Ата-бабаларымыздан қалған дәстүрлі Ислам дінін насихаттап, оның қаймағын бұзбай, қастерлеп ұстау біздің парызымыз.

Сондықтан біз жастар, қасиетті Мәуліт айында жас ұрпаққа рухани – тәлімдік тәрбие беру, жастарға Ислам дінінің негіздерін түсіндіре отырып, имандылыққа, адамгершілікке тәрбиелеу мақсатында Рудный кеншілер қаласында «Әйелдер-қыздар» секторы және қалалық «Нұр» мешітінің ұйымдастыруымен Тәуелсіздігіміздің 25 жылдығына және адамзаттың асылы Пайғамбарымыз Мұхаммед (с.а.с)-ның туылған күнінің құрметіне орай «Иманды жас – ел болашағы!» атты рухани-танымдық кеш өткізілді.

Бұл шараға Рудный қалалық «Нұр» мешітінің Бас имамы Сейіт қажы Темірбекұлы, Қостанай облыстық мешітінің ұстазы Жансая Халим, Рудный қалалық «Нұр» мешіті «Асыл әжелер» мектебінің басшысы Талшаш Майхеева, осы шаһардағы «Нұр» мешіті «Инабатты келіндер» мектебінің жетекшісі Ақтолқын Баймбетова, ұстаз Аяулым Смағұлова және шәкірттер қатысты.

Рухани-танымдық кеш бүкіл әлемдердің Раббысы болған Алланың хақ сөзі Құран кәріммен басталып, Рудный қалалық «Нұр» мешітінің Бас имамы Сейіт қажы Темірбекұлы құттықтау сөз сөйледі.

Басқосу барысында айтылған сөздер, өткізілген сайыстар жиналған жұртшылықтың көзіне жас алдыртып, көпшілікті терең ойда қалдырды.

ҚМДБ Қостанай облысы бойынша
өкілдігінің баспасөз қызметі

«Аллаға мадақ, пайғамбарға салауат» – міне, осы атаумен Арқалық қалалық «Мухтасиб Әлмұхаммед» мешітінің жамағаты жұма күні жамағат болып, мүбарак Мәуліт айының құрметіне ардақты Пайғамбарымызға (с.ғ.с.) салауат айтып, Мәуліт оқыды.

Бас имам Бектұрсын Торғайбайұлы Алла Мұхаммед пайғамбардың (с.ғ.у.) өнегелі өміріне тоқталып, «Жасалған дұғалар, жер мен көктің ортасында тұрады. Ол Пайғамбарымызға (с.ғ.у) салауат айтылғанда тез қабыл болуына ықпалы тиеді» - деп салауат сөзінің мән-мағнасын түсіндірді.

Соңынан ақсақалдар жамағатпен бірге тілек тілеп, ел тыныштығы мен бірлігі үшін дұға жасап, бата берді.

Намаздан соң мешіт жамағаттары өз қалаулары бойынша мәуліт айының құрметі үшін, мұқтаж отбасыларына мешіт қызметкерлерімен бірлесе отырып, қайырымдылық жасады.

Мұндай игі шара қалаға қарасты Молодежный, Фурманов ауылдарында да жалғасын тапты.

ҚМДБ-ның Қостанай облысындағы
өкілдігінің баспасөз қызметі

Тәуелсіздігіміздің 25 жылдық мерейтойы қарсаңында Қазақстан Республикасы Президентінің 2016 жылғы 29 қарашадағы Жарлығына сәйкес ҚМДБ-ның Қостанай облысы бойынша өкілі және облыстық мешіттің бас имамы Бахытбек Нұрғабылұлы мен найб имам Бақытжан Икрам «Қазақстан Республикасының Тәуелсіздігіне 25 жыл» мерекелік медалімен марапатталды.

Дәл осындай марапатқа Қостанай, Рудный қалалары мен Денисов, Жітіқара, Қарасу, Ұзынкөл аудандық мешіттерінің бас имамдары Шоқан Ғазезұлы, Сеит Темірбекұлы, Ерік Қожахметұлы, Сабыржан Зейнелғабиденұлы, Халық Қабиұлы, Есенгелді Сақтағанұлы ие болды.

