Қостанай қалалық «Жайлаубай ата» мешітіне келуші жомарт жандар әрқашанда көмекке мұқтаж кісілерге қолұшын беріп, қайырымдылық жасауды өздерінің азаматтық парызы деп есептейді.

Олар халыққа шарапаттарын тигізіп, өзге де замандастарына өнеге боларлық жарқын істерге мұрындық болып келеді. Жуырда ғана жеті отбасыға күнделікті тұтынуға қажетті азық-түліктерді табыс етті.

Қуанышқа кенелген жанұялар жанашырлық пен мейірімділік танытқан жерлестерімізге дән ризашылықтарын білдірді. Демеушілерге жаңа басталған Қоян жылы молшылық пен береке алып келсін!

Қостанай облыстық мешітінің баспасөз қызметі

Жақында Денисов аудандық «Жұма» мешітінің бас имамы Руслан Маратұлы жергілікті әкімдіктің ішкі саясат бөлімімен бірлесе отырып, аудандық статистика басқармасы және кәсіпкерлер палатасы қызметкерлерімен кездесу өткізді.

Бұл жүздесу барысында өзекті тақырып - дін және діни ағымдар жайлы насихат айтылды. Жиналған қауым олардың мағыналы сөздерін ерекше ықыласпен тыңдады.

Соңғы кездері жалпы әлемдегі дінаралық келіспеушіліктер, жат ағымдар жайлы аз айтылып жүрген жоқ. Олардың адамзатқа тигізер зардаптары да баршылық. Әсіресе, өскелең жас ұрпақты теріс ағымдардан сақтандыру және бойларын аулақ ұстату басты міндетке жатады.

Жиында қатысушылар қозғалған тақырыптарға байланысты өздерінің көкейде жүрген сауалдарып қойып, нақты жауап алды.

Қостанай облыстық мешітінің баспасөз қызметі

Шоқан қажы Әмірхановтың есімі күллі республикамызға жақсы таныс. Өйткені, оның дін саласында үлкен абыроймен қызмет атқарып келе жатқанына отыз жылдан асты.

Осы кезең ішінде адамгершілік қасиеттеріне ішкі жан дүниесі сай келетін, нағыз көркем мінезді, білікті де білімді азаматтың талай шәкірттердің тәлімгері атанғаны көпшілікке аян. Олар кең байтақ еліміздің түкпір-түкпірінде жақсы қырларымен көзге түсуде.

Белгілі дін қайраткері қазіргі таңда Қостанай қалалық «Жайлаубай ата» мешітінің бас имамы, өңіріміздегі өзгелерге өнеге етерлік таңдаулы мамандардың бірі.

Сондай-ақ ол республикамызда мекендеп жатқан ұлттар мен ұлыстардың арасындағы сыйластық пен ынтымақтың, ауыз бірліктің арта түсуіне қомақты үлесін қосуда.

«Еңбегіне қарай өнбегі» демекші, өткен жылдардағы адал да жауапты қызметі талай рет өзінің лайықты бағасын алды. Жуырда ғана «Халықаралық халықтық дипломатия достастығы» ұйымының президенті Бақыт Рустемов мырза оған халықтар достығын нығайтудағы және халықаралық қызметтегі ерекше жетістіктері үшін арнайы төсбелгіні өз қолымен салатанатты жағдайда табыс етті.

Біз ел арасында беделді де құрметті Шоқан қажы Ғазизұлын мәртебелі марапатымен шын жүректен құттықтап, оған алдағы уақытта да қажымас қажыр-қайрат, жауапты қызметінде табыс тілейміз.

Қостанай облыстық мешітінің баспасөз қызметі

Қазақстан мұсылмандары діни басқармасы Бас мүфтиінің кеңесшісі Кенжетай Байкемелұлы Жангелдин ауданындағы конференциядан кейін Торғай селосында Ғазиз қажы атындағы қарилар медресесінің салтанатты ашылуына да қатысты.

Елімізге белгілі дін қайраткерін жергілікті жұртшылық жылы жүзбен қарсы алды. Бұл айтулы жиында аудандық мешіттің негізін қалаған әрі талай лайықты шәкірттер тәрбиелеген қайталанбас тұлға жайлы естеліктер айтылды.

Аталмыш шараға арнайы келген Кенжетай Байкемелұлы Бас мүфтидің сәлемін жеткізіп, 100 Құран Кәрім мен «Әліппе және Таджуид ережелері» сыйға тарты.

