Арқалық қалалық «Мухтасиб Әлмұхаммед» мешітінде қыз балалардың «Имани жаз» атты сауат ашу курсы жұмысын бастады.

Қазіргі таңда имандылық ордасында 15-ке жуық оқушы білім нәрімен сусындап, уақыттарын тиімді өткізуде.

Олар курс барысында шәкірттерге Құран әліппесі және тәрбиеден дәріс алады.

Сабақтан тыс кездері балаларға жеміс-жидек, тәтті шырын беріледі. Сондай-ақ, сурет салу және қызықты ойындар ұйымдастырылады.

Қостанай облыстық мешітінің баспасөз қызметі

Білім – ақылдылық пен парасаттылықтың белгісі. Ислам – білім алуды парыз деп санайтын дін. Асыл дініміздің адамзат баласына қоятын ең басты талабы білім алу және оны іздену. Баршамызға мәлім, Қасиетті Құранның алғашқы түскен аяты да білім алуға шақырды. Ардақты Пағамбарымыз (с.ғ.с.): «Білім алу – әрбір мұсылман ер мен әйелге парыз, – десе, тағы бір хадисінде: «Тал бесіктен жер бесікке дейін білім үйрен», – деп насихат айтқан.

Ілім – қараңғылықтан жарыққа шығаратын шамшырақ. Бізден бұрын өткен мұсылман елінің ғалымдары білімнің алуан түрлі салаларын меңгерді. Қазақтың ұлы ғалымдары Мәшһүр Жүсіп, Шалкиіз, сол заманда өмір кешкен Ақтамберді жырау, Бұхар жырау, Абай, Шәкәрім, Ыбырай т.б. көркем әдебиет ғылымын шариғаттан негіз ала отырып, жандандырған. Бүгінгі тақырыбымыздың да негізгі өзегі – көрнекті педагог, ағартушы, ақын, этнограф Ыбырай Алтынсариннің елге жасаған уақып амалы жайлы болмақ.

Барлық күш-жігерін оқу-ағартуға арнаған кемеңгер ұстаздың бойында туған халқыма пайдамды тигізсем деген ұмтылыс басым болды. Ол ұрпақ тәрбиелеп, педагогикалық қызметпен шұғылдануды армандады, бұл істі өзінің өмірлік мақсаты деп білді. Ақындық шығармашылығында ең алдымен халыққа білім берудің маңызын насихаттап, жастарды білім алуға шақырды. Білімнің қажеттілігін өз заманында дәлелдеу керек болды. Ол балаларды оқуға, білімге шақырған көптеген өлеңдер жазды. Солардың ішіндегі: «Бір Аллаға сыйынып, Кел, балалар, оқылық.

Оқығанды көңілге, Ықыласпен тоқылық!» деген өлеңі жас өспірімді оқуға үміттеген жалынды ұран болып қалды. Бұл өлеңде адам өміріндегі білім мен ғылымның пайдасы туралы нақты айтылды.

Ибраһим Ыбырай Алтынсариннің қазақ даласындағы алғашқы мектепті Торғайда ашқаны тарихтан мәлім. Бірақ тұңғыш білім ошағын тұрғызу оңай болған жоқ. Мектеп ашуға рұқсат беріліп, Торғайға мұғалім болуға жіберілгенде Ыбырайдың жасы 20-да ғана еді. Ол, нағашысы Шеген бидің елінде ұстаздық ете жүріп, осы өңірде мектеп ашуға бел буып, 1861 жылы құрылыс жұмыстарын бастайды. Шеген бидің ұрпақтары, яғни нағашылары, ауыл-ауылдағы тұрғындар демеу көрсетіп, ортақ іске қаражат жинайды. Нағашыларының көмектесіп жатқанын естіген өз жұрты, яғни Балғожа бидің туыстары да "біз де қалыспайық" деп, мал жиып, Торғайға құрылысқа қажетті материалдар жіберген.

Ағартушы ұстаз Ырғыз қаласында да қазақ қыздарына арналған мектеп-интернат ашты. Оның басшылығымен қазақ балаларына арналған 7 бастауыш мектеп, 4 екі сыныптық училище жұмыс істеді. Қыз балалардың сауаттылығын арттыру жолында да тер төгіп олардың жүйелі білім алуын жолға қойды.

Алтынсарин шәкірттердің адамгершілік тәрбиесіне де баса мән берді және кедейлердің балаларын, қазақтың қыздарын оқытуға ерекше көңіл бөлді. Ол шәкірттердің бойында адамгершілік, еңбекке адалдық, Отан сүйгіштік қасиеттерді қалыптастыруға күш салды. «Олар кейіннен парақор болып шықпас үшін, олардың адамгершілік сезімдерін оятуға барлық күш-жігерімді жұмсаудамын» - деген өз еңбегінде....

Көшпелі ел ғасырлар бойы бағып өсірген малын байлығым деп санаған. Ал, негізінде ешқашан сарқылмайтын нағыз байлық ол – білім. Алтынсарин жастардың көзін осыған жеткізгісі келді, оларды сендіруге ұмтылды. Осындай жағдайды алға қоя отырып, терең түсінген қазақтан шыққан алғаш педагог Ыбырай: «Қазақ хрестоматиясында» жарық көрген өлеңінде ғылымы озық елдердің техникалық үдерісін қарапайым сөзбен түсіндіре мысалға келтірді:

«Өнер – білім бар жұрттар,
Тастан сарай салғызды.

Айшылық алыс жерлерден,
Көзіңді ашып-жұмғанша,
Жылдам хабар алғызды»,

- деп, өнер мен білім, техниканың пайдасын айтып насихаттап, бәсекелестік рухта тәрбиеледі. Осы сөздермен сол замандағы ұрпаққа қазіргі тілмен айтқанда үлкен мотивация беріп, қатарынан қалыспай, жаңа ғылымдарды зерттеп көруге шақырды.

Ағартушылықты жанының азығы еткен Ұстаздың өз ойларын 1864 жылы 16 наурызда жазылған келесі жазбаларынан байқауға болады: «Қойды қуған аш қасқыр секілді, мен қызу түрде балаларға білім беруге кірістім. Және осы балалар үш айдың ішінде, тіпті орыс және татар тілдерінде оқып-жазуды үйреніп алды. Бір сөзбен айтқанда, бұл жақсылар курс аяқталғанша, 4 жылдан кейін бір нәрсе үйреніп, лайықты сөйлей алатын болады деп үміттенемін. Сондай-ақ, кейін олар жемқор болып шықпас үшін, бар ынта-жігеріммен тіпті олардың моральдық әрекеттеріне де әсер етуге тырысамын» деп жазған.

Ресей білім орындарында алған әсері мен тәжірибесін қазақ өлкесінде іске асыру үшін бастауыш мектептердің ашылуына рұқсаттар алып онда сабақ өтудің озық үлгілерін көрсетті. Ол тек қана жазу-сызуды ғана үйретіп қоймай, математика, физика, биология, география, этнография, тіпті, қазіргі күннің өзінде тек жоғары оқу орындарында ғана оқытылатын геология саласында да қазақ ұл-қыздарына негізгі білім берді.

Басқа да өңірлерде ашылған мектептерге мұғалім дайындау ісіне де ат салысты. Ондағы оқыту мен тәрбие берудің педагогикалық талаптарға сай болуын қадағалап отырды.

«Оқысаңыз, балалар,
Шамнан шырақ жағылар,
Тілегенің алдыңнан,
Іздемей-ақ табылар»,

- деп жырлап, оқыған, көзі ашық адамның қараңғыны қаумалап жүрмей, қандай мәселеде болсын шаммен қарағандай анық көре алатындығын, критикалық ойлау қабілетінің дамитындығын түсіндіріп жеткізді. Білімді адам кемінде өзінің күн-көрісін бір жүйеге қоя алады. Бұл турасында келесі жолдардан анық байқауға болады:

«Әлпештеген ата-ана, Қартаятын күн болар.
Қартайғанда жабығып, Мал таятын күн болар.
Ата-енең қартайса - Тіреу болар бұл оқу,
Қартайғанда мал тайса, Сүйеу болар бұл оқу».

Адамның және жалпы ұлттың қадірі оның білімімен өлшенеді. Халықтың жері қаншалықты бай болса да, оны игеретін ғалымы, білімді азаматы болмаса одан не пайда?! Сондықтан: «Күш - білімде, Білім - кітапта. Қына тасқа бітеді, Білім басқа бітеді» - демекші, жастарымыз білімді болсын, сол білім жолына насихат жасайтын ғалымдарымыз көп болсын!

Бар ғұмырын қазақ ұлтының сауатын ашу, көңілін білімге ояту, қоғам өмірінде белсенді болуға шақырумен өткізген Ыбырай Алтынсарин атамыздың елге жасаған ерен еңбегін, игі істерін Алла сауаптан жазсын.

Ендігі уақытта жазба әдебиетімізді байытқан ұлт ұстазының еңбектерін келер ұрпаққа дәріптеумен кеңінен айналысуымыз қажет. Әсіресе бастауыш мектеп-медреселерде өлең-әңгімелерін талдап, әр баланың бойында жақсы қасиеттер қалыптастыруға жұмыс жасалғаны абзал.

Қостанай қалалық «Марал ишан» мешітінің имамы
Бектұрсын Торғайбайұлы

Жуырда Қостанай қалалық "Марал ишан" және "Жайлаубай ата" мешіттерінің ұжымы бірлесіп, есте қаларлықтай игі істі жүзеге асырды. Бас имам Бектұрсын Торғайбайұлы мен найб имам Ерлан қажы екеуі Рудный қаласындағы балалар үйінде болды.

Олар жазғы демалыс лагеріндегі жасөспірімдерге арнайы атбасын бұрып, Құрбан айт тәбәрігінен 4 қойдың еті, тәтті тағамдар мен 1 қап қазақтың бауырсағын табыс етті.

Осы арада айта кетер бір жай, осыдан біраз уақыт бұрын аталмыш тәрбие орнына облыстағы аудан мен қала мешіттері атынан 22 кілем сыйға тартылған еді.

"Балалар үйінің" басшылары мен барша қызметкерлері қайырымдылық көрсеткен азаматтарға шынайы алғысын білдірді. Кездесудің соңында дастарқан жайылды.

"Жетім көрсең, жебей жүр"-деген қағиданы берік ұстанған мешіт имамдарына Алла разы болсын!

Қостанай облыстық мешітінің баспасөз қызметі

Әулиекөл аудандық «Әмит ишан» мешітінде «Қайырымды жұма» қайырымдылық акция аясында 10 көмекке мұқтаж көпбалалы отбасыларына азық-түлік таратылды.

Кезінде ардақты Мұхаммед Пайғамбарымыз өзінің хадис-шарифінде мұсылман үмбетіне: «Жақсылық жасаңдар, қайырымды болыңдар»,- деген өсиет қалдырған.

Осынау ұлағатты қағиданы бойтұмардай ұстанған жүрегі жомарт бауырларымыздың қатары көбейіп, Алла тағала олардың ізгі ниеттерін қабыл етсін!

Қостанай облыстық мешітінің баспасөз қызметі

Қостанай қалалық «Жайлаубай ата» мешітінің ұжымы қайырымдылық мақсатында қыруар жұмыстар атқарып, қолдауға мұқтаж жандардың шынайы алғысына бөленіп келеді.

Жуырда Шоқан қажы Әмірханов бастаған имандылық ордасының қызметкерлері І топтағы мүмкіндігі шектеулі үш адамға қол ұшын созды.

Мәселен, екі кісіге 230 мың теңге тұратын қос мүгедектер арбасын сыйға тартты. Сондай-ақ, бір азаматқа Құрбан айтқа шалынған мал еті берілді.

«Кең болсаң, кем болмайсың!» демекші, жомарттық танытушы азаматтардың қатары көп болғай!

Қостанай облыстық мешітінің баспасөз қызметі

Биыл да қасиетті Құрбан айт мейрамы Әулиекөл аудандық «Әмит ишан» мешіті аумағында ойдағыдай атап өтілді. Соған орай бірқатар танымдық -тағылымдық жағы мол шаралар ұйымдастырылды.

Мерекеге осы аумақтағы үлкенді-кішілі қауым жиналып, көп жайға қанықты. Мәселен, тәтті тағамдар жәрмеңкесі, көздің жауын алған қолөнер бұйымдарының көрмесі, балаларға арналған ойын-сауық бағдарламалар үлкен әсер қалдырды.

Жергілікті мешіттегі кішкентай бүлдіршіндерге арналған сайыстар мен жарыстар өте көңілді өтті. Бұл мерекеде барлық қатысушыларға сыйлықтар мен ойыншықтар табыс етілді.

Сондай-ақ, осынау мұсылмандардың ерекше мерекесінің құрметіне балаларға балмұздақ, сусын, кәмпиттер үлестірілді. Ал мешіт қонақтары арнайы дайындалған ыстық палау мен бауырсақтан дәм татты.

Мерекенің тиісті деңгейде ұйымдастырылуына белсене атсалысқан жандарға Алланың нұры жаусын!

Қостанай облыстық мешітінің баспасөз қызметі

Жылдағы қалыптасқан дәстүр бойынша Қостанай облыстық мешітінің жанындағы Зекет және қайырымдылық қорының қызметкерлері Құрбан айт мерекесі барысында қарқынды жұмыс атқарды.

Үш күнде Мұхаммед Пайғамбарымыздың, ұлтымыздың біртуар тұлғасы Кенесары және тәуелсіздігіміздің жарқын болашағы үшін ғұмырын арнаған Алаштың бес арысының атынан құрбандық шалынды.

Атап айтатын болсақ жоғарыда аталған күндерде 1 түйе, 26 ірі қара, 311 қой, 1 ешкі сойылды. Нақты мәліметтерге сүйенетін болсақ, 22 тонна 380 келі ет көмекке мұқтаж жандарға таратылды. Бұл мақсатқа 62 млн. 867 400 теңге жұмсалды.

«Кең болсаң, кем болмайсың» деген қағиданы берік ұстанған демеушілер мен қайырымдылық шараларды ұйымдастырған Қазақстан мұсылмандары діни басқармасының Қостанай облысындағы өкілдігі айтарлықтай іс тындырып, халықтың шынайы алғысына бөленді.

Қостанай облыстық мешітінің баспасөз қызметі

Қостанай қалалық"Жайлаубай ата" мешітінің үйымдастырумен биылғы 5-30 маусым аралығында оқушыларға арналған "Имани жаз" атты жазғы діни сауат ашу курсы өткізілді.

Нақты деректер мен дәйектерге тоқталатын болсақ, дәріс барысында 22 ер бала мешітте жатып оқыды. Ал 40 қыз және 80 ер бала үйлерінен қатынап сауаттарын ашты.

Курс барысында 142 оқушы білім алып,сертификатқа ие болды. Ал мешітте жатып оқыған 22 талабаға барлық жағдай жасалды. Оларға күніне бес мезгіл тамақ берілді. Дүние танымдарын кеңейту мен саламатты өмір салтына баулу мақсатында мәдени және спорттық іс-шаралар ұйымдастырылды. Түлектерге сертификатпен қоса «Айттық» сыйлығы да тапсырылды.

Жоғарыда аталған "Имани жаз" курсына Астана медресесі мен Нұр-Мүбарак Египет ислам мәдениеті университетінен дәріс беру үшін бес шәкірт арнайы шақыртылды. Оларға жамағаттың көмегімен шәкірт ақы берілді.

Болашақта түлектеріміздің ішінен Қарилар мен дін саласында танымал ғалымдар шығып жатса нұр үстінен нұр емес пе.

Қостанай облыстық мешітінің баспасөз қызметі

Үстіміздегі жылы күллі мұсылмандар қауымы ерекше қадірлеп, қастерлейтін Құрбан айт мейрамы Ұзынкөл ауданыңда тиісті деңгейде аталып өтті. Үш күн бойы ағайындар бір-бірін шын жүректен құттықтап, ілтипат танытты.

Бас имам Есенкелді қажы Сақтағанұлының ұйытқы болуымен «Балықты» мешітінде айт намазы оқылды. Содан кейін аудан көлемінде құрбандыққа 3 ірі қара және 78 қой шалынды. Сойылған ет 168 көмекке мұқтад отбасыларына таратылды. Мешіт қызметкерлері Сатай және Преснягорьков ауылдарында болып, балаларға 10 дана «Құрбан айт тәттісі» мен 20 дана «Құрбан айт қоржынын» тапсырды.

Сонымен қатар имандылық жолында жүрген азаматтар аудандық ауруханаға арнайы барып, емделіп жатқан адамдардың хал-жағдайларын білді. Оларды мейраммен құттықтап, дайындалған тағамнан дәм таттырды.

Бұл мерекеде ұлттық спорт пен салт-дәстүрді жаңғыртуға да айрықша көңіл бөлінді. Мәселен, жастар арасында қазақша күрес, арқан тарту және гір тасын көтеруден жарыстар тартысты өтті. Сондай-ақ, келіндер сайысы да ұйымдастырылды. Жеңімпаздарға сыйлықтар табыс етілді.

Мерекенің құрметіне асханада 150 адамға дастархан жайылды.

Қостанай облыстық мешітінің баспасөз қызметі

Қасиетті Құрбан айт мерекесі Арқалық қалалық «Мухтасиб Әлмұхаммед» мешітінде жылдағыдай жоғары ұйымшылдықпен әрі тиісті деңгейде атап өтілді.

Аталмыш имандылық ордасының алаңына арнайы киіз үй тігіліп, келген барша қауымға жайылған ақ дастарханнан дәм ұсынылды. Алғашқы күнгі айт намазы оқылып болғаннан кейін шаһар әкімі Әмірхан Біркенұлының ұйытқы болуымен «Торғай ЕТ» жауапкершілігі шектеулі серіктестігінің ет комбинатында құрбандық шалынды.

Қала әкімдігі, жергілікті мешіт, Абай Құспанұлы басқаратын «Алюминстрой» жауапкершілігі шектеулі серіктестігі және өзге де іскер әрі жанашыр азаматтардың ізгі ниетімен 2 ірі қара және өзге де ұсақ малдар сойылды.

Сондай-ақ, ұлттық ойындарымызды жандандыру мақсатында қол күресі, өгіз және арқан тартыс, дартс, гір көтеру сынды спорт түрлерінен сайыс өткізілді. Жарыс жеңімпаздары мен жүлдегерлеріне қой және ақшалай сыйлықтар, грамоталар мен медальдар салтанатты түрде табыс етілді.

Төменде осы тағылымы мол мейрамды өз көздерімен көріп, куә болған қала тұрғындарының жылы лебіздерін беріп отырмыз.

Көшер Сарин:

-Мереке шын мәнінде өте әсерлі өтті. Өзімен бірге немеремді де ала келдім. Көп жайға қанықтық. Ұйымдастырушыларға айтар алғысым шексіз.

Марғұлан Сабыржанов:

- Құрбан айт мейрамы әрбір шаңыраққа ырыс-береке, молшылық алып келсін. Бүгінгі көрсетілген бағдарламалар жұртшылықтың көңілінен шықты. Спорттық жарыстарды тамашалап, біраз серпіліп қалдық.

Қостанай облыстық мешітінің баспасөз қызметі