Әулиекөл ауданындағы Сұлукөл елді-мекенінде жаңа мешіт пайдалануға берілді. Сөйтіп, жергілікті халық үлкен қуанышқа бөленді. Салтанатты шараға аудан әкімі Жансұлтан Тәукенов, облыстың Бас имамы Бахытбек қажы Тәжімбет, аудандық «Әмит ишан» мешітінің Бас имамы Нұрбол қажы Балахметов және тұрғындар қатысты.

Ауыл ақсақалы Тілеген Жұматов пен кәсіпкер Мәлік Қиқымов лентаны қиып, мешіттің ашылу рәсімін жасады.

Жоғарыда аталған құтты қоныстың тумасы, шаруа қожалығының басшысы Мәлік Кәдірұлының осындай заманауи мешіт салып, жұртшылықтың игілігіне айналдыру көптен бергі арманы болатын.

Алдына үлкен мақсат қойған азамат имандылық ордасын небәрі төрт айда тұрғызып, жамағатқа есігін айқара ашты. Жүзге тарта адамға лайықталған киелі орын әсем безендірілген. Мұнда әйелдер бөлмесі де бар.

Алыстан көз тартатын мешіттің маңдайшасына Есқали атаның есімі айшықты етіп жазылған. Марқұмның ұрпақтары бұл күндері елге үлгі болар тұлғаларға айналған. Бұған жан-жақтан келген жерлестерінің көзі айқын жетті. Жомарттық танытқан жанашыр жанға аға ұрпақ өкілдері батасын берді.

Мәлік Қиқымов қыстан қысылмай шығу мақсатында мешітке қажетті мөлшерде отын-көмір түсіріп берді. Ал, ауыл молдасы Балғабай бауырымызға имандылық жолындағы қызметінде сәттілік тілейміз.

Қостанай облыстық мешітінің баспасөз қызметі