Сонымен қатар аудан әкімі Шота Сәбитбекұлыда сөз сөйлеп, болашақ дін қызметкерлерін дайындайтын білім ордасының тәлімгерлері мен Жангелдин ауданының барша азаматтарына шын жүректен шыққан ізгі тілегін білдірді. 

Қостанай облыстық мешітінің баспасөз қызметі

Қазақстан мұсылмандары діни басқармасы Бас мүфтиінің кеңесшісі Кенжетай Байкемелұлының Қостанай облысына іс-сапары Жангелдин ауданында жалғасты.

Мұнда ол абыз тұлға, бүкіл саналы ғұмырын ислам дінін өркендету мен ағарту саласына арнаған, алдағы ақпан айында 95 жасқа толғалы отырған Ғазиз Әмірхановтың құрметіне орай өткізілген «Ғибратты ғұмыр – ұстаз тағылымы» атты аймақтық ғылыми-теориялық конференцияға қатысты.

Жиын Нұрхан Ахметбеков атындағы мәдениет үйінде ұйымдастырылды. Оның жоғары деңгейде өтуіне Жангелдин аудандық білім бөлімі ұйытқы болды.

Конференциядан өңірдегі дін қайраткерлері, зиялы қауым өкілдері мен жергілікті жұртшылық кезінде елдің ыстық ықыласына бөленген тұлға жайлы мол мағлұмат алды.

Қостанай облыстық мешітінің баспасөз қызметі

Бүгін Қазақстан мұсылмандары діни басқармасы Бас мүфти кеңесшісі, елімізге танымал дін қайраткері Кенжетай Байкемелұлының Қостанай облысына іс-сапары басталды.

Ол алдымен Арқалық қаласына ат басын бұрды. Осындағы жергілікті «Мухтасиб Әлмұхаммед» мешітінде болып, жұма намазда «Нәпсі түрлері мен тәрбиелеу жолдары» тақырыбында уағыз айтты.

Имандылық ордасында жиналған мұсылман қауым оның ұлағатқа толы ой-толғамдарын ерекше ден қойып тыңдады.

Қостанай облыстық мешітініңбаспасөз қызметі

Қостанай ауданына қарасты Қостомар ауылының тұрғындары жаңа жылды үлкен қуанышпен бастады. Өйткені, осындағы Медет Байзақовтың тікелей жанашырлығы және елді-мекен азаматтарының ұйытқы болуымен жаңа мешіт ашылып, халық игілігіне берілді.

Осынау имандылық ордасының құрылысы «Жұмыла көтерген жүк жеңіл» демекші, небәрі алты ай мерзімде салынып бітті. Оған сонау Құлсарыдан, Алматы шаһарынан да бауырларымыз лайықты үлесін қосты.

Мешіттің ашылу салтанатында облыстық мешіттің найб имамы Бақытжан қажы Икрамұлы жергілікті ағайындарды ауыл өміріндегі үлкен оқиғамен шын жүректен құттықтады.

Бұл басқосуға бірқатар аудандық және қалалық мешіттердің имамдары да қатысып, қуаныштарына ортақтасты. Жиын барысында көпшілікке аталмыш мешіт имамы Амангелді Бегжанов таныстырылды.

Қазақстан мұсылмандары діни басқармасының Зекет және қайырымдылық қорының «Ел үлесі -пәтерге» жобасы аясында ауыл мешітіне 601-ші пәтердің кілті тапсырылды. Сондай-ақ, 11 отбасыға азық-түлік үлестірілді.

Ал, Айсары ауылдық округінің әкімі Бауыржан Нұрғазин мешіт құрылысына белсене атсалысқан жомарт жүректі жандарға алғысын білдірді. Қостанай қалалық «Марал ишан» мешітінің бас имамы Бектұрсын қажы Уәлиевтің салиқалы сөзі мен ғибратты уағызын жұртшылық ұйып тыңдады.

 «Жақсының жақсылығын айт, нұры тасысын» дегендей, әрдайым игі істің басынан табылып, мешіттің бой көтеруіне ерекше ықпалын тигізген Медет Байзақовтың сіңірген еңбегі орасан. Дін жанашыры бұған дейін де Жамбыл ауылындағы жаңа мешіттің салынуына мұрындық болған еді.

