Қазақстан мұсылмандары діни басқармасының РАНТ мүшесі, Алматы қаласындағы Жетісу аудандық «Абай Құнанбаев» мешітінің Бас имамы Нұрболат Дүйсебаев Қостанай облысына іс- сапармен келді.

Ол алдымен қалалық «Марал ишан» мешітіне ат басын бұрып, құптан намазы алдында жамағатпен "Білім алудың маңыздылығы" жөнінде әңгіме өрбітті.

Келесі күні облыс орталығындағы №38 еңбекпен түзету мекемесінде жазасын өтеушілермен кездесті. Жүздесуде «Дін, имандылық - адамды жақсылыққа, бауырмашылдыққа жетелейді» тақырыбы аясында уағыз -насихат айтып, сұрақтарға жауап берді.

Түстен кейін Шырақбек Қабылбаев атындағы Қостанай академиясының курсанттарына отансүйгіштік, жауапкершілік, имандылық туралы дәріс оқыды.

Сондай-ақ облыстық «Аймағанбет қажы Спанұлы» мешітінде қала және аудан имамдарынан құралған ЖАНТ өкілдерімен семинар ұйымдастырылды. Онда ол теріс ағымның алдын алуға арналған «Құрандағы мухкам мен муташабиһ» аяттарына талдау жасап, өз ойын ортаға салды.

Қостанай облыстық мешітінің баспасөз қызметі

Мұғалімдер күніне орай облыс орталығындағы “Жайлаубай ата” мешітінің қызметкерлері қаладағы Ыбырай Алтынсарин атындағы дарынды балаларға арналған мектеп-интернат пен Назарбаев зияткерлік мектебінде болды.

Бас имам Шоқан қажы Әмірханов қос білім ордасындағы ұстаздарды төл мерекелерімен құттықтап, сый-сияпат жасады. Өз кезегінде педагогтар қауымы имандылық ордасының ұжымына шынайы алғыстарын білдірді.

Қостанай облыстық мешітінің баспасөз қызметі

Қалыптасқан дәстүр бойынша Қостанай қалалық “Жайлаубай ата” мешітінің ұжымы өткен жұма күні қайырымдылық шарасын өткізді.

Онда көмекке мұқтаж жандарға күнделікті тұтынатын ауылшаруашылық өнімдерін табыс етті. Олар қолдау көрсеткен демеушілерге алғыстарын жаудырды.

Қостанай облыстық мешітінің баспасөз қызметі

Қазақстан мұсылмандары діни басқармасының әйел-қыздар секторының арнайы тапсырмасы бойынша облыстық «Аймағанбет қажы Спанұлы» мешітінде Мәуліт кеші болып өтті.

Оған облыстық және қалалық «Жайлаубай ата» мешіттерінің ұстаздары Жансая Халим мен Аяулым Смағұлова бастаған тоқсанға жуық әйел жамағаттары қатысты.

Жиында Құран мен Мәуліт-шәриф оқылды. Ғибраты мол уағыз айтылды. Әжелер бата берді. Қатысушыларға сыйлықтар мен құнды кітаптар таратылды.

Қостанай облыстық мешітінің баспасөз қызметі

Халықаралық қарттар күніне орай Қостанай қалалық «Жайлаубай ата» мешітінің ұжымы ардақты ақсақалдар мен ақ жаулық аналарға, алқа мүшелеріне ілтипат танытты.

Жайылған дастархан басында Бас имам Шоқан қажы Әмірханов аға буын өкілдерін мерекемен құттықтап, оларға зор денсаулық, отбастарына бақыт тіледі.

Абыз ақсақал бата берді. Жиын соңында ардагерлерге сый-сияпат жасалды.

Қостанай облыстық мешітінің баспасөз қызметі

Қарттарға құрмет көрсетілді

Халықаралық қарттар күніне орай Ұзынкөл аудандық «Құрман баба» мешітінің ұжымы жергілікті ақсақалдар мен ақ жаулықты аналардың басын қосып, мерекелік іс-шара өткізді.

Имандылық ордасының асханасында дастархан жайылып, оларға құрмет көрсетілді. Онда аудан әкімі Марат Жұрқабаев ардагерлерді құттықтап, игі тілегін білдірді.

Кездесу барысында мәдениет үйінің өнерпаздары әуелете ән шырқап, күмбірлете күй шертті. Құрметке бөленген қарттар дән ризашылықтарын білдіріп, ақ баталарын берді.

Қарты бар елдің қазынасы бар

Жоғарыда аталған Қарттар күні қарсаңында Федоров ауылындағы жалпы білім беретін мектебінің ұжымы және оқушылармен кездесу ұйымдастырылды. Онда «Қарттар - біздің асыл қазынамыз» тақырыбында уағыз-насихат айтылды.

