Есімі елімізге кеңінен танымал дін қайраткері Шоқан қажы Ғазизұлы басқаратын Қостанай қалалық “Жайлаубай ата” мешітінің ұжымы уақытпен санаспай қасиетті Рамазан айы бойы қолдауға мұқтаж жандарға қайырымдылық көмек жасады.

Сондай-ақ, имандылық ордасында Ораза айт мерекесінің құрметіне 10 отбасыға 100 мың теңге тұратын азық-түлік табыс етілді. Шаңырақ иелері демеушілер мен ұйымдастырушыларға шынайы алғысын білдірді.

Сонымен қатар жүрегі жомарт жандардың жанашырлығымен әлеуметтік жағдайы төмен тағы бір жанұяны азық-түлік және үй ішіне қажетті төсенішпен қамтамасыз етті.

Қостанай облыстық мешітінің баспасөз қызметі

Биыл Федоров аудан мұсылмандары мешітте ерте жиналып аудан имамның Руслан Маратұлының ораза айт жайында насихат тындады. Уағыз насихаттан кейін айт намазы оқылып дұға жасалды. Дүниеден өткен момын мұсылмандарға құран бағышталды. Одан кейін асық ату, бес асық, тоғызқұмалақ секілді ұлттық ойындардан жарыстар өткізілді. Ұлттық ойындардан кейін мешітте жамағатқа дастарқан жайылып айт шәйі берілді. Аудан кәсіпкері Гулиев Замик өз атынан 100 адамға қайырымдылық жасап азық түлік таратты.

Жылдағы қалыптасқан дәстүр бойынша қостанайлықтар облыстық «Аймағанбет қажы Спанұлы»мешітіне таңертенгі сағат 7:30-да жиналды. Оразаны толық ұстап, тарауыққа қатысқан үлкенді-кішілі қауымның көңіл -күйі жоғары. Олар бір-бірін айтулы мерекемен құттықтасып жатты.

Жиналған жұртшылықтың алдында Қостанай облысының Бас имамы Бектұрсын Торғайбайұлы сөз алып, барша қауымды Ораза айт мерекесімен шын жүректен құттықтады.

Ораза айт намазынан кейін жамағатқа дастархан жайылып айт шайы берілді.

Мұндай айт намазы өңіріміздегі барлық аудандар мен қалалардағы, кенттердегі мешіттерде бір мезгілде өткізілді.

Қостанай облыстық мешітінің баспасөз қызметі

Рамазан айлардың сұлтаны деп босқа айтылмайды. Өйткені, бұл айда ерекше қайырымдылық жасалады. Осы өзіміздің нақты айғағы ретінде Оразаның соңғы күні облыстық «Аймағанбет қажы Спанұлы» мешіті жанындағы Зекет және қайырымдылық қорының тікелей мұрындық болуымен елімізде жүріп жатқан «Ел үлесі - пәтерге» жобасы аясында қостанайлық музыкант Ербол Мухиядиновқа 46-шы пәтердің кілті табыс етілді. Ал бұл республикамыздағы көмекке мұқтаж жандарға беріліп отырған 829-шы пәтер.

Жиналған жұртшылықтың алдында Қостанай облысының Бас имамы Бектұрсын қажы Торғайбайұлы сөз алып, мәдениет саласында қызмет атқарып жүрген азаматқа көп болып қолдау көрсетілгендігін айтып өтті. Оның отбасына ырыс-береке, молшылық тіледі.

Пәтер кілтін алып, қуанышқа бөленген Ербол Ишанбекұлы оның жағдайын терең түсініп, дер кезінде көмек қолын созған барша ағайын мен демеушілерге, мешіт қызметкерлеріне дән ризашылығын білдірді.

Қостанай облыстық мешітінің баспасөз қызметі

Жақында Арқалық қалалық «Мухтасиб Әлмұхаммед» мешіті ұжымының ұйытқы болуымен ежелден келе жатқан жарапазан жыры айтылды. Оған имандылық ордасының қызметкерлері, өнер қайраткерлері, ел ағалары мен ақжаулықты аналар қатысты.

Мұндағы мақсат - ұлттық құндылықтарымызды насихаттап, өскелең ұрпақтың санасына сіңіру. Сондықтан алдын-ала тиянақты дайындық жасалғандықтан ол ойдағыдай жүзеге асырылды.

Соңынан аға буын өкілдері бата беріп, апаларымыз шашу шашты. Жоғарыда аталған мешіттің Бас имамы Нұрхан қажы Асанұлы барлық қатысушыларға шынайы алғысын білдірді.

Қостанай облыстық мешітінің баспасөз қызметі

Қасиетті Рамазан айында Қостанай қалалық «Жайлаубай ата» мешітінде Ораза бойы ауызашар беріліп, жүрегі жомарт жандар халықтың шынайы алғысына бөленді.

Алаш ардақтысы Міржақып Дулатовтың ұрпағы, белгілі кәсіпкер Бақберген Өтеулин жыл сайын Қадір түні қарсаңында отбасының атынан ауызашар беріп, жұртшылықтың сауабын алып келеді.

Биыл да сол дәстүр жалғасын тауып, тиянақты дайындық жасады. Ол аталмыш имандылық ордасының асханасында дастархан жайды. Ауызашар барысында елімізге танымал азамат Бағытұр Дәндібаев жұртшылыққа ұлағатты сөзін арнаса, Қазақстан Жазушылар Одағының мүшесі, ақын Ақылбек Шаяхмет Қадір түні жайлы өлең оқыды.

