасына үйдің кілті табыс етіліп, жанұя мүшелері үлкен қуанышқа кенелді.

Аудандық мешітте әлеуметтік жағдайы төмен көп балалы 11 шаңырақ иелеріне күнделікті тұтынатын азық-түлік берілді.

Жергілікті «Шапағат» кафесінде 200 адамға дастарқан жайылды. Мұнда алдымен ұлы Мұхаммед Пайғамбарымызға Құран бағышталды. Өңірімізге белгілі имамдар Нұрбол Балахмет пен Дархан Сыздықовтар «Салауат шариф» оқыды.

Ас барысында Бахытбек қажы Нұрғабылұлы көпшілікке уағыз-насихат айтты. Мәуліт кешінің жоғары деңгейде өтуіне лайықты үлестерін қосып, демеушілік жасаған бауырларымызға Алғыс хаттарды тапсырды.

Ұлттық спортымыз қазақ күресіне арналған «Түйе палуан» сайысы көрермендерге үлкен әсер қалдырды. Жарыста 70 келіге дейін және одан жоғары салмақта палуандар бақ сынасты.

Сайыс қорытындысында қадірменді ақсақалдар жеңімпаздардың иығына шапан жапты. Бас имам топ жарған азаматтарға ақшалай сыйлықты тапсырып, олардың мәртебесін асқақтатты.

Қостанай облыстық мешітінің баспасөз қызметі

Қостанай облыстық мешітінде Мәуліт айының құрметіне имандылық ордасының найб имамы, діни сауат ашу курсына жауапты Тимур Туребаевтың ұйымдастыруымен «Адамзаттың асыл тәжі» атты интеллектуалдық білім сайысы өткізілді.

Пайғамбарымыздың өмірбаянынан сыр шертетін жарысқа өңіріміздің барлық қалалары мен аудандарынан 30 талапкер қатысып, бақтарын сынады. Аталмыш сайысқа 85 сұрақ қамтылды. Қатысушылар ұялы телефондары арқылы қойылған сауалдарға жауап берді.

 «Жүзден жүйрік, мыңнан тұлпар» демекші, жарыс қорытындысы бойынша жүлделі бірінші және екінші орындарды Рудный қалалық «Нұр» мешітінен келген Серікболсын Өтеш пен Дәулетбай Мұратхан жеңіп алды.

Ал, үшінші орынды Арқалық қалалық «Мұхтасиб Әлмұхаммед» мешітінен қатысқан Закария Жамантай иеленді. Жеңімпаздарға Алғыс хаттар мен қаржылай сыйлықтар табыс етілді.

Қатысушылардың ой-өрісін, таным көкжиегін кеңейтуге ерекше ықпал еткен білім сайысы өте қызықты әрі ұйымшылдықпен өтті.

Қостанай облыстық мешітінің баспасөз қызметі

Жуырда ұлт ұстазы, Алаш ардақтысы Ахмет Байтұрсынұлының 150 жылдық мерейтойы аясында Қостанай облыстық мешітте жұртшылыққа жаңа кітапхана есігін айқара ашты. Оған қазақ халқының жарқын болашағы үшін бүкіл саналы ғұмырын арнаған дара тұлғаның есімі берілді.

Рухани орданың ашылу салтанатына белгілі дін қайраткерлері, өңіріміздегі зиялы қауым өкілдері, жамағат қатысты. Оның лентасын Қазақстан мұсылмандары діни басқармасының наиб мүфтиі Сансызбай қажы Құрбанұлы, абыз ақсақалдар – Рудныйлық Торғайбай қажы Уәлиұлы, Ұзынкөлдік Кенесары Мырзахметовтер қиды.

Кітапхана алдағы уақытта ислам дініне ден қоюшыларға құнды дүниелер ұсынады, пайдалы кеңес береді. Қазір ондағы сөрелерден фиқһ, ақида және басқа да білім көкжиегі мен дүние танымыңды кеңейтер кітаптарды қиналмай табасыз.

Қостанай облыстық мешітінің баспасөз қызметі