Кездесуде аға ұрпақ өкілдерін құрметтеу - өскелең ұрпақтың басты парызы екендігі тілге тиек етілді. Оқушылар ғибратты басқосудан алған әсерлерімен бөлісіп, қойған сауалдарына нақты жауап алды.

Қостанай облыстық мешітінің баспасөз қызметі

Ұзынкөл аудандық мешітінің асханасында

Федоров ауылындағы кездесу

Өткен жексенбі күні Қостанай аудандық "Маңдай батыр" мешіті ұжымының ұйымдастыруымен және мешіт жанашырлары мен жамағатының атсалысуымен Тобыл қаласындағы мұсылмандар зиратында "Тазалық иманның жартысы" атты сенбілік болып өтті.

Осы шара соңында аталған мешіттің Бас имамы Дархан Манарбекұлы қорымда жатқан барша марқұмдарға Құран оқып, найб имам Ерлан Өмірбекұлы дұға бағыштады.

Осынау игі істе ұйымшылдық танытқан барша азаматтарға Алланың нұры жауа берсін.

Қостанай облыстық мешітінің баспасөз қызметі

Қостанай облысының Бас имамы Бектұрсын қажы Уәлиев Енбек спорт залында жастармен арнайы кездесті. Онда еркін күреспен айналысатын балаларға «Кәмелетке толмағандар арасында діни экстремизм мен терроризмнің алдын алу» тақырыбында дәріс оқыды.

Оған жас спортшылар, жаттықтырушылар, басшылық құрам және қалалық «Марал ишан» мешітінің Бас имамы Сабыржан Есмурзин мен облыстық «Аймағанбет қажы Спанұлы» мешітінің жанындағы жастар ісі секторының жауапты маманы Әлішер Ертайұлы қатысты.

Кездесуде жастар Бектұрсын қажы Торғайбайұлының өзекті мәселеге байланысты дәрісін ұйып тыңдады. Қатысушылар тарапынан сауалдар қойылып, тиянақты жауап алды. Соңында естелік суретке түсті.

Қостанай облыстың мешітінің баспасөз қызметі

Халықаралық қарттар күні қарсаңында Қазақстан мұсылмандары діни басқармасының Қостанай облысындағы өкілдігі өңірдегі ардақты ақсақалдар мен ақ жаулықты аналардың басын қосты.

Бұл «Қартын сыйлаған елдің қазынасы мол» деп аталатын маңызды кездесуде облыстың Бас имамы Бектұрсын қажы Торғайбайұлы сөз сөйлеп, барша ардагерлерді мерекемен құттықтап, оларға мықты денсаулық, отбасында бақыт, өскелең ұрпаққа ақылшы болып жүре берулеріне тілектестігін білдірді.

Сонымен қатар ол арамызда жүрген қарттарымызға құрмет көрсетіп, ілтипат таныту мен қамқорлық жасау әрбір азаматтың парызы екендігіне ерекше тоқталды.

Аға буын өкілдеріне облыстық «Аймағанбет қажы Спанұлы» мешітінің асханасында дастархан жайылды. Қаншама жылы лебіздер айтылды. Астың соңында абыз ақсақал Торғайбай Уәлиев бата берді.

Қостанай облыстық мешітінің баспасөз қызметі

Халықаралық қарттар күні қарсаңында Лисаков қалалық "Әбдіхаим Саламатұлы” мешітінің қызметкерлері “Орда” дәмханасында “Қазыналы қарттарым” атты тағылымды іс-шара ұйымдастырды.

Мұндағы басты мақсат - аға буын өкілдеріне құрмет көрсетіп, олардың өмірлік тәжірибесі мен өнегесін жастарға үлгі ету.

Сондай-ақ жаны жайсаң қариялардың жүрегіне жылу ұялату.

Аталған мерекелік кешке қала тұрғындары, зейнеткерлер мен ардагерлер, мешіт жамағаты және еріктілер қатысты. “Орда” да дәмханасының кең әрі жайлы залындағы дастархан басында қарттарға ерекше ілтипат танытылды.

Іс-шара барысында мешіттің Бас имамы жылы лебізі мен ізгі тілегін білдірді. Қонақтар әдемі әуен мен термелерді ұйып тыңдады. Абыз ақсақалдар жастарға бата беріп, имандылық ордасының ұжымына шынайы алғыстарын жеткізді.

Осындай мағыналы шаралар үлкендерді құрметтеу – ізгіліктің бастауы екенін тағы бір дәлелдеді.

Қостанай облыстық мешітінің баспасөз қызметі