Кештің соңында абыз ақсақал Торғайбай Уәлиев бата берді. Бас имам Шоқан қажы Әмірханов аруақтарға арнап Құран бағыштады. Сондай-ақ, Бақберген Қасымұлына естелік сыйлық, ал жамағат атынан Құран кітабын табыс етті.

Қостанай облыстық мешітінің баспасөз қызметі

Жуырда Қостанай қалалық “Жайлаубай ата” мешітінің қызметкерлері Рамазан айында Наурыз мерекесінің құрметіне мешіт ақсақалдары мен алқа мүшелеріне "Ақсақалын құрметтеген, ел озар” атты жиын өткізді. Онда ғибратты ғұмырлары, өнегелі істерімен үлгі көрсетіп жүрген аға ұрпақ өкілдеріне сыйлықтар табыс етті.

Қостанай облыстық мешітінің баспасөз қызметі

Есімі елімізге кеңінен танымал, республикалық «Үздік қала имамы» номинациясының жеңімпазы Шоқан қажы Әмірханов басқаратын мешіт ұжымы қасиетті Рамазан айы басталғалы бері «Алтын алма, алғыс ал» деген қағиданы берік ұстанды.

Оразаның аяқталуына жақын қалғанына қарамастан қайырымдылық шараларын жиі ұйымдастырып, әлеуметтік жағынан аз қорғалған шаңырақ иелерінің шынайы алғысына бөленіп келеді.

Өткен апталарды айтпағанның өзінде, осы таяуда ғана көмекке мұқтаж 10 отбасына 100 мың теңгенің азық-түлігін табыс етті. Олар мешіт қызметкерлеріне шын жүректен шыққан шынайы алғысын жаудырды.

Қостанай облыстық мешітінің баспасөз қызметі

Қадір түні мың айдан қайырлы. Мұны Пайғамбарымыз (Алланың оған игілігі мен сәлемі болсын) Рамазан айының соңғы он күнінің тақ түндерінен іздеңдер деген. Соның ішінде 26- нан 27-не қараған түні қадір түні болу ықтималдығы жоғары екенін айтқан ишараттар бар.

Сол мақсатта жылдағы үрдіске сәйкес барлық мешіттерде осы түнді жоспар бойынша өткізу қалыптасқан. Сондықтан облыстық «Аймағанбет қажы Спанұлы» мешітінде халық көп жиналып, қасиетті түн өз деңгейінде ұйымдастырылды.

Алдымен Құранды осы имандылық ордасына жақында ұстаздық қызметке кіріскен қари Мұртаза Ертайұлы мен республикалық қарилар медресесінің ұстазы Мұхаммедали Садуақасұлы оқыды. Содан кейін тарауық намазындағы хатым Құранның аяқталғандығына байланысты батаны Қостанай облысының бас имамы Бектұрсын қажы Торғайбайұлы жасады. Ол Рамазан айында жамағаттың көңілінен шығып, бойларындағы білім-біліктерін Құранды толық оқып, қажыр-қайраттарын аямай жұмсаған Қариларға ілтипат ретінде иықтарына шапан жауып, көпшіліктің атынан ақшалай сыйлықты тарту етті.

Бектұрсын қажы Уәлиев бастаған имамдар Қадір түнінінің қадір -қасиеті жайлы жиналғандарға мазмұны терең, тыңдауға ұғынықты уағыз айтты.

Сондай-ақ жиналған қауымның діни білімін шыңдау мақсатында танымдық викториналық сұрақ-жауап ойындары өткізілді. Жеңімпаздарға, мешіттің бес уақыт намазына тұрақты қатысқан жамағатқа және ауызашар барысында белсенді қызмет көрсеткен шәкірттерге Құран және діни кітаптар табыс етілді. Тәсбих намазы оқылып, еркін құлшылық жасауға мүмкіндік берілді.

Қадір түнінің құрметіне мешіттің асханасында сәресіге арналған дастархан жайылды. Содан кейін таң намазы оқылып, жұртшылық жоғары көңіл-күймен тарасты.

Қостанай облыстық мешітінің баспасөз қызметі.

Қасиетті Рамазан айында Наурыз мейрамының құрметіне Қостанай облыстық «Аймағанбет қажы Спанұлы» мешітінің қызметкерлері ұлттық ойындар - гір көтеру, арқан және таяқ тартудан сайыс ұйымдастырды.

Жұма намазынан кейінгі мешіт жамағаты арасындағы бұл жарыс өте тартысты өтті. Онда имамдар да белсенділік танытып, команда құрамы намысты қолдан берген жоқ.

Сайыстың соңында облыстың Бас имамы Бектұрсын Уәлиев сөз алып, ата-бабамыздан келе жатқан салт-дәстүрімізді, яғни ұлттық ойындарды дәріптеп, оны халыққа насихаттау аса маңызды екендігіне тоқталды. Бүгінгі шара соның бір жарқын көрінісі болып табылатындығын айтты.

Сондай-ақ, ол жеңімпаздарды құттықтады. Сый-сияпат жасап, діни кітаптарды табыс етті. Кешке барлық қатысушыларға ауызашар берілді.

Қостанай облыстық мешітінің баспасөз қызметі