Сонымен қатар 2016 жылы ақарылған шаралардың нәтижесі бойынша Бас мүфти Ержан қажы Малғажыұлы қолынан Бахытбек Нұрғабылұлы мен Арқалық қаласының бас имамы Бектұрсын Торғайбайұлы алғыс хатқа ие болды.

Біз облысымыздың таңдаулы дін қайраткерлерін құттықтай отырып, оларға алдағы уақытта да мықты денсаулық, игі мақсат жолындағы қызметтерінде табыс тілейміз.

ҚМДБ-ның Қостанай облысындағы
өкілдігінің баспасөз қызметі

Арқалық қалалық «Мухтасиб Әлмұхаммед» мешітінің діни сауат ашу курсындағы әйелдер тобы Тәуелсіздік пен мерейлі Мәуліт мерекесі қарсаңында Арқалық балалар және жасөспірімдерге арналған үйде тәрбиеленіп жатқан бүлдіршіндермен кездесті.

Мұнда 3 пен 14 жас аралығындағы ата-анасының тәрбесі құқығынан айырылған балалар тәрбиеленуде.

Осынау жүздесу барысында мұндағы он екі сәбиге ойыншықтар мен тәттілер үлестірілді. Оларға бала ұғымындағы тәрбие жөнінде қызықты қойылымдар қойылып, әндер шырқалды.

Әйелдер тобының ұстазы Диана Альтанова бастаған мешіт шәкірттері өздерінің арнайы дайындаған мерекелік бағдарламасын «Елімнің бақытын тербеткен – Тәуелсіздік» деп атады.

Кездесуде ата-ананың ыстық ықыласы мен аялы алақанының жылуына мұқтаж бейкүнә сәбилер ерекше қуанышқа бөленіп, жүздері шаттықтан бал-бұл жанды.

Балалар үйінің қызметкерлері өздеріне арнайы келіп, осындай шара ұйымдастырған жүректері жомарт жандарға шынайы алғыстарын білдірді.

ҚМДБ-ның Қостанай облысындағы
өкілдігінің баспасөз қызметі

«Денсаулық - зор байлық» демекші, біздің елімізде денсаулыққа ерекше көңіл бөліп, спортта белсенділік көрсетіп жүрген жастарымыз аз емес. Өйткені спорт – тек денсаулыққа ғана емес, аймақтағы түрлі ұлттар мен ұлыстардың арасындағы ауызбірлікке өзінің ерекше әсерін тигізеді.

Егеменді еліміздің тәуелсіздігінің 25 жылдық мерейтойына орай Қазақстан мұсылмандары діни басқармасының Қостанай облысы бойынша жастар ісі бөлімі мен Рудный қалалық «Нұр» мешіті бірлесе отырып, суға жүзуден жарыс ұйымдастырды.

Бұл жарыста облыс төңірегіндегі қалалар мен аудандардан жастар қатысып, өздерінің қызығушылықтарын танытты. Жалпы олардың бұл сайысқа дайындықпен келгендіктері байқалды.

Осынау жарыста жастар жүзудің үш түрлінен бақтарын сынасып, жүлделі орынға деген талпыныстарын көрсетті. Баршаға мәлім, қашан да мықтылар алғы шептен көрінеді.

«Жүзден жүйрік, мыңнан тұлпар» демекші, сайыстың нәтижесі бойынша жеңімпаздарға ҚМДБ-ның Қостанай облысындағы өкіл имамы Бахытбек қажы Нұрғабылұлы бағалы сыйлықтарды табыс етті.

ҚМДБ-ның Қостанай облысындағы
өкілдігінің баспасөз қызметі

Әдеттегідей биыл да әлемнің көптеген елдері хазіреті Мұхаммед (с.а.у) пайғамбарымыздың мәулітін атап өтеді. Мәуліт араб сөзі, қазақ тілінде «туған күн» деген мағына береді.

Күллі адамзаттың асыл тәжі болған пайғамбарымыздың (с.ғ.у) өмірі кімге де болсын өнеге. Ал тәрбие тал бесіктен берілсе, сонда бүлдіршіннің бойына сіңіп, олар ертең саналы азамат болып өседі.

Осы мақсатта жуырда мешіт жамағаты мен әйелдер қауымы балаларға есте қаларлықтай қуаныш сыйлады. Өткізілген шара аясында балалар Мұхаммед (с.ғ.у) өмірі мен тағылымды сөздерінен көп ғибрат алды.

Мұндай басқосулардың әрқашанда тигізер ықпалы мол екендігі даусыз. Жас кезде берілген тәлімді тәрбие кімнің болсын жадында мәңгілік сақталады.

ҚМДБ-ның Қостанай облысындағы
өкілдігінің баспасөз қызметі

Мектеп – білім айдынындағы үлкен кеме. Осы кемеде он бір жыл уақытты әр бала өткізеді. Сол себепті мектеп қабырғасында білім алып жүрген әрбір баланың тәрбиесі, алып жатқан тәлімі мен дамуына үлкен жауапкершілік танытып, оларға дұрыс бағыт көрсету тек мұғалімнің ғана емес, біріншіден отбасының міндеті, одан кейін жеке тұлға болып қалыптасқан азаматтардың міндеті. Міне осы пікірді ұстанған Рудный қалалық «Нұр» мешітінің Бас имамы Сейіт қажы Темірбекұлы қаладағы №19 орта мектебінде өткен «Мектеп пен отбасы бірлігі оқушы дамуының тиімді құралы» атты тақырыбында мектеп оқушыларының ата-аналарымен семинар өткізді.

Кездесуде Сейт қажы «Отбасы» – бала тәрбиесін қалыптастырудағы ең алғашқы бесік екені ақиқат. Перзент үшін дүниеде ең жетілген, білімді де мәртебелі адам - оның ата - анасы. Ал, ең әдемі де жарық үй - оның туылған үйі. Сондықтан да жас баланың дамуына ата - ананың орны ерекше екені, Қасиетті Құран аяттарымен, Мұхаммед (с.ғ.у) пайғамбардың хадистерімен және саңлақ сахабалардың өмірлерінен алынған қиссаларын мысалға келтіріп, тыңдарман қауымды еліктіре баяндап берді.

ҚМДБ-ның Қостанай облысындағы
өкілдігінің баспасөз қызметі

Тәуелсіздік – талайдың тағдырына бұйырмаған баға жетпес бақыт. Алла Тағланың бізге берген үлкен нығмет-сыйы. Ғасырлар бойы жүргізілген тынымсыз күрес пен қайтпас қайсар бабаларымыздың ерен еңбегі. Сондықтан Тәуелсіздік – біздер үшін аманат. Осы қасиетті құндылығымызды атадан балаға, баладан ұрпаққа қалдыруға үлес қосу кез келген саналы адамға міндет. Ол үшін әрқайсымыз иманды да ибалы болып, еліне жанашыр жан болғанымыз абзал.

Азат елдің діни сенім бостандықтарын қамтамасыз ететін тәуелсіз мемлекет болмаса, онда діннің де, руханияттың да еркін тыныстай алмасы анық. Сонымен қатар, тұрақтылық пен тыныштық орнамаған елде экономикалық ахуал да оңалмайды. Сондықтан, әуелі тәуелсіздік пен тұрақтылық, татулық пен тыныштық қажет деп білемін.

Адам жанына рухани азық, ішкі жан-дүниесіне күш-қуат беретін құндылықтар бар. Соның бірі – дін. Діннің қоғамда алатын орны ерекше. Дін – адам тарихының тағылым-тәрбиесінің бірі және сарқылмас даналық көзі. Дін – имандылықтың, парасаттылықтың кепілі. Дін татулығы – халық бірлігі, яғни қоғамда дінаралық келісім болса, сол қоғамда өмір сүріп жүрген халықтың да бірлік пен татулықта болғаны.

Жалпы қоғам өмірінде діннің алар орны ерекше. Дін – адам баласын мейірімділікке, қайырымдылыққа, білімділікке үндейді. Бауырластыққа, татулыққа, бейбітшілікке шақырудағы орны да орасан зор. Діннің ел мен елді, түрлі ұлттар арасындағы достық қарым-қатынастарды реттеудегі рөлі жоғары.

Сонау 1992 жылы Елбасымыздың ұсынысымен Рухани келісімнің Бүкіләлемдік Бірінші Конгресі өткізілген болатын. Онда татулық пен мейрімділікті паш етер – Рухани келісім күнін атау туралы шешім қабылданған. Мұндағы мақсат конфессияаралық келісім, өзара түсіністікпен құрметті қалыптастыру болатын. Бұл игі іс өз жемісін де берді. Бұған дәлел Елбасымыздың бастамасымен Астана қаласында бірнеше рет өткен Әлемдік және дәстүрлі діндер лидерлерінің съездері. Осы алқалы жиынның нәтижесінде жер шарының түрлі елдерінен келген халықаралық дәрежедегі әлемдік дін лидерлері ортақ мәмілелерге келді.

Күллі жер шары – барша адамзатқа ортақ үй. Мұны Алла Тағала біздерге аманат етіп берді. Оны сақтау, қорғау бәріміздің борышымыз. Бүгінгі алмағайып дүниеде бейбітшілік пен ынтымақтың күшейіп, дамуы үшін әсіресе дінаралық үнқатысу мен төзімділіктің мән-маңызы зор. Әлемдік діндер арасындағы үнқатысу ерте кездерден бастау алады. Қасиетті Құранның өзі мұсылман жұртшылығын өзге дін өкілдерімен ынтымақ жарастыруға, ортақ түсіністікке шақырады.

Мәселен, Құранның Хужурат сүресінде: «Я, Адамзат! Біз сендерді бір ер және бір әйелден жараттық. Бір-бірлеріңмен танысып, білісулерің үшін сендерді ұлыстар мен түрлі ұлттарға бөлдік. Араларыңдағы ең ізгілерің тақуалықта тым жоғары болғандарың» - делінеді. Аятқа тереңірек үңілетін болсақ, барша адамзат бір ата мен бір анадан өрбіп өскендіктен баршамыздың арғы тегіміз бір. Бір атаның балаларымыз.

Сондай-ақ, біздің әртүрлі ұлыстар мен ұлттарға бөлінуіміздің астарында танысу мен білісу жатыр. Келесі бір Құран аятында: «Кітап иелерімен ең көркем түрде, сыпайылықпен әдептілік сақтап пікір алысыңдар». Міне, қасиетті Құранның дәріптеп отырған насихаты осы. Пікірталас өрбіту кезінде сыпайылықтан аспау, Исламда ізгілік этикасы болып табылады. Адамзат мақтанышы ардақты пайғамбарымыз Мұхаммед (с.ғ.с.) Раббысынан алған тәрбиесімен мұсылман, християн, яһуди деместен барлық адамға құрметпен қарай білді.

Соңғы кездері сан ғасырдан бері бейбітшіл бағытты ауытқусыз насихаттап келген асыл дінімізді лаңкестік, экстремистік сияқты небір жағымсыз ұйымдармен байланыстыратын жалған пікірлер пайда болуда.

Сондай-ақ Тәуелсіздігімізге мойынұсынбайтын, мемлекеттігімізге шүбә келтіретін дәстүрлі емес діни ағымдар көбейген. Әлбетте, мұндай діни экстремизмді қоздырушылар шынайы мұсылман емес. Діни экстремистер мен деструктивті топ мүшелері, Ислам дінінде тыйым салған көптеген әрекеттерге барады. Негізінде Ислам еш уақытта адам баласын бүлікке, бұзақылыққа, тәртіпсіздікке шақырған емес. Керісінше, ол өзгенің ақысына қылдай қиянат жасамауға үйрететін үлкен тәрбиенің қайнар көзі.

Бүгінде бізге ауадай қажет құндылықтардың бірі ол – татулық пен бауырмалдық. Алла Тағала Құранда: «Алланың жібінен (дінінен) мықтап ұстаңдар, ажырап бөлінбеңдер» - деп мұсылман жұртшылығына бірлік пен ынтымақтықты бұйырады. «Тозған қазды топтанған қарға алады» - демекші, бірлік жоқ болса, бар байлығымыздан ажырап қалуымыз ықтимал. Адамзат тарихында қай жерде бірлік жоғалса, сол жерде жеңіліс болғанын көреміз. Өмірдің берекесі мен мерекесі де осы – бірлікте емес пе. Қандай жағдайда да ең әуелі ел бірлігін, жұрт тыныштығын барлық мүддеден жоғары қою қажет.

Қазіргі таңдағы Алла Тағаланың егемен елімізге берген ынтымақ-бірлігінің арқасында алған асуларымыз бен жеткен жетістіктеріміздің қадірін білгеніміз жөн. Тәуелсіздігіміз баянды, мемлекетіміздің тұғыры биік, еліміз марқайып, дініміз көркиіп, ел тыныштығы сақталып, байрағымыз көкте мәңгі желбіреп тұрсын десек, біздің бар тілек-дұғамыз татулық пен ынтымақ болуы тиіс. Алла Тағала жаны жайсаң, дархан халқымызды ынтымағынан ажыратпасын.

Олай болса, қадірлі қауым! Біздер де бір-бірімізге қамқор болып, дінаралық диалогты, достық пен сыйластықты құптай отырып, егемен еліміздің өркендеуі мен даму жолына бірлік қажет екенін дұрыс түсініп, кешірімділік пен қайырымдылық жолын ұстана білейік.

Ылайым жер бетінде тыныштық орнап, әрдайым амандық пен татулық болсын! Бәрiмiз бiрiгiп әлемге тыныштық, бейбiт аспан, ынтымақ пен бiрлiк тiлейiк. Сол үшiн дұға жасайық!

Алла Тағала Тәуелсіз еліміздің тұғырын биік, мәртебесін асқақтата берсін!

Бектұрсын Уәлиев
Арқалық қалалық «Мухтасиб Әлмұхаммед»
мешітінің бас имамы

Тәуелсіздігіміздің 25 жылдығына орай, Арқалық қалалық «Мухтасиб Әлмұхаммед» мешітінің қызметкерлері қаладағы Ы.Алтынсарин атындағы мемлекеттік педагогикалық институтында, Агроколледждің оқу корпустары мен жатақханаларында жастармен кездесу өткізді.

Бұл жүздесулерде ең әуелі жастардың ата-бабаларымыз ғасырлар бойы армандап өткен тәуелсіздіктің қадірін білу және оны баянды ету жайы әңгімеге арқау болды.

Кездесулерде Бас имам Бектұрсын Торғайбайұлы егемендігіміздің жемісі жайлы тілге тиек етіп, тәуелсіздіктің арқасында асыл дініміз қайта оралғандығын тебірене айтты.

Бас имам жастарды иманды да ибалы, білімді де парасатты болуға шақырды. Сондай-ақ елімізге, қоғамға зиян келтіретін жат ағымдардан аулақ жүру керектігін де ескертті.

Институттағы жүздесуде білім ордасының басшысы, география ғылымдарының докторы Сейітбек Бекенұлы жастар тәрбиесі қашан да маңызды екендігіне тоқталды. Оларға мемлекет тарапынан жасалып жатқан қамқорлық та ауыз толтырып айтарлықтай екендігін баяндады.

Сондай-ақ мешіттің алқа мүшесі, дін жанашыры Мейрамхан қажының студенттерге арнап, ұстаздар мен ата-анаға құрмет көрсету жайындағы ойлары да қатысушыларды тебірентті.

ҚМДБ-ның Қостанай облысындағы
өкілдігінің баспасөз қызметі