Қостанай аудандық «Маңдай батыр» мешітінің бас имамы Дархан Сыздықов қостомарлықтарға ең ізгі тілегін айта келіп, имамдар атынан жергілікті әріптестері Медет Байзақовқа хадия табыс етті.

Аллаға құлшылық ететін ғибадат орны жамағатқа толы болсын!

Қостанай облыстық мешітінің баспасөз қызметі

 Жұртшылыққа мәлім, облыс орталығындағы бұрынғы «Марал ишан» мешіті күрделі жөндеуден өткізілді. Жуырда оның пайдалануға берілу рәсімі болып өтті.

Мешіттің ашылу салтанаты Құран оқудан басталып, Қазақстан мұсылмандары діни басқармасының төрағасы, Бас мүфти Наурызбай қажы Тағанұлы бата берді.

Содан кейін Қостанай облысының әкімі Құмар Ақсақалов жұртшылықты осынау айтулы оқиғамен шын жүректен құттықтап, алдағы уақытта да үлкенді-кішілі қауымды имандылыққа ұйытар киелі орын бола беретіндігіне тоқталды.

Елордамыз Астанадан арнайы келген мәртебелі қонақ, көрнекті дін қайраткері, Бас мүфти Наурызбай қажы Тағанұлы өз сөзінде жергілікті халықтың қуанышына ортақ екендігін жеткізді. Оның тебірене сөйлеген ұлағатты ой-толғамдарын жерлестеріміз ерекше ықыласпен тыңдады.

Жиында Қазақстан Жазушылар Одағының мүшесі, дін тақырыбындағы талай айтары мол құнды кітаптардың авторы, белігілі ақын Ақылбек Шаяхмет, ізденімпаз ғалым, тарих ғылымдарының докторы, профессор Аманжол Күзембайұлы қостанайлықтарға шынайы лебіздерін айтты.

Есте қаларлық бұл басқосуда уағыз айтылып, жұма намазы оқылды.

Қостанай облыстық мешітінің баспасөз қызметі

Жуырда Қостанай қалалық «Жайлаубай ата» мешітіне келуші жомарт жандардың қолдауының арқасында Молокановка ауылының тұрғыны, көп балалы ана Майра Шахаева үлкен қуанышқа кенелді.

Олар «Жылулық сыйла» қайырымдылық акциясы аясында ардақты ананың үйіне отын түсіріп берді. Шапағатқа бөленген жанұя иесі көмек көрсеткен азаматтарға ризашылығын білдіріп, алғысын жаудырды.

Қостанай облыстық мешітінің баспасөз қызметі

Қостанай қалалық «Жайлаубай ата» мешітіне өңіріміздегі Рыспай елді -мекенінің тұрғыны Қамқа Қапсұлтанқызынан өтініш түскен болатын.

Шоқан қажы Әмірханов басқаратын имандылық ордасының ұжымы оның тілегін қабыл алып, дер кезінде қол ұшын берді. Сөйтіп, қыстан қысылмай шығуы үшін пешке жағатын отын ағаштан көмек көрсетті.

Жалпы, «Жылу сыйла» атты қайырымдылық қорына өзінің лайықты үлесін қосқан азаматтар қашанда халықтың шынайы алғысына бөленетіндігі белгілі. 

Көп балалы ана қамқорлыққа алынды

Қостанай қалалық «Жайлаубай ата» мешітінің жанашырлары «Жылулық сыйла» қайырымдылық акциясының тиісті деңгейде өтуіне әрдайым айрықша көңіл бөліп келеді.

Осы сөзіміздің нақты айғағы ретінде бір мысал келтіре кетелік. Жақында имандылық ордасындағы жамағаттардың демеушілігімен облысымыздың Айсары елді-мекенінде ғұмыр кешіп жатқан 7 баланың анасы, «Алтын алқа» иесіне қыс айында пешке жағатын көмір мен тамызық боларлық ағаш түсіріп берді. 

Қайырымдылық адам бойындағы ең асыл қасиеттің бірі. Солтүстік өңірде басқа аймақтарға қарағанда ауа-райы суық әрі аязды болатыны белгілі. Сол себептен жамағаттардың қолдауымен ардақты апамызға көмегімізді көрсеттік, - дейді аталмыш мешіттің бас имамы Шоқан қажы Әмірханов. 

Қостанай облыстық мешітінің баспасөз қызметі