Перзенті үшін түн ұйқысын төрт бөліп, мейірім шуағы мен жан жылуын төгетін ардақты аналарға қандай ілтипат жасасақ та әбден жарасады.

Міне, солардың қадір – қасиетін жете бағалайтын Ұзынкөл аудандық «Балықты» мешітінің Бас имамы Есенгелді қажы Сақтағанұлының ұйымдастыруымен 8 наурыз - Халықаралық әйелдер күні қарсаныңда имандылық ордасында дастархан жайылды.

Осы өңірге белгілі ақ жаулықты әжелеріміз бен апаларымызды жылда бір келетін ерекше мейрамымен құттықтап, бағалы сыйлықтар табыс етілді.

Аудан әкімінің орынбасары Фархад Балашов жиналған аяулы жандарға шынайы лебізін білдіріп, дендеріне саулық, отбастарына баянды бақыт тіледі.

Бір тоқтала кетер жай, басқосуда ұршық иіріп, көпшілікті тәнті еткен қолы шебер апаларымызға сый-сияпат жасалды. Жергілікті мәдениет үйінің өнерпаздары әуелете ән шырқап, күмбірлете күй шертті.

Сонымен қатар құрметке бөленген асыл әжелеріміз жергілікті мешіттің Бас имамы мен қызметкерлеріне ақ баталарын беріп, алғыстарын жаудырды.

Қостанай облыстық мешітінің баспасөз қызметі