Қасиетті Рамазан айында Қостанай қалалық «Жайлаубай ата» мешітінде Ораза бойы ауызашар беріліп, жүрегі жомарт жандар халықтың шынайы алғысына бөленді.

Алаш ардақтысы Міржақып Дулатовтың ұрпағы, белгілі кәсіпкер Бақберген Өтеулин жыл сайын Қадір түні қарсаңында отбасының атынан ауызашар беріп, жұртшылықтың сауабын алып келеді.

Биыл да сол дәстүр жалғасын тауып, тиянақты дайындық жасады. Ол аталмыш имандылық ордасының асханасында дастархан жайды. Ауызашар барысында елімізге танымал азамат Бағытұр Дәндібаев жұртшылыққа ұлағатты сөзін арнаса, Қазақстан Жазушылар Одағының мүшесі, ақын Ақылбек Шаяхмет Қадір түні жайлы өлең оқыды.

Кештің соңында абыз ақсақал Торғайбай Уәлиев бата берді. Бас имам Шоқан қажы Әмірханов аруақтарға арнап Құран бағыштады. Сондай-ақ, Бақберген Қасымұлына естелік сыйлық, ал жамағат атынан Құран кітабын табыс етті.

Қостанай облыстық мешітінің баспасөз қызметі

Жуырда Қостанай қалалық “Жайлаубай ата” мешітінің қызметкерлері Рамазан айында Наурыз мерекесінің құрметіне мешіт ақсақалдары мен алқа мүшелеріне "Ақсақалын құрметтеген, ел озар” атты жиын өткізді. Онда ғибратты ғұмырлары, өнегелі істерімен үлгі көрсетіп жүрген аға ұрпақ өкілдеріне сыйлықтар табыс етті.

Қостанай облыстық мешітінің баспасөз қызметі

Есімі елімізге кеңінен танымал, республикалық «Үздік қала имамы» номинациясының жеңімпазы Шоқан қажы Әмірханов басқаратын мешіт ұжымы қасиетті Рамазан айы басталғалы бері «Алтын алма, алғыс ал» деген қағиданы берік ұстанды.

Оразаның аяқталуына жақын қалғанына қарамастан қайырымдылық шараларын жиі ұйымдастырып, әлеуметтік жағынан аз қорғалған шаңырақ иелерінің шынайы алғысына бөленіп келеді.

Өткен апталарды айтпағанның өзінде, осы таяуда ғана көмекке мұқтаж 10 отбасына 100 мың теңгенің азық-түлігін табыс етті. Олар мешіт қызметкерлеріне шын жүректен шыққан шынайы алғысын жаудырды.

Қостанай облыстық мешітінің баспасөз қызметі

Қадір түні мың айдан қайырлы. Мұны Пайғамбарымыз (Алланың оған игілігі мен сәлемі болсын) Рамазан айының соңғы он күнінің тақ түндерінен іздеңдер деген. Соның ішінде 26- нан 27-не қараған түні қадір түні болу ықтималдығы жоғары екенін айтқан ишараттар бар.

Сол мақсатта жылдағы үрдіске сәйкес барлық мешіттерде осы түнді жоспар бойынша өткізу қалыптасқан. Сондықтан облыстық «Аймағанбет қажы Спанұлы» мешітінде халық көп жиналып, қасиетті түн өз деңгейінде ұйымдастырылды.

Алдымен Құранды осы имандылық ордасына жақында ұстаздық қызметке кіріскен қари Мұртаза Ертайұлы мен республикалық қарилар медресесінің ұстазы Мұхаммедали Садуақасұлы оқыды. Содан кейін тарауық намазындағы хатым Құранның аяқталғандығына байланысты батаны Қостанай облысының бас имамы Бектұрсын қажы Торғайбайұлы жасады. Ол Рамазан айында жамағаттың көңілінен шығып, бойларындағы білім-біліктерін Құранды толық оқып, қажыр-қайраттарын аямай жұмсаған Қариларға ілтипат ретінде иықтарына шапан жауып, көпшіліктің атынан ақшалай сыйлықты тарту етті.

Бектұрсын қажы Уәлиев бастаған имамдар Қадір түнінінің қадір -қасиеті жайлы жиналғандарға мазмұны терең, тыңдауға ұғынықты уағыз айтты.

Сондай-ақ жиналған қауымның діни білімін шыңдау мақсатында танымдық викториналық сұрақ-жауап ойындары өткізілді. Жеңімпаздарға, мешіттің бес уақыт намазына тұрақты қатысқан жамағатқа және ауызашар барысында белсенді қызмет көрсеткен шәкірттерге Құран және діни кітаптар табыс етілді. Тәсбих намазы оқылып, еркін құлшылық жасауға мүмкіндік берілді.

Қадір түнінің құрметіне мешіттің асханасында сәресіге арналған дастархан жайылды. Содан кейін таң намазы оқылып, жұртшылық жоғары көңіл-күймен тарасты.

Қостанай облыстық мешітінің баспасөз қызметі.

Қасиетті Рамазан айында Наурыз мейрамының құрметіне Қостанай облыстық «Аймағанбет қажы Спанұлы» мешітінің қызметкерлері ұлттық ойындар - гір көтеру, арқан және таяқ тартудан сайыс ұйымдастырды.

Жұма намазынан кейінгі мешіт жамағаты арасындағы бұл жарыс өте тартысты өтті. Онда имамдар да белсенділік танытып, команда құрамы намысты қолдан берген жоқ.

Сайыстың соңында облыстың Бас имамы Бектұрсын Уәлиев сөз алып, ата-бабамыздан келе жатқан салт-дәстүрімізді, яғни ұлттық ойындарды дәріптеп, оны халыққа насихаттау аса маңызды екендігіне тоқталды. Бүгінгі шара соның бір жарқын көрінісі болып табылатындығын айтты.

Сондай-ақ, ол жеңімпаздарды құттықтады. Сый-сияпат жасап, діни кітаптарды табыс етті. Кешке барлық қатысушыларға ауызашар берілді.

Қостанай облыстық мешітінің баспасөз қызметі

Ұзынкөл ауданынан шыққан қажылар аз емес. Олар жылдағы қалыптасқан дәстүр бойынша Ораза айында жергілікті «Құрман баба» мешітінің асханасында дастархан жайды. Жиналған жамағат зәм - зәм суымен ауыз ашып, дайындалған тағамнан дәм татты.

Сонымен қатар қажылар көмекке мұқтаж 10 отбасына азық - түлік салынған «Рамазан қоржынын» табыс етті.

Жиналған халық жерлестерінің ыстық ықыластарына дән риза болып, ақсақалдардың ақ батасын алды.

Қостанай облыстық мешітінің баспасөз қызметі

Ұзынкөл ауданындағы «Айгөлек» бөбекжайында Наурыз мейрамы жоғары деңгейде аталып өтті. Онда салт-дәстүрімізге сай ұлттық киімдер киген бүлдіршіндер би билеп, ән шырқады.

Жергілікті «Құрман баба» мешітінің Бас имамы Есенгелді қажы Сақтағанұлы тәрбие орнына арнайы ат басын бұрып, қызметкерлерге ризашылығын білдірді. Балақайларға «Рамазан тәттілері» себетін тапсырып, ақ батасын берді.

Қостанай облыстық мешітінің баспасөз қызметі

Рамазан айында Қостанай қалалық «Жайлаубай ата» мешітінің қызметкерлері қайырымдылық шарасын ұйымдастыруға ерекше көңіл бөлуде.

Таяуда осы сөзіміздің нақты айғағы ретінде 22 көп балалы отбасыға 220 мың теңгенің азық-түлгі табыс етілді.

-Қайырымдылық адам бойындағы ең ізгі қасиеттердің бірі. Сондықтан біз Оразаның алғашқы күнінен бастап бұл сауабы мол акцияға айрықша назар аудардық. Қаншама көмекке мұқтаж жандарға қол ұшын бердік. Дер кезінде үн қатқан демеушілерге алғысымыз шексіз, - дейді Бас имам Шоқан қажы Ғазизұлы.

Қостанай облыстық мешітінің баспасөз қызметі

Қазақстан мұсылмандары діни басқармасы жастарды имандылыққа баулу мен оларға тәлімді тәрбие беруге айрықша назар аударып жатқаны белгілі. Осы талапты басшылыққа алған Қостанай қалалық «Жайлаубай ата» мешітінің қызметкерлері де бірқатар игі жұмыстарды жүзеге асыруда.

Мәселен, имандылық ордасының ұстаздары оқушылардың көктемгі демалысын пайдалана отырып, діни дәрістерді оқытуды одан әрі жалғастыруда. Наиб имам Қазбек Кошеров қасиетті Рамазан айында балаларға Құран негіздерін және әліпбиді үйретіп жатыр.

Бас имам Шоқан қажы Әмірхановтың айтуына қарағанда, оқушылар сабақ барысында көп жайды көңілге түйіп, діни сауатын арттыруға толық мүмкіндік алады.

Қостанай облыстық мешітінің баспасөз қызметі

Лисаков қалалық «Әбдіхаим Саламатұлы» мешітінің қызметкерлері қасиетті Рамазан айында «Рамазан тәттісі» атты қайырымдылық акциясын ұйымдастырды.

Осынау іс-шара барысында 20 балаға «Рамазан тәттісі» себеті үлестірілді. Мұндағы басты мақсат – өскелең ұрпаққа қасиетті айдың мәні мен маңызын жете ұғындыру.

Бас имам Әкімбек Асанов бүлдіршіндер мен ата-аналарға Оразаның ерекшелігі туралы айтып, жан-жақты мағлұмат берді. Жиын соңында қатысушылар мешіт ұжымына алғыстарын жеткізді.

Қостанай облыстық мешітінің баспасөз қызметі