Қазіргі кезде қасиетті дінімізді жеккөрінішті етіп көрсету етек алуда. Ислам дінін қаралап, терроризм, экстремизм, уаххабизм және салафизм ұстанушыларына теңеп, мұсылмандарды жік-жікке бөліп, бір-бірімен соғыстыру жағдайына дейін апарып отырған күштер, мұсылман әлемінің берекесін кетіріп, бірлігін бұзуда.

Солардың бірі «Тәкфиршілер тобы». Олар үлкен күнә жасағандарды мұсылманшылық санатынан шығаратындықтарын айтып жар салуда. Бұлардың адасқан жерлерінің екіншісі, өздерін мұсылман санайтын бірақ, мемлекетті басқару жүйелерінде шариғатты басшылыққа алмағандығы үшін билік өкілдерін кәпір санауларында.

Кезінде Пайғамбарымыз Мұхаммед (с.а.с) айтқан болатын: «Шектен тыс кінәмшілдік, жанкештілік жақсылыққа апармайды. Кінә таға беру мұсылмандар арасында өшпенділікке апарады». Ирактағы, Сириядағы жағдайлар осының айғағы. Негізі дініміз адамзатты Алла жолына даналық, жұмсақтық, көркем үгіт арқылы шақыруды көздейді. Құран аяттары да Исламды жұртшылыққа сабырлылықпен қарапайым етіп жеткізуді ұсынады. Өз кезегінде ханафи мазхабының негізін салған имам Әбу Ханифа да «Сәлаф салихтарға, тіл тигізбейтін, тағдырға иман келтіретін және күнәсі үшін мұсылманды кәпір санамайтын», топты жақтаған.

Осы күндері намаз оқымағандарды кәпір санайтын сәлафия ағымы дін атына кір келтіруде. Ал біздің аһли сунна уал джамаға ғұламаларының көпшілігі, амал жасамаған мұсылманды кәпір деуге қарсы.

Өмірде кездесіп жүргендей, біз кейде айтып отырған сөзімізге мән бермей, достарымыздың өзіне де сен кәпірсің дей саламыз. Аллаға серік косу (ширк) үлкен күнасын жасаған кісіден басқа, кез келген адам үлкен күнә жасағандығы үшін кәпір болмайды. Алла Тағала, өзіне серік қосудан басқа күнәләрдің барлығын қалаған кісіге кешірім жасайды, қаласа жазалайды.

Парыз амалдарды орындамағандар немесе күнә амалын істеген кісіні күнәһар немесе пасық дейді, алайда оны кәпір демейді. Намаз оқымаған адамдарға да жаназа оқылатыны бізге мәлім.

Мұсылмандар бір-бірінің айыбын ашып, кемшілігін іздегеннен гөрі, бауырмалдылықты насихаттауымыз керек.

Қоғамымызды, бөлінушіліктен сақтап, берекелі ғұмыр кешуді мақсат етуіміз қажет. Пайғамбарымыз (с.ғ.с.) кезінде айтып кеткен: «Алланың ең сүйіктілері, араларында ешқандай туысқандық, сауда-саттық, іскерлік байланыс болмаса да, Алла разышылығы үшін бір-бірін жақсы көретіндер». Бүгін біздің мемлекетіміздің ұстанымы: дінаралық, ұлтаралық татулық, толеранттылық.

Біздің елде салафиттік бағыттың ішіндегі «хиджра уа такфир» ағымына тыйым салынды. Сол себепті біз, мешіт жамағаты, халықты теріс ағымдардан сақтанып жүруге шақырамыз.

Ата-бабаларымыздың дінімізге берік болғаны етенеден белгілі. Ал кәзір де ынтымағымыз жарасқан 134 ұлт пен ұлыстардың өкілдері береке бірлікте ғұмыр кешудеміз. Алла Тағала осы жолдан тайдырмасын деп тілейік жаратушыдан.

Үстіміздегі жылдың 18 тамызында «Ат-такфир уаль-хиджра» халықаралық ұйымы экстремистік ұйым есебінде танылып және елімізде оның қызметіне тыйым салынғаны жөнінде хабар БАҚ арақылы таратылуда. Көп соққанға бір тосу деген осы болмақ.

Жақсылық қажы Ғайсин
ҚМДБ «Зекет»қорының
Қостанай облысы бойынша өкілі,
Қажылар қауымдастығының